ສະມາຊິກແກ້ງ Call Center ອີກ 700 ປາຍຄົນຖືກກວາດລ້າງ

ທີ່ຜ່ານມາ ໜວ່ຍຮັັກສາຄວາມປອດໄພ ຝ່າຍລາວ ແລະ ຈີນ ໄດ້ກວດລ້າງກຸ່ມແກ້ງ ສໍ້ໂກງ ທາງໂທລະຄົມ (Call Center), ຊຶ່ງມີແຜນການຈະໃຫ້ສໍາເລັດ ຢ່າງຈິງຈັງ ແລະປິດກຸ່ມ Call Center ນີ້ ໃນເສັ້ນຕາຍ ຂອງວັນທີ 25 ເດືອນ ສິງຫາ 2024 ນີ້.

ຫລ້າສຸດ ໃນ  ວັນທີ 12 ສິງຫາ 2024 ທີ່ຜ່ານມາ ໜ່ວຍຮັກສາຄວາມປອດໄພຝ່າຍລາວ ແລະ ຈີນ ລວມທັງໝົດ 205 ຄົນ ສືບຕໍ່ມ້າງກຸ່ມແກ້ງສໍ້ໂກງ ທາງໂທລະຄົມ (Call Center) ຢູ່ໃນ ເຂດເສດຖະກິດພິເສດ ສາມຫລ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ໄດ້ຕື່ມອີກ 771 ຄົນ ຍິງ 282 ຄົນ ລວມມີ 15 ສັນຊາດ ໃນນັ້ນ ເປັນຜູ້ຖືກຫາ ສັນຊາດຈີນ 106 ຄົນ ຍິງ 5 ຄົນ ແບ່ງເປັນ ຫົວໜ້າອໍານວຍການບໍລິສັດ ກັບຫົວໜ້າບໍລິສັດ (ຫົວໂປໂຕການ) 18 ບໍລິສັດ ສ່ວນທີ່ເຫລືອເປັນລູກນ້ອງ ເຮັດວຽກສໍ້ໂກງທາງໂທລະຄົມ.ຕາມຄວາມເວົ້າຂອງ ເຈົ້າໜ້າທີ່ແຂວງບໍ່ແກ້ວ ຜູ້ທີ 1 ຍານາງກ່າວຕໍ່ ວິທຍຸ ເອເຊັຍເສຣີ ໃນວັນທີ 21 ສິງຫາ ນີ້ວ່າ:

“ທາງຕ່າງປະເທດລະແມ່ນ ມາເປັນລູກມື ຂອງເຂົາເຈົ້າຊື່ໆ ຜູ້ທີ່ເຮົາສົ່ງຈັບໃຫ້ຈີນ ແມ່ນເປັນອັນນັ້ນ ເປັນຫົວໜ້າອໍານວຍການບໍລິສັດ ກັບຫົວໜ້າບໍຣິສັດ ໃນ 100 ກ່ວາຄົນ ກໍບໍ່ແມ່ນໝົດ ມັນມີພຽງແຕ່ 18 ບໍລິສັດເດ້ ຫົວໜ້າມັນນ່າ ເປັນຫົວໂປໂຕການ ສ່ວນພວກຈີນອື່ນໆ ກໍແມ່ນ ຮ່ວມເປັນລູກມືເຂົາຄືກັນ ກິນເງິນເດືອນ.” 

ຜູ້ຖືກຫາ ທີ່ເຫລືອອີກ 665 ຄົນ ແບ່ງເປັນ ສັນຊາດລາວ ຫລາຍກວ່າໝູ່ ຄື 275 ຄົນ ຍິງ143 ຄົນ, ມຽນມາ 231 ຄົນ ຍິງ 93 ຄົນ, ຟີລີປປິນ 73 ຄົນ ຍິງ 23 ຄົນ, ອິນເດັຍ 29 ຄົນ ຍິງ2 ຄົນ, ອິນໂດນີເຊັຍ 20 ຄົນ ຍິງ 6 ຄົນ, ໂມຊໍາບີ 6 ຄົນ, ເອທິໂອເປັຍ 11 ຄົນ ຍິງ 2 ຄົນ, ອູການດາ 6 ຄົນ ຍິງ 5 ຄົນ, ຫຫວຽດນາມ 5 ຄົນ ຍິງ 1 ຄົນ, ຕູນີເຊັຍ 4 ຄົນ, ອາວານດາ 2 ຄົນ, ໂຄລໍາເບັຍ ເພດຍິງ 1 ຄົນ, ຈໍເຈັຍ ເພດຍິງ 1 ຄົນ ແລະ ບູຣັຮດີ 1 ຄົນ. ແລະວ່າ ຜູ້ຖືກຫາ ຈໍານວນນີ້ ສ່ວນຫລາຍ ຕົກເປັນຜູ້ຖືກເຄາະຮ້າຍ ຈາກການຄ້າມະນຸດ ຍ້ອນ ຖືກຕົວະມາອອກແຮງງານ ເຮັດວຽກຕອບແຊດ ໃຫ້ບໍລິການຈີນ ສໍ້ໂກງທາງໂທລະຄົມ. ດັ່ງ ເຈົ້າໜ້າທີ່ ກະຊວງປ້ອງກັນຄວາມສະງົບ ແຫ່ງຊາດລາວ ຍານາງກ່າວວ່າ:

“ສ່ວນຫລາຍ ແມ່ນ ເປັນຜູ້ທີ່ວ່າ ເຂົາເຈົ້າຈ້າງມາເນາະ ເຮັດຕອບແຊດບໍ່ ຫລືວ່າ ມາເປັນເຄືອຂ່າຍ ໃນການຄ້າມະນຸດ ຊີ້ນ່າ ຕົວະມາອອກແຮງງານ ສຸດທ້າຍ ເຂົາບັງຄັບຂູດໃຊ້ແຮງງານແບບຜິດກົດໝາຍຫັ້ນນ່າ.” 

ສໍາລັບ ຜູ້ຖືກຫາ ສັນຊາດຈີນທັງໝົດ ໄດ້ນໍາສົ່ງໃຫ້ເຈົ້າໜ້າທີ່ຈີນ ໃນວັນທີ 15 ສິງຫາ 2024 ຢູ່ດ່ານສາກົລບໍ່ເຕັນ-ບໍ່ຫານ ແຂວງຫລວງນ້ໍາທາແລ້ວ, ສ່ວນຜູ້ຖືກຫາ ສັນຊາດລາວ ແມ່ນ ໄດ້ເຮັດບົດບັນທຶກ ສືກສາອົບຮົມກ່າວເຕືອນ ແລ້ວມອບໃຫ້ຍາດພີ່ນ້ອງມາເຊັນຮັບປະກັນ ພ້ອມນໍາພາກັບຄືນທ້ອງຖິ່ນ, ແລະຜູ້ຖືກຫາສັນຊາດອື່ນ ຍັງຢູ່ໃນການຄອບຄຸມຂອງເຈົ້າໜ້າທີ່ ເຂດເສດຖະດພິເສດສາມຫລ່ຽມຄໍາ ເພື່ອລໍຖ້າສະຖານທູດແຕ່ລະປະເທດ ທີ່ປະຈໍາການຢູ່ ນະຄອນຫລວງວຽງຈັນ ມາຮັບໂຕໄປດໍາເນີນການຕາມລະບຽບກົດໝາຍ. ດັ່ງ ເຈົ້າໜ້າທີ່ ແຂວງບໍ່ແກ້ວ ຜູ້ທີ່ 1 ຜູ້ດຽວກັບຂ້າງເທິງ ຍານາງກ່າວວ່າ: 

“ຜູ້ຖືກຫາ ທາງສະຖານທູດ ຕ້ອງມາຮັບເອົາ ແຈ້ງໄປແລ້ວ ຟີລິບປິນ ນີ້ ຊິມາເອົາມື້ຮືນີ້ເນາະ ອິນເດັຍ ມາເອົາມື້ອື່ນນີ້ ອິນເດັຍນີ້ ຈີນສົ່ງ ມອບດ່ານບໍ່ເຕັນຮຽບຮ້ອຍແລ້ວ ແຕ່ມື້ກ່ອນພຸ້ນແລ້ວ.” 

ດ້ານສະຖານທູດອິນເດັຍ ປະຈໍາລາວ ລະບຸຕໍ່ ວິທຍຸ ເອເຊັຍເສຣີ ເຈົ້າໜ້າທີ່ສະຖານທູດອິນເດັຍ ກໍາລັງໄປເອົາພົນລະເມືອງອິນເດັຍ ລົງມານະຄອນຫລວງວຽງຈັນ ເພື່ອກຽມສົ່ງ ພວກເຂົາເຈົ້າກັບປະເທດ ຢ່າງປອດໄພ. 

ປະຕິການມ້າງແກ້ງ ສໍ້ໂກງທາງໂທລະຄົມເທື່ອນີ້ ຕໍາຫລວດລາວ-ຈີນ ຍັງໄດ້ເຄື່ອງຂອງກາງ ຄອມພີວເຕີ ຕັ້ງໂຕະ 709 ຊຸດ, ຄອມພີວເຕີໂນ້ດບຸ້ກ 28 ໜ່ວຍ, ໂທລະສັບມືຖື 1,896 ໜ່ວຍ, ໄອແພ້ດ 2 ໜ່ວຍ ແລະ USB 10 ອັນ ເຊິ່ງເຄື່ອງຂອງກາງທັງໜົດ ແມ່ນສົ່ງມອບໃຫ້ ເຈົ້າໜ້າທີ່ຈີນ ໄປດໍາເນີນການຕ່າງໆ ໃຫ້ຖືກກົດລະບຽບ. ດັ່ງ ເຈົ້າໜ້າທີ່ ແຂວງຫລວງນ້ໍາທາ ກ່າວວ່າ: 

“ໂຕນີ້ (ເຄື່ອງຂອງກາງ) ຄົນຈີນ ເອົາສົ່ງຄົນຈີນໝົດເດີ້ ມັນເປັນວຽກຂອງ ກໍາລັງພາຍໃນ ຂອງປ້ອງກັນປະເທດ ຂອງ ສປປ ລາວ ຮ່ວມກັບ ສປ ຈີນ ໂຕນີ້ ອິງໃສ່ທິດຊີ້ນໍາຂອງກະຊວງ ຕໍ່ໄປ ແນ່ນອນ ຈະປະຕິບັດຕາມ ໃຫ້ມີຄວາມສະງົບ.” 

ດ້ານປະຊາຊົນ ຈາກແຂວງບໍ່ແກ້ວ ທີ່ຕິດຕາມຂ່າວນີ້ ຢ່າງໃກ້ຊິດ ກ່າວວ່າ ເຖິງແມ່ນວ່າ ຕໍາຫລວດລາວ-ຈີນ ຈັບຜູ້ຖືກຫາ ສັນຊາດຈີນ ຜູ້ເຊິ່ງເປັນຫົວໂປໂຕການໄດ້ແລ້ວ ມັນກໍຍັງມີອີກ ທີ່ຕໍາຫລວດ ຍັງມ້າງບໍ່ໄດ້ ຈຶ່ງຕ້ອງໄດ້ຕິດຕາມ ການກວດລ້າງກຸ່ມແກ້ງຄໍເຊັນເຕີຕໍ່ໄປ. ດັ່ງ ທ່ານກ່າວວ່າ: 

“ຕາມທີ່ເສພຂ່າວເບິ່ງກໍ້ ມັນກໍຫລາຍແກ້ງ ຈັບຜູ້ນີ້ໄດ້ ກໍຍັງມີຜູ້ນີ້ ມັນກໍແບບນັ້ນແຫລະ ເພາະວ່າ ມັນມີຫລາຍບໍລິສັດມາຢູ່ຫັ້ນນ່າ ແຕ່ວ່າຜູ້ທີ່ເປີດ ໃຫ້ເຂົ້າມາກໍ້ ກໍນ່າເປັນຫົວໜ້າກຸ່ມ ທີ່ມາສໍາປະທານທີ່ດິນຫັ້ນແຫລະ ເພາະວ່າ ເພິ່ນມາເຮັດ ມາກໍ່ສ້າງເນາະ ແລ້ວກໍເພິ່ນເປີດໃຫ້ເຂົາມາ ອັນນີ້ກໍນ່າຈະແບບ ກໍຄືທີ່ຮູ້ເນາະ ພື້ນທີ່ຫັ້ນ ເປັນເສດຖະກິດ ເປັນພື້ນທີ່ສີເທົາເນາະ.”

ກ່ອນໜ້ານີ້ ການລົບລ້າງກຸ່ມແກ້ງສໍ້ໂກງ ທາງໂທລະຄົມຂ້າມຊາດ ຢູ່ເຂດເສດຖະກິດພິເສດສາມຫລ່ຽມຄໍາ ໃນວັນທີ 9 ສິງຫາ 2024 ລະບຸວ່າ ພາກສ່ວນທີ່ກ່ຽວຂ້ອງ ໄດ້ກັກຕົວ ຜູ້ຖືກຫາ ທີ່ຢູ່ໃນກຸ່ມແກ້ງເຄືອຂ່າຍສໍ້ໂກງທາງໂທລະຄົມ ໄດ້ທັງໝົດ 1,389 ຄົນ ມີຍິງ 83 ຄົນ ໃນນັ້ນ ສັນຊາດຈີນ 1,211 ຄົນ ຍິງ 53 ຄົນ , ສັນຊາດຫຫວຽດນາມ 145 ຄົນ ຍິງ 25 ຄົນ, ສັນຊາດມະເລເຊັຍ 16 ຄົນ ຍິງ 2 ຄົນ, ສັນຊາດ ເອທິໂອເປັຍ 13 ຄົນ, ສັນຊາດພະມ້າ 4 ຄົນ ຍິງ 3 ຄົນ.