ປກສ ສວັນນະເຂດ ບຸກຮ້ານ ຄາຣາໂອເກະ

ໄຊຍາ
2021-05-25
Share
ປກສ ສວັນນະເຂດ ບຸກຮ້ານ ຄາຣາໂອເກະ ກຸ່ມມົ້ວສຸມຢາເສພຕິດ ທີ່ ປກສ ສວັນນະເຂດ ບຸກເຂົ້າຈັບກຸມ ຢູ່ຮ້ານຄາຣາໂອເກະຂອງຄົນຈີນ ຢູ່ບ້ານນາເລົ່າ ນະຄອນໄກສອນ ພົມວິຫານ.
ນັກຂ່າວພົລເມືອງ

ເຈົ້າໜ້າທີ່ຕຳຣວດ ປກສ ແຂວງສວັນນະເຂດໄດ້ບຸກເຂົ້າຈັບກຸ່ມມົ້ວສຸມຢາເສບຕິດທີ່ ຮ້ານຄາຣາໂອເກະຄົນຈີນເປັນເຈົ້າຂອງຕັ້ງຢູ່ບ້ານ ນາເລົ່າ ນະຄອນໄກສອນ ພົມວິຫານ ແຂວງສວັນນະເຂດ. ໃນນີ້ມີທັງຄົນຈີນ ແລະຄົນລາວ ທີ່ຖືກຈັບພ້ອມຂອງກາງຢາເສບຕິດ ແລະ ອຸປກອນເສບຢາເສບຕິດ.

ສ່ວນເຈົ້າຂອງທີ່ເປັນຄົນຈີນ ກໍຖືກດຳເນີນຄະດີເຊັ່ນກັນ. ດັ່ງເຈົ້າໜ້າທີ່ຕຳຣວດ ປກສ ແຂວງສວັນນະເຂດ ໄດ້ກ່າວຢັ້ງຢືນຕໍ່ເອເຊັຽ ເສຣີ ເມື່ອສັປດາຜ່ານມາວ່າ. ຕຳຣວດໄດ້ຈັບກຸມ ກຸ່ມດັ່ງກ່າວແລ້ວ ກໍຄືກັບຂ່າວທີ່ໄດ້ອອກມາ.

"ມີຄົນຈີນ ຄົນລາວ ຕາມນັ້ນເລີຍຕາມທີ່ລິ້ງຂ່າວ ເພິ່ນລົງຫັ້ນແຫຼະ ຕາມຂ່າວຫັ້ນແຫຼະ."

ຜົລຂອງການຈັບກຸມໃນເທື່ອນີ້ ທ່ານ ພັນຕຣີ ທະນູສອນ ຈິນດາວົງ ຫົວໜ້າຜແນກສະກັດກັ້ນ ແລະ ຕ້ານຢາເສບຕິດ ປກສ ແຂວງ ສວັນນະເຂດໄດ້ແຈ້ງຕໍ່ສື່ໃນແຂວງວ່າ. ກຸ່ມນີ້ໄດ້ຣະເມີດຄຳສັ່ງເລກທີ 15/ນຍ ລົງວັນທີ 21 ເມສາ 2021 ແລະ ຄຳສັ່ງຂອງເຈົ້າ ແຂວງສວັນນະເຂດ ເລກທີ 0775 ວ່າດ້ວຍການເພີ່ມທະວີ ມາຕການສະກັດກັ້ນ, ຄວບຄຸມ ແລະ ກຽມພ້ອມຕ້ານເຊື້ອໂຄວິດ-19.

ທ່ານໄດ້ຣະບຸຕື່ມວ່າ ເຫດການຈັບກຸມເກີດຂຶ້ນໃນເວລາປະມານ 01:00 ໂມງຂອງວັນທີ 17 ພຶສພາ ໃນຂນະທີ່ ກຸ່ມດັ່ງກ່າວກຳລັງ ດື່ມສິ່ງມຶນເມົາ ແລະ ເສບຢາເສບຕິດ ໃນສະຖານທີ່ ຄາຣາໂອເກະ. ໂດຍຕຳຣວດເຂົ້າໄປຈັບເ ຊິ່ງພວກກ່ຽວຂ້ອງ ກຳລັງເສພ ຢາເສບຕິດ ໃນສະຖານທີ່ດັ່ງກ່າວ.

ດັ່ງນັ້ນຕຳຣວດຈຶ່ງໄດ້ກັກໂຕພວກກ່ຽວ ໄວ້ດຳເນີນຄະດີ ເຊິ່ງປະກອບມີຄົນຈີນ 04 ຄົນ ເຊັ່ນ ທ້າວ ເຈິນຮູປິງ ອາຍຸ 30 ປີ ເຈົ້າຂອງຮ້ານຄາຣາໂອເກະ, ທ້າວ ອາເຊົາອາຍຸ 30 ປີ, ທ້າວ ວີວຫົງ ອາຍຸ 44 ປີ, ທ້າວ ລີຈຽງອາຍຸ 27 ປີ. ນອກຈາກນີ້ ຍັງມີຄົນລາວ ທ້າວ ບຸນມີ ວົງສະຫວັນ ອາຍຸ 23 ປີ , ນາງ ຈິມມີ້ ສໍອາຄົມ ອາຍຸ 24 ປີ, ນາງ ເຈນນະຄອນ ບຸບຜາວັນ ອາຍຸ 24 ປີ, ນາງ ອິນທານົນ ພູມສີສະຫວັດອາຍຸ 19 ປີ, ນາງ ດາຈັນບົວກອງອາຍຸ 21 ປິ, ນາງ ເພັດອຳພອນ ຖີ່ນພາສຸກ ອາຍຸ 17 ປີ. ນາງ ນ້ອຍ ດອນດາລາ ອາຍຸ 23 ປີ.

ສ່ວນຂອງກາງ ທີ່ຢຶດມາໄດ້ກໍມີ ຢາເສບຕິດປະເພດ ຢາອີ, ຢາເຄ( ຜົງຂາວ ) ພ້ອມອຸປກອນ ໃນການເສພຈຳນວນນຶ່ງ. ຣົດເກັງ ຄັນນຶ່ງ ຢີ່ຫໍ້ ຈາກົວ. ນອກຈາກນີ້ຍັງມີເງິນເປັນຈຳນວນ ຫຼາຍທີ່ຕຳຣວດຍຶດໄວ້. ຕໍ່ກັບຄະດີດັ່ງກ່າວ ແມ່ນຍັງຢູ່ໃນຂັ້ນຕອນ ການສືບສວນ-ສອບສວນ ຂອງເຈົ້າໜ້າທີ່ ເພື່ອເກັບກໍາຂໍ້ມູນ ຫລັກຖານເພີ່ມເພື່ອນຳໂຕ ຜູ້ຮ່ວມຂະບວນການ ມາດຳເນີນຄະດີ ຕາມກົດໝາຍ.

ຕໍ່ກັບຄະດີດັ່ງກ່າວ ປະຊາຊົນໃນແຂວງສວັນນະເຂດ ໄດ້ກ່າວວ່າເຫັນດີນໍາ ທີ່ເຈົ້າໜ້າທີຕຳຣວດລາວ ທີ່ມີການຈັບກຸມໃນຄັ້ງນີ້. ຍ້ອນວ່າ ກຸ່ມດັ່ງກ່າວຣະເມີດຄຳສັ່ງຂອງເລກທີ 15/ນຍ ໂດຍຈັບກຸ່ມກັນຊຸມແຊວ ໃນຮ້ານບັນເທີງ ທີ່ມີການສັ່ງປິດ ໃນໄລຍະ ການຣະບາດ.

"ເຫັນດີ ເຫັນດີ ເພິ່ນຫ້າມຢູ່ແລ້ວ ແຕ່ເຈົ້າທ້າທາຍກົດໝາຍບ້ານເມືອງຫັ້ນນ່າ ເຈົ້າຢາກກິນຄົນດຽວກິນແລ້ວ ແລ້ວກໍແລ້ວຄືເຮົາ ກໍຕ້ອງເບິ່ງປະຕິບັດຕາມມາຕການຄັນວ່າເຮົາບໍ່ເຮັດ ມັນຊິມີບັນຫາໃນອະນາຄົດ."

ປັຈຈຸບັນການຣະບາດເຊື້ອ ໂຄວິດ-19 ໃນແຂວງສວັນນະເຂດ ຍັງມີການຣະບາດເພີ່ມຂຶ້ນ ໂດຍຜູ້ຕິດເຊື້ອສະສົມມາເຖິງວັນທີ 25 ພຶສພາ 97 ຄົນ ບໍ່ມີຜູ້ເສັຍຊີວິດ. ການຣະບາດ ໃນຮອບສອງແຂວງສວັນນະເຂດ ຕົ້ນເຫດກໍແມ່ນມາຈາກ ກໍຣະນີທີ່ 59 ເຊິ່ງ ເລີ່ມຣະບາດ ມາແຕ່ເດືອນເມສາ ເປັນຕົ້ນມາ.

Anonymous says:
May 26, 2021 04:55 PM

ເຫັນຂ່າວຕໍ່າລວດໄທບຸກຈັບກຸ່ມມາເຟັຽຈີນຢູ່ໄທເຖີງຂັ້ນຍິງເຈົ້າໜ້າທີ່ໄທບາດເຈັບ2ຄົນ,ຕໍ່ມາຍັງມາເຫັນການຈັບກຸມຢູ່ລາວອີກ,ນີ້ສແດງໄຫ້ຮູ້ວ່າ(ຈ)ຈີນນີ້ກ້າວລ້າວແລະລະເໝີດຕໍ່ກົດໝາຍຂອງປະເທດທີ່ຈີນໄປລົງທືນນໍາອີກຕົວຢ່າງລາວ,ໄທແລະຂເໝນເປັນຕົ້ນ,ການທີ່ມີສອງຂ່າວນີ້ອອກມາມັນເປັນພຽງ1/100ເທົ່ານັ້ນທີ່ຈິງແລ້ວມີຫຼາຍກ່າວນີ້ແລະຮ້າຍແຮງກ່າວນີ້ອີກໂດຍທຸກຄົນບໍ່ໄດ້ຮູ້ເພາະດ້ວຍເຫດໃດນື່ງຈີນອາດຈະມີສ່ວນກ່ວຽຂ້ອງແລະຄວບຄຸມຂ່າວສານຂອງປະເທດນັ້ນໆເປັນສ່ວນໄຫ່ຍເພາະເຂົາໄຊ້ເງີນສະໜັບສະໜຸນລະບົບຂ່າວສານທີ່ເປັນກະບອກເສືອງໄຫ້ເຂົາ,ຕົວຢ່າງງ່າຍຖ້າທຸກຄົນເບີ່ງຂ່າວຂອງຕ່າງປະເທດກໍເຂົ້າໃຈໄດ້ງ່າຍໆໃນການສະເໜີຂ່າວທີ່ມັກຈະໂຈມຕີຕໍ່ຟ່າຍຕົງຂ້າມກັບຈີນເປັນສ່ວນໄຫ່ຍເຫັນໄດ້ຢ່າງຈະແຈ້ງ,ໄຫ້ຕົວຢ່າງງ່າຍໆ,ພຽງແຕ່ຂັ້ນທູດຂອງຈີນກໍຍັງໄດ້ເອີ້ນວ່າພະນະທ່ານທູດ,ບາດປະເທດທີ່ຕົງກັນຂ້າມກັບຈີນນັ້ນຂັ້ນປະທານາທິບໍດີກໍຍັງຮ້ອງຊື່ຢ່າງເຈາະຈົງວ່ານາຍນັ້ນນາຍນີ້,ຖ້າມະນຸດເຮົາທີ່ມີການພິຈາລະສຶກສາຄົ້ນຄົ້ວຢ່າງຮອບຄອບຂອງແຕ່ລະປະເທດທີ່ຕົງໄປຕົງມາກໍຈະເຂົ້າໃຈໄດ້ເລີຍວ່າຄວາມແຕກຕ່າງລະວ່າງໃຜຄືຄອມມີວນິສໃຜຄືເສລີປະຊາທິປະໄຕຢູ່ໃນບົນໂລກໜ່ວຍນີ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ