ຄົນງານ ມາເລເຊັຽ ຫຼາຍຄົນ ຍັງຕົກຄ້າງ ຢູ່ໃນສາມຫຼ່ຽມຄຳ

ກະຊວງ ການຕ່າງປະເທດ ຂອງມາເລເຊັຽ ອອກຖແລງການເມື່ອວັນທີ 6 ຕຸລານີ້ວ່າ ໄດ້ດໍາເນີນການ ຜ່ານສະຖານທູຕ ມາເລເຊັຽ ປະຈໍາ ປະເທດລາວ ໃນການຊ່ອຍເຫລືອ ຄົນງານມາເລເຊັຽ ທີ່ຖືກຕົວະໄປເຮັດວຽກ ເປັນ ສແກັມເມີ ແລະມີຄວາມສ່ຽງ ຕໍ່ການທີ່ຈະຕົກເປັນເຫຍື່ອ ຂອງການຄ້າມະນຸສ ຢູ່ເຂດເສຖກິຈພິເສດ ສາມຫລ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ໄດ້ 7 ຄົນ, ແຕ່ກໍຍັງມີຄົນງານ ມາເລເຊັຽອີກຫລາຍຄົນ ທີ່ຖືກກັກຕົວຢູ່ພາຍໃນເຂດດັ່ງກ່າວ ແລະຍັງລໍຖ້າການຊ່ອຍເຫລືອຢູ່.

ດັ່ງຄົນງານລາວ ທີ່ຂາຍເຄື່ອງຍ່ອຍ ຢູ່ໃນເຂດເສຖກິຈ ພິເສດດັ່ງກ່າວ ຜູ້ນຶ່ງເວົ້າຕໍ່ວິທຍຸ ເອເຊັຽເສຣີ ໃນມື້ວັນທີ 10 ຕຸລານີ້ວ່າ:

“ມີຄົນລາວຄົນຕ່າງປະເທດ ຄົນມາເລເຊັຽ, ມີໆ ແຕ່ວ່າສ່ວນໃຫຍ່ ແມ່ນເປັນຄົນຈີນ ກັບຄົນລາວ, ຄົນພະມ້າ, ມາເລເຊັຽ ຄົນລາວ ອ່ານ່າສິມີ, ແຕ່ວ່າຂ້ອຍບໍ່ຮູ້ວ່າ ຂະເຈົ້າຢູ່ໃສເຮັດຫຍັງ ຂ້ອຍຮູ້ແຕ່ວ່າສ່ວນຫລາຍ ເປັນຄົນຈີນກັບຄົນລາວນີ້ແຫລະ ຄົນພະມ້າ ແລະກະຄົນຕ່າງປະເທດນີ້ ແມ່ນສ່ວນຫລາຍຂະເຈົ້າ ບໍ່ໃຫ້ອອກມາຈາກຕຶກຫັ້ນນ່າ ເຂົ້າໄປແລ້ວບໍ່ຄ່ອຍສິຮູ້ຫັ້ນນ່າ.”

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຫາ ເຈົ້າໜ້າທີ່ຂແນງແຮງງານ ຄະນະຄຸ້ມຄອງ ເຂດເສຖກິຈ ພິເສດສາມຫລ່ຽມຄໍາ ແຂວງບໍ່ແກ້ວ ເພື່ອຂໍຮູ້ກ່ຽວກັບແນວທາງ ການຊ່ອຍເຫລືອ ຄົນງານຕ່າງປະເທດ ທີ່ຖືກຕົວະໄປເຮັດວຽກ ຢູ່ໃນເຂດດັ່ງກ່າວເພີ່ມຕື່ມອີກ, ແຕ່ບໍ່ສາມາດຕິດຕໍ່ໄດ້.

ໃນໄລຍະ 1-2 ປີທີ່ຜ່ານມາ ມີຄົນງານ ທັງລາວ ແລະຕ່າງປະເທດ ຈໍານວນຫລາຍ ຖືກຕົວະມາເຮັດວຽກ ເປັນ ສະແກັມເມີຣ໌ (Scammer) ຢູ່ເຂດເສຖກິຈ ພິເສດສາມຫລ່ຽມຄໍາ ຂອງຈີນ ຊຶ່ງທາງຫ້ອງການ ສົ່ງເສີມ ແລະຄຸ້ມຄອງເຂດເສຖກິຈ ພິເສດ ຄະນະຄຸ້ມຄອງເຂດເສຖກິຈ ພິເສດສາມຫລ່ຽມຄໍາ ກະຊວງແຜນການ ແລະການລົງທຶນ ໄດ້ອອກແຈ້ງການ ບໍ່ໃຫ້ຄົນງານລາວ ເຂົ້າໄປເຮັດວຽກຕອບແຊັດ ຢູ່ໃນເຂດດັ່ງກ່າວ ເມື່ອທ້າຍເດືອນກໍຣະກະດາທີ່ຜ່ານມາ, ແຕ່ມາຮອດປັດຈຸບັນ ກໍຍັງມີຄົນງານຕ່າງປະເທດ ຖືກຕົວະເຂົ້າໄປເຮັດວຽກນັ້ນ ຢູ່ໃນເຂດດັ່ງກ່າວຫລາຍຢູ່.

ດັ່ງຄົນງານລາວ ຜູ້ນຶ່ງ ທີ່ເຮັດວຽກຢູ່ທີ່ນັ້ນ ເວົ້າໃນມື້ດຽວກັນນີ້ວ່າ:

“ພາສາອັງກິດນີ້ ກໍເງິນເດືອນກໍໄດ້ຫລາຍກວ່າ, ອັງກິດ, ມີລາວ ແລ້ວກໍມີວຽດນາມ, ອິນໂດເນເຊັຽ, ມາເລເຊັຽ, ອິນໂດ. ພາສາອັງກິດມັນຈະໄດ້ 6,000 ຢັວນ ຜູ້ຊາຍນີ້ບໍ່ຄ່ອຍເອົາ ບໍ່ຄ່ອຍຮັບ, ຄັນຮັບນີ້ ຮັບຜູ້ຍິງ ບາງທີກໍມັນມາແບບເຮັດວຽກໂຕຈິງ ກໍມີ ບາງຄົນກໍມາແບບ ສາຍລັບກໍມີຫັ້ນນ່າ.”

ພ້ອມດຽວກັນນີ້ ຄົນງານລາວອີກຜູ້ນຶ່ງ ທີ່ເຮັດວຽກ ຢູ່ໃນເຂດເສຖກິຈ ພິເສດສາມຫລ່ຽມຄໍາ ກໍເວົ້າວ່າ ມາຮອດປັດຈຸບັນ ການເຮັດວຽກເປັນ ສະແກັມເມີຣ໌ ຢູ່ທີ່ນີ້ ບໍ່ແມ່ນແຕ່ຕົວະໃຫ້ຄົນລາວ ຢູ່ພາຍໃນປະເທດ ໂອນເງິນຜ່ານລະບົບອອນລາຍນ໌ ເທົ່ານັ້ນ ແຕ່ຍັງຕົວະຄົນຕ່າງປະເທດ ໃຫ້ໂອນເງິນເຂົ້າມານໍາດ້ວຍ, ອັນເຮັດໃຫ້ກຸ່ມນັກຕົ້ມຕຸ໋ນ ຕ້ອງ ການຄົນງານ ທີ່ໄດ້ພາສາອັງກິດ. ດັ່ງນັ້ນພວກເຂົາ ຈຶ່ງນໍາຄົນງານຕ່າງປະເທດ ເຂົ້າມາເຮັດວຽກຕອບແຊັດ ເປັນຕົ້ນ ຄົນງານຈາກມາເລເຊັຽ, ອິນໂດເນເຊັຽ ແລະຟີລິບປິນ ຫລືຄົນງານ ປະເທດໃດກໍຢ່າ ທີ່ສາມາດໃຊ້ພາສາອັງກິດໄດ້ດີ.

ດັ່ງທີ່ທ່ານກ່າວວ່າ:

“ພາສາອັງກິດ ມັນຈະໄດ້ກ່ອນພາສາອື່ນ ເພາະວ່າເຮົາໃຊ້ເປັນເງິນໂດລ້າຣ໌ ລູກຄ້າມາເຕີມເປັນເງິນ USD ເດ໋ ແລ້ວແຕ່ຄວາມສາມາດ ຂອງເຮົານ່າ ເພາະວ່າ ວຽກຕອບແຊັດນີ້ ມັນເປັນເຣື່ອງກ່ຽວກັບ ຕລາດດີຈີຕອລນ່າ ກ່ຽວກັບເທຣດ, ຫຸ້ນ, ບິດຄອຍ ເປັນອີ່ຫຍັງຊີ້ນ່າ ກໍແລ້ວແຕ່ເຮົານ່າ ສ່ວນຫລາຍມັນວຽກກາງເວັນ ມັນບໍ່ຄ່ອຍຈະໂອເຄແລ້ວນ່າ ບໍ່ຄ່ອຍຈະມີຄົນຫລິ້ນນ່າ ສ່ວນຫລາຍຈະເປັນກາງເດິກ ດຽວນີ້ຫັ້ນ ສ່ວນຫລາຍໆຈະເປັນ ແຕ່ຄົນອາເມຣິກາ ຂະເຈົ້າຫລິ້ນ.”

ເມື່ອວັນທີ 7 ແລະວັນທີ 10 ຕຸລານີ້ ວິທຍຸ ເອເຊັຽເສຣີ ໄດ້ຕິດຕໍ່ໄປຍັງສະຖານທູຕ ມາເລເຊັຽ ປະຈໍາລາວ ຜ່ານທາງອີແມວ ເພື່ອຂໍຮູ້ກ່ຽວກັບ ການຊ່ອຍເຫລືອຄົນງານ ມາເລເຊັຽ ທີ່ຖືກຕົວະໄປເຮັດວຽກ ເປັນສະແກັມເມີຣ໌ ຢູ່ເຂດເສຖກິຈ ພິເສດສາມຫລ່ຽມຄໍາ ຊຶ່ງເຈົ້າໜ້າທີ່ ສະຖານທູຕກໍຮູ້ແລ້ວ, ແຕ່ຍັງບໍ່ສາມາດ ໃຫ້ຄໍາເຫັນໃດໆ ໄດ້ເທື່ອໃນໄລຍະນີ້.

ແຕ່ເຖິງຢ່າງໃດກໍຕາມ ທ່ານ ດາໂຕະ ຮິຊາມຸ໋ດດິ໋ນ ຮາຮິມ (Dato Hishamuddin Hahim) ເລຂາທິການອົງການ ເພື່ອມະນຸສທັມ ລະຫວ່າງປະເທດ ຂອງມາເລເຊັຽ ຫລື Malaysia International Humanitarian Organization (MHO) ກໍໄດ້ກ່າວຕໍ່ວິທຍຸ ເອເຊັຽເສຣີ ເຖິງວຽກງານການຊ່ອຍເຫລືອ ຄົນງານມາເລເຊັຽ ອອກມານັ້ນວ່າ:

“So, as far as what I heard unofficial information, there are more than 20 people have already been rescued and in the process of sending back. But how many altogether who have been not rescued, according to them, they report to us there are more than 50 people and above.”

“ເທົ່າທີ່ພວກເຮົາຮູ້ຂໍ້ມູນ ຢ່າງບໍ່ເປັນທາງການ, ມີພົລເມືອງມາເລເຊັຽ ຖືກຊ່ອຍອອກມາຈາກລາວ ຫລາຍກວ່າ 20 ຄົນແລ້ວ ແລະພວມຢູ່ໃນຂັ້ນຕອນ ດຳເນີນເອກສານສົ່ງກັບ. ແຕ່ວ່າ ມີທັງໝົດຈັກຄົນ ທີ່ຖືກຕົວະໄປເຮັດວຽກຢູ່ຫັ້ນ ແລ້ວຍັງບໍ່ທັນຖືກຊ່ອຍອອກມາເທື່ອ ແມ່ນມີປະມານ 50 ຄົນຂຶ້ນໄປ, ອີງຕາມການຣາຍງານ ຂອງຄົນມາເລເຊັຽ ທີ່ພວກເຮົາຊ່ອຍອອກມາໄດ້.”

ທ່ານກ່າວຕື່ມວ່າ ໂຕເລຂພົລເມືອງມາເລເຊັຽ ທີ່ໄດ້ຣາຍງານ ໄປກ່ອນໜ້ານີ້ວ່າ ມີຄົນມາເລເຊັຽ ຕິດຄ້າງໃນປະເທດລາວ 700 ຄົນນັ້ນ ເປັນຂໍ້ມູນ ທີ່ບໍ່ໄດ້ເຈາະຈົງ ແຕ່ປະເທດລາວ, ແຕ່ໝາຍເຖິງຄົນມາເລເຊັຽ ທີ່ຖືກຕົວະໃຫ້ໄປເຮັດວຽກ ໃນປະເທດກັມພູຊາ ແລະພະມ້ານຳດ້ວຍ ຈຶ່ງເຮັດໃຫ້ໂຕເລຂ ຫລາຍເຖິງຂນາດນັ້ນ, ແຕ່ສະເພາະໃນປະເທດລາວ ເທົ່າທີ່ມີຂໍ້ມູນ ແມ່ນມີປະມານ 50 ຫາ 100 ຄົນ ທີ່ຍັງບໍ່ສາມາດຊ່ອຍ ອອກມາໄດ້ເທື່ອ.

ທ່ານກ່າວເພີ່ມອີກວ່າ ທ່ານເອງ ແລະສະມາຊິກຄອບຄົວ ເປັນຫ່ວງທີ່ສຸດ ກໍແມ່ນກຸ່ມຄົນມາເລເຊັຽ ທີ່ຖືກຕົວະໄປເຮັດວຽກ ໃນເຂດເສຖກິຈ ພິເສດສາມຫລ່ຽມຄຳ, ແລ້ວບໍ່ສາມາດຕິດຕໍ່ ກັບພວກເຂົາເຈົ້າໄດ້ເລີຍ, ເພາະບໍ່ຮູ້ວ່າ ເຂົາເຈົ້າຢູ່ໃສ ແລະ ຍັງມີຊີວິຕຢູ່ ຫຼືບໍ່, ແຕ່ເຖິງຢ່າງໃດກໍຕາມ, ສິ່ງທີ່ເຮັດໃຫ້ເຫັນຄື ທາງຣັຖບານລາວ ສາມາດເຮັດໄດ້ ແລະໃຫ້ຄວາມຮ່ວມມື ກໍແມ່ນການພະຍາຍາມ ສັບປ່ຽນກຳລັງເຈົ້າໜ້າທີ່ ຕຳຣວດທ້ອງຖິ່ນ ທີ່ເຮັດວຽກຢູ່ໃນເຂດດັ່ງກ່າວ ໃຫ້ຖີ່ຂຶ້ນ ເພື່ອບໍ່ໄດ້ເຈົ້າໜ້າທີ່ຕຳຣວດ ເຮັດວຽກຢູ່ໃນເຂດນັ້ນ ດົນເກີນໄປ ຈົນຕົກເປັນເຄື່ອງມື ຂອງກຸ່ມ ນັກຕົ້ມຕຸ໋ນຊາວຈີນ ໃນການທີ່ຈະຊ່ອຍປົກປ້ອງ ພວກເຂົາ ທີ່ສ້າງເຣື່ອງບໍ່ດີ.

ເມື່ອກ່ອນໜ້ານີ້ ຄືວັນທີ 6 ຕຸລາ ກະຊວງການຕ່າງປະເທດ ຂອງມາເລເຊັຽ ໄດ້ອອກຖແລງການວ່າ ໄດ້ດໍາເນີນການ ຜ່ານສະຖານທູຕ ມາເລເຊັຽ ໃນກຸງພະນົມເປັນ ແລະນະຄອນຫລວງວຽງຈັນ ໂດຍປະສົບຄວາມສໍາເຣັດ ໃນການຊ່ອຍເຫລືອ ແລະນໍາຊາວມາເລເຊັຽ 21 ຄົນ ທີ່ຕົກເປັນເຫຍື່ອ ກຸ່ມນັກຕົ້ມຕຸ໋ນ ໃນປະເທດກັມພູຊາ ແລະລາວ ກັບມາມາເລເຊັຽ. ໃນນັ້ນຖືກຊ່ອຍອອກ ຈາກກັມພູຊາ 14 ຄົນ, ແລະຈາກລາວ 7 ຄົນ.

ສໍາລັບແຜນການ ຊ່ອຍເຫລືອຄົນງານ ມາເລເຊັຽ ທີ່ຖືກຕົວະໄປເຮັດວຽກ ເປັນສະແກັມເມີຣ໌ ແລະມີຄວາມສ່ຽງຕໍ່ການທີ່ ຈະຕົກເປັນເຫຍື່ອ ຂອງການຄ້າມະນຸສ ຢູ່ປະເທດຕ່າງໆຕື່ມ, ກະຊວງການຕ່າງປະເທດ ຂອງມາເລເຊັຽ ຈະດໍາເນີນການ ຜ່ານສະຖານທູຕມາເລເຊັຽ ປະຈໍາລາວ, ​ກັມພູຊາ, ພະມ້າ ແລະໄທຍ. ພ້ອມດຽວກັນນັ້ນ ກໍແນະນໍາໃຫ້ ຜູ້ທີ່ຮູ້ຂໍ້ມູນ ກ່ຽວກັບຂະບວນການ ຕົວະຄົນງານມາເລເຊັຽ ໄປເຮັດວຽກເປັນ ສະແກັມເມີຣ໌ ແຈ້ງໄປໃຫ້ເຈົ້າໜ້າທີ່ ຕໍາຣວດຮູ້ນໍາ ແລະຫລີກເວັ້ນ ການໃຫ້ຂໍ້ມູນ ທີ່ເຮັດໃຫ້ຄອບຄົວ ຂອງຜູ້ເຄາະຮ້າຍກັງວົນໃຈ.