ສື່ໄທຍ ຣາຍງານ ຈ້າວ ເຫວີ່ຍ ກ່ຽວພັນ ແກ້ງທຸຣະກິຈ ຜິດກົດໝາຽ ໃນໄທຍ

ສື່ມວນ​ຊົນໄທຍ ໄດ້້ອອກມາເປີດເຜີຍ ທ່ານ ຈ້າວ ເຫ​ວີ່ຍ, ປະທານ ສະພາບໍຣິຫານ ເຂດເສຖກິຈພິເສດສາມຫລ່ຽມຄຳ ມີສ່ວນກ່ຽວພັນ ກັບແກ້ງທຸຣະກິຈ ຜິດກົດໝາຽ ໃນໄທຍ ທີ່ຕຳຣວດໄທຍ ໄດ້ກວາດລ້າງແລະ ຂຍາຍຜົລ ການສືບສວນ-ສອບສວນ. ຫລ້າສຸດ ໂຕແທນ ຂອງທ່ານ ຈ້າວ ເຫວີຍ, ໄດ້ອອກມາປະຕິເສດ ຢ່າງເປັນທາງການ.

ໄມຊູລີ: ສະບາຍດີ ທ່ານຜູ້ຟັງທີ່ເຄົາຣົບ… ຂໍຕ້ອນຮັບ ທ່ານເຂົ້າມາສູ່ ຣາຍການ “ມາຟັງນຳກັນ”. ສັປດານີ້ ມາຕິດຕາມ ປະເດັນ ຂອງເຂດເສຖກິຈພິເສດ ສາມຫລ່ຽມຄຳ ຢູ່ເມືອງຕົ້ນເຜີ້ງ ແຂວງບໍ່ແກ້ວ. ເມື່ອຕົ້ນເດືອນພຶສຈິກາ ຜ່ານມາ ຕຳຣວດໄທຍ ໄດ້ອອກກວາດລ້າງ ກຸ່ມແກ້ງຄົນຈີນ ເຮັດທຸຣະກິຈ ຜິດກົດໝາຽໃນບາງກອກ ປະເທດໄທຍ. ໃນນີ້ ສື່ມວນ​ຊົນໄທຍ ໄດ້ຣາຍງານວ່າ ກຸ່ມດັ່ງກ່າວ ເຊື່ອມໂຍງເຖິງ ທ່ານ ເຈົ້າເຫ​ວີ່ຍ ປະທານ ສະພາບໍຣິຫານ ເຂດເສຖກິຈພິເສດ ສາມຫລ່ຽມຄຳ ເວົ້າງ່າຍໆ ກໍຄື ເຈົ້າຂອງ ເຂດເສຖກິຈພິເສດ ສາມຫລ່ຽມ ໂດຍສື່ມວນຊົນໄທຍ ໄດ້ຣາຍງານວ່າ ທ່ານ ຈ້າວ ເຫວີຍ ມີສ່ວນກ່ຽວພັນກັບ ແກ້ງທຸຣະກິຈ ຜິດກົດໝາຽ ໃນໄທຍ. ສຳລັບຫົວຂໍ້ ໃນຣາຍການມື້ນີ້ ແມ່ນ ສື່ມວນ​ຊົນໄທຍ ເຜີຍ ຈ້າວ ເຫ​ວີ່ຍ ກ່ຽວພັນ ແກ້ງທຸຣິກິຈ ຜິດກົດໝາຽ ໃນໄທຍ. ດຳເນີນ ຣາຍການໂດຍ ໄມຊູລີ ແລະ ໄຊຍາ.

ໄຊຍາ: ເຖິງແມ່ນວ່າ ຈະຖືກກ່າວຫາວ່າ ມີສ່ວນພົວພັນ ທຸຣະກິຈ ຜິດກົດໝາຽ ຜ່ານມາ ການພັທນາ ໃນເຂດເສຖກິຈພິເສດ ສາມຫລ່ຽມຄຳ ທີ່ໄດ້ເຜີຍແຜ່ ຜ່ານສື່ສັງຄົມອ໋ອນລາຍນ໌ ໂດຍທາງຄະນະຮັບຜິດຊອບ ໃນໂຄງການ ພັທນາ ກໍໄດ້ເລັ່ງ ປະຊາສັມພັນ ທັງການກໍ່ສ້າງ ສນາມບີນ, ແຫລ່ງທ່ອງທ່ຽວ, ຕລາດນໍ້ານາໆຊາຕ, ໂຮງຮຽນນາໆຊາຕ, ສນາມກິລາ ລະດັບສາກົລ ເປັນຕົ້ນ. ແຕ່ໃນນັ້ນ ຍັງມີຫລາຍໂຄງການ ທີ່ກຳລັງ ດຳເນີນການ ກໍ່ສ້າງ. ໂດຍ ສື່ວຽງຈັນທາຍນ໌ ຣາຍງານວ່າ ປັດຈຸບັນ ໃນເຂດເສຖກິຈພິເສດ ສາມຫລ່ຽມຄຳ ໄດ້ດຶງດູດ ການລົງທຶນ ເຖິງ 81 ຫົວໜ່ວຍທຸຣະກິຈ ທັງການກໍ່ສ້າງ, ກະສິກັມ, ລ້ຽງສັດ, ໂຮງແຮມ, ທີ່ຢູ່ອາສັຍ ແລະ ສະຖານບັນເທີງ. ດັ່ງເຈົ້າໜ້າທີ່ ທີ່ຮັບຜິດຊອບ ພັທນາໂຄງການ ຂອງເຂດເສຖກິຈພິເສດ ສາມຫລ່ຽມຄຳ ທີ່ຂໍສງວນຊື່ ແລະ ສຽງ ໄດ້ກ່າວເຖິງ ການພັທນາໂຄງການ ດັ່ງກ່າວ ເມື່ອວັນທີ 18 ພຶສຈິກາ 2022 ຜ່ານມາວ່າ:

“ຢູ່ພາຍໃນເຂດນີ້ ສ່ວນຫລາຍ ລະແມ່ນ ເຣື່ອງການບໍຣິການ ການທ່ອງທ່ຽວ ກາມີ ສະຖານທີ່ທ່ອງທ່ຽວ ທີ່ເປັນຫລັກການ ແມ່ນ ດອນຊາວ ແລະ ທີ່ກຳລັງ ພັທນາຢູ່ ກາມີ ສວນຕລາດ, ສວນວັທນາທັມ ໂຕນີ້ກາກຳລັງກໍ່ສ້າງ ຈາກນັ້ນກາມີ ໂຮງແຮມ 5 ດາວ.

ທ່ານກ່າວຕື່ມວ່າ ຈຸດພິເສດ ຂອງການລົງທຶນ ສ່ວນໃຫຍ່ແມ່ນ ມາຈາກ ສປຈີນ ຫລື ຈີນແຜ່ນດິນໃຫຍ່. ເຖິງແມ່ນວ່າ ຣັຖບານລາວ ໄດ້ປະກາດ ເປີດປະເທດ ເປັນປົກກະຕິແລ້ວ ແຕ່ດ້ວຍ ຜົລກະທົບ ຂອງໂຄວິດ-19 ທີ່ໃຊ້ມາຕການ ປ້ອງກັນເຂັ້ມງວດ ເຮັດໃຫ້ ທັງນັກທ່ອງທ່ຽວ ແລະ ນັກລົງທຶນ ຍັງບໍ່ໄດ້ຕາມແຜນທີ່ ວາງໄວ້.

…

(ເຊີນທ່ານ ຟັງຣາຍລະອຽດ ຈາກສຽງ ທີ່ໄດ້ບັນທຶກໄວ້ ຂ້າງເທິງນັ້ນ)