ແມ່ຍິງລາວ 2 ຄົນ ໃນຈໍານວນ 16 ຄົນທີ່ຕິດຄ້າງ ຢູ່ປະເທດມຽນມາ ໄດ້ກັບບ້ານແລ້ວ

ປັດຈຸບັນ ແມ່ຍິງລາວ 2 ຄົນ ອາຍຸລະຫວ່າງ 19 ຫາ 21 ປີ ຈາກແຂວງຫຼວງນໍ້າທາໃນຈໍານວນຄົນລາວ 16 ຄົນ ທີ່ຕົກເປັນເຫຍື່ອການຄ້າມະນຸດ ຍ້ອນຖືກນາຍໜ້າຄົນລາວ ຕົວະໄປເຮັດວຽກຕອບແຊັດ ຢູ່ໂຮງກາສິໂນໂກຊາຍ ຂອງຈີນ ທີ່ເມືອງເມຍວະດີ ປະເທດມຽນມາ (ພະມ້າ) ຕັັ້ງແຕ່ເດືອນສິງຫາ ປີ 2022 ນັ້ນ ມາຮອດມື້ວັນທີ 8 ເດືອນເມສາ ປີ 2024 ນີ້ ພວກນາງ ໄດ້ກັບມາຮອດບ້ານເກີດເມືອງນອນແລ້ວ ໂດຍທີ່ບໍ່ໄດ້ເສຍຄ່າໄຖ່ໂຕແຕ່ຢ່າງໃດ, ແຕ່ພວກນາງ ຕ້ອງໄດ້ເສຍເງິນ ໃຫ້ກັບຜູ້ທີ່ພາອອກຈາກໂຮງກາສິໂນດັ່ງກ່າວ ຄົນລະ 40,000 ຢວນ ຄິດເປັນເງິນໂດລ້າ ຕົກຢູ່ປະມານ 5,522 ໂດລ້າສະຫະລັດ, ອີງຕາມຄວາມເວົ້າ ຂອງແມ່ຍິງລາວຜູ້ຖືກເຄາະຮ້າຍ ໜຶ່ງໃນຈໍານວນສອງຄົນນັ້ນ ທີ່ໄດ້ກັບມາຫາຄອບຄົວ ດ້ວຍຄວາມປອດໄພ ໄດ້ເລົ່າໃຫ້ວິທຍຸເອເຊັຽເສຣີຟັງ ໃນວັນທີ 9 ເດືອນເມສາ ນີ້ວ່າ:

“ພວກນ້ອງອອກມາຈັ່ງໃດເນາະ ກໍແບບວ່າ ທາງຫົວໜ້າ (ຄົນຈີນ) ເຂົາບອກວ່າ ໃຫ້ປ່ອຍແມ່ນບໍ່ ປ່ອຍ ແລ້ວກໍ່ ນ້ອງກັບໝູ່ນ້ອງ ກະອອກມາ ແບບນັ້ນຫັ້ນນ່າ ຖາມວ່າ ເສຍເງິນບໍ່ ບໍ່..ບໍ່ໄດ້ເສຍເງິນ ລະກະບໍ່ໄດ້ໄຖ່ໂຕ ຖ້າຢາກກັບແບບສະບາຍ ແລ້ວກັບມາຮອດລາວປອດໄພ ເຮົາຕ້ອງຈ້າງ ຈ້າງເຂົາເຈົ້າ ຊອກຄົນທີ່ໄວ້ໃຈ ແລ້ວກະບໍ່ເອົາເຮົາໄປຂາຍຕໍ່ຫັ້ນ ຈ້າງເຂົາ ແລ້ວເຂົາຈະພາເຮົາກັບມາລາວ ຢ່າງປອດໄພ.”

ນາງ ຍັງເລົ່າເຫດການ ກ່ອນທີ່ຈະໄດ້ກັບມາລາວນີ້ ໃຫ້ຟັງນໍາວ່າ: ນ້ອງກໍ່ລໍຖ້າການຊ່ອຍເຫຼືອ ຈາກທາງການລາວ ແລະ ພາກສ່ວນທີ່ກ່ຽວຂ້ອງມາດົນຄືກັນ ຈົນປີປາຍ ເກືອບ 2 ປີ ແຕ່ກໍ່ບໍ່ໄດ້ຮັບການຊ່ອຍເຫຼືອ ພໍດີຫົວໜ້າກຸ່ມ ຖາມນາຍຈ້າງຄົນຈີນໃຫ້ພວກນ້ອງ ແລ້ວນາຍຈ້າງຈີນ ກໍ່ຖາມພວກນ້ອງຄືນວ່າ ພວກນ້ອງຢາກກັບບ້ານບໍ່ ພວກນ້ອງ ກໍຟ້າວຕອບເລີຍ ວ່າ ຢາກກັບ ເພາະວ່າ ກ່ອນທີ່ເຂົາຈະປ່ອຍ ໃຫ້ຄົນກັບບ້ານນີ້ ມັນກໍ່ບໍ່ແມ່ນງ່າຍ ໃນເມື່ອເຂົາປ່ອຍແບບນີ້ ພວກນ້ອງກໍ່ຕັດສິນໃຈ ຈ້າງຄົນໃຫ້ພາອອກມາເລີຍ ເພາະກໍ່ຄຶດຢ້ານຄົນຈີນ ທີ່ເປັນນາຍຈ້າງນັ້ນລາວປ່ຽນຄຳເວົ້າ ຈັກໜ່ອຍຊິບໍ່ໄດ້ກັບ.

ນາງຍັງບອກໃຫ້ຮູ້ຕື່ມວ່າ ພວກທີ່ພາຄົນອອກມານັ້ນ ມັນກໍ່ຈະມີຫຼາຍກຸ່ມ ບາງກຸ່ມກໍ່ຈະນ້ອຍ ແລະບາງກຸ່ມກໍ່ໃຫຍ່ ເຂົາຈະເອົາມາຫຼາຍຄົນ ແຕ່ກຸ່ມທີ່ພວກນ້ອງຈ້າງເຂົາ ພາມາເອົາອອກນັ້ນ ແມ່ນເຂົາເອົາຄ່າຈ້າງ ຄົນລະ 40,000 ຢວນ ພວກເຂົາເອົາແຕ່ເງິນຢວນເທົ່ານັ້ນ ສ່ວນການເດີນທາງ ຈາກປະເທດມຽນມາ ມາຮອດປະເທດລາວ ແມ່ນຂີ່ລົດມາທາງລັດ ໃຊ້ເວລາເດີນທາງ 2-3 ມື້ ຈຶ່ງຮອດປະເທດລາວ ແຕ່ເຖິງແນວໃດກໍດີ ນ້ອງເອງ ກໍ່ຢາກຝາກບອກຄົນລາວ 14 ຄົນ ທີ່ຍັງຕິດຄ້າງ ຢູ່ໃນກາສິໂນໂກຊາຍ ນັ້ນວ່າ ຖ້າຢາກຊອກຫາຄົນພາອອກມາ ກໍ່ຕ້ອງຊອກຫາຄົນ ທີ່ໄວ້ວາງໃຈໄດ້ເທົ່ານັ້ນ ເພາະວ່າບາງຄົນ ເຮົາຈ້າງໄປແລ້ວ ເຂົາອາດຈະຂາຍເຮົາຕໍ່ໄປບ່ອນອື່ນໄດ້ ແລະນ້ອງເອງກໍ່ດີໃຈທີ່ສຸດ ທີ່ຊອກຫາຄົນໄປເອົາອອກມາ ທີ່ໄວ້ວາງໃຈໄດ້ ແລ້ວພາພວກນ້ອງ ກັບມາຮອດປະເທດລາວ ຢ່າງປອດໄພ.

ສອດຄ່ອງກັບ ຜູ້ປົກຄອງຂອງເດັກນ້ອຍ ໃນແຂວງຫຼວງນໍ້າທາ ຜູ້ທີ 1 ໄດ້ເວົ້າໃຫ້ວິທຍຸເອເຊັຽເສຣີຟັງ ໃນມື້ດຽວກັນ ນີ້ວ່າ:

“ຍິນຕາມລູກເຮົາວ່າ ແມ່ນອອກລ້າໆ ບໍ່ແມ່ນ ເສຍເງິນເສຍຄໍາອີ່ຫຍັງນີ່ ລູກເຮົາວ່າ ຕາມລູກເຮົາໂທມື້ຊືນນີ້ແຫຼະ ມັນວ່າ ໝູ່ເຮົາອອກ 2 ຄົນລະເດີ້ແມ່ເດີ້ ບໍ່ເສຍຄ່າຫຍັງ ບໍ່ເສຍຄ່າຖົກຄ່າໄຖ່ອີ່ຫຍັງ ອອກລ້າໆ ມີແຕ່ເສຍຄ່າທາງ ເຂົາຊິເສຍທໍ່ໃດກະບໍ່ຮູ້ແຫຼະແມ່ເອີ່ຍ ຍິນຕາມລູກວ່າແນວນີ້.”

ໃນຂະນະທີ່ ຜູ້ປົກຄອງ ຜູ້ທີ່ 2 ທີ່ລູກຊາຍ ຍັງຕິດຄ້າງຢູ່ໃນກາສິໂນໂກຊາຍ ແລະລູກຊາຍ ກໍໄດ້ເວົ້າສະພາບການ ທີ່ຈະເກີດຂຶ້ນນັ້ນ ໃຫ້ຟັງວ່າ:

“ແມ່ກໍ່ໄດ້ໂທລົມລູກຊາຍຢູ່ວ່າ ຊິເຮັດຈັ່ງໃດເດ້ ເຂົາປ່ອຍ ເຂົາສົ່ງບໍ່ ລາງຄົນ ເຂົາກະສົ່ງແນວນັ້ນ ແລ້ວລູກຢູ່ທາງໃນ ຊິເຮັດຈັ່ງໃດ ລູກກະວ່າ ເປັນຈັ່ງໃດກໍ ຖ້າເບິ່ງວັນທີ 15 ເດືອນ 6 ນີ້ແຫຼະ ຄັນບໍ່ໄດ້ອອກກໍ ຄ່ອຍຫາວິທີທາງໃໝ່ ລູກກະບອກແບບນັ້ນ.”

ອີງຕາມແຫຼ່ງຂ່າວທີ່ເຊື່ອຖືໄດ້ ໄດ້ເລົ່າໃຫ້ວິທຍຸເອເຊັຽເສຣີຟັງ ໃນມື້ວັນທີ 10 ເດືອນເມສານີ້ວ່າ ໃນອີກບໍ່ດົນນີ້ ເດັກນ້ອຍແລະໄວໜຸ່ມລາວ ທັງ 14 ຄົນ ທີ່ຍັງຕິດຄ້າງຢູ່ໃນກາສິໂນດັ່ງກ່າວ ຄົງຈະຖືກທະຍອຍສົ່ງອອກເມືອລາວ ແຕ່ຂໍໃຫ້ບັນດາພວກຜູ້ປົກຄອງ ຢູ່ທາງບ້ານ ພາກັນຕຽມເງິນໄວ້ ບາງທີຕ້ອງໄດ້ເສຍຄ່າໃຊ້ຈ່າຍ ຄົນລະ 80,000-90,000 ບາດ. ຕໍ່ກັບຄ່າໃຊ້ຈ່າຍທີ່ວ່ານີ້ ຍິ່ງເຮັດໃຫ້ບັນດາພວກຜູ້ປົກຄອງ ເປັນກັງວົນຫຼາຍ ເພາະທາງບ້ານເອງ ກໍທຸກຍາກຂາດເຂີນ, ດັ່ງຜູ້ປົກຄອງ ຜູ້ທີ 3 ເວົ້າວ່າ:

“ພໍ່ແມ່ກໍ່ເນາະ ໄດ້ຍິນຂ່າວວ່າ ໂອ້...ລູກເຕົ້າ ຊິໄດ້ມາພາຍໃນເດືອນ 6 ນີ້ຫັ້ນນ່າ ພໍ່ແມ່ກະຢາກຂໍ ທາງຫົວໜ້າບໍລິສັດ ສົ່ງລູກພວກແມ່ກັບມາສາ ກັບມາໂດຍທີ່ວ່າບໍ່ໄດ້ເສຍເງິນເນາະ ໂດຍທີ່ວ່າ ບໍ່ໄດ້ໃຊ້ຈ່າຍເງິນ ຄ່າໄຖ່ສາ ເພາະວ່່າ ພໍ່ແມ່ກະທຸກຍາກເດ້ ຍ້ອນວ່າບໍ່ມີິເງິນ ຈັ່ງໃຫ້ລູກຫັ້ນໄປເຮັດວຽກເຮັດງານ ໄປຊອກເງິນຊອກຄໍາ ບາດໄປແລ້ວລູກກະມາຕົກເປັນສະພາບແບບນີ້ ຊິໃຫ້ເຮົາເອົາເງິນ ໄປໄຖ່ລູກຫັ້ນນ່າ ເຮົາຊິເງິນຢູ່ໃສໄປໄຖ່ ພໍ່ແມ່ທາງພີ້ ກໍ່ທຸກຍາກຂາດເຂີນ ພໍ່ແມ່ກໍ່ຫາເຊົ້າກິນຄໍ່າ ຫາຈ້າງຫາເສ ໄດ້ມື້ລະ 100,000 ກີບ ພໍໄດ້ມາຊື້ເຂົ້າຊື້ນໍ້າກິນ ໃນພາຍຄອບຄົວ ລະໃຫ້ພໍ່ແມ່ຊິເອົາເງິນຢູ່ໃສມາເສຍ.”

ເຖິງແນວໃດກໍຕາມ ຜູ້ປົກຄອງຜູ້ນີ້ ກໍຢາກຂໍຮ້ອງນໍາຫົວໜ້າບໍລິສັດ ທີ່ເປັນຄົນຈີນ ນັ້ນຕື່ມວ່າ:

“ເພາະວ່າ ລູກກໍ່ ໄປເຮັດວຽກໃຫ້ ກະຫຼາຍປີແລ້ວ ແນວໃດ ກໍຂໍໃຫ້ສົ່ງກັບສາ ຫາເງິນໃຫ້ກໍ່ໄດ້ຫຼາຍແລ້ວ ຫາເງິນໃຫ້ທາງ ຫົວໜ້າບໍລິສັດທາງພຸ້ນກໍ ມີແຕ່ວ່າຊິເອົາເງິນນໍາລູກ ນໍາພໍ່ນໍາແມ່ນີ້ ພໍ່ແມ່ບໍ່ມີໃຫ້ ແນວໃດກໍ່ຂໍໃຫ້ສົ່ງສາ.”

ໃນຂະນະດຽວກັນ ຜູ້ປົກຄອງ ຜູ້ທີ 4 ກໍເວົ້າເຖິງຄວາມຫຍຸ້ງຍາກ ພາຍໃນຄອບຄົວນັ້ນ ໃຫ້ຟັງວ່າ:

“ຈັ່ງວ່າ ເງິນເລື່ອງເງິນເລື່ອງຄໍານີ້ ກໍຄືວ່າ ຫາຍາກຫາຊາ ເຮັດຈັ່ງໃດບຸ 3-4 ໝື່ນ (ບາດ) ໄລ່ມາເປັນເງິນກີບກໍ່ແພງ ຈັກຊິເຮັດແນວໃດ ຄັນຈໍາເປັນແທ້ໆ ຄັນລູກໄດ້ອອກມາກໍ ຄັນເປັນໄປໄດ້ ກໍ່ຢາກໃຫ້ອອກຫັ້ນໂອ້ ເຮັດແນວໃດ ເລື່ອງຝ້າຍເລື່ອງເງິນກໍ່ບໍ່ມີ ຈັກຊິເຮັດແນວໃດບຸ ຖ້າເບິ່ງສະພາບກ່ອນຕິ ເດືອນໜ້າ ຈັກມື້ຈັກໃດ ມີແຕ່ບາງທີລູກກະໄດ້ອອກມາ ບໍ່ຮູ້ວ່າ ເວົ້າເລື່ອງເງິນກະບໍ່ມີເງິນ ກະຢາກໃຫ້ອອກມາໄດ້ ຄື 2 ຄົນ ແນວນີ້ເບາະ ຫຼືວ່າໃຫ້ອອກມາດີໆຄື ຈຸ 10 ປາຍຄົນ ມາມື້ກ່ອນ ຈຸເຂົາ 10 ປາຍຄົນ ມາທາງມຽນມານັ້ນ ເຂົາສົ່ງໃຫ້ເຈົ້າໜ້າທີ່ ເຈົ້າໜ້າທີ່ບໍ່ໄດ້ເສຍເງິນໂອ້ ອັນນັ້ນນ່າ ເຂົາໄດ້ມາລ້າໆໂອ້.”

ຂະນະທີ່ ຜູ້ປົກຄອງ ຜູ້ທີ 5 ກໍເວົ້າດ້ວຍຄວາມອັ່ງອຸກໃຈ ກ່ຽວກັບເງິນ ຈໍານວນ 40,000 ຢວນ ທີ່ແມ່ຍິງລາວ 2 ຄົນ ໄດ້ຈ່າຍໄປ ນັ້ນວ່າ:

“ຕາຍແຫຼະລູກສາວ ຄັນຄົນ 40,000 ຢວນ ຕົກເງິນລາວ ເປັນທໍ່ໃດ ຕາຍລະ ຊັ້ນລູກຊາຍ ກະຄືຊິບໍ່ໄດ້ອອກລະຕີ້ ຊິເຮັດແນວໃດ ຊິຕາຍຢູ່ຫັ້ນແລ້ວຕີ້ຊັ້ນນ່າ ບໍ່ມີໃຜໄປໄຖ່ອອກ ຊິເຮັດແນວໃດຫຸ ມາໄດ້ຍິນຄໍານີ້ອີ່ແມ່ກະອຸກໃຈເດ້ ແນວພວກພໍ່ພວກແມ່ ເປັນປະຊາຊົນຄົນບ້ານເດ້ ມີແຕ່ຈ້າງກິນເສກິນເດ້ ຈ້າງມື້ໃດ ກະຈັ່ງໄດ້ກິນມື້ນັ້ນ ບໍ່ຈ້າງເດີ້ ກະບໍ່ໄດ້ກິນແທ້ໆນ່າ ແນວພວກພໍ່ພວກແມ່ນີ້ ຕາຍແທ້ໆອີ່ແມ່ນີ້ ຄືຊິບໍ່ໄດ້ເຫັນໜ້າລູກແລະຊາດນີ້ ຄັນວ່າ ຊິໄປໄຖ່ໂຕແນວນັ້ນນິ່.”

ສ່ວນຜູ້ປົກຄອງຜູ້ທີ 2 ຜູ້ດຽວກັບຂ້າງເທິງ ທີ່ເປັນຫ່ວງລູກເຕົ້າ ທີ່ຍັງຕິດຄ້າງຢູ່ມຽນມາ ກໍກ່າວຕື່ມອີກວ່າ:

“ພໍ່ແມ່ທາງບ້ານ ກໍ່ເປັນຫ່ວງລູກ ລູກກໍ່ ດຽວນີ້ກໍ່ເຮັດວຽກບໍ່ໄດ້ແລ້ວ ຄົນໄທ, ຄົນຫຍັງ ເຂົາກໍ່ຮູ້ຫຼາຍແລ້ວ ເປັນຈັ່ງໃດ ກະຂໍໃຫ້ທາງ ຫົວໜ້າຄາສິໂນຫັ້ນ ສົ່ງເດັກນ້ອຍລາວກັບສາເຢີ່ ຄັນສິໃຫ້ເສຍຄ່າສີ້ນເປືອງ ຄືເຂົາອອກມາຫັ້ນ ພໍ່ແມ່ກະບໍ່ມີເງິນເນາະ ຫາເຊົ້າກິນຄໍ່າ ເປັນຈັ່ງໃດກໍ່ ຂໍທາງຫົວໜ້າຄົົນຈີນຫັ້ນ ສົ່ງເດັກນ້ອຍຫັ້ນກັບ ຊິເຮັດຈັ່ງໃດ ເຂົາຢູ່ຫັ້ນເຂົາກະຫາເງິນບໍ່ໄດ້ ພໍ່ແມ່ກະເປັນຫ່ວງ ຄິດຮອດລູກແດ່ ໄປປີປາຍ 2 ປີ ຊິຮອດແລ້ວໃດ໋ ຄັນຮອດເດືອນ 9 ກະຊິຮອດ 2 ປີແລ້ວໃດ໋.”

ກ່ຽວກັບເລື່ອງ ຄວາມຄືບໜ້າ ຂອງການຊ່ອຍເຫຼືອເດັກນ້ອຍລາວ ທີ່ຍັງຕິດຄ້າງ ຢູ່ເມືອງເມຍວະດີ ປະເທດມຽນມາ ເຈົ້າໜ້າທີ່ສະຖານທູດລາວ ປະຈໍາປະເທດມຽນມາ ທ່ານໜຶ່ງ ເຄີຍໄດ້ອະທິບາຍ ໃຫ້ເອເຊັຽເສຣີຟັງ ເມື່ອວັນທີ 3 ເດືອນເມສາ ປີ 2024 ດັ່ງນີ້:

“ຂັ້ນຕອນຂອງອ້າຍຜູ້ເພິ່ນຮັບຜິດຊອບ ເພິ່ນກະຄືຊິດໍາເນີນການແລ້ວເນາະ ເພາະວ່າຕາມທີ່ວ່າຮູ້ເນາະ ສະຖານທີ່ ທີ່ວ່າມັນເກີດເຫດຕ່າງໆຫັ້ນ ສ່ວນຫຼາຍມັນກະຢູ່ນອກແນ່ ລະມັນກະປັດຈຸບັນນີ້ ຄືນ້ອງຄືຊິຮູ້ ສະພາບມຽນມາ ຂະເຈົ້າກະມີການສູ້ກັນຫັ້ນນ່າ ບາງຄັ້ງສະຖານທູດລາວເຮົາ ກະບໍ່ສາມາດ ທີ່ຈະເຂົ້າໄປໂດຍຕົງໄດ້ ເພາະສະນັ້ນ ເຮົາກະຕ້ອງໄດ້ປະສານງານ ຮ່ວມກັບປະເທດເຈົ້າພາບຫັ້ນ ເພື່ອໃຫ້ປະເທດເຈົ້າພາບຊ່ວຍຕື່ມຫັ້ນ ແຕ່ທາງສະຖານທູດເຮົາ ກະຊ່ວຍສຸດຄວາມສາມາດ ແຕ່ວ່າເລື້ອງເວລາ ເຮົາກະຕ້ອງໄດ້ລໍຖ້າ ຈາກປະເທດເຈົ້າພາບຄືກັນ.”

ວິທຍຸເອເຊັຽເສຣີ ໄດ້ຕິດຕາມລາຍງານຂ່າວນີ້ ມາໂດຍຕລອດ: ຄືຕັ້ງແຕ່ ເດືອນສິງຫາ ປີ 2022 ມີຜູ້ຖືກເຄາະຮ້າຍ ຈາກການຄ້າມະນຸດ ເປັນເດັກນ້ອຍໄວໜຸ່ມລາວ ອາຍຸລະຫວ່າງ 14-30 ປີ ຈໍານວນທັງໜົດ 45 ຄົນ ເຊິ່ງສ່ວນໃຫຍ່ເປັນຜູ້ຊາຍ ຈາກແຂວງຫຼວງນໍ້າທາ ໃນເບື້ອງຕົ້ນ ຖືກກຸ່ມແກ້ງຄ້າມະນຸດ ທີ່ເປັນຄົນລາວ ຕົວະໄປເຮັດວຽກຕອບແຊັດ ຢູ່ໂຮງກາຊິໂນ ຄິງໂຣມັນ ໃນເມືອງຕົ້ນເຜິ້ງ ແຂວງບໍ່ແກ້ວ ແຕ່ສຸດທ້າຍແລ້ວ ພັດຖືກຂາຍຕໍ່ ໃຫ້ໄປເຮັດວຽກ ຢູ່ບໍລິສັດຂອງຈີນ ທີ່ກາຊິໂນໂກຊາຍ ໃນເມືອງເມຍວະດີ ປະເທດມຽນມາ (ພະມ້າ) ໃນນັ້ນ ເມື່ອຕົ້ນປີ 2023 ຫົວໜ້າຈີນ ໄດ້ຮຽກຄ່າໄຖ່ ເພື່ອປ່ອຍໂຕກັບປະເທດລາວ 12 ຄົນ, ໃນເດືອນພະຈິກ ປີ 2023 ຫົວໜ້າຈີນ ປ່ອຍໂຕກັບປະເທດລາວ ຍ້ອນເຮັດວຽກຕອບແຊັດບໍ່ໄດ້ 16 ຄົນ ແລະມີເດັກນ້ອຍຜູ້ຍິງຄົນນຶ່ງ ອາຍຸ 17 ປີ ຖືກຂາຍຕໍ່ ໃຫ້ໄປເຮັດວຽກຢູ່ບ່ອນອຶື່ນ ຫຼ້າສຸດນີ້ ໃນວັນທີ 8 ເດືອນເມສາ ປີ 2024 ຫົວໜ້າຈີນ ກໍ ປ່ອຍໂຕກັບປະເທດລາວ ອີກ 2 ຄົນ ໂດຍທີ່ບໍ່ໄດ້ເສຍເງິນຄ່າໄຖ່ໂຕແຕ່ຢ່າງໃດ. ປັດຈຸບັນ ຍັງມີເດັກນ້ອຍ ແລະໄວໜຸ່ມລາວທີ່ເປັນຜູ້ເຄາະຮ້າຍ 14 ຄົນ ທີ່ຍັງຕິດຄ້າງຢູ່ໃນກາສິໂນດັ່ງກ່າວ ແລະພວກເຂົາເຈົ້າ ກໍລໍຖ້າການຊ່ອຍເຫຼືອ ຈາກທາງການ ທີ່ກ່ຽວຂ້ອງຢູ່ທຸກມື້.