ຣັຖກອນ ແຂວງຫຼວງນ້ຳທາ 41 ຄົນ ທີ່ລະເມີດລະບຽບພັກ ຖືກປະຕິບັດວິໄນ

ທາງການແຂວງນໍ້າທາ ປະຕິບັດວິໄນ ກຸ່ມພະນັກງານ-ຣັຖກອນ ຈໍານວນທັງໝົດ 41 ຄົນຕາມມະຕິ ຂອງກອງປະຊຸມ ຄົ້ນຄ້ວາວິໄນ ຕໍ່ພະນັກງານ-ຣັຖກອນ ລົງວັນທີ 02 ມິຖຸນາ 2023 ໂດຍມີ ທ່ານ ວຽງສະຫັວດ ສີພັນດອນ ເຈົ້າແຂວງ ແຂວງຫຼວງນໍ້າທາ ເປັນປະທານກອງປະຊຸມ ຍ້ອນພະນັກງານ-ຣັຖກອນ ທັງໝົດນີ້ລະເມີດ ຕໍ່ກົດລະບຽບຂອງພັກ.

ດັ່ງເຈົ້າໜ້າທີ່ ຫ້ອງວ່າການປົກຄອງ ແຂວງຫຼວງນໍ້າທາ ກ່າວຕໍ່ວິທຍຸເອເຊັຽເສຣີໃນວັນທີ 6 ພຶສຈິການີ້ວ່າ.

“ ແມ່ນຕັ້ງແຕ່ຊ່ວງແລ້ວໆ ມາຫັ້ນ (ການລະບາດໂຄວິດ-19) ແມ່ນແຫຼະມີແຕ່ກ່າວເຕືອນ ຂຽນໃບສໍາຣວດໂຕເອງສື່ໆ ແລ້ວກາຜ່ານໃນກົມກອງຫຼາຍໆ ສ່ວນຫຼາຍເຂົາກາຖືກວິໄນແທ້ໆ ກາໜັກກາມີຈຳນວນນຶ່ງເນາະ ແຕ່ກາສ່ວນຫຼາຍ ກາມີແຕ່ຂັ້ນສອງເນາະ. ມັນຊິແມ່ນທຳມະດານ່າ ຂຽນໃບສຳຣວດໂຕນີ້ແຫຼະ”

ສໍາລັບການປະຕິບັດວິໄນ ກຸ່ມພະນັກງານ-ຣັຖກອນ ແຂວງຫຼວງນໍ້າທາ ຈໍານວນທັງໝົດ 41 ຄົນ ແບ່ງອອກເປັນ 6 ກຸ່ມດັ່ງນີ້.

1. ພະນັກງານ-ຣັຖກອນ ຈຳນວນ 8 ຄົນ ທີ່ລຶບຊື່ອອກຈາກພັກ, ລົງວິໄນຂັ້ນ 4 ອອກຈາກການເປັນຣັຖກອນ ໂດຍບໍ່ໄດ້ຮັບນະໂຍບາຍໃດໆ ແລະ ດຳເນີນຄະດີຕາມຂະບວນຍຸຕິທັມ ດັ່ງນີ້.
   • ທ່ານ ພູຂົງ ແກ້ວກາງເພັງ ຮອງຫົວໜ້າຫ້ອງວ່າການແຂວງນໍ້າທາ
   • ທ່ານ ຄອນທອງ ເລືອງຄຳມາ ຜູ້ຊ່ອຍວຽກຫ້ອງວ່າການແຂວງນໍ້າທາ
   • ຍານາງ ປີ່ນແກ້ວ ວິວັນໄຊ ຮອງຫົວໜ້າຄະນະຄຸ້ມຄອງ ເຂດເສຖກິຈພິເສດແຂວງຫຼວງນໍ້າທາ
   • ທ່ານ ແສງພາວັນ ແກ້ວມະນີວົງ ຮອງຫົວໜ້າຄະນະຄຸ້ມຄອງ ເຂດເສຖກິຈພິເສດແຂວງຫຼວງນໍ້າທາ
   • ທ່ານ ເພັດມະໂນຈິດ ໄຊຍະທີ ຫົວໜ້າຂແນງພົວພັນ ຮ່ວມມືສາກົລ ຜແນກການຕ່າງປະເທດ ແຂວງຫຼວງນໍ້າທາ
   • ທ່ານ ຄຳມວນ ດວງພະຈັນ ຮອງຫົວໜ້າຂແນງຄວບຄຸມ ພະຍາດຕິດຕໍ່ ຜແນກສາທາທາຣະນະສຸຂ ແຂວງຫຼວງນ້ຳທາ
   • ທ່ານ ມານະຈິດ ຫຼວງລືໄຊ ວິຊາການສັງກັດຢູ່ຜແນກສາທາຣະນະສຸຂ ແຂວງຫຼວງນໍ້າທາ
   • ທ່ານ ວົງເພັດ ຊົນຊາຍ ວິຊາການ ສັງກັດຢູ່ຫ້ອງວ່າການແຂວງຫຼວງນໍ້າທາ
2. ພະນັກງານ-ຣັຖກອນຈຳນວນ 7 ຄົນຖືກລຶບຊື່ອອກຈາກພັກ, ລົງວິໄນຂັ້ນ 4 ອອກຈາກການເປັນ ຣັຖກອນ ໂດຍບໍ່ໄດ້ຮັບນະໂຍບາຍໃດໆ.
3. ພະນັກງານ-ຣັຖກອນ ຈຳນວນ 4 ຄົນຖືກລຶບຊື່ອອກຈາກພັກ, ລົງວິໄນຂັ້ນ 3 ດ້ວຍການປົດຕຳ

ແໜ່ງ ໃຫ້ເປັນວິຊາການທົ່ວໄປ, ຍົກຍ້າຍບ່ອນປະຈຳການ, ໂຈະການເລື່ອນຊັ້ນຂັ້ນເງິນເດືອນ 2 ຂັ້ນ, ໂຈະການຍ້ອງຍໍ 4 ປີ.

4. ພະນັກງານ-ຣັຖກອນ ຈຳນວນ 4 ຄົນ ຖືກປົດຕຳແໜ່ງ ຄະນະພັກ, ໂຈະການຮ່ວມຊີວິດພັກ 6 ເດືອນ, ລົງວິໄນຂັ້ນ 3 ດ້ວຍການປົດຕຳແໜ່ງ 1 ຂັ້ນ ຍົກຍ້າຍບ່ອນປະຈຳການ ໂຈະການເລື່ອນຊັ້ນຂັ້ນເງິນດືອນ 1 ຂັ້ນ, ໂຈະການຍ້ອງຍໍ 2 ປີ.
5. ພະນັກງານ-ຣັຖກອນ ຈຳນວນ 12 ຄົນຖືກປະຕິບັດວິໄນຂັ້ນ 2 ກ່າວເຕືອນຄວາມຜິດ ດ້ວຍການຂຽນໃບສຳຣວດໂຕເອງ ແລະບັນທຶກຄວາມຜິດໄວ້ເປັນຫຼັກຖານ
6. ພະນັກງານ-ຣັຖກອນຈຳນວນ 6 ຄົນ ຖືກຕິຕຽນຄວາມຜິດ.

ເຈົ້າໜ້າທີ່ຜແນກພາຍໃນ ແຂວງຫຼວງນໍ້າທາ ທີ່ເປັນໜ່ວຍງານຮັບຜິດຊອບ ເຣື່ອງການຈັດຕັ້ງປະຕິບັດ ແລະ ພະນັກງານກ່າວວ່າ ໄດ້ຮັບໜັງສືຈາກອຳນາດການປົກຄອງ ແຂວງຫຼວງນໍ້າທາແລ້ວ ກ່ຽວກັບເຣື່ອງການປະຕິບັດວິໄນ ກຸ່ມພະນັກງານ-ຣັຖກອນ ໃນຄັ້ງນີ້ແຕ່ການປະຕິບັດວິໄນ ແລະຂໍ້ກ່າວຫາຕ່າງໆ ບໍ່ມີໃຜຮັບຮູ້ວ່າກຸ່ມພະນັກງານ-ຣັຖກອນ ທັງໝົດກະທຳຄວາມຜິດ ກ່ຽວກັບຫຍັງ.

ດັ່ງເຈົ້າໜ້າ ທີ່ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ຜແນກພາຍໃນ ບໍ່ໄດ້ເຮັດເນາະເພາະວ່າ ຈະແມ່ນຂັ້ນເທີງເປັນຜູ້ເຮັດຫັ້ນນ່າ. ພວກຂ້ອຍກາບໍ່ຮູ້ຄືກັນເນາະ ເພາະວ່າມີແຕ່ເຫັນເອກະສານ ຂັ້ນເທີງຫັ້ນສົ່ງມາໃຫ້ສື່ໆເນາະ.

ກ່ຽວກັບເຣື່ອງການປະຕິບັດວິໄນ ກຸ່ມພະນັກງານ-ຣັຖກອນ ແຂວງຫຼວງນໍ້າທາໃນຄັ້ງນີ້ ເຈົ້າໜ້າທີ່ອົງການຈັດຕັ້ງສາກົລກ່າວວ່າ ເຈົ້າໜ້າທີ່ພະນັກງານ-ຣັຖກອນ ເລົ່ານັ້ນອາດມີສ່ວນກ່ຽວຂ້ອງ ກັບການຮຽກຮັບສິນບົນກັບກຸ່ມນັກລົງທຶນຈີນ ແລະກຸ່ມນັກລົງທຶນຈີນ ທີ່ເຂົ້າມາລົງທຶນ ແລະເຮັດວຽກຢູ່ເຂດເສຖກິຈພິເສດ ສາມຫຼ່ຽມຄຳ, ເຂດເສຖກິຈພິເສດ ບໍ່ເຕັນແດນງາມ ແລະໃນແຂວງພາກເໜືອ ຂອງປະເທດລາວ.

ດັງເຈົ້າໜ້າທີ່ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ເມື່ອກີ້ນີ້ກາຂອງຈີນ ກາຍ້ອນນັກລົງທຶນ ຜູ້ເຂົ້າມາຟ້ອງກົງສູນຈີນກົງສູນ ຈີນກາເຮັດໜັງສືແຈ້ງມາໃຫ້ຣັຖບານລາວ ຣັຖບານລາວມີຫຼັກຖານ ຈັດການເລີຍ.”

ສ່ວນຊາວລາວ ໃນແຂວງຫຼວງພຣະບາງ ທີ່ໄດ້ຕິດຕາມຂ່າວສານ ກ່ຽວກັບເຣື່ອງນີ້ເຫັນວ່າ ຢາກໃຫ້ຣັຖບານລາວ ປາບປາມການສໍ້ຣາສ ບັງຫຼວງ ຢ່າງຈິງຈັງເພາະເຫັນວ່າ ເຣື່ອງການສໍ້ຣາສບັງຫຼວງຂອງເຈົ້າໜ້າທີ່ລາວ ເກີດຂຶ້ນຢ່າງແຜ່ຫຼາຍ ແລະເປັນບັນຫາຊໍ້າເຮື້ອ ມາດົນນານແລ້ວ. ນອກຈາກນີ້ກ ຢາກໃຫ້ຣັຖບານລາວ ອອກມາຊີ້ແຈງຣາຍລະອຽດ ແລະແຈ້ງຂໍ້ມູນຂ່າວສານ ກ່ຽວກັບເຣື່ອງນີ້ໃຫ້ສັງຄົມໄດ້ຮັບຮູ້ ຢ່າງກົງໄປກົງມາ ເພາະເປັນເຣື່ອງໃຫຍ່ທີ່ສັງຄົມລາວ ໃຫ້ຄວາມສົນໃຈຫຼາຍ.

ດັ່ງຊາວລາວທ່ານນີ້ໄດ້ກ່າວວ່າ:

“ຄວາມຈິງແລ້ວ ມັນກາຕ້ອງໄດ້ອອກຂ່າວຫັ້ນແຫຼະ ເພື່ອໃຫ້ສັງຄົມໄດ້ຮັບຮູ້ເພາະວ່າ ມັນມີມາດົນແລ້ວມັນມີຫຼາຍກ່ວານັ້ນກາດີໆ ດີແລ້ວມັນມີຂະບວນການຊັກທອດ ກັນປະເທດຊາຕຈົນຊິລົ່ມລະລາຍແລ້ວ ສົມຮູ້ຮ່ວມຄິດກັນຕ່າງຄົນຕ່າງໂກງ, ຕາມຮ້ານຄ້າຂາຍປະຊາຊົນ ກາວ່າແນວນັ້ນ (ໃຫ້ໄລ່ອອກ) ເຂົາບໍ່ຄ່ອຍຢາກລົມນໍາແລ້ວ.”

ໃນວັນທີ 07 ມິຖຸນາ 2023 ທີ່ຜ່ານມາກອງບັນຊາການ ປກສ ແຂວງຫຼວງນໍ້າທາກໍໄດ້ປະຕິບັດນະວິໄນ ຕໍ່ນາຍແລະພົນຕຳຣວດ ທີ່ເຮັດວຽກປະຈຳຢູ່ດ່ານສາກົລ ບໍ່ເຕັນ ລວມທັງໝົດ 78 ຄົນໃນນັ້ນມີຈຳນວນ 5 ຄົນໃຫ້ອອກຈາກພັກ, ປະຕິບັດວິໄນໄລ່ອອກຈາກກຳລັງ ໂດຍບໍ່ໄດ້ຮັບນະໂຍບາຍໃດໆ ຕາມກົດໝາຍວ່າດ້ວຍ ກຳລັງປ້ອງກັນຄວາມສງົບ ແລະດຳເນີນຄະດີຕາມຂະບວນຍຸຕິທັມ ອີງຕາມແຈ້ງການຂອງກອງບັນຊາການ ປກສ ແຂວງຫຼວງນໍ້າທາ. ສຳລັບຂໍ້ກ່າວຫາ ການປະຕິບັດວິໄນ ຕໍ່ນາຍແລະພົນຕຳຣວດ ທັງໝົດຍ້ອນອະນຸຍາດໃຫ້ ກຸ່ມຄົນຈີນເຂົ້າ-ອອກປະເທດລາວ ໂດຍບໍ່ໄດ້ຮັບອະນຸຍາດ, ຮັບເງິນສິນບົນ ແລະນຳໃຊ້ໜ້າທີ່ຕຳແໜ່ງ ຂອງຕົນເອື້ອອຳນວຍ ຄວາມສະດວກໃຫ້ຄົນຈີນ.