ຄົນງານລາວ ຍັງລັກລອບ ໄປເຮັດວຽກ ຢູ່ໄທຍ

ອຸ່ນແກ້ວ
2022.02.11
Share on WhatsApp
Share on WhatsApp
ຄົນງານລາວ ຍັງລັກລອບ ໄປເຮັດວຽກ ຢູ່ໄທຍ ເຈົ້າໜ້າໄທຍ ຊຸດຕິດຕາມຈັບຄົນງານລາວ ທີ່ລັກເຂົ້າເມືອງແບບຜິດກົດໝາຍ.
RFA

ໃນ​ວັນ​ທີ 8 ກຸມ​ພາ ທີ່​ຜ່ານ​ມາ ເຈົ້າ​ໜ້າ​ທີ່​ທະ​ຫານ​ເຮື​ອ ແລະ ຕຳ​ຣວດ ແຂວງ​ອຸ​ບົນ​ຣາ​ຊ​ທາ​ນີ ຂອງ​ໄທ​ຍ ໄດ້​ຈັບ​ຄົນ​ລາວ 9 ຄົນ ທີ່​ລັກ​ລອບ​ເຂົ້າ​ໄທ​ຍ​ ແບບ​ຜິດ​ກົດ​ໝາຍ. ຄົນ​ລາວ​ທັງ​ໝົດ 9 ຄົນ ອາ​ຍຸ​ແຕ່ 19-28 ປີ ລວມ​ມີຜູ້​ຊາຍ 5 ຄົນ ແລະ ຜູ້ຍິງ 4 ທີ່​ຂີ່​ເຮືອ​ຂ້າມ​ມາ​ຈາກ​ຝັ່ງ​ລາວ. ກຸ່​ມ​ຄົນ​ງານ​ດັ່​ງ​ກ່າວ​ສ່ວນ​ຫຼາຍ ມາ​ຈາກ ແຂວງ​ສວັນ​ນະ​ເຂດ ບໍ່​ມີ​ເອກ​ສານ ຖືກ​ຕ້ອງ ແລະ ໄດ້​ຈ້າງໃຫ້​ນາຍ​ໜ້າຄົນ​ລາວ ​ໃນ​ລາ​ຄາ​ຄົນ​ລະ 10,000 ບາດ ເປັນ​ສ​ະ​ກຸນ​ເງິນ​ໄທ​ຍ ກ່ອນ​ຈະ​ເດີ​ນາງ​ມາ​ເຖິງຝັ່ງ​ໄທ​ຍ ແລະ ນາຍ​ໜ້າ​ບອກ ຈະ​ມີ​ຄົນ​ມາ​ຮັບ ໄປ​ເຮັດ​ວຽກ​ຢູ່​ບາງກອກ ກັບ​ນາຍ​ໜ້າ​ໄທ​ຍ ທີ່​ໄດ້​ຊອກວຽກ​ໄວ້​ໃຫ້​ແລ້ວ.

ເຈົ້າ​ໜ້າ​ທີ່​ຕຳ​ຣວດ ເມືອງ​ເຂັມ​ມະ​ຣາດ ແຂວງ​ອຸ​ບົນ​ຣາ​ຊ​ທາ​ນີ ທ່ານ​ນຶ່ງ ກ່າວ​ຕໍ່​ເອ​ເຊັຽ​ເສ​ຣີ ໃນ​ວັນ​ທີ 11 ກຸມ​ພາ ນີ້​ວ່າ:

ໃນພື້ນທີ່ເຂົາ ໄປຊຸ້ມຢູ່ແລ້ວ ພົບຫຼາຍຄົນ ມາຈາກ ແຂວງສວັນນະເຂດ ແລະ ແຂວງ ຈຳປາສັກ ຈ່າຍເງິນໃຫ້ນາຍໜ້າ 1 ໝື່ນບາດ ນາຍໜ້າປະເທດລາວ ເຂົາຈ່າຍຢູ່ລາວ ເພື່ອໃຫ້ພາຂ້າມມາຝັ່ງໄທ ເຮົາກໍຈະຜັກດັນໄປຕຳຣວດກວດຄົນເຂົ້າເມືອງ ເພື່ອຜັກດັນອອກນອກປະເທດຕໍ່ໄປ ໂດຍບໍ່ໄດ້ປັບໃໝ ເພາະວ່າ ເຂົາຫຼົບໜີເຂົ້າເມືອງ ເພາະວ່າ ພວກເຮົາບໍ່ໄດ້ຈັບພວກທີ່ພາມາ ຫຼືພວກນາຍໜ້າ ເພາະວ່າ ພື້ນທີ່ເຂດຂາຍແດນຢູ່ເມືອງເຂັມມາຣາດ ມີ 40 ກິໂລແມັດ.”

ທ່ານ ກ່າວ​ຕື່ມ​ວ່າ ທີ່​ຜ່ານ​ມາ ແຂວງ​ຕິດ​ຊ​າຍ​ແດນ​ກັບ​ຝັ່ງ​ລາວ ເຈົ້າ​ໜ້າ​ທີ່​ທະ​ຫານ ແລະ ຕຳ​ຣວດ​ຂອງ​ໄທ​ຍ ສາ​ມາດ​ຈັບ​ຄົນ​ງານ​ລາວ ​ທີ່​ສັກ​ລອບ​ເຂົ້າ​ມາ​ແບບ ​ຜິດ​ກົດ​ໝາຍ​ໄດ້​ຕ​ລອດ.

ປັດ​ຈຸ​ບັນ ແຂວງ​ຈຳ​ປາ​ສັກເປີດ​ໃຫ້​ຄົນ​ງານ​ລາວ ທີ່​ມີ MOU ໄປ​ເຮັດ​ວຽກ​ຢູ່​ຕ່າງ​ປະ​ເທດ ເພື່ອ​ໃຫ້​ຖືກ​ກົດ​ໝາຍ. ເຈົ້າ​ໜ້າ​ທີ່​ຜ​ແນກ​ແຮງ​ງານ ແລະ ສວັດ​ດີ​ການ​ສັງ​ຄົມ ແຂວງ​ຈຳ​ປາ​ສັກ ໄດ້​ກ່າວ​ວ່າ:

ເຂົາໃຫ້ເປີດລົງທະບຽນໄວ້ ແຕ່ວ່າ ບໍຣິສັດ ຈັດຫາງານ ເພິ່ນກະຍັງບໍ່ທັນໄດ້ຮັບໄປເນາະ ເພິ່ນກຳລັງໂຄສະນາ ຈະຮັບຄົນໄປອອກແຮງານ ຢູ່ ເພິ່ນຢາກໃຫ້ໄປຖືກຕ້ອງ ບໍ່ ຢາກໃຫ້ລັກໄປ ເປີດໃຫ້ມາລົງທະບຽນໄວ້ ສົ່ງເສີມໄປໃຫ້ຖືກ ມາການຕຳຣວດ ທະຫານ ເຂົາຍາມຢູ່ຫັ້ນແຫຼະ ຄົນເຮົາມັນກໍລັກໄປ.”

ຢູ່​ແຂວງ​ສາ​ຣາ​ວັນ ທີ່​ຕິດ​ກັບ​ປະ​ເທດ​ໄທ​ຍ ແລະ ເຈົ້າ​ໜ້າ​ທີ່​ແຂວງ ກໍ​ໄດ້​ເປີດ​ໃຫ້​ປະ​ຊາ​ຊົນ​ລົງ​ທະ​ບຽນ. ເຈົ້າ​ໜ້າ​ທີ່​ຜ​ແນກ​ແຮງ​ງານ ແລະ ສວັດ​ດີ​ການ​ສັງ​ຄົມ ແຂວງ​ສາ​ຣະ​ວັນ ໄດ້​ກ່າວ​ວ່າ:

ມັນກະມີແຫຼະ ແຕ່ບາງເທື່ອກໍ່ບໍ່ສາມາດສະກັດກັ້ນໄດ້ທັງໝົດອອກ ຄັນທີຜູ້ໃດຕ້ອງການມີວຽກງານທຳ ສະມັກຕາມຣະບົບ ຖືກຕ້ອງຕາມກົດ! ມີບໍຣິສັດຈັດຫາງານ ປະມານເກືອບສອງໝື່ນ.”

ປັດ​ຈຸ​ບັນ ເຈົ້າ​ໜ້າ​ທີ່​ຍັງ​ປິດ​ດ່ານ​ສາ​ກົນ ແລະ ດ່ານ​ຊາຍ​ແດນ ໂດຍ ມີ​ເຈົ້າ​ໜ້າ​ທີ່​ຕຳ​ຣວດ ແລະ ທະ​ຫານ​ເຝົ້າ​ເວນ​ຍາມ ເພື່ອ​ປ້ອງ​ກັນ​ການ​ລັກ​ລອບ​ເຂົ້າ-ອອກ ແບບ​ຜິດ​ກົດ​ໝາຍ. ເຈົ້າ​ໜ້າ​ທີ່ກ່ຽວ​ຂ້ອງ ແຂວງ​ສວັນ​ນະ​ເຂດ ທ່ານ​ນຶ່ງ ໄດ້​ກ່າວ​ວ່າ:  

ກະຄືເຮົາ ຮູ້ເນາະ ພື້ນທີ່ຮັບຜິດຊອບມັນຫຼາຍ ການແຈກຢາຍກຳລັງວຽກຊາຍແດນອາດຈະບໍ່ທົ່ວເຖິງ ກະມີຊ່ອງວ່າງ ມາການສະກັດກັ້ນ ເຮົາກໍຍັງເຮັດຄືເກົ່າ ກະມີເຈົ້າໜ້າທີ່ທະຫານເວນຍາມ ຢູ່ໃນຂອບເຂດຊານແດນ ພວກເຮົາຍັງປິດດ່ານຢູ່.”

ຂັ້ນ​ຕອນ​ເຮັດ MOU ໃຊ້​ເວ​ລາ​ດົນ ແລະ ຕ້ອງ​ໄດ້​ເສັຽ​ເງິນ. ຄົນ​ງານ​ລາວ ທີ່​ເຄີຍ​ເຮັດ​ວຽກ​ຢູ່​ໄທ​ຍ ໄດ້​ກ່າວ​ວ່າ:

ມັນມີຫຼາຍຢ່າງ ແຮງງານແລ່ນ MOU ໃຊ້ເວລາ ດົນ ຄັນດຽວນີ້ ເພາະວ່າ ດ່ານມັນຍັງບໍ່ເປີດ ຝັ່ງໄທ ກໍຍັງບໍ່ເປີດ ມັນກໍແລ່ນຍາກແດ່ ມັນກໍເສັຽເງິນຂຶ້ນ ອີກແດ່ບາດດີ ຄັນຂ້ອຍຊິໄປນີ້ເງິນຕິດໂຕ ຂ້ອຍນີ້ບໍ່ຕ່ຳກວ່າ 2 ໝື່ນ ຫຼື 2 ໝື່ນປາຍ ພຸ້ນແຫຼະ ເພື່ອກິນເພື່ອຢາກ ເພື່ອນັ້ນ ເພື່ອນີ້ ເຂົາກໍຕ້ອງລັກຂຶ້ນໄປ.”

ຄົນສ່ວນ​ໃຫຍ່ ​ມັກ​ລັກ​ລອບ​ເຂົ້າໄປ​ເຮັກ​ໃນ​ໄທ​ຍ ກໍ​ຍ້ອນ ການເຮັດເອກ​ສານ​ຫຍຸ້ງ​ຍາກ​ຫຼາຍ​ລໍ​ຖ້າ ​ນາ​ນເກີ​ນ​ໄປ.

ຄົນ​ງານ​ລາວ ທີ່​ເຄີຍ​ເຮັດ​ວຽກ ຢູ່​ໄທ​ຍ ທ່ານ​ນຶ່ງ ກ່າວ​ວ່າ:

ສຳລັບເຣື່ອງຄ່າໃຊ້ຈ່າຍ MOU ມັນ 17,000 ຫັ້ນເນາະ ແຕ່ວ່າ ມັນຫຍຸ້ງຍາກນຳເອກສານ ຈະໄປໄດ້ບໍ່ໄດ້ ກໍຍັງບໍ່ຮູ້ຕອນນີ້ ບາງຄົນກະໄປເລີ່ຍ ແຕ່ຫາກລັກໄປ.”

ກ່ອນ​ໜ້ານີ້ ວັນ​ທີ 18 ມົກ​ກະ​ຣາ 2022 ເຈົ້າ​ໜ້າ​ທີ່ຕຳ​ຣວດ ຕະ​ເວນ​ຊາຍ​ແດນ​ແມ່​ນ້ຳ​ຂອງ​ໄທ​ຍ ກໍ​ຈັບ​ຄົນ​ງານ​ລາວ ໄດ້ 8 ຄົນ ທີ່ຂີ່​ເຮືອ​ມາ​ຈາກ​ບ້ານ​ທ່າ​ເດື່ອ ເມືອງ​ສອງ​ຄອນ ແຂວງ​ສວັນ​ນະ​ເຂດ ລັກ​ຂ້າມ​ນ້ຳ​ຂອງໄປ​ປະ​ເທດໄທ​ຍ ເຂົ້າ​ມ​າ​ເຂດ​ບ້ານ​ແກ້ງ​ກ້ຽງ ບ້ານ​ນາ​ສນາມ ເມືອງ​ເຂມ​ມະ​ຣາດ ແຂວງ​ອຸ​ບົນຣາ​ຊ​ທາ​ນີ.      

ວັນ​ທີ 8 ມົກ​ກະ​ຣາ 2022 ທີ່​ຜ່ານ​ມາ, ເຈົ້າ​ໜ້າ​ທີ່​ຕຳ​ຣວດ ເມືອງ​ສາມ​ຣ້ອຍຍອດ ແຂວງ ປະ​ຈວບ​ຄື​ຣີ​ຂັນ ກໍ​ສາ​ມາດ​ຈັບ​ຄົນ​ງານ​ລາວ​ໄດ້ 24 ຄົນ ໂດຍ ການ​ຂົ​ນ​ສົ່ງ ​ຜ່ານເສັ້ນ​ທາງ​ເຂົ້າ​ໝູ່​ບ້ານ ເກາະ​ນາ​ນ້ອຍ ກ່ອນ​ເຖິງ​ດ່ານກວດ​ກາ ປະ​ມານ 500 ແມັດ ສ່ວນ​ໃຫຍ່ມາ​ຈາກ ແຂວງ ​ສວັນ​ນະ​ເຂດ ລັກ​ຂ້າມ​ມາໂດຍທາງເຮືອ​ມາ​ຂຶ້ນ​ຝັ່ງ​ໄທ​ຍ ແຂວງ ມຸກ​ດາ​ຫານ ທຸກ​ຄົນ​ເສັຽ​ຄ່າ​ນາຍ​ໜ້າ​ຄົນ​ລະ 9,000-10,000 ບາດ.

ຢ່າງ​ໃດ​ກໍ​ຕາມ ຣັ​ຖານ​ລາວ ແລະ ໄທ​ຍ ກໍ​ມີ​ການ​ເຮັດ​ຂໍ້​ຕົກ​ກັນ ເພື່ອ​ແກ້​ໄຂ​ບັນ​ຫາກ​ດັ່ງ​ກ່າວ ບໍ່​ຢາກ​ໃຫ້​ຄົນ​ງານ​ລາວ ລັກ​ລອບ​ເຂົ້າ​ໄປ​ເຮັດ​ວຽກ​ໃນ​ໄທ​ຍ ແບບ​ຜິດ​ເກົດ​ໝາຍ​ ໂດຍ​​ໃຫ້​ຄົນ​ງານ​ລາວ​ທີ່ມີ MUO ເຂົ້າ​ມາ​ເຮັດ​ວຽກ​ໄດ້ ເຊິ່ງ​ໃນ​ເບື້ອງ​ຕົ້ນ ບໍ​ຣິ​ສັດ ຈັດ​ຫາ​ງານ​ຫຼາຍ​ແຫ່ງ ກໍ​ໄດ້​ເລີ່ມ​ເປີດ​ໃຫ້​ລົງ​ທະ​ບຽນ​ໄວ້​ແລ້ວ.  

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ