ກອງປະຊຸມ ທຳອິດ ຂອງອາຊ່ຽນ

ອາ​ວະ​ຣີ
2016-09-03
ອີແມວລ໌
ຄໍາເຫັນ
Share
ພິມ
ຄະນະກັມມະການ ຜູ້ຕາງໜ້າ ຖາວອນ ປະຈຳອາຊ່ຽນ
ຄະນະກັມມະການ ຜູ້ຕາງໜ້າ ຖາວອນ ປະຈຳອາຊ່ຽນ
RFA/Avary

ກອງປະຊຸມ ທຳອິດ ກ່ອນຈະເຖິງ ກອງປະຊຸມ ສຸດຍອດ ອາຊ່ຽນ ແມ່ນກອງປະຊຸມ ຄະນະກັມມະການ ຜູ້ຕາງໜ້າ ຖາວອນ ປະຈຳອາຊ່ຽນ ຊຶ່ງໄດ້ເປີດຂຶ້ນ ໃນວັນທີ 3 ກັນຍາ ປີ 2016 ນີ້ ທີ່ໂຮງແຮມ ລາວພລາຊາ ນະຄອນຫລວງວຽງຈັນ ພາຍໃຕ້ ການເປັນປະທານ ຂອງທ່ານ ລັດສະໝີ ແກ້ວມະນີ ເອກອັກຄະຣັຖທູດ ຜູ້ຕາງໜ້າ ຖາວອນແຫ່ງສປປລາວ ປະຈຳອາຊ່ຽນ ໂດຍມີບັນດາເອກອັກຄະຣາຊທູດ ແລະ ຜູ້ຕາງໜ້າຖາວອນ ຂອງທັງສິບປະເທດ ສະມາຊິກອາຊ່ຽນ, ຮອງເລຂາທິການໃຫຍ່ອາຊ່ຽນ ແລະ ພະນັກງານການທູດ ທີ່ກ່ຽວຂ້ອງ ເຂົ້າຮ່ວມ.
ຈຸດປະສົງຫລັກ ຂອງກອງປະຊຸມ ເທື່ອນີ້ ແມ່ນເພື່ອແກ້ໄຂ ບັນຫາຄົງຄ້າງ ພາຍໃຕ້ ຂອບຄວາມຮັບຜິດຊອບ ຂອງຄະນະກັມມະການ; ພິເສດ ກອງປະຊຸມ ໄດ້ຮ່ວມກັນ ຮ່າງເອກກະສານ ສຳຣັບກອງປະຊຸມ ເຈົ້າໜ້າທີ່ ຂັ້ນສູງ ກອງປະຊຸມ ສະພາ ປະສານງານ ກອງປະຊຸມ ສຸດຍອດ ອາຊ່ຽນ ຄັ້ງທີ 28 ແລະ 29 ແລະ ກອງປະຊຸມ ສຸດຍອດອື່ນໆ ທີ່ດຳເນີນໄປ ໃນຣະຫວ່າງ ວັນທີ 6 ຈົນເຖິງວັນທີ 8 ເດືອນກັນຍານີ້ ທີ່ນະຄອນຫລວງວຽງຈັນ.
ໃນມື້ກອງປະຊຸມ ຄັ້ງທຳອິດ ຊຶ່ງຈັດຂຶ້ນ ເມື່ອວັນເສົາ ທີ່ຜ່ານມາ, ທ່ານ ທອງລຸນ ສີສຸລິດ, ນາຍົກຣັຖມົນຕຣີສປປລາວ, ໄດ້ກ່າວ ກ່ຽວກັບ ກອງປະຊຸມອາຊ່ຽນ ທາງໂທຣະທັດ ແຫ່ງຊາດລາວ ຕອນນຶ່ງວ່າ:
“ເພື່ອຕ້ອນຮັບ ກອງປະຊຸມສຸດຍອດ ອາຊ່ຽນ ຂ້າພະເຈົ້າ ຂໍເຊີນຊວນ ພໍ່ແມ່ພີ່ນ້ອງ ປວງຊົນລາວ ໃນທົ່ວປະເທດ, ໂດຍສະເພາະ, ປວງຊົນລາວ ນະຄອນຫລວງວຽງຈັນ ຂອງພວກເຮົາ ຂໍໃຫ້ເປັນເຈົ້າພາບທີ່ດີ ຕ້ອນຮັບແຂກດ້ວຍອັດທະຍາສັຍໄມຕຣີ ອັນຈົບງາມ ຕາມຮີດຄອງປະເພນີ ຂອງຊາດລາວເຮົາ ແລະ ປະຊາຊົນລາວເຮົາ ຂໍຂອບໃຈ.”
ເອກອັກຄະຣາຊທູດ ຫລື ຜູ້ຕາງໜ້າຖາວອນ ປະຈຳອາຊ່ຽນ ແມ່ນເຈົ້າໜ້າທີ່ ທາງການຂອງ ແຕ່ລະປະເທດ ສະມາຊິກ ອາຊ່ຽນ ທີ່ໄປເຮັດວຽກ ປະຈຳ ຢູ່ກອງເລຂາອາຊ່ຽນ ທີ່ນະຄອນຫລວງ ຈ່າກາກຕ່າ ປະເທດອິນໂດນີເຊັຍ. ສ່ວນເຈົ້າໜ້າທີ່ ຂັ້ນສູງນັ້ນ ສ່ວນຫລາຍແລ້ວ ຈະແມ່ນ ຫົວໜ້າກົມ ອາຊ່ຽນ ຂອງແຕ່ລະປະເທດ.

ອາວະຣີ RFA ຣາຍງານຈາກ ນະຄອນຫລວງວຽງຈັນ

ຄໍາເຫັນ (2)
Share

ຄ.ນະຄຳມ່ວນ

ຈາກ ທ່າແຂກ

ໃຫ້ປະຊາຊົນລາວຊ່ວຍທຳຄວາມສະອາດທົ່ວໄປແທນ ກຳແພງນະຄອນ ແບບສະມັກໃຈແລ້ວ ຍັງມາເກັບເງິນຄອບຄົວລະ 100 000 ກີບອີກ, ເພື່ອຄຳນັບຮັບຕ້ອນກອງປະຊູມອາຊຽນ, ມີຄວາມຍຸຕຕິທຳດີແລ້ວບໍ? ພະນັກງານພັກ-ຣັຖ ສປປລາວ ໄດ້ຫນ້າ ປະຊາຊົນລາວທູກແລ້ວຍິ່ງຈົນຕື່ມ, ຍ້ອນອຳນາດ ພະເດັດການໂດຍກົງແທ້ໆ, ທີ່ມະນູຕທັງໂລກບໍ່ພຶ່ງປາຖນາ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Sep 07, 2016 01:46 PM

ປະຊາຊົນລາວ

ຈາກ ວຽງຈັນ

ລັດທະບານບໍ່ມີເງີນຈັດກອງປະຊຸມສິຈັດເຮັດຫຍັງ ເປັນຫຍັງຈື່ງຕ້ອງມາເກັບນຳ ປະຊາຊົນຄອບຄົວລະ100000ກີບເງີນແສນກີບບໍ່ແມ່ນນ້ອຍໆເດີທ່ານ ບາງຄອບຄົວບໍ່ມີຊ້ຳເງີນແສນຫັນ ເຈົ້າໄປຂູດຮິດເອົານຳເຂົາເຈົ້າໄດ້ແນວໃດ ບໍ່ມີປັນຍາສິຈັດເຮັດຫຍັງທ່ານເອີຍ... ບໍ່ຮູ້ວ່າປະເທດອື່ນກະເກັບຫລືບໍ່...


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Sep 06, 2016 06:57 PM

ເຕັມຫນ້າ