ປິດປະຊຸມ ສະພາແຫ່ງຊາຕລາວ ຄັ້ງທີ 8 ຊຸດທີ 8

ຈຳ​ປາ​ທອງ
2019-12-06
ອີແມວລ໌
ຄໍາເຫັນ
Share
ພິມ
ຍານາງ ປານີ ຢ່າທໍ່ຕູ້ ປະທານສະພາແຫ່ງຊາຕລາວ ກ່າວປິດກອງປະຊຸມ ສມັຍສາມັນເທື່ອທີ 7 ຂອງ ສະພາແຫ່ງຊາຕ ຊຸດທີ 8 ວັນທີ 25 ມິຖຸນາ 2019
ຍານາງ ປານີ ຢ່າທໍ່ຕູ້ ປະທານສະພາແຫ່ງຊາຕລາວ ກ່າວປິດກອງປະຊຸມ ສມັຍສາມັນເທື່ອທີ 7 ຂອງ ສະພາແຫ່ງຊາຕ ຊຸດທີ 8 ວັນທີ 25 ມິຖຸນາ 2019
ຮູບພາບຈາກ : ປະເທດລາວ

ກອງປະຊຸມ ສມັຍສາມັນ ເທືຶ່ອທີ 8 ຂອງສະພາແຫ່ງຊາຕ ຊຸດທີ 8 ຂອງ ສປປລາວ ທີ່ເປີດມາແຕ່ ມື້ວັນທີ 7 ພຶສຈິກາ ໄດ້ພິຈາຣະນາ ແລະ ຮັບຮອງເອົາ ຫຼາຍບັນຫາ ທີ່ທາງຣັຖບານສເນີ ຮວມທັງ ການຈັດຕັ້ງປະຕິບັດ ວຽກງານ ປີ 2019 ແລະ ທິດທາງແຜນວຽກ ປີ 2020, ການຈັດຕັ້ງປະຕິບັດ ແຜນພັທນາ ເສຖກິຈ-ສັງຄົມ, ການແກ້ໄຂ ສະພາບຄວາມຫຍຸ້ງຍາກ ທາງດ້ານ ເສຖກິຈ,  ຜົລກະທົບ ຈາກພັຍທັມຊາດ ແລະ ບັນຫາອື່ນໆ, ເຊິ່ງທ່ານ ທອງລຸນ ສີສຸລິດ, ນາຍົກຣັຖມົນຕຣີ ກ່າວຕໍ່ກອງປະຊຸມວ່າ:

“ຣັ​ຖບານ ຍັງມີຄວາມພະຍາຍາມສູງ ໃນການຈັດຕັ້ງປະຕິບັດ ແຜນພັທນາ ເສຖກິຈ-ສັງຄົມ ເທື່ອນີ້ ດ້ວຍສະພາບແວດລ້ອມ ທີ່ເຕັມໄປດ້ວຍ ຄວາມທ້າທາຍ ຫຍຸ້ງຍາກ ຕ່າງໆນາໆ. ສະພາບຂອງໂລກ ກໍບໍ່ອຳນວຍ ແລ້ວກໍສະພາບພາຍໃນ ປະເທດຂອງເຮົາ.”

ໃນກອງປະຊຸມ, ນອກຈາກ ໄດ້ພິຈາຣະນາ ແລະ ຮັບຮອງ ເອົາບັນຫາຕ່າງໆ ທີ່ຣັຖບານ​ ສເນີແລ້ວ ກໍຍັງໄດ້ພິຈາຣະນາ ແລະ ຮັບຮອງເອົາຣາຍງານ ຂອງອົງການກວດກາ ຣັຖບານ, ອົງການກວດສອບ ແຫ່ງຣັຖ, ອົງການຕຸລາການ ກໍໄດ້ສເນີ ກ່ຽວກັບ ວຽກງານຂອງຕົນ ແລະ ທັງໄດ້ຮັບຮອງເອົາ ຮ່າງກົດໝາຍ 8 ສະບັບ ທີ່ຣັຖບານ ສເນີນຳດ້ວຍ.

ກອງປະຊຸມ ສມັຍສາມັນ ເທືຶ່ອທີ 8 ຂອງສະພາແຫ່ງຊາຕ ຊຸດທີ 8 ທີ່ຍານາງ ປານີ ຢາທໍ່ຕູ້ ປະທານສະພາແຫ່ງຊາດ ເປັນປະທານນີ້, ໄດ້ປິດລົງ ໃນມືວັນທີ 6 ທັນວາ ດັ່ງຍານາງກ່າວວ່າ:

“ໃນໂອກາດນີ້ ຂ້າພະເຈົ້າ ຂໍປະກາດ ອັດກອງປະຊຸມ ສມັຍສາມັນ ເທື່ອທີ 8 ຂອງສະພາແຫ່ງຊາດ ຊຸດທີ 8 ຢ່າງເປັນທາງການ ນັບແຕ່ເວລານີ້ເປັນຕົ້ນໄປ, ຂໍຂອບໃຈ.”

ຮ່າງກົດໝາຍ 8 ສະບັບ ທີ່ກອງປະຊຸມ ສະພາແຫ່ງຊາຕ ຮັບຮອງເອົານັ້ນ, ມີຮ່າງກົດໝາຍໃໝ່ 2 ສະບັບ ຄື ຮ່າງກົດໝາຍ ວ່າດ້ວຍ ຮູບເງົາ ແລະ ວ່າດ້ວຍ ຄວາມສເມີພາບຍິງ-ຊາຍ ແລະ ຮ່າງກົດໝາຍ ສະບັບປັບປຸງ 6 ສະບັບ ຄືຮ່າງກົດໝາຍ ວ່າດ້ວຍ ການລົ້ມລະລາຍ ຂອງວິສາຫະກິຈ, ວ່າດ້ວຍ ການອະນາມັຍ, ກັນພະຍາດ ແລະ ສົ່ງເສີມຄຸນນະພາບ, ຮ່າງກົດໝາຍ ວ່າດ້ວຍ ການປະກັນພັຍ, ວ່າດ້ວຍ ຫຼັກຊັພ, ວ່າດ້ວຍກິລາ-ກາຍກັມ ແລະ ຮ່າງກົດໝາຍ ວ່າດ້ວຍ ການສົ່ງເສີມ ການລົງທຶນ.

ໃນກອງປະຊຸມສະພາ ເທື່ອນີ້, ຄນະປະຈຳ ສະພາແຫ່ງຊາຕ ໄດ້ສເນີ ໃຫ້ຣັຖບານ ເອົາໃຈໃສ່ ຄົ້ນຄວ້າຫຼາຍບັນຫາ ທີ່ກ່ຽວຂ້ອງ ກັບການແກ້ໄຂ ບັນຫາເສຖກິຈ ເປັນຕົ້ນ ການຄົ້ນຄວ້າວິໃຈ ເພື່ອຮັບປະກັນ ອັດຕຣາ ການເຕີບໂຕ ຂອງລວມຍອດ ມູລຄ່າ ຜລິຕພັນພາຍໃນ ຫລື GDP ທີ່ກຳນົດໄວ້ ໃນຣະດັບ 6.5%. ເອົາໃຈໃສ່ ດຶງດູດ ແລະ ສົ່ງເສີມ ການລົງທຶນ ທັງພາກເອກກະຊົນ ພາຍໃນປະເທດ ແລະ ຕ່າງປະເທດ ໃຫ້ບັນລຸ ຕາມຄາດ​ໝາຍ, ເຮັດໃຫ້ ສະບຽງອາຫານ ເປັນຕົ້ນ ເຂົ້າ, ພືດຜັກ, ຊີ້ນ, ປາ, ໄກ່ ແລະ ໄຂ່ ໃຫ້ພຽງພໍ ກັບຄວາມຕ້ອງການ ພາຍໃນປະເທດ. ຄົ້ນຄວ້າ ແລະ ປະຕິບັດ ນະໂຍບາຍ ໃຫ້ແກ່ປະຊາຊົນ ແລະ ຜູ້ປະກອບການ ທີ່ໄດ້ຮັບຜົນກະທົບ ຈາກພັຍທັມຊາດ ດ້ວຍການ ຍົກເວັ້ນການເກັບພັນທະ ອາກອນ, ຫຼຸດຄ່າໄຟຟ້າ, ເລື່ອນຊຳລະ ໜີ້ທນາຄານ ແລະ ຫຼຸດດອກເບັ້ຽ.

ໃນກອງປະຊຸມ ຜູ້ແທນຫຼາຍທ່ານ ກໍມີຄຳເຫັນຫຼາຍຢ່າງ ທັງຍ້ອງຍໍ ແລະ ຕຳນິ ການບໍຣິຫານງານ ຂອງຣັຖບານ ແລະ ຂອງພະນັກງານ ໃນການປະຕິບັດໜ້າທີ່, ເຊິ່ງໃນນັ້ນ ຮວມທັງທ່ານ ສາຍທອງ ແກ້ວດວງດີ, ສະມາຊິກສະພາແຫ່ງຊາຕ ກໍໄດ້ເວົ້າເຖິງ ການສໍ້ໂກງ ຂອງເຈົ້າໜ້າທີ່ຣັຖ ບາງຄົນວ່າ ເຮັດແບບບໍ່ຢ້ານກົວ ຣະບຽບກົດໝາຍ.

“ສະນັ້ນ, ຕໍ່ບັນຫາຕົວນີ້ ການໂກງກິນ ຢູ່ຣະຫວ່າງທາງ ປະຊາຊົນເຣີ່ມນັບຖືກົດໝາຍ ເງິນຖືກເຂົ້າມາຣັ​ຖ ແລະ ເສັຽຢູ່ກາງທາງ ຍ້ອນໜ່ວຍງານ ຂອງຣັຖເອງນີ້ໄດ໋. ປະຊາຊົນ ຜູ້ປະກອບການ ເສັຽພາສີ ອາກອນ ໃຫ້ຣັ​ຖ ຢ່າງເອົາໃຈໃສ່. ຣາຍຮັບ ເຂົ້າງົບປະມານ ສູນກາງ ຣັ​ຖບານ ໜ້ອຍນຶ່ງ, ກໍສະແດງວ່າ ຣັຖະບານເຮົານີ້ ເຣີ່ມທຸກລົງໆ ພະນັກງານ ຢູ່ໃນກົງຈັກຣັ​ຖ ຢູ່ເຄິ່ງກາງ ຮັ່ງຂຶ້ນໆ. ອັນນີ້ມັນຜິດຫຼັກການ.”

ແລະ ສະມາຊິກ ສະພາແຫ່ງຊາຕ ຄົນອື່ນໆ ກໍມີຄວາມເຫັນ ເຖິງຫຼາຍບັນຫາ ຮວມທັງບັນຫາ ທີ່ເຮັດໃຫ້ ຣັຖບານ ບໍ່ສາມາດ ເກັບຣາຍຮັບ ໄດ້ຕາມເປົ້າໝາຍ, ການພັທນາເສຖກິຈ, ລວມຍອດມູນຄ່າ ຜລິຕພັນ ພາຍໃນ ບໍ່ໄດ້ຕາມແຜນການ ທີ່ວ່າ. ໃນປີ 2019 ນີ້ ຈະໃຫ້ໄດ້ 6.7%, ແຕ່ອາຈໄດ້ພຽງ 6.4% ແລະ ການເປັນໜີ້ຫຼາຍ. ຂນະທີ່ນັກຊ່ຽວຊານ ດ້ານການເງິນ ຂອງທະນາຄານໂລກ ປະຈຳລາວ ຢືນຢັນ ວ່າ ຣັຖບານລາວ ຕ້ອງປະເຊີນກັບ ສະພາວະ ການເປັນໜີ້ ເພີ້ມຂຶ້ນ ຢ່າງຕໍ່ເນື່ອງ ຄື ໜີ້ຈະເພີ້ມຂຶ້ນຈາກ 65,3% ໃນປີ 2018 ເປັນ 68% ໃນປີ 2019 ແລະ ຫຼາຍກວ່າ 70% ໃນປີ 2020, ເຊິ່ງເປັນປີສິ້ນສຸດ ຂອງແຜນພັທນາເສຖກິຈ-ສັງຄົມ 5 ປີຄັ້ງທີ 8 ຂອງຣັຖບານລາວ.

ຄໍາເຫັນ (1)
Share

(

ກອງ​ປະ​ຊຸມ​ສະ​ພາ ກໍ​ອັດ​ລົງ​ດ້ວຍ​ຜົນ​ສຳ​ເລັດ ຕາມ​ທີ່​ທາງ​ການ​ເວົ້າ​ມາ ທຸກໆ​ປີ​ກໍ​ອັດ​ລົງ​ດ້ວຍ​ຜົນ​ສຳ​ເລັດ​ຄື​ກັນ ແຕ່​ສິ່ງ​ທີ່​ຫ​ນ້າ​ເປັນ​ຫ່ວງ ຄື​ຄຳ​ສະ​ເຫ​ນີ ຂອງ​ປະ​ຊາ​ຊົນ ຕໍ່​ສະ​ມາ​ຊິກ​ສະ​ພາ​ແຫ່ງ​ຊາດ ປະ​ຈຳ​ເດ​ຂ ທີ່​ຕົນ​ອາ​ໃສ​ຢູ່​ນັ້ນ ສະ​ພາ​ກໍ່​ໄດ້​ສະ​ເຫ​ນີ ໄປ​ຫລາຍ​ບັນ​ຫາ ແລະ ກໍ​ມີ​ບາງ​ບັນ​ຫາ ທີ່​ບໍ່​ໄດ້​ສະ​ເຫ​ນີ. ສ່ວນ​ຂໍ້​ສະ​ເຫ​ນີ ທີ່​ສະ​ມາ​ຊິກ​ສະ​ພາ​ແຫ່ງ​ຊາດ ສະ​ເຫ​ນີ ໄປ​ນັ້ນ ຫວັງ​ວ່າ ທ່ານ​ນາ​ຍົກລັດ​ຖະ​ມົນ​ຕີ ຈະ​ເອົາ​ໄປ​ແກ້​ໄຂ ແລະ ກັບ​ມາ ລາຍ​ງານ​ໃຫ້​ປະ​ຊາ​ຊົນ​ຮັບ​ຮູ້​ວ່າ ໄດ້​ແກ້​ໄຂ​ຫ​ຍັງ​ແດ່ ໄດ້​ຈັບ​ຜູ້​ກະ​ທຳ​ຜິດ​ມາ​ລົງ​ໂທດ​ຈັກ​ຄົນ ໄດ້​ຈັບ​ຜູ້​ໂກງ​ເງິນ​ໄປ ມາ​ລົງ​ໂທດ​ຈັກ​ຄົນ ໄດ້​ນຳ​ເອົາ​ເງິນ ກັບ​ຄືນ​ມາ​ເຂົ້າ​ລັດ ຈັກ​ຕື້​ກີບ ຫລືວ່າ ຍ້າຍ​ແຕ່​ຕຳ​ແຫ​ນ່ງ ແລະ ກໍ​ງຽບ​ໄປ​ເລີຍ ຄື​ກັນ​ກັບ ຫລາຍໆ​ຄົນ ເປັນ​ຕົ້ນ​ແມ່ນ ບັນ​ຫາ​ເຈົ້າ​ແຂວງ ຮອງ​ເຈົ້າ​ແຂວງ ລັດ​ຖູ​ມົນຕີ ຮອ​ງ​ລັດ​ຖະ​ມົນ​ຕີ ຫົວ​ຫ​ນ້າ​ກົມ ຮອງ​ຫົວ​ຫ​ນ້າ​ກົມ. ຢ່າງ​ໃດ ກໍ​ໃຫ້​ຕິດ​ຕາມ​ໄປ​ນຳ​ກັນ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Dec 12, 2019 07:12 AM

ເຕັມຫນ້າ