ໂທຣະທັດກອງທັບລາວ ຊ່ອງ 7

ສຸພັດຕາ
2020-09-11
ອີແມວລ໌
ຄໍາເຫັນ
Share
ພິມ
ອຸປກອນເຄື່ອງໃຊ້ ຈາກ ສະຖານີໂທຣະທັສ ແຫ່ງຊາດລາວ ທີ່ນໍາສເນີຂ່າວສານ ການປະຕິບັດວຽກງານ ຂອງຣັຖບານ
ອຸປກອນເຄື່ອງໃຊ້ ຈາກ ສະຖານີໂທຣະທັສ ແຫ່ງຊາດລາວ ທີ່ນໍາສເນີຂ່າວສານ ການປະຕິບັດວຽກງານ ຂອງຣັຖບານ
RFA

ໃນມື້ວັນທີ 9 ກັນຍາ ຜ່ານມານີ້ ທາງການລາວ ໄດ້ມີພິທີເປີດໃຊ້ ສະຖານນີ ໂທຣະທັດ ຊ່ອງ 7 ຂອງກະຊວງປ້ອງກັນປະເທດ ເຊິ່ງເປັນ ສະຖານນີໂທຣະທັດ ຊ່ອງໃໝ່ ຂອງລາວ ເປັນຊ່ອງ ທີ່ນໍາສເນີກ່ຽວກັບ ຂ່າວສານ ແລະ ຄວາມເຄື່ອນໄຫວ ຂອງກອງທັບລາວ ເປັນຫຼັກ ເຊິ່ງໄດ້ຮັບທຶນຊ່ອຍເຫຼືອ ຈາກ ກອງທັບຈີນ ໃນການກໍ່ສ້າງສະຖານນີ ແລະ ອຸປກອນຕ່າງໆ ໂດຍກະຊວງປ້ອງກັນປະເທດລາວ ເປັນຜູ້ ຄວບຄຸມທັງໝົດ, ດັ່ງເຈົ້າໜ້າທີ່ກະຊວງປ້ອງກັນປະເທດ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 10 ກັນຍາ ນີ້ວ່າ:

“ເອີ່ ຊ່ອງໃໝ່ ກໍາລັງຊິທົດລອງເປີດ ມີແຕ່ພວກເຮົາເປັນຣາຍການ ຂອງພວກເຮົາເອງ ເທົ່ານັ້ນຊື່ໆ ບໍ່ທັນໄດ້ເຮັດນໍາທົດລອງອອກອາກາດ ຍັງບໍ່ທັນໄດ້ເຕັມສ່ວນ ພວກເຮົາກະເລີ້ມ ທົດລອງຊື່ໆ ມີແຕ່ພວກເຮົາໝົດ.”

ທ່ານກ່າວຕື່ມວ່າ ສໍາລັບຣາຍຣະອຽດ ຂອງຣາຍການຕ່າງໆ ແລະ ຂ່າວສານ ທີ່ຈະນໍາສເນີນັ້ນ ຍັງບໍ່ສາມາດແຈ້ງໃຫ້ຮູ້ໄດ້ເທື່ອວ່າຈະເປັນ ໄປໃນທິດທາງໃດ ຍ້ອນກໍາລັງມີການຫາລືກັນ ເພີ້ມເຕີມຢູ່ ເຊິ່ງກະຊວງປ້ອງກັນປະເທດລາວ ເປັນຜູ້ຄວບຄຸມ ແລະ ຜລິດຣາຍການເອງ ທັງໝົດ ແລະເມື່ອສາມາດອອກອາກາດໄດ້ ແບບເຕັມສ່ວນແລ້ວ ປະຊາຊົນ ທົ່ວປະເທດ ກໍສາມາດຕິດຕາມ ເບິ່ງໄດ້ທັງທາງໂທຣະທັດ ແລະ ທາງສື່ອອນລາຍຕ່າງໆ.

ກ່ອນໜ້ານີ້ ທ່ານ ພົນເອກ ຈັນສະໝອນ ຈັນຍາລາດ ຣັຖມົນຕຣີ ກະຊວງປ້ອງກັນປະເທດ ໄດ້ກ່າວຕໍ່ສື່ມວນຊົນທ້ອງຖິ່ນ ໃນມື້ວັນທີ່ 9 ກັນຍາ ທີ່ຜ່ານມານີ້ ວ່າ ສະຖານນີ ໂທຣະທັດ ຊ່ອງ 7 ເປີດຂຶ້ນເພື່ອເຮັດໃຫ້ວຽກງານ ໂຄສະນາຂ່າວສານ ຂອງກອງທັບລາວ ມີບົດບາດ ກ້າວໃໝ່ ເຊິ່ງທາງພາກສ່ວນກ່ຽວຂ້ອງ ຈະມີການເອົາໃຈໃສ່ ຄຸ້ມຄອງ, ບໍາລຸງຮັກສາ ແລະ ໃຊ້ສະຖານນີ ໂທຣະທັດ ໃຫ້ເກີດປໂຍດສູງສຸດ.

ກ່ຽວກັບການເປີດໂຕ ສະຖານນີໂທຣະທັດ ຊ່ອງ 7 ນີ້ ຊາວລາວຫຼາຍຄົນ ບໍ່ໄດ້ໃຫ້ຄວາມສົນໃຈ ໃນການຕິດຕາມເບິ່ງ ແຕ່ຢ່າງໃດ ແລະບໍ່ ຮູ້ຊໍ້າວ່າຈະມີ ໂທຣະທັດຊ່ອງ 7 ເກີດຂຶ້ນ ຍ້ອນສ່ວນໃຫຍ່ ບໍ່ມັກເບິ່ງຂ່າວ ຫຼືຣາຍການຕ່າງໆ ຂອງຊ່ອງໂທຣະທັດລາວຢູ່ແລ້ວ ມັກເບິ່ງແຕ່ ຊ່ອງໂທຣະທັດ ຂອງປະເທດໄທຍ ຫຼາຍກວ່າ, ດັ່ງຊາວລາວ ຄົນນຶ່ງ ເວົ້າວ່າ:

“ບໍ່ຮູ້ເລີຍບາດນີ້ ກະບໍ່ຄ່ອຍໄດ້ເບິ່ງນະ ເວົ້າຄວາມຊື່ ບໍ່ຄ່ອຍໄດ້ເບິ່ງເລີຍ ແທບບໍ່ໄດ້ເບິ່ງເລີຍ ວ່າຊັ້ນຊະຊ່ອງລາວ ເປັນລະຄອນເປັນຫຍັງ ກະເບິ່ງ ແຕ່ທາງຂອງໄທຍ.”

ຊາວລາວອີກຄົນນຶ່ງເວົ້າວ່າ ກ່ຽວກັບຂ່າວ ທີ່ທາງການລາວ ຈະເປີດສະຖານນີ ໂທຣະທັດ ຊ່ອງ 7 ນັ້ນຕົນບໍ່ໄດ້ໃຫ້ຄວາມສົນໃຈ ແລະຄິດ ວ່າຈະບໍ່ໄດ້ຕິດຕາມ ເບິ່ງຢ່າງແນ່ນອນ ເພາະວ່າ ສ່ວນໃຫຍ່ມັກເບິ່ງຂ່າວ ຫຼື ອ່ານຂ່າວຄວາມເຄື່ອນໄຫວ ຂອງສັງຄົມ ຜ່ານທາງສື່ອອນລາຍ ຫຼາຍກວ່າ ທາງໂທຣະທັດ ແລະ ກໍມີຄວາມເຫັນ ກ່ຽວກັບ ການເປີດໂຕ ໂທຣະທັດ ຊ່ອງ ດັ່ງກ່າວ:

“ບໍ່ນະ ສ່ວນເຮົາບໍ່ໄດ້ເບິ່ງຊ່ວງນີ້ບໍ່ໄດ້ເບິ່ງຊໍ້າ ບໍ່ໄດ້ຕິດຕາມສ່ວນຫຼາຍບໍ່ໄດ້ເບິ່ງ ເຣື້ອງອັນນູ້ນນີ້ນັ້ນ ເຮົາຕິດຕາມເບິ່ງຢູ່ໃນເຟສເອົາຊື່ໆນະ.”

ຊາວລາວ ທີ່ເຮັດວຽກຢູ່ປະເທດໄທຍ ຄົນນຶ່ງ ໃຫ້ຄວາມເຫັນກ່ຽວກັບເຣື່ອງນີ້ວ່າ ຕົນບໍ່ໄດ້ໃຫ້ຄວາມສໍາຄັນ ຕໍ່ການເປີດ ໂທຣະທັດ ຊ່ອງ 7 ດັ່ງກ່າວ ຍ້ອນຮູ້ຢູ່ແລ້ວວ່າ ເປົ້າໝາຍຫຼັກ ຄືຈະຕ້ອງນໍາສເນີຂໍ້ມູນ ຂອງກອງທັບ ແລະເປັນກະບອກສຽງຂອງພັກ-ຣັຖ ຫຼາຍກວ່າ ທີ່ຈະ ຣາຍງານຂ່າວເຖິງຄວາມເດືອດຮ້ອນ ຂອງ ປະຊາຊົນ:

“ບໍ່ຄ່ອຍໄດ້ໃຫ້ຄວາມສໍາຄັນຫຍັງຫຼາຍເນາະ ສ່ວນຫຼາຍກະຄື ຕັ້ງຂ່າວກ່ອນຂຶ້ນມາ ກະສນັບສນຸນກອງທັບ ຫຼາຍກວ່າ ເປັນກະບອກສຽງໃຫ້ ກອງທັບ ໃຫ້ພັກຣັຖ ຫຼາຍກວ່າ ບໍ່ແມ່ນວ່າ ນໍາສເນີຂ່າວສານ ຂໍ້ມູນແບບຕຣົງໄປຕຣົງມາ ທຸກໆຊ່ອງ ທີວີ ຂອງລາວ ສ່ວນຫຼາຍກະເປັນນໍາ ສເນີ ຂ່າວແຕ່ເຣື່ອງ ທະຫານ ເຣື່ອງຕໍາຣວດ ບໍ່ໄດ້ວ່າ ນໍາສເນີ ເຣື່ອງຄວາມເດືອດຮ້ອນ ຂອງ ປະຊາຊົນ.”

ແຕ່ເຖິງຢ່າງໃດກໍຕາມ ມີຊາວລາວຈໍານວນນຶ່ງ ທີ່ຮູ້ສຶກຕື່ນເຕັ້ນ ກັບການເປີດສະຖານນີໂທຣະທັດຊ່ອງ 7 ຂອງກອງທັບ ແລະຈະຕິດຕາມ ເບິ່ງຊ່ອງດັ່ງກ່າວ ເຊິ່ງຢາກໃຫ້ມີການນໍາ ສເນີຂ່າວສານກ່ຽວກັບ ກອງທັບ ແລະເຜີຍແຜ່ກ່ຽວກັບ ປວັດສາດ ການສູ້ຣົບໃນສມັຍສົງຄາມ, ດັ່ງທ່ານກ່າວວ່າ:

“ເອີ່ ກະສົນໃຈເບິ່ງຢູ່ ແຕ່ກະບໍ່ທັນໄດ້ເບິ່ງເທື່ອວ່າຊັ້ນຊະ ຕັ້ງຊ່ອງໂທຣະທັດ ມັນກະມີຜົນດີຫຼາຍຢ່າງ ຫັ້ນແຫຼະ ເຣື່ອງກອງທັບ ກະມັນກະ ຕ້ອງເວົ້າເຣື່ອງການສູ້ຮົບຕົບຕີ ດ້ານປວັດສາດ ຫັ້ນແຫຼະ ຢາກໃຫ້ເພິ່ນມີແນວນີ້ຕລອດ.”

ໃນເບື້ອງຕົ້ນ ກອງທັບປົດປ່ອຍ ປະຊາຊົນຈີນ ໄດ້ໃຫ້ງົບປະມານ ຊ່ອຍເຫຼືອແກ່ການສ້າງສະຖານນີ ໂທຣະທັດແຫ່ງນີ້ ຈໍານວນຫຼາຍກວ່າ 11 ຕື້ກີບໃນນັ້ນປະກອບດ້ວຍອາຄານສູງ 4 ຊັ້ນ, ຫ້ອງສະຕູດິໂອ ສໍາລັບຈັດຣາຍການ 2 ຫ້ອງ, ຫ້ອງອັດສຽງ 1 ຫ້ອງ, ຫ້ອງເຕັກນິກ ຕັດຕໍ່ ແລະ ຫ້ອງບໍຣິຫານ ພ້ອມດ້ວຍອຸປກອນຄົບຊຸດ ໂດຍສົ່ງສັນຍານ ຜ່ານດາວທຽມລາວແຊັດ 1 ແລະໃຊ້ສັນຍານເຊື່ອມຕໍ່ສາຍສົ່ງ ຂອງບໍຣິສັດສະກາຍໂທຣະຄົມລາວ, ອີງຕາມການຣາຍງານ ຂອງໜັງສືພິມຂ່າວສານປະເທດລາວ ໃນວັນທີ 9 ເດືອນກັນຍາ ປີ 2020.

ເຕັມຫນ້າ