ທ.ຊິນໂຊ ອາເບ ຢ້ຽມຢາມ ສະຫະຣັດ

ສະຫະຣັດ ອະເມຣິກາ ກັບ ຍີ່ປຸ່ນ ສລອງ ຄວາມ ສັມພັນ ແລະ ມິຕພາບ ຣະຫ່ວາງ ກັນ ອີກ ໃນ ເວລາ ທີ່ ນາຍົກ ຣັຖມົນຕຣີ ຍີ່ປຸ່ນ ທ່ານ ຊິນໂຊ ອາເບ ແລະ ພັລຍາ ໄດ້ ເດີນທາງ ມາ ຢ້ຽມຢາມ ນະຄອນ ຫລວງ ວໍຊິງຕັນ ດີຊີ ໃນ ວັນທີ 28 ເມສາ ປີ 2015 ນີ້. ທ່ານ ບາຣັກ ໂອບາມາ ປະທານາທິບໍດີ ສະຫະຣັດ ອະເມຣິກາ ພ້ອມດ້ວຍ ພັລຍາ ຍານາງ  Michelle Obama ໄດ້ ໃຫ້ການ ຕ້ອນຮັບ ດ້ວຍ ຄວາມ ອົບອຸ່ນ ຢູ່ ທີ່ເດີ່ນ ທໍານຽບ ປະທານາທິບໍດີ:

ສະບາຍດີ.. ຕາງໜ້າ ໃຫ້ ປະຊາຊົນ ອະເມຣິກັນ ມີແຊນ ແລະ ຂ້າພະເຈົ້າ ເອງ ຖື ເປັນກຽດ ຢ່າງສູງ ຍິນດີ ຕ້ອນຮັບ ທ່ານ ນາຍົກ ຣັຖມົນຕຣີ ອາເບ ແລະ ຍານາງ ອາເບ ແຫ່ງ ຍີ່ປຸ່ນ ຊຶ່ງ ເປັນ ພັນທະມິດ ນຶ່ງ ທີ່ ໃກ້ຊິດ ທີ່ສຸດ ຂອງ ສະຫະຣັຖ ອະເມຣິກາ ໃນໂລກ.

ທ່ານ ໂອບາມາ ກ່າວ ຕໍ່ໄປວ່າ ການ ຢ້ຽມຢາມ ຂອງ ທ່ານ ອາເບ ຄັ້ງນີ້ ເປັນ ປວັດສາດ ສໍາຄັນ ບັ້ນນຶ່ງ ອີກ. ໃນ ປີ 1960 ປະທານາທິບໍດີ ໄອເຊນຮາວເອີ້ ໄດ້ ຕ້ອນຮັບ ພໍ່ເຖົ້າ ຂອງ ທ່ານ ຊິນໂຊ ອາເບ ນາຍົກ ຣັຖມົນຕຣີ ກີຊີ Kizhi ຢູ່ ທີ່ ທໍານຽບ ຂາວ ແຫ່ງນີ້. ທັງສອງ ໄດ້ ລົງນາມ ໃນ ສົນທິ ສັນຍາ ວ່າດ້ວຍ ຄວາມ ໝັ້ນຄົງ ອັນເຮັດ ໃຫ້ ສອງ ປະເທດ ເປັນ ເພື່ອນມິດ ໝັ້ນຄົງ ຍືນຍົງ ມາ ຮອດ ເທົ່າ ທຸກວັນ ນີ້. ມື້ນີ້ ສະຫະຣັຖ ອະເມຣິກາ ຍິນດີ ຕ້ອນຮັບ ນາຍົກ ຣັຖມົນຕຣີ ທ່ານ ອາເບ ຄືກັນກັບ ພວກເຮົາ ນໍາເອົາ ພັນທະມິດ ມາຢູ່ ຄຽງຂ້າງ ພວກເຮົາ.

ມື້ນີ້ ສະຫະຣັຖ ອະເມຣິກາ ໄດ້ເອົາ ບົດບາດ ການ ນໍາພາ ໃນ ຂົງເຂດ ເອເຊັຽ ປາຊີຟິກ ຄືນໃໝ່, ນາຍົກ ຣັຖມົນຕຣີ ທ່ານ ອາເບ ກໍາລັງ ນໍາພາ ຍີປຸ່ນ ໄປສູ່ ບົດບາດ ໃໝ່ ໃນ ເວທີ ການນໍາ ໂລກ. ຄວາມເປັນ ພັນທະມິດ ຂອງ ສອງ ປະເທດ ນີ້ ແມ່ນ ເວົ້າເຖິງ ອະນາຄົດ ຂອງໂລກ ຄວາມ ໝັ້ນຄົງ ຂອງ ປະເທດ ເຮົາ ໃນໂລກ ການຄ້າ ທີ່ ມີຄວາມ ເປັນທັມ ແລະ ເສຣີ ຄວາມ ສະເໝີພາບ ທາງດ້ານ ສິດທິ ມະນຸດ ທຸກຄົນ ໃນ ທົ່ວໂລກ ແລະ ໃນ ປະເທດ ຂອງ ພວກເຮົາ ເອງ ແລະ ແມ່ຍິງ ດ້ວຍ.

ຕໍ່ຈາກ ນັ້ນ ນາຍົກ ຣັຖມົນຕຣີ ຊິນໂຊ ອາເບ ກໍກ່າວ ຂອບໃຈ ປະທານາທິບໍດີ ໂອບາມາ ໃນການ ຮັບຕ້ອນ ທີ່ ອົບອຸ່ນ ໃນ ຄັ້ງນີ້. ທ່ານ ຊິນໂຊ ອາເບ ໄດ້ ເວົ້າ ເປັນ ພາສາ ຍີປຸ່ນ ຜ່ານ ລ່າມແປ ພາສາ ໃນ ຕອນນຶ່ງ ວ່າ:

"ການ ຢ້ຽມຢາມ ນະຄອນ ຫລວງ ວໍຊິງຕັນ ໃນຄັ້ງ ນີ້ ຖືວ່າ ພິເສດ. ທ່ານວ່າ ນັບແຕ່ ທ່ານໄດ້ ເຂົ້າຮັບ ຕໍາແຫນ່ງ ນາຍົກ ຣັຖມົນຕຣີ ມານີ້ ນະໂຍບາຍ ການຕ່າງ ປະເທດ ຂອງ ທ່ານ ອັນທີ່ ຮິບດ່ວນ ທີ່ສຸດ ແມ່ນ ຣື້ຟືນ ຄວາມເປັນ ພັນທະມິດ ກັບ ສະຫະຣັຖ ອະເມຣິກາ. ເມື່ອ ສອງປີ ກ່ອນ ທ່ານໄດ້ ພົບປະ ເຈຣະຈາກັບ ທ່ານ ໂອບາມາ ນັບແຕ່ ນັ້ນມາ ພວກທ່ານ ໄດ້ ສົນທະນາ ກັນ ເຣື້ອງ ການຜັນ ຂະຫຍາຍ ການເປັນ ຄູ່ຮ່ວມ ແລະ ການ ຈັດວາງ ກອງ ກໍາລັງ ທະຫານ ສະຫະຣັດ ໃນ ພາກພື້ນ ເອເຊັຽ ຄືນໃໝ່ ແລະ ດຽວນີ້ ຄວາມ ສັມພັນ ຣະຫ່ວາງ ສອງ ປະເທດ ແຂງແກ່ນ ຂຶ້ນ ຢ່າງ ບໍ່ເຄີຽ ມີມາກ່ອນ. ຄວາມເປັນ ພັນທະມິດ ຂອງ ພວກເຮົາ ໄດ້ ແໜ້ນແຟ້ນ ຂຶ້ນຕື່ມ. ໃນ ທຸກວັນ ນີ້ ໂລກ ຂອງເຮົາ ກໍລັງ ປະເຊີນ ກັບ ສິ່ງ ທ້າທາຍ ທີ່ ບໍ່ເຄີຽ ມີ ມາກ່ອນ ຍີ່ປຸ່ນ ຈະຢືນຢູ່ ແຖວໜ້າ ຮ່ວມກັບ ສະຫະຣັຖ ໃນການ ແກ້ໄຂ ບັນຫາ ທ້າທາຍ ໃນ ພູມີພາກ ແລະ ບັນຫາ ຂອງ ໂລກ"

ໃນ ຕອນບ່າຍ ຂອງ ວັນດຽວ ກັນນີ້ ປະທານາທິບໍດີ ໂອບາມາ ກັບ ນາຍົກ ຣັຖມົນຕຣີ ຊິນໂຊ ອາເບ ໄດ້ພາກັນ ໄປ ຢ້ຽມຢາມ ອານຸສາວະຣີ ປະທານາທິບໍດີ ອາບຣາແຮັມ ລິນຄອນ ຊຶ່ງ ເປັນ ສັນຍາລັກ ຂອງການ ຖືກຕ້ອງ ປອງດອງ ກັນ ໃໝ່ ຫລັງ ສົງຄາມ ເພາະວ່າ ສອງ ປະເທດ ເຄີຽເປັນ ສັຕຣູ ກັນ ໃນ ປາງ ສົງຄາມ ໂລກ ຄັ້ງທີ່ ສອງ.

ການ ຢ້ຽມຢາມ ສະຫະຣັຖ ອະເມຣິກາ ຢ່າງ ເປັນ ທາງການ ຂອງ ນາຍົກ ຣັຖມົນຕຣີ ຊິນໂຊ ອາເບ ມີຂື້ນໃນ ປີ ຄົບຮອບ 70 ປີ ຂອງການ ສິ້ນສຸດ ສົງຄາມ ໂລກ ຄັ້ງທີ ສອງ ຄື ໃນ ວັນທີ 15 ສິງຫາ 1945 ກອງທັບ ຍີ່ປຸ່ນ ຍອມ ຈໍານົນ ຕໍ່ ກອງທັບ ພັນທະມິຕ ຊຶ່ງ ນໍາພາ ດ້ວຍ ສະຫະຣັຖ ອະເມຣິກາ. ການເຊັນ ສັນຍາ ສັນຕິພາບ ແລະ ຍອມເສັຽ ສົງຄາມ ຂອງ ຍີ່ປຸ່ນ ຕໍ່ ສະຫະຣັຖ ອະເມຣິກາ ມີຂຶ້ນ ໃນ ວັນທີ 2 ກັນຍາ ປີ 1945.

ໃນ ວັນຈັນ ທີ 27 ເມສາ ຣັຖມົນຕຣີ ຕ່າງ ປະເທດ ແລະ ຣັຖມົນຕຣີ ປ້ອງກັນ ປະເທດ ຂອງ ຍີ່ປຸ່ນ ກັບ ສະຫະຣັຖ ໄດ້ ພົບປະ ກັນ ທີ່ ນະຄອນ ນີວຢໍອກ ແລະ ໄດ້ ເຫັນພ້ອມ ນໍາກັນ ທົບທວນ ເອກສານ ການ ຊີ້ນໍາ ເຣື້ອງ ປ້ອງກັນ ປະເທດ.

ຣະບຽບ ການໃໝ່ ນີ້ ແມ່ນ ຍົກຣະດັບ ຄວາມ ສາມາດ ດ້ານ ທະຫານ ຍີ່ປຸ່ນ ໃນ ຖ້າມກາງ ການ ບຸກໜ້າ ຂອງ ກໍາລັງ ທະຫານ ຈີນ ຢູ່ ເຂດ ທະເລ ຈີນ ໃຕ້ ທີ່ ຈີນ ອ້າງວ່າ ເປັນ ອະທິ ປະໄຕ ຂອງຕົນ. ການ ປ່ຽນແປງ ຣະບຽບ ການ ປ້ອງກັນ ປະເທດ ທີ່ ຕົກລົງ ກັນໃໝ່ ນີ້ ຮ່ວມທັງ ຍົກຣະດັບ ຄວາມ ເຂັ້ມແຂງ ຂອງ ກອງ ກໍາລັງ ທະຫານ ຍີ່ປຸ່ນ ດ້ານ ການ ປ້ອງກັນ ທາງ ຈະຣວດ ການ ກວາດລ້າງ ຣະເບີດ ສົງຄາມ ຢູ່ ນ່ານນໍ້າ ແລະ ກວດກາ ເຮືອ ເດີນ ທະເລ ແລະ ອາດກ້າວໄປ ສູ່ການ ປະຕິບັດ ການ ຢູ່ ນອກຝັ່ງ ຮ່ວມກັບ ສະຫະຣັຖ ນໍາອີກ.

ຈະເຫັນ ໄດ້ວ່າ ນັບແຕ່ ນາຍົກ ຣັຖມົນຕຣີ ຊິນໂຊ ອາເບ ຂຶ້ນຄອງ ອໍານາດ ປະມານ 2 ປີ ນີ້ ເຮັດໃຫ້ ກອງທັບ ປ້ອງກັນ ໂຕເອງ ຂອງ ຍີ່ປຸ່ນ ປ່ຽນ ໂສມໜ້າ ເປັນ ກອງທັບ ປົກກະຕິ ຄືກັນ ກັບ ປະເທດ ອື່ນໆ ເທື່ອລະ ກ້າວ.

ນອກຈາກ ນັ້ນ ແລ້ວ ໄດ້ ເຈຣະຈາ ກັນ ເຣື້ອງ ການຄ້າ ຣະຫວ່າງ ສອງ ປະເທດ ແລະ ການ ເຂົ້າເປັນ ຄູ່ຮ່ວມ ການຄ້າ ຂ້າມ ທະວີບ ປາຊີຟິກ ຫລື TPP ຊຶ່ງເປັນ ແຜນການ ລິເລີ້ມ ຂອງ ສະຫະຣັຖ.

ໃນ ຕອນເຊົ້າ ຂອງ ວັນທີ່ 29 ເມສາ ນີ້ ນາຍົກ ຣັຖມົນຕຣີ ຊິນໂຊ ອາເບ ໄດ້ ໄປ ຢ້ຽມຢາມ ຫລຸມ ຝັງສົພ ນັກຣົບ ນິຣະນາມ ອະເມຣິກັນ ຢູ່ ສຸສານ ແຫ່ງຊາຕ ອາກລິງຕັນ ຣັຖ ເວີຈີເນັຽ. ຕໍ່ ຈາກນັ້ນ ກ່ອນທ່ານ ໄດ້ຂຶ້ນ ຖແລງຕໍ່ ຣັຖສະພາ ສະຫະຣັຖ ກ່ຽວກັບ ການ ສັມພັນ ທາງ ການຄ້າ ແລະ ຄວາມ ໝັ້ນຄົງ ຊຶ່ງ ນັບວ່າ ເປັນ ປວັດການ ບັ້ນໃໝ່ ເນື່ອງຈາກ ວ່າ ຜ່ານມາ ບໍ່ຄ່ອຍ ມີ ນາຍົກ ຣັຖມົນຕຣີ ຍີ່ປຸ່ນ ຄົນໃດ ໄດ້ ຖແລງ ຕໍ່ ສະພາ ຕໍ່າ ແລະ ສະພາ ສູງ ຂອງ ສະຫະຣັຖ ພ້ອມໆກັນ.

ທ່ານໄດ້ ກ່າວ ສະແດງ ຄວາມ ເສັຽໃຈ ຕລອດ ກາຣະນານ ນໍາການ ສູນເສັຽ ຊີວິດ ຂອງຊາວ ອະເມຣິກັນ ຢູ່ ສນາມລົບ ປະເທດ ຍີ່ປຸ່ນ. ທ່ານວ່າ ປວັດສາດ ມັນມີ ຄວາມ ໂຫດຮ້າຍ ສິ່ງທີ່ ເກີດຂຶ້ນ ແລ້ວ ເອົາຄືນ ບໍ່ໄດ້. ດ້ວຍ ຄວາມເສັຽໃຈ ຢ່າງ ສຸດຊຶ້ງ ຂ້າພະເຈົ້າ ໄດ້ ຢືນຢູ່ ຕໍ່ໜ້າ ສຸສານ ດ້ວຍຈິດໃຈ ທີ່ ງຽບສງົບ ແລະ ພາວັນນາ ເຖິງ ຜູ້ຕາຍ. ໃນ ຕອນນຶ່ງ ຂອງ ຄໍາກ່າວ ຂອງ ທ່ານ ພໍ ສລຸບໄດ້ວ່າ:

"ຕາງໜ້າ ໃຫ້ ປະເທດ ຍີ່ປຸ່ນ ແລະ ປະຊາຊົນ ຍີ່ປຸ່ນ ຂ້າພະເຈົ້າ ຂໍ ສົມມະນາ ຕອບແທນ ດ້ວຍ ຄວາມ ນັບຖື ອັນ ເລິກຊຶ້ງ ແລະ ເສັຽໃຈ ຕລອດ ກາຣະນານ ຕໍ່ ດວງ ວິນຍານ ຂອງ ປະຊາຊົນ ອະເມຣິກັນ ທີ່ ລົ້ມຫາຍ ຕາຍຈາກ ໃນ ປາງ ສົງຄາມ ໂລກ ຄັ້ງທີ່ ສອງ".

ແລະ ໃນຕອນນຶ່ງ ທ່ານວ່າ:

"ພືດຕິກັມ ຂອງ ທະຫານ ຍີ່ປຸ່ນ ຂອງ ພວກເຮົາ ໄດ້ ນໍາເອົາ ຄວາມ ເຈັບປວດ ມາສູ່ ປະຊາຊົນ ໃນ ບັນດາ ປະເທດ ເອເຊັຽ. ພວກເຮົາ ຈະ ຫລຽວ ຂ້າມ ເຫດການ ທີ່ ເກີດຂຶ້ນ ໃນ ປວັດສາດ ນັ້ນ ບໍ່ໄດ້".

ນາຍົກ ຣັຖມົນຕຣີ ຊິນໂຊ ອາເບ ບໍ່ໄດ້ ກ່າວ ຂໍອາພັຍໂທດ ໂດຍກົງ ຕໍ່ ເຫດການ ທີ່ ທະຫານ ຈັກກະພັດ ຍີ່ປຸ່ນ ໄດ້ ເກນເອົາ ແມ່ຍິງ ຊາວ ເກົາຫລີ ແລະ ຊາວຈີນ ຫລາຍຮ້ອຍ ຄົນ ໄປເປັນ ນາງ ບໍາເຣີ ໃນ ເວລາ ທີ່ ທະຫານ ຍີ່ປຸ່ນ ເຂົ້າໄປ ຢືດຄອງ ຈີນ ແລະ ເກົາຫລີ, ເມື່ອ ນັກຂ່າວ ຖາມ ເຖິງ ເຣື້ອງນີ້ ທ່ານ ຊິນໂຊ ອາເບ ກໍ ຕອບວ່າ ເມື່ອ ຄິດເຖິງ ເຣື້ອງ ທີ່ຜ່ານ ມານີ້ ແລ້ວ ທ່ານ ກໍມີ ຄວາມ ເຈັບປວດ ແລະ ເສັຽໃຈ ນໍາຜູ້ໄດ້ ຮັບ ເຄາະຮ້າຍ.

ປະທານາທິບໍດີ ບາຣັກ ໂອບາມາ ແລະ  ນາຍົກ ຣັຖມົນຕຣີ ຊິນໂຊ ອາເບ ສະແດງ ຄວາມ ເປັນຫ່ວງ ນໍາການ ເຄື່ອນໄຫວ ຕ່າງໆ ຂອງ ຈີນ ຢູ່ ທະເລ ຈີນ ໃຕ້ ທັງສອງ ໃຫ້ ສັນຍາ ກັນວ່າ ຈະ ພ້ອມກັນ ຕ້ານການ ນາບຂູ່ ຂອງ ຈີນ ແລະ ເພີ້ມ ການສ້າງ ກໍາລັງ ເພື່ອຕ້ານ ຢັນ ຄືນ.

ນັກວິເຄາະ ການເມືອງ ຫລາຍຄົນ ເຊື່ອວ່າ ເຂດ ທະເລ ຈີນ ໃຕ້ ທີ່ ເຊື່່ອວ່າ ເຕັມໄປດ້ວຍ ຊັພຍາກອນ ນໍ້າມັນ ແລະ ແກັສ ທັມມະຊາຕ ນີ້ ອາດເປັນ ຈຸດຣະເບີດ ຂອງການ ຂັດແຍ້ງ ກັນ ໃນວັນໃດ ວັນນຶ່ງ ຂ້າງໜ້າ.