ທາງການລາວຍັງມິດເສີຍເຣື້ອງ ພຣະ

ເວລາ ລ່ວງເລີຍ ຈົນກາຍ ວັນທີ 28 ມົກກະຣາ ທາງການ ລາວ ກໍບໍ່ມີ ການ ຖແລງ ຂ່າວ ຫຍັງ ກ່ຽວກັບ ຄົນ ວຽດນາມ ເຂົ້າມາ ເອົາ ພຣະ ພຸດທະຮູບ ຢູ່ ວັດ ອົງຕື້ ມະຫາ ວິຫານ. ໃນ ອາທິດ ຜ່ານມາ ມີຂ່າວ ຈາກ ອຳນາດ ການ ປົກຄອງ ບ້ານ ວັດຈັນ ເມືອງ ຈັນທະບູລີ ນະຄອນ ຫລວງ ວຽງຈັນ ວ່າ ຈະມີ ການ ຖແລງ ຂ່າວ ກ່ຽວກັບ ພຣະ ຢູ່ ວັດ ອົງຕື້ ໂດຍ ແມ່ນ ທ່ານ ສາຍທອງ ແກ້ວດວງດີ ຮອງ ເຈົ້າຄອງ ນະຄອນ ຫລວງ ຈະ ຖແລງ ຂ່າວ, ແຕ່ ໃນ ຕົວຈິງ ທ່ານ ຮອງ ເຈົ້າຄອງ ນະຄອນ ຫລວງ ວຽງຈັນ ກໍມາ ຈັດ ພິທີ ສົມບັດ ສົມມາ ຂໍ ຄະມາ ລາໂທດ ຢູ່ ວັດ ອົງຕື້ ເທົ່ານັ້ນ.

ຂ່າວ ຣາຍງານ ວ່າ ມີຜູ້ ເຂົ້າຮ່ວມ ຫລາຍ ພໍ ສົມຄວນ ແລະ ພິທີກັມ ກໍຈັດກັນ ບໍ່ ເປັນ ທາງການ. ແຕ່ວ່າມີ ຜູ້ຕັ້ງຂໍ້ ສັງເກດ ວ່າ ທາງອອກ ຂອງ ທາງການ ລາວ ແມ່ນບໍ່ມີ ຖແລງການ ກໍຍ້ອນວ່າ ມັນໄປ ກະທົບ ກະເທືອນ ເຖີງ ຫລາຍ ພາກສ່ວນ. ເຈົ້າໜ້າທີ່ ຜູ້ທີ່ບໍ່ ປະສົງ ອອກຊື່ ທ່ານ ນຶ່ງ ກ່າວວ່າ:

"ກະເປັນ ທີ່ ຜິດຫວັງ ຢູ່ ໜ້ອຍນຶ່ງ ຫັ້ນແຫລະ ເນາະ ເພາະວ່າ ຫລາຍຄົນ ກະຊິ ຕັ້ງໃຈ ຄວນຈະມີ ພິທີ ການ ຖແລງການ ຫລືວ່າ ຍ້ອນຫຍັງ ສາເຫດ ມັນເປັນ ແນວໃດ ຈັ່ງໃດ ຫັ້ນນ່າ ແຕ່ ກະຄິດວ່າ ມັນຄົງຈະ ຕໍາຫລາຍ ບ່ອນ ທີ່ ຈະສະແດງ ແຈ້ງ ໃຫ້ ສາທາຣະນະ ຫັ້ນ ແຫລະ".

ແລະ ນອກຈາກ ນີ້ ທ່ານ ຍັງໃຫ້ ທັສນະ ອີກວ່າ ເປັນການ ຫລີກລ້ຽງ ບັນຫາ ແລະ ບໍ່ຍອມ ປະເຊີນ ໜ້າ ກັບ ຜູ້ຄົນ ດັ່ງ ທ່ານ ກ່າວ ອີກວ່າ:

"ກະຄິດ ວ່າ ອັນທີ ນຶ່ງ ບໍ່ຢາກ ປະເຊີນ ໜ້າ ໂດຍກົງ ຫັ້ນນ່າ ຄັນ ສົມມຸດວ່າ ຖແລງການ ລະ ຊິມີຄົນ ຖາມວ່າ ແມ່ນໃຜ ເປັນ ຜູ້ເຮັດ ແມ່ນໃຜ ອະນຸຍາດ ແມ່ນ ໃຜເຮັດ ອີ່ຫຍັງ ຫັ້ນນ່າ ຄິດວ່າ ເຂົາເຈົ້າ ໜ້າ ຈະຫລົບ ເຂົາເຈົ້າ ໜ້າ ຈະຫລີກ ບັນຫາ ນີ້ ບໍ່ຢາກ ປະເຊີນ ໜ້າ ກັບ ຜູ້ຄົນ ທີ່ ຈະຖາມ ຫລາຍອັນ ອັນແນວ ຫັ້ນນະ ອາດຈະເປັນ ເຫດຜົນ ນຶ່ງ ທີ່ ເຂົາເຈົ້າ ບໍ່ຍອມ ມາຖແລງ".

ເຫດການ ທີ່ ເກີດຂຶ້ນ ເຮັດໃຫ້ ຄົນລາວ ສ່ວນຫລາຍ ບໍ່ພໍໃຈ ຕໍ່ ຣັຖບານ ລາວ ແລະ ຄົນ ວຽດນາມ ເຖີງວ່າ ຈະເອົາ ພຣະ ພຸດທະຮູບ ກັບຄືນມາ ສົ່ງແລ້ວ ກໍຕາມ. ອີງຕາມ ຂໍ້ມູນ ຈາກ ວັດ ອົງຕື້ ມະຫາ ວິຫານ, ພຣະ ພຸດທະຮູບ ບູຮານ ອົງ ດັ່ງກ່າວ ແມ່ນ ເປັນທີ່ ຕ້ອງການ ຂອງ ປະທານ ທະນາຄານ ເພື່ອ ການ ລົງທຶນ ແລະ ການ ພັທນາ ຂອງ ວຽດນາມ ທີ່ ຊື່ວ່າ ເຈີ່ນ ບັກ ຮ່າ ໂດຍ ທະນາຄານ ດັ່ງກ່າວ ແມ່ນ ມີຮຸ້ນສ່ວນ ກັນກັບ ທະນາຄານ ລາວ-ວຽດ ທີ່ ເປີດ ບໍຣິການ ຢູ່ ນະຄອນ ຫລວງ ວຽງຈັນ.

ເມື່ອ ບໍ່ດົນ ມານີ້ ກໍມີ ຂ່າວວ່າ ລູກຄ້າ ຈໍານວນນຶ່ງ ພາກັນ ໄປ ຖອນເງິນ ທີ່ ຝາກໃນ ທະນາຄານ ລາວ-ວຽດ ຍ້ອນວ່າ ເຂົາເຈົ້າ ບໍ່ພໍໃຈ ການທີ່ ປະທານ ທະນາຄານ ມີສ່ວນ ພົວພັນ ກັບ ເຫດການ ດັ່ງກ່າວ ນັ້ນ. ດັ່ງ ລູກຄ້າ ຄົນນຶ່ງ ຂອງ ທະນາຄານ ລາວ-ວຽດ ກ່າວວ່າ:

"ເພາະວ່າ ຂ້ອຍ ໄປຖາມ ເບິ່ງ ທະນາຄານ ກໍມີຄົນ ໄປຖອນໄດ໋ ເງິນ ບໍ່ພໍໃຈ ເຂົາ ໄປຖອນ ອອກໄດ໋ ຄົນໄປຖອນ ອອກ ຫລາຍຄົນ ໄດ໋ ເອີ ກະມີຄົນ ໄປຖອນ ອອກ ຄົນລາວ ເຮົາ ແມ່ນຫຍັງ ຂ້ອຍ ກະບໍ່ຮູ້ ວ່າ ມີໂຕເລກ ເທົ່າໃດ".

ຂ່າວຍັງ ຣາຍງານ ອີກວ່າ ກຸ່ມ ຄົນ ວຽດນາມ ທີ່ ມາເອົາ ພຣະ ພຸດທະຮູບ ນັ້ນ ແມ່ນ ກຸ່ມຄົນ ທີ່ ບໍຣິສັດ ຈິດຈະເຣີນ ກໍ່ສ້າງ ສົ່ງມາ ຊຶ່ງ ບໍຣິສັດ ດັ່ງກ່າວ ນັ້ນ ມີສ່ວນ ສຳພັນ ກັບ ທະນາຄານ ວຽດນາມ ທີ່ ກ່າວມາ ແລະ ຣົດທີ່ໃຊ້ ເຂົ້າມາ ຂົນເອົາ ພຣະ ພຸດທະຮູບ ທີ່ ເຫັນຢູ່ ໃນພາບ ວີດີໂອ ທີ່ ເຜີຍແພ່ ຢູ່ໃນ ສື່ສັງຄົມ ອອນລາຍ ນັ້ນ ກໍແມ່ນ ຣົດຂອງ ບໍຣິສັດ ຈິດ ຈະເຣີນ ກໍ່ສ້າງ.

ປະຫວັດ ຂອງ ພຣະ ພຸດທະຮູບ ບູຮານ ກໍຄື: ພຣະ ພຸດທະຮູບ ບູຮານ ດັ່ງກ່າວ ແມ່ນ ປະດິດ ສະຖານ ທີ່ ສິມ ວັດ ອົງຕື້ ມະຫາ ວິຫານ ຫຼັງ ພຣະເຈົ້າ ໃຫ່ຍ ຢູ່ ທາງທິດ ຕາເວັນຕົກ, ມີໜ້າຕັກ ກວ້າງ 50 ຊມ, ຢູ່ ໃນທ່ານັ່ງ ຢູ່ເທີງຖານ ບັນລັງ.
ອົງ ພຣະ ພຸທຮູບ ມີ ລັກສນະ ສວຍງາມ ຖືກຕາມ ຫຼັກ ພຸທ ລັກສນະ ເປັນ ພຣະ ພຸດທະຮູບ ສີລປະ ລ້ານຊ້າງ ຫລໍ່ ດ້ວຍ ທອງ ສຳລິດ ຊຶ່ງ ເຊື່ອກັນວ່າ ຖືກສ້າງ ຂຶ້ນໃນ ສັດຕະວັດ ທີ່ 16 ສະໄໝ ພຣະເຈົ້າ ໄຊຍະ ເຊດຖາ ທິຣາດ.

ພຣະ ພຸທະຮູບ ອົງ ດັ່ງກ່າວ ເປັນ ພຣະ ປາງ ມະລະວິໄຊ ຊຶ່ງເປັນ ທີ່ ນິຍົມ ສ້າງກັນ ຢ່າງ ແພ່ຫຼາຍ ໃນ ສະໄໝ ນັ້ນ ຮູບ ລັກສນະ ສັນຖານ ທົ່ວໄປ ຄ້າຍຄື ກັບ ພຣະເສີມ, ພຣະໃສ ເນື້ອທອງ ສີສຸກ ສົດໃສ ມາແບບ ດຽວກັນ, ມີ ລັກສນະ ໂດດເດັ່ນ ກໍຄື ທີ່ ຜ້າສັງຄາ ສະຫຼັກລາຍ ເປັນ ຮອຍ ຝັງເງິນ, ທີ່ ພຣະບາດ ມີຮູບ ທັມຈັກ ອ້ອມດ້ວຍ ລາຍລາວ ແລະ ພຣະ ສາລິລະ ພຽວບາງ ກວ່າ ພຣະເສີມ, ພຣະໃສ.

ແລະ ນອກຈາກ ນີ້ ຍັງ ເຊື່ອວ່າ ພຣະ ພຸດທະຮູບ ອົງ ດັ່ງກ່າວ ເປັນ ພຣະ ພຸດທະຮູບ ປາງ ມະລະ ວິໄຊ ຊຶ່ງ ເປັນຕົ້ນ ແບບ ທີ່ ໃຊ້ຫລໍ່ ພຣະ ພຸດທະຮູບ ອົງຕື້ ໃຫຍ່. ນອກຈາກ ນີ້ ຣັຖບານ ໃນ ສະໄໝ ພຣະ ຣາຊອະນາ ລາວ ເຄີຍໃຊ້ ວັດອົງ ຕື້ ມະຫາ ວິຫານ ເປັນ ສະຖານ ສາບານ ຕົນ ຫລັງຈາກ ທີ່ ໄດ້ມີການ ຈັດຕັ້ງ ຄນະ ຣັຖບານ. ເຫດທີ່ ວັດ ອົງຕື້ ມະຫາ ວິຫານ ເປັນວັດ ທີ່ ເກົ່າແກ່ ແລະ ມີ ປະຫວັດ ຄວາມ ເປັນມາ ຢ່າງ ຍາວນານ ແລະ ມີ ພຣະ ພຸດທະຮູບ ບູຮານ ອັນ ເກົ່າແກ່.

ຄວາມ ເປັນມາ ຂອງ ເຫດການ ທີ່ ເກີດຂຶ້ນ ໃນ ວັນທີ 9 ມົກກະຣາ ທີ່ ກຸ່ມ ຄົນ ວຽດນາມ ເຂົ້າມາ ເອົາ ພຣະ ພຸດທະຮູບ: ອີງຕາມ ການ ບອກເລົ່າ ຂອງ ຜູ້ເຫັນ ເຫດການ, ເຫດ ເກີດຂຶ້ນ ໃນ ວັນທີ 9 ມົກກະຣາ ທີ່ ຜ່ານມາ ເວລາ ປະມານ 11 ໂມງ ເຊົ້າ ໄດ້ມີຄົນ ວຽດນາມ ກຸ່ມນຶ່ງ ເຂົ້າມາ ຫາມເອົາ ພຣະ ພຸດທະຮູບ ດັ່ງກ່າວ. ຕໍ່ມາຈຶ່ງ ມີຄົນເອົາ ຮູບພາບ ວີດີໂອ ມາ ເຜີຍແພ່ ຢູ່ໃນ ສື່ສັງຄົມ ອອນລາຍ ຫລື ເຟັສບຸກ ແລະ ເຫດການ ມັນຈຶ່ງດັງ ຂຶ້ນມາ.

ໃນ ວັນດຽວກັນ ເວລາ ປະມານ 16:00 ຫລື ວ່າ 4 ໂມງ ແລງ ກຸ່ມຄົນ ວຽດນາມ ຈຶ່ງ ນຳເອົາ ພຣະ ພຸດທະຮູບ ອົງ ດັ່ງກ່າວ ກັບຄືນມາ ສົ່ງ ຢູ່ວັດ ອົງຕື້ ຄືເກົ່າ ໂດຍ ທີ່ ຍັງບໍ່ທັນ ມີການ ອະທິບາຍ ຫຍັງ ວ່າເຫດໃດ ເຂົາ ຈຶ່ງເອົາ ກັບຄືມາ ສົ່ງ ແລະ ເຫດໃດ ເຂົາເຈົ້າ ຈຶ່ງ ເຂົ້າມາເອົາ.

ແຕ່ ເຈົ້າໜ້າທີ່ ກະຊວງ ຖແລງ ຂ່າວ ວັທນະທັມ ແລະ ທ່ອງທ່ຽວ ທ່ານ ນຶ່ງ ໄດ້ກ່າວ ຕໍ່ ນັກຂ່າວ ເອເຊັຽເສຣີ ວ່າ ສາເຫດ ທີ່ ກຸ່ມຄົນ ວຽດນາມ ເອົາ ພຣະ ພຸດທະຮູບ ກັບຄືນມາ ສົ່ງ ຍ້ອນວ່າ ຣັຖມົນຕຣີ ກະຊວງ ຖແລງ ຂ່າວ ວັທນະທັມ ແລະ ທ່ອງທ່ຽວ ມີຄຳສັງ ໃຫ້ນໍາ ເອົາ ພຣະ ພຸດທະຮູບ ກັບຄືນມາ ໄວ້ ຄືເກົ່າ.

ຕໍ່ ເຫດການ ດັ່ງກ່າວ, ກໍ່ເປັນທີ່ ວິພາກ ວິຈານ ຢ່າງ ໜາຫູ ທີ່ສຸດ ໃນບັນດາ ປະຊາຊົນ ລາວ ແລະ ມີການ ວິພາກ ວິຈານ ວ່າ ເຣື້ອງນີ້ ຕ້ອງມີ ເງື່ອນງຳ ເບື້ອງ ໜ້າ ເບື້ອງ ຫຼັງ ທີ່ເລິກ ເຊິ່ງ ແລະ ອາຈມີ ການ ກ່ຽວຂ້ອງ ກັບ ຜູ້ ມີອຳນາດ ໃນ ຂັ້ນ ສູນກາງ. ເພາະວ່າ ເຈົ້າໜ້າທີ່ ອຳນາດ ການ ປົກຄອງ ຂັ້ນ ທ້ອງຖິ່ນ ກໍ່ຄືຂັ້ນ ບ້ານ ໄດ້ກ່າວ ຢັ້ງຢືນ ວ່າ ພວກຕົນ ແມ່ນ ບໍ່ໄດ້ ຮັບຮູ້ ວ່າມີ ການ ສັ່ງການ ໃດໆ ເລີຍ.

ເຫດການ ດັ່ງກ່າວ ນີ້ ແມ່ນ ກ່ຽວພັນ ກັບຄົນ ວຽດນາມ ຈຳນວນ ນຶ່ງ: ພາບ ຂອງຄົນ ວຽດນາມ ທີ່ ຢູ່ໃນ ປະເທດ ລາວ ແມ່ນ ການຕັດໄມ້ ແລະ ແກ່ ໄມ້ທ່ອນ ຂະໜາດ ໃຫຍ່ ແລ້ວ ຂົນ ສົ່ງໄປ ປະເທດ ວຽດນາມ ຈົນ ບໍ່ສາມາດ ພັນລະນາ ໄດ້ວ່າ ມີ ຈຳນວນ ຈັກ ລ້ານ ແມັດກ້ອນ.

ເມື່ອ ເວົ້າເຖິງ ພາບ ຂອງ ຄົນ ວຽດນາມ ຫລາຍຄົນ ກໍຈະເຫັນ ຕອນທີ່ ເຂົາເຈົ້າ ເຂົ້າມາ ບຸກເບີກ ທີ່ດິນ ຂອງ ປະຊາຊົນ ລາວ ຢູ່ ຕ່າງ ແຂວງ ແລ້ວ ຫັນດິນ ໄປປູກ ຕົ້ນໄມ້ ອຸດສາ ຫະກັມ ໂດຍ ແມ່ນ ທີ່ດິນ ແມ່ນໄດ້ ຈາກ ການທີ່ ຣັຖບານ ລາວ ເອົາ ທີ່ດິນ ຂອງ ປະຊາຊົນ ລາວ ແລ້ວ ມອບໃຫ້ ບໍຣິສັດ ວຽດນາມ ສຳປະທານ.

ແລະ ກັບເຂົ້າມາ ຫາ ເຫດການ ທີ່ ຄົນ ວຽດນາມ ເຂົ້າມາ ເອົາ ພຣະ ທຸດທະຮູບ ຢູ່ໃນ ວັດອົງຕື້ ມະຫາ ວິຫານ ນີ້ ແລະ ບໍ່ມີການ ດໍາເນີນການ ຫຍັງ ກັບກຸ່ມ ຄົນ ເຫລົ່ານັ້ນ ແລະ ທາງການ ກໍ ບໍ່ມີ ການ ອອກມາ ດໍາເນີນການ ຫຍັງ ກ່ຽວກັບ ເລື້ອງນີ້, ຊຶ່ງ ສິ່ງ ດັ່ງກ່າວ ໄດ້ ທຳລາຍ ຄວາມ ເຊື່ອຖື ຂອງ ປະຊາຊົນ ລາວ ທີ່ ມີຕໍ່ ຣັຖບານ ໄປແລ້ວ.