ຄົນຕ່າງດ້າວ 5 ໝື່ນ ເຮັດວຽກ ບໍ່ມີ ອະນຸຍາດ

ໄມຊູລີ
2019-03-06
ອີແມວລ໌
ຄໍາເຫັນ
Share
ພິມ
ກະຊວງແຮງງານ ແລະ ສວັດດີການສັງຄົມ ສປປ ລາວ
ກະຊວງແຮງງານ ແລະ ສວັດດີການສັງຄົມ ສປປ ລາວ
Public Domain

ກົມແຮງງານລາວ ກວດພົບຄົນງານຕ່າງປະເທດ ທີ່ບໍ່ມີໃບອະນຸຍາດ ເຮັດວຽກຢູ່ລາວ ປະມານ 5 ໝື່ນຄົນ, ສ່ວນຫຼາຍເປັນຄົນວຽດນາມ ແລະຈີນ ທີ່ເຂົ້າມາແບບນັກທ່ອງທ່ຽວ ຕາມດ່ານຕ່າງໆ ແລະ ມີໜັງສືເດີນທາງ ຢ່າງຖືກຕ້ອງ, ແຕ່ກໍານົດຢູ່ໄດ້ 1 ເດືອນ ເທົ່ານັ້ນ, ຫລັງຈາກນັ້ນ ຕ້ອງໄປຕໍ່ໃໝ່. ຄົນງານຕ່າງປະເທດ ທີ່ກວດພົບນີ້, ສ່ວນຫຼາຍຈະໄປຮັບຈ້າງຂາຍເຄື່ອງຕ່າງໆ ຕາມຮ້ານຂາຍເຄື່ອງຍ່ອຍ, ຫຼືຮັບຈ້າງຕັດຜົມ ແລະອີກຫຼາຍອາຊີບ, ຕາມຄໍາເວົ້າຂອງເຈົ້າໜ້າທີ່ ກົມແຮງງານ ໃນມື້ວັນທີ 5 ມີນາ ນີ້:

“ແຮງງານຕ່າງປະເທດ ທີ່ເຂົ້າມາເຮັດວຽກຢູ່ລາວ, ຫຼືວ່າເຂົ້າມາຫາກິນຢູ່ລາວນິ່ນ່າ, ກຸ່ມທີ່ບໍ່ຖືກຕ້ອງ ໃຫ້ກາຍເປັນວ່າຖືກຕ້ອງມີປະມານ 5 ໝື່ນຄົນ ມີວຽດນາມ, ຈີນ 2 ປະເທດ ເຈີແຕ່ປັນຫາຄົນເຂົ້າມາ ມີພາສປອດທ່ອງທ່ຽວ ໄດ້ເດືອນນຶ່ງ ມາກໍ່ມາຢູ່ເລີຍ ພາສປອດໝົດແລ້ວ ກໍ່ໄປຕໍ່ແລ້ວບໍ່ກັບປະເທດ ແລ້ວກໍ່ຮັບຈ້າງເຮັດວຽກຫຼາຍອາຊີບ.”

ທ່ານກ່າວຕື່ມວ່າ ສໍາຫຼັບຄົນຕ່າງປະເທດ ທີ່ຜິດກົດໝາຍ ແລະຕ້ອງການເຮັດວຽກຢູ່ລາວ ແບບຖືກຕ້ອງຕາມກົດໝາຍນັ້ນ, ປັດຈຸບັນີ້ທາງ ກົມແຮງງານ ໄດ້ເປີດໃຫ້ຄົນງານເຫຼົ່ານີ້, ມາລົງທະບຽນເປັນຄົນງານ ທີ່ຖືກຕ້ອງແລ້ວ, ຊຶ່ງທາງກົມແຮງງານ ໄດ້ມີການ ແຈ້ງໃຫ້ບໍຣິສັດ ແລະເຈົ້າຂອງທຸຣະກິຈຕ່າງໆ ທີ່ຮັບເອົາແຮງງານຕ່າງປະເທດເຫລົ່ານີ້, ເຂົ້າເຮັດວຽກໃນລາວ ຕ້ອງນໍາແຮງງານມາລົງທະບຽນ ຫາກຝ່າຝືນ ຈະຖືກປັບໃໝຕາມກົດໝາຍ:

“ຕອນນີ້ ແຈ້ງໄປຫາທຸກໜ່ວຍງານ ໃຜມີແຮງງານຕ່າງປະເທດ ຕ້ອງເອົາແຮງງານຕ່າງປະເທດມາລົງທະບຽນ ຢູ່ແຂວງໃດກໍ່ຕ້ອງໄດ້ ລົງທະບຽນຢູ່ແຮງງານແຂວງນັ້ນ ຖ້າໃຜບໍ່ລົງ ຕໍ່ໄປໄປຖ້າເຮົາລົງໄປກວດເຈີ ເຮົາຊິທຳການປັບໃໝ ຕາມລະບຽບກົດໝາຍ ນັ້ນແຫຼະ.”

ເຖິງຢ່າງໃດກໍຕາມ ທາງການລາວ ຍັງບໍ່ມີການຮ່ວມມືກັບ ວຽດນາມ ແລະຈີນ, ໃນການແກ້ໄຂບັນຫາແຮງງານ ຕ່າງປະເທດ ທີ່ເຂົ້າມາ ເຮັດວຽກ ໃນລາວ ແບບຜິດກົດໝາຍນີ້ເທື່ອ, ແຕ່ຖ້າຫາກກວດພົບຄົນງານຕ່າງດ້າວ ຜິດກົດໝາຍທາງການລາວ ຈະດໍາເນີນການຕາມ ກົດໝາຍ ບ້ານເມືອງໃນທັນທີ.

ເຕັມຫນ້າ