ທ່ານ ບຸນທັນ ທັມມະວົງສ໌ ໄດ້ອິສຣະ ແລ້ວ

ມະນີຈັນ
2019.06.21
Share on WhatsApp
Share on WhatsApp
F-Bounthanh ທ່ານ ບຸນທັນ ທັມມະວົງສ໌ ໄດ້ຖືກທາງການລາວ ປ່ອຍໂຕແລ້ວ ໃນວັນທີ 19 ມີຖຸນາ 2019
RFA

ທ່ານ ບຸນທັນ ທັມມະວົງສ໌, ອະດີດນັກໂທສການເມືອງລາວ ເຊື້ອຊາຕລາວ ສັນຊາຕໂປແລນ ໄດ້ຖືກທາງການລາວ ປ່ອຍໂຕແລ້ວ ໃນມື້ ວັນທີ 19 ມີຖຸນາ ນີ້, ພາຍຫຼັງທີີ່ທ່ານຖືກທາງການລາວ ຕັດສິນຈຳຄຸກ ນັບຕັ້ງແຕ່ປີ 2015 ເປັນຕົ້ນມາ. ດັ່ງທ່ານໄດ້ ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີໃນວັນທີ 21 ມິຖຸນາ ນີ້ວ່າ:

“ໄດ້ຮັບການປົດປ່ອຍ ວັນທີ 19 ເດືອນນີ້ແຫຼະ, ລະໄດ້ມາຮອດບ້ານ ມາຮອດໂປແລນ ມື້ຄືນນີ້. ຕອນ 1 ໂມງກາງຄືນ.”

ທ່ານກ່າວຕື່ມວ່າ ລວມເວລາທັງໝົດແລ້ວ ທ່ານຖືກຈຳຄຸກໃນປະເທສລາວ 4 ປີເຕັມ ຍ້ອນໄດ້ຮັບອະພັຍໂທສ ຈາກທາງການລາວ 9 ເດືອນ ຈາກ ທີ່ຖືກຕັດສິນໃຫ້ຈຳຄຸກ 4 ປີ 9 ເດືອນ.

“ເຣື້ອງໂຕນີ້ເພິ່ນຕັດສິນຫັ້ນ 4 ປີ 9 ເນາະ, ແຕ່ປີ 2017 ເພິ່ນຫຼຸດຜ່ອນໃຫ້ 9 ເດືອນ. ໂດຍຢູ່ໂຕຈິງແມ່ນ 4 ປີ, 4 ປີເຕັມນ່າ ບໍ່ມີຫຼຸດ ບໍ່ມີລື່ນ. ອາຈຊິຫຼຸດລື່ນດ້ວຍເວລານາທີ ອາຈເປັນຢ່າງນັ້ນ.”

ໃນມື້ທີ່ທ່ານຖືກປົດປ່ອຍໂຕ ໃຫ້ອອກມາສູ່ອິສຣະພາບນັ້ນ, ທາງສຖານເອກອັກຄະຣັຖທູຕໂປແລນ ປະຈຳປະເທສໄທ ກໍໄດ້ສົ່ງໂຕແທນຂອງ ຕົນໄປເຊັນຮັບຮອງ ເອົາທ່ານອອກມາຈາກຄ້າຍຄຸມຂັງ ນັກໂທສຕ່າງປະເທສ ບ້ານໂພນຕ້ອງ, ເມືອງຈັນທະບູຣີ ນະຄອນຫຼວງວຽງຈັນ ຊ້ອງໜ້າເຈົ້າໜ້າທີ່ກວດຄົນເຂົ້າເມືອງ ຂອງທາງການລາວ ແລ້ວເດີນທາງອອກມາຈາກ ສປປລາວ ທັນທີ.

ເມື່ອເດືອນກັນຍາ ປີ 2015, ທ່ານ ບຸນທັນ ທັມມະວົງສ໌ ຖືກສານປະຊາຊົນສູງສຸດນະຄອນຫຼວງວຽງຈັນ ຕັດສິນຈຳຄຸກເປັນເວລາ 4 ປີ 9 ເດືອນ ໃນຂໍ້ຫາໂຄສະນາຕ້ານ ສປປລາວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.