ເຈົ້າໜ້າທີ່ລັດ 13 ຄົນ ແຂວງຫລວງນໍ້າທາ ຖືກສານຕັດສິນຈໍາຄຸກ ຍ້ອນສໍ້ລາດບັງຫລວງ

ສານປະຊາຊົນ ແຂວງຫລວງນໍ້າທາ ໄດ້ລົງໂທດ ຕັດສິນ ອາດີດພະນັກງານລັດ 13 ຄົນ ໃຫ້ຈໍາຄຸກ ຍ້ອນການສໍ້ໂກງຊັບສິນຂອງລັດ ຫຼື ສໍ້ລາດບັງຫຼວງ.

ພະນັກງານ 13 ຄົນ ລວມມີແມ່ຍິງ 1 ຄົນ ທີີ່ຖືກສານຕັດສິນຈໍາຄຸກ ໃນວັນທີ 3 ກັນຍາ ເປັນເຈົ້າໜ້າທີ່ຄະນະສະເພາະກິດ ຄວບຄຸມ ແກ້ໄຂ ພະຍາດໂຄວິດ-19 ຂອງແຂວງຫລວງນໍ້າທາ. 

ທັງໝົດທີ່ຖືກສານຕັດສິນນັ້ນ ຍ້ອນ ສໍ້ລາດບັງຫຼວງ ຍັກຍອກຊັບສິນຂອງລັດ ເປັນຂອງສ່ວນຕົວ ລວມເຖິງການຟອກເງິນ ແລະ ຮັບສິນບົນ ຈາກຄົນທີ່ເຂົ້າເຂົ້າເມືອງຜິດກົດໝາຍ ໃນໄລຍະຄວບຄຸມພະຍາດໂຄວິດ-19​.

ໃນຈໍານວນຜູ້ທີ່ຖືກສານນັ້ນ ມີ 3 ຄົນ ຖືກສານຕັດສິນຈໍາຄຸກຕະຫຼອດຊີວິດ ຊຶ່ງລວມມີ ທ້າວ ພົມມະສຸກ ວິໄລກຸນ ອາດີດຮອງເຈົ້າແຂວງຫລວງນໍ້າທາ ແລະ ອີກ 2 ຄົນເປັນອາດີດ ພະນັກງານຂັ້ນສູງຂອງແຂວງ, ສ່ວນທີ່ເຫຼືອອີກ 10 ຄົນນັ້ນ ຖືກຈໍາຄຸກເປັນເວລາ 20 ປີລົງມາ.

ເຈົ້າໜ້າທີ່ກ່ຽວຂ້ອງ ແຂວງຫລວງນໍ້າທາ ທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 12 ກັນຍາ ວ່າ:

“ຈຸຖືກນີ້​ແມ່ນເປັນອາດຊະຍາກອນແບບພິເສດ ສໍ້ລາດບັງຫຼວງ ກິນສິນບົນນໍາຈຸຄ້າມະນຸດ ແບບວ່າ ບັນດາ ຄົນຈີນເຂົ້າເມືອງຜິດກົດໝາຍ ຫຼືວ່າ ຄົນເຂົ້າເມືອງຖືກກົດໝາຍ ຜູ້ໃດເຂົາຢາກໄດ້ກ່ອນ ກໍເອົາເງິນມາໃຫ້ ຮອງເຈົ້າແຂວງຫ້ອງວ່າການຜູ້ນຶ່ງ ສາທາ ຕໍາຫຼວດ ພະນັກງານຂັ້ນສູງກະມີ ຂັ້ນນ້ອຍກະມີ ຜູ້ຮັບໃຊ້ຫັ້ນແຫຼະ.”

ນອກຈາກນີ້ ຜູ້ກະທໍາຜິດຍັງ ຖືກປັບໃໝທັງໝົດເປັນເງິນເກືອບ 3.9 ຕື້ ກີບ ແລະ ຖືກຢຶດຊັບຈາກການກະທໍາຜິດທັງໝົດ ຊຶ່ງບໍ່ໄດ້ມີການເປີດເຜີຍຈໍານວນຊັບສິນທີ່ຢຶດຄືນມາ.

ຄະດີການຟ້ອງຮ້ອງດັ່ງກ່າວ ໄດ້ເລີ່ມຂຶ້ນແຕ່ 2022 ເປັນຕົ້ນມາ ຫຼັງຈາກ ຄົນຈີນເປັນຜູ້ຟ້ອງຮ້ອງວ່າ ມີເຈົ້າໜ້າທີ່ລະດັບສູງຂອງແຂວງຫລວງນໍ້າທາ ຮັບສິນບົນ ໃນຊ້ວງໂຄວິດ 19 ລະບາດ ໃນເວລານັ້ນ ແລະ ເຈົ້າໜ້າທີ່ກວດກາແຫ່ງລັດ ລົງໄປຄົນບ້ານ ເຈົ້າໜ້າທີ່ຂັ້ນສູງຂອງແຂວງ ແລະ ພົບເງິນສົດເປັນຈໍານວນຫຼາຍ.

ເຈົ້າໜ້າທີ່ກ່ຽວຂ້ອງທ່ານນຶ່ງ ໄດ້ກ່າວວ່າ:  

“ກະເບິ່ງຂ່າວຢູ່ ກະສົມຄວນແລ້ວ ເຂົາເຈົ້າເຮັດເປັນຂະບວນການນ່າ 13 ຄົນ ຫວ່າງປີ 2022 ເຂົາເຈົ້າໄປຄັນເຮືອນຂອງທ່ານ ພົມມະສຸກ ສ່າ ມີເງິນຢວນກັບຄໍາບັກຫຼາຍໆ ເດ້ ເຂົາເຈົ້າກັກຮອດໄດ້ 2 ປີແລ້ວ ສານຫາກໍ່ຕັດສິນເຂົ້າຄຸກຈັກປີ ຈັກປີຊື່ໆ ຕອນໂຄວິດຫັ້ນ ຄົນຈີນເຂົ້າມາບັກຫຼາຍໆ ແຕ່ລະມື້ ເສັຍເງິນໃຫ້ພວກນີ້ ເສັຍເງິນໃຫ້ບ້ານພັກ ຕາມອ້າຍຮູ້ຂ່າວ ຄົນຈີນນ່າຟ້ອງ ເພາະວ່າ ຈີນເຂົາເຈົ້າເສັຍຫາຍເດ້.”

ຊາວລາວທ່ານນຶ່ງ ກ່າວວ່າ ການກວດກາ ບັນຫາສໍ້ລາດບັງຫລວງ ບໍ່ຄວນເຮັດສະເພາະແຂວງດຽວ ແຕ່ ຕ້ອງເຮັດທຸກແຂວງ ຈົນຮອດລະດັບກະຊວງ:

“ກະສົມຄວນ ແຕ່ຄັນເຮັດແຂວງດຽວແລ້ວ ແລ້ວບາດນີ້ ແຂວງອື່ນຫັ້ນນ່າ ຄືບໍ່ຜິດຊິນ່າ ມັນມີທົ່ວປະເທດນ່າ ມັນເວົ້າເລື່ອງນີ້ ເຮື່ອງຄໍຣັບຊັ້ນນີ້ ນັບແຕ່ຂັ້ນແຂວງ ກໍລະດັບນຶ່ງ ຊື່ໆເນາະ ມັນຍັງກະຊວງ ໂອ້ຍມີໝົດ ຜູ້ໃຫຍ່ ມັນໄດ້ກິນ ບໍ່ໄດ້ຊໍ່າກັນ ກໍຕ້ອງໄດ້ຫັ້ນນ່າ.”

ຊາວລາວອີກທ່ານນຶ່ງ ກ່າວວ່າ ການສໍ້ລາດບັງຫລວງ ເປັນການຖ້ວງດຶງຄວາມຈະເລີນ ແລະ ເກີດຂຶ້ນທຸກແຂວງ ຊຶ່ງສ່ວນຫຼາຍມັນກໍເປັນລະດັບໃຫຍ່ ແລະ ມີການສົມຮູ້ຮ່ວມຄິດກັນ:  

“ມັນກໍມີໝົດແຫຼະແຕ່ລະແຂວງ ໂອ້ຍ ມັນກະລະດັບນາຍພຸ້ນແລ້ວມາ ລະດັບເທິງພຸ້ນແລ້ວ ລະດັບລຸ່ມ ເຂົາກໍບໍ່ກ້າປານໃດດອກ ຍັກຍອກອີ່ຫຍັງ ກໍເງິນຫັ້ນແຫຼະ ສ່ວນຫຼາຍໂຄງການຊາວຍເຫຼືອວ່າ ອີຫຍັງ ອີ່ຫຍັງຫັ້ນນ່າ ເງິນໂຕນີ້ມັນກໍຮ່ວມຫົວຫັນໝົດແລ້ວ ຜູ້ດຽວມັນເອົາບໍ່ໄດ້ດອກ ບ້ານເມືອງບໍ່ຈະເລີນຍ້ອນຈັ່ງຊີ້ແຫຼະ.”

ຜູ້ທີ່ຖືກສານຕັດສິນ 13 ຄົນ ລວມມີ:

1. ທ້າວ ພົມມະສຸກ ວິໄລກຸນ ອາດີດຮອງເຈົ້າແຂວງ ຫລວງນໍ້າທາ ມີຄວາມຜິດອາຍາ ໃນຂໍ້ຫາ ຍັກຍອກຊັບຂອງລັດ ຫຼື ລວມໝູ່ ຮັບສິນບົນ ສວຍໃຊ້ຖານະຕໍາແໜ່ງ ສິດອໍານາດ ໜ້າທີ່ເອົາຊັບຂອງລັດ ລວມໝູ່ ຫຼື ບຸກຄົນ ແລະ ຟອກເງິນ. ຜູ້ກ່ຽວຖືກລົງໂທດຕັດອິດສະຫຼະພາບ ຈໍາຄຸກຕະຫຼອດຊີວິດ ແລະ ປັບໃໝ່ ເປັນເງິນປະມານ 800 ລ້ານກີບ ພ້ອມທັງຖືກຢຶດຊັບຄືນ.
2. ທ້າວ ແກ້ວ ອິນທະວົງ ອາດີດຮອງຫົວໜ້າ ພະແນກສາທາລະນະສຸກ ແຂວງ ມີຄວາມຜິດດຽວກັນ ກັບຮອງເຈົ້າແຂວງ ຖືກລົງໂທດຕັດອິດສະຫຼະພາບ ຕະຫຼອດຊີວິດ ແລະ ປັບໃໝປະມານ 700 ລ້ານ ກີບ ແລະ ຖືກຢຶດຊັບຄືນ.
3. ທ້າວ ພູຊົງ ແກ້ວກາງເພັງ ອາດີດຮອງຫົວໜ້າ ຫ້ອງວ່າການແຂວງມີຄວາມຜິດດຽວກັນ ກັບຮອງເຈົ້າແຂວງ ຖືກລົງໂທດຕັດອິດສະລະພາບຕະຫຼອດຊີວິດ ແລະ ປັບໃໝ ເປັນເງິນປະມານ 700 ລ້ານ ກີບ ແລະ ຖືກຢຶດຊັບ ສ່ວນວ່າ ອີກ 10 ຄົນ ແມ່ນຈໍາຄຸກ 20 ປີລົງມາ ຕາມລໍາດັບ.