ສປປລາວຍັງບໍ່ມີສິດເສຣີພາບ

ອົງການ ອິສຣະພາບ ທີ່ ສະຫະຣັດ ອະເມຣິກາ ອອກ ຣາຍງານ ປະຈໍາປີ 2014 ກ່ຽວກັບ ການ ປະຕິບັດ ສິດ ເສຣີພາບ ຢູ່ ປະເທສ ຕ່າງໆ ໃນ ທົ່ວໂລກ ແຈ້ງວ່າ ສປປ ລາວ ບໍ່ມີ ສິດ ເສຣີພາບ.

ໃນປີ 2013 ຣັຖບາລ ລາວ ເປີດກວ້າງ ທາງ ດ້ານ ເສຖກິດ ສູ່ໂລກ ພາຍນອກ ແຕ່ຍັງ ຄວບຄຸມ ຢ່າງ ເຂັ້ມງວດ ທາງດ້ານ ການເມືອງ. ຣັຖບາລ ລາວ ຖືກ ຕ່າງ ປະເທສ ວິພາກ ວິຈານ ຕລອດ ທັງປີ ຍ້ອນ ຄວາມ ຫລົ້ມເຫລວ ໃນການ ສືບສວນ ສອບສວນ ຫາ ທ່ານ ສົມບັດ ສົມພອນ ນັກ ພັທນາ ຊຸມຊົນ ດີເດັ່ນ ທີ່ ຫາຍສາບສູນ ໄປ ເມື່ອ ທ້າຍປີ 2012 ທີ່ ຜ່ານມາ.

ພ້ອມກັນ ນັ້ນ ຣັຖບາລ ລາວ ຍັງບໍ່ຟັງ ສຽງ ຄັດຄ້ານ ຂອງ ປະຊາຊົນ ຕໍ່ ໂຄງການ ເຂື່ອນ ໄຟຟ້າ ໄຊຍະບູຣີ ຊຶ່ງ ເປັນ ໂຄງການ ຂນາດ ໃຫຍ່ ກັ້ນ ແມ່ນໍ້າຂອງ ແລະ ໂຄງການ ເຂື່ອນ ໄຟຟ້າ ດອນ ສະໂຮງ ຢູ່ ແມ່ນໍ້າຂອງ ທີ່ ມີຄວາມ ຂັດແຍ້ງ ກັນ ຍ້ອນມີ ຄວາມ ກັງວົນ ນໍາ ຜົລກະທົບ ຢ່າງ ໃຫຍ່ຫລວງ ຕໍ່ ວິຖີ ຊີວິດ ຂອງ ພົລເມືອງ ລາວ ຫລາຍ ພັນ ຄົນ ແລະ ຕໍ່ ປະຊາຊົນ ທີ່ ຢູ່ແຄມ ແມ່ນໍ້າຂອງ ຫລາຍ ສິບລ້ານ ຄົນ ແລະ ຕໍ່ສະພາບ ແວດລ້ອມ ນໍາດ້ວຍ.

ຣັຖທັມມະນູນ ລາວ ປີ 1991 ກໍານົດ ວ່າ ສປປ ລາວ ມີພັກ ປະຊາຊົນ ປະຕິວັດ ລາວ ພັກດຽວ ທີ່ ເປັນ ພັກ ການເມືອງ ຖືກຕ້ອງ ຕາມ ກົດໝາຍ ແລະ ກໍານົດ ໃຫ້ ມີບົດບາດ ນໍາພາ ທຸກ ຣະດັບ ການຈັດຕັ້ງ ຂອງຣັຖ. ກັມການ ສູນກາງ ພັກ 61 ຄົນ ແລະ ກັມການ ກົມ ການເມືອງ ສູນກາງ ພັກ 11 ຄົນ ເປັນຜູ້ ຕັດສິນ ບັນຫາ ສໍາຄັນໆ ຂອງ ຊາດ ທັງໝົດ.

ມີການ ເລືອກຕັ້ງ ສະມາຊິກ ສະພາ ແຫ່ງຊາດ ທຸກໆ 5 ປີ ແຕ່ ການ ເລືອກຕັ້ງ ນັ້ນ ບໍ່ເປັນໄປ ຢ່າງ ເສຣີ ແລະ ບໍ່ ຍຸຕິທັມ. ຣັຖທັມມະນູນ ສປປລາວ ຫ້າມ ບໍ່ໃຫ້ ມີພັກ ການເມືອງ ອື່ນ ນອກຈາກ ພັກ ປະຊາຊົນ ປະຕິວັດ ລາວ ເທົ່ານັ້ນ.

ຜູ້ຮັບ ສມັກ ເລືອກຕັ້ງ ເປັນ ສະມາຊິກ ສະພາ ແຫ່ງຊາດ ທຸກຄົນ ບໍ່ຈໍາເປັນ ຈະ ແມ່ນ ສະມາຊິກ ພັກ ແຕ່ ທຸກຄົນ ຕ້ອງໄດ້ ຮັບ ອະນຸມັດ ຈາກ ຄນະ ກັມການ ສະພາ ແຫ່ງຊາດ ຊຶ່ງ ໃນ ພາກ ຕົວຈິງ ແລ້ວ ເກືອບວ່າ ທັງໝົດ ເປັນ ສະມາຊິກ ພັກ ປະຊາຊົນ ປະຕິວັດ ລາວ.

ນອກຈາກ ນັ້ນ ການ ສໍ້ຣາສ ບັງຫຼວງ ຂອງ ເຈົ້າໜ້າທີ່ ຣັຖບາລ ກໍແພ່ ຂຍາຍ ຢ່າງ ກວ້າງ ຂວາງ ເຖິງມີ ກົດໝາຍ ຕ້ານ ການ ສໍ້ຣາສ ບັງຫລວງ ແຕ່ກໍບໍ່ໄດ້ ຮັບການ ຈັດຕັ້ງ ປະຕິບັດ ແລະ ກົດ ຣະບຽບ ຂອງ ຣັຖບາລ ກໍໃຫ້ ໂອກາດ ທຸກດ້ານ ສໍາລັບ ການ ຕິດ ສິນບົນ.