ທ.ອ໊ອດ ຍັງຫາຍສາບສູນ ຢູ່ໄທ

ເຈົ້າໜ້າທີ່ໄທ ຍັງບໍ່ມີຄວາມຄືບໜ້າ ໃນການຕິດຕາມສືບຫາ ທ້າວ ອ໊ອດ ໄຊຍະວົງ ນັກເຄື່ອນໄຫວ ເພື່ອ ປະຊາທິປະໄຕ ຊາວລາວ ທີ່ ມາລີ້ພັຍ ຢູ່ປະເທດໄທ ແລ້ວຫາຍໄປ ຢູ່ບາງກອກ ເມື່ຶອວັນທີ່ 26 ສິງຫາ ປີ 2019 ທີ່ ຜ່ານມາ, ມາຮອດປັດຈຸບັນກໍເປັນ ເວລາ 4 ເດືອນ ປາຍແລ້ວ. ພົນຕໍາຣວດເອກ ທີຣະຍຸດ ຜູ້ຮັບຜິດຊອບ ຄະດີການຫາຍໄປຂອງ ທ້າວ ອ໊ອດ ໄຊຍະວົງ ກ່າວຕໍ່ວິທຍຸ ເອເຊັຽເສຣີ ໃນວັນທີ 10 ມົກກະຣາ ນີ້ວ່າ:

“ຂ້າພະເຈົ້າ ກໍໃຫ້ຝ່າຍສືບສວນ ກໍເຮັດການເຝົ້າ ສືບສວນຕິດຕາມຢູ່ຕລອດ ທັງຢູ່ເທິງດິນ ແລະໃຕ້ດິນ ທັງເຣື່ອງອິຫຍັງຕ່າງໆ ກໍສືບຖາມ ແລ້ວກໍປະສານກັບ ທາງເຈົ້າໜ້າທີ່ UN  ອົງການສະຫະປະຊາຊາດ ຢູ່ຕລອດ ປະສານກັບຍາດພີ່ນ້ອງຂອງລາວ ນໍາດ້ວຍ.”

ທ່່ານເວົ້າວ່າ ຜ່ານມາ ເຈົ້າໜ້າທີ່ຕໍາຣວດ ໄດ້ກວດເບິ່ງ ກ້ອງວົງຈອນປິດ ທຸກແຫ່ງ ແຕ່ກໍບໍ່ເຫັນວ່າ ທ້າວ ອ໊ອດ ຫາຍສາບສູນໄປຈາກໃສ ແທ້, ປັດຈຸບັນ ກໍສັງເກດການ ເບິ່ງບໍຣິເວນ ໃກ້ບ່ອນພັກ ກໍຍັງບໍ່ພົບເຫັນ, ແລະ ເຈົ້າໜ້າທີ່ ມີຣາຍງານຄວາມຄືບໜ້າ ຕໍ່ອົງການສະຫະ ປະຊາຊາດ ປະເທດໄທ ເປັນປະຈໍາ.

ທ່ານ Phil Robertson ຮອງຜູ້ອໍານວຍການ ອົງການສິດທິມະນຸດ ຫຼື Human right Watch ປະຈໍາພູມມິພາກ ເອເຊັຍຕາເວັນອອກ ກ່າວຕໍ່ ວິຍຸເອເຊັຽເສຣີ ໃນ ມື້ດຽວກັນ ນັ້ນວ່າ: ສິ່ງສໍາຄັນ ໃນຕອນນີ້ ຜູ້ ທີ່ເຂົ້າມາຂໍລີ້ພັຍ ໃນປະເທດໄທ ຕ້ອງ ຣະມັດ ຣະວັງ ເພາະ ຣັຖບານໄທ ບໍ່ສາມາດ ເບິ່ງແຍງ ຄວາມປອດໄພ ຂອງທຸກຄົນໄດ້ ຢ່າງທົ່ວເຖິງ:

“ສິ່ງສໍາຄັນ ບໍ່ແມ່ນແຕ່ ຂໍລີ້ພັຍ ສໍາລັບຄົນອົພຍົບ ໃນກຸງເທບແລ້ວ ທຸກຄົນ ຕ້ອງຣະມັດຣະວັງ ແລ້ວກໍຕ້ອງມີຄວາມຊັດເຈນ ຈາກຣັຖບານ ໄທ ວ່າເຂົາ ຈະເຮັດແບບໃດ ເຣື່ອງ ທ້າວ ອ໊ອດ ນີ້ ເພາະວ່າເຣື່ອງນີ້ ເປັນທີ່ສໍາຄັນ ເຂົາກໍຕ້ອງຕາມຫາ ເຖິງທີ່ສຸດ.”  

ນອກຈາກ ທ້າວ ອ໊ອດ ໄຊຍະວົງ ແລ້ວ, ທ້າວ ເພັດພູທອນ ພິລາຈັນ  ຄົນງານລາວ ຢູ່ໄທ ທີ່ເຄີຍເຄື່ອນໄຫວ ຕໍ່ຕ້ານ ຣັຖບານ ລາວກັບ ທ້າວ ອ໊ອດ ໄຊຍະວົງ ກໍຫາຍສາບສູນ ໄປໃນເວລາ ກັບຄືນໄປຢາມບ້ານເກີດ ຢູ່ລາວ ເມື່ອເດືອນ ພຶສຈິກາ ປີກາຍ.