ຫວຽດນາມໄດ້ສິດລົງທຶນ ໃນລາວຫຼາຍ ແຕ່ປະຊາຊົນບໍ່ໄດ້ຮັບປະໂຫຍດ

ລັດຖະບານລາວ ໄດ້ອະນຸມັດການລົງທຶນ ໃຫ້ນັກທຸລະກິດຫວຽດນາມ ຈໍານວນ 6 ໂຄງການ ລວມມູນຄ່າ 339 ລ້ານໂດລ້າສະຫະລັດ ໃນ 6 ເດືອນຕົ້ນປີ 2024 ນີ້. ໃນນັ້ນ ມີຂະແໜງການບໍ່ແຮ່ 1 ໂຄງການ, ຂະແໜງໄຟຟ້າ 1 ໂຄງການ ແລະຂະແໜງອື່ນໆ 4 ໂຄງການ ຊຶ່ງກະຈາຍການລົງທຶນຢູ່ຕາມແຂວງຕ່າງໆ ຂອງປະເທດລາວ.

ປະຊາຊົນລາວຜູ້ນຶ່ງ ຢູ່ເມືອງຊານໄຊ ແຂວງອັດຕະປື ທີ່ສູນເສຽດິນທໍາການກະເສດ ໃຫ້ໂຄງການປູກອ້ອຍ ຂອງນັກລົງທຶນຫວຽດນາມ ເວົ້າຕໍ່ວິທຍຸເອເຊັຽເສຣີໃນມື້ວັນທີ 29 ສິງຫານີ້ ເຖິງນັກທຸລະກິດຫວຽດນາມ ທີ່ເຂົ້າມາລົງທຶນປູກພືດ ແລະຂຸດຄົ້ນບໍ່ແຮ່ໃນລາວວ່າ ມີຈໍານວນຫຼາຍ ໃນໄລຍະຫຼາຍປີມານີ້ ຊຶ່ງກໍມີປະຊາຊົນຫຼາຍບ້ານ ໄດ້ສູນເສຽດິນທໍາການກະເສດ ໃຫ້ໂຄງການລົງທຶນເຫຼົ່າ ນັ້ນ. ແຕ່ສຸດທ້າຍ ປະຊາຊົນລາວໃນເຂດດັ່ງກ່າວ ບໍ່ໄດ້ຮັບຜົນປະໂຫຍດຫຍັງ ດັ່ງທີ່ທ່ານກ່າວວ່າ:

“ປະຊາຊົນດຽວນີ້ ສິບໍ່ມີປະໂຫຍດອີ່ຫຍັງ ຄືເຂດບ້ານເຮົາຫັ້ນ ເຂົາກະປູກອ້ອຍຈົນວ່າຈໍາດິນໄຮ່ດິນນາຮົ້ວສວນ ກະໄດ້ປະໂຫຍດແຕ່ເບື້ອງຕົ້ນ ເຂົາໃຫ້ເງິນເຮັດຫ້ອງການບ້ານຫັ້ນ ໄລຍະນີ້ກະບໍ່ໄດ້ຫຍັງ ໄດ້ແຕ່ເທື່ອດຽວນັ້ນ ຜົນປະໂຫຍດຄືວ່າຫັ້ນກະມີແຕ່ຜູ້ໄປ ໄດ້ອອກແຮງງານນໍາບໍລິສັດ.”

ທ່ານກ່າວຕື່ມອີກວ່າ ກ່ອນທີ່ບໍລິສັດຫວຽດນາມ ຈະເຂົ້າມາລົງທຶນໃນລາວ ນັກລົງທຶນກໍບອກໃຫ້ຊາວບ້ານຮູ້ວ່າ ຈະສ້າງວຽກເຮັດງານທໍາ ໃຫ້ປະຊາຊົນໃນເຂດ ທີ່ຈະມີການລົງທຶນ ແລະຊ່ວຍພັດທະນາບ້ານເມືອງ ໃຫ້ມີຄວາມຈະເລີນຂຶ້ນ. ແຕ່ເມື່ອໄດ້ຮັບສໍາປະທານດິນໄປແລ້ວ ກໍບໍ່ເຫັນຈ້າງຄົນລາວ ເຂົ້າໄປເຮັດວຽກນໍາໂຄງການ ພໍປານໃດ. ໃນບາງເຂດ ຍັງມີການຕິດປ້າຍປະກາດຫ້າມ ບໍ່ໃຫ້ປະ ຊາຊົນ ເຂົ້າໄປໃນເຂດສໍາປະທານນັ້ນອີກ.

ນອກຈາກນັ້ນ ບາງໂຄງການລົງທຶນ ຍັງສ້າງຜົນກະທົບ ໃຫ້ປະຊາຊົນໃນເຂດສໍາປະທານນໍາອີກ ເຊັ່ນ ເຮັດໃຫ້ເສັ້ນທາງເປ່ເພ ຈາກການຂົນສົ່ງແຮ່ທາດ ແລະຜົນຜະລິດທາງການກະເສດ ຢູ່ເຂດເມືອງຊານໄຊ, ຫົນທາງເປັນບວກເປັນຂຸມ ແຕ່ພວກນັກລົງທຶນ ບໍ່ເຄີຍສ້ອມແປງໃຫ້ຄືເກົ່າເລີຍ.

ແລະຢູ່ເມືອງຄໍາ ແຂວງຊຽງຂວາງ ປະຊາຊົນລາວນາງນຶ່ງ ກໍເວົ້າວ່າ ຢູ່ເຂດເມືອງຄໍານີ້ ມີບໍລິສັດຂອງຄົນຫວຽດນາມ ເຂົ້າມາລົງທຶນຫລາຍ ໂດຍສະເພາະໂຄງການຂຸດຄົ້ນແຮ່ທາດ ແລະການປູກພືດເສດຖະກິດ ແຕ່ມາຮອດປັດຈຸບັນ ກໍຍັງບໍ່ເຫັນໂຄງການລົງທຶນເຫລົ່ານັ້ນ ໃຫ້ການຊ່ວຍເຫລືອປະຊາຊົນລາວ ໃນເຂດດັ່ງກ່າວຈັກເທື່ອ.

“ບໍ່ມີກໍຜົນປະໂຫຍດ ຕົວຢ່າງຄືໂຄງການບໍ່ແຮ່ເນາະກະບໍ່ໄດ້ຮັບນ່າ ຜ່ານມາບໍ່ເຄີຍມີເນາະ ບໍ່ແຮ່ ກະສິກໍາບໍ່ ບໍ່ເຄີຍມີ ວ່າສິເຮັດໂຄງການມາຊ່ວຍເຫລືອ ປະຊາຊົນໃນເຂດດັ່ງກ່າວ ບໍ່ເຫັນມີ.”

ຢູ່ເມືອງທ່າແຂກ ແຂວງຄໍາມ່ວນ ປະຊາຊົນນາງນຶ່ງ ກໍເວົ້າຕໍ່ວິທຍຸເອເຊັຽເສຣີໃນມື້ດຽວກັນນີ້ວ່າ ຫຼາຍປີມານີ້ ມີນັກລົງທຶນຫວຽດນາມ ເຂົ້າມາລົງທຶນ ຂຸດຄົ້ນແຮ່ທາດຫລາຍ ຢູ່ແຂວງຄໍາມ່ວນ. ບາງໂຄງການ ກວມເອົາເນື້ອທີ່ທໍາການກະ ເສດ ຂອງປະຊາຊົນ ເປັນຈໍານວນຫຼວງຫຼາຍ, ສ້າງຜົນກະທົບຢ່າງໜັກ ຕໍ່ດິນໄຮ່ດິນນາ, ຕາມພູຜາ ກໍລະເບີດເອົາຫີນໄປຫຼາຍ. ຫຼາຍຄອບຄົວ ຖືກໃຫ້ໂຍກຍ້າຍ ແລະຢູ່ຫຼາຍເຂດ ເສັ້ນທາງເປ່ເພ ຈາກການຂົນແຮ່ທາດ ອອກໄປປະເທດຫວຽດນາມ, ມີຜົນກະທົບຫຼາຍ, ປະຊາຊົນບໍ່ໄດ້ຮັບຜົນປະໂຫຍດ, ເງິນຊົດເຊີຍຄວາມເສຍຫາຍ ກໍໃຫ້ໜ້ອຍດຽວ, ແຕ່ລັດຖະບານບໍ່ຄ່ອຍອອກຂ່າວ ດັ່ງທີ່ນາງເວົ້າວ່າ:

“ລົງທຶນໄປບັກຫລາຍໆ ດິນດອນຕອນຫຍ້າ ໄຮ່ນາຮົ້ວສວນ ເລື່ອງຊົດເຊີຍບໍ່ ເລື້ອງໄກ້ເກັ່ນໍາປະຊາຊົນແນວໃດນີ້ ເງິນຊົດເຊີຍມັນຕໍ່າກວ່າຊັ້ນສາ ບາງຄົນຂະເຈົ້າກະບໍ່ພໍໃຈ ລັດຖະ ບານ ເພິ່ນກະບໍ່ຄ່ອຍອອກຂ່າວແບບນີ້ປານໃດ.”

ກ່ຽວກັບເລື່ອງທີ່ວ່ານີ້ ເຈົ້າໜ້າທີ່ຜູ້ຮູ້ຈັກວຽກງານການຄ້າ ທ່ານນຶ່ງ ເວົ້າເຖິງນັກລົງທຶນຊາວຫວຽດນາມວ່າ ທຽບໃສ່ນັກລົງທຶນຈາກປະເທດຈີນ ແລະໄທ, ຫວຽດ ນາມເຂົ້າມາລົງທຶນໃນລາວ ໜ້ອຍລົງຫລາຍ ໃນໄລຍະຫຼາຍປີມານີ້. ນັກທຸລະ ກິດຫວຽດນາມ ທີ່ເຂົ້າມາລົງທຶນໃນລາວ ສ່ວນຫລາຍ ຈະເນັ້ນໄປທາງດ້ານເສດຖະກິດ ຕາມແຂວງຊາຍແດນ ເຊັ່ນໂຄງການສ້າງເຂື່ອນໄຟຟ້າ, ໂຄງການຂຸດຄົ້ນແຮ່ທາດ ແລະໂຄງການປູກພືດເສດຖະກິດ ເພາະມັນມີຄວາມສະດວກໃນການຂົນສົ່ງ ແລະການເຂົ້າ-ອອກປະເທດ.

ສ່ວນທຸລະກິດທົ່ວໄປ ທີ່ຄົນຫວຽດນາມເປັນເຈົ້າຂອງກິດຈະການ ສ່ວນຫລາຍຈະເປັນກຸ່ມລູກຊອດລາວ-ຫວຽດນາມ ທີ່ສືບທອດກິດຈະການ ຈາກພໍ່ແມ່ ດັ່ງທີ່ທ່ານກ່າວວ່າ:

“ຄົນຫວຽດນາມ ຢາກເນັ້ນໄປດ້ານເສດຖະກິດຢູ່ເລາະຊາຍແດນ ພວກປະກອບການຫລືວ່າເຮັດໂຮງຈັກໂຮງງານ ຫລືວ່ານັກທຸລະກິດສ່ວນຫລາຍ ກະແມ່ນລູກຊອດ ຫວຽດ.”

ເວົ້າເຖິງເລື່ອງການຂຸດຄົ້ນບໍ່ແຮ່ຢູ່ລາວ ປະຊາຊົນລາວ ກັງວົນຫຼາຍ, ທີ່ບໍ່ຢາກໃຫ້ລັດຖະບານລາວ ອະນຸມັດໃຫ້ຂຸດຄົ້ນຫຼາຍເກີນໄປ ເພື່ອປົກປັກຮັກສາຊັບສິນອັນມີຄ່າສູງນີ້ເອົາໄວ້ ຮວມໄປເຖິງການປົກປັກຮັກສາປ່າໄມ້ ແລະສິ່ງແວດລ້ອມ ຍ້ອນວ່າ ທີ່ຜ່ານມາ ແລະໃນປັດຈຸບັນ ມີຫຼາຍໂຄງການ ສ້າງຜົນກະ ທົບຢ່າງໜັກ ຕໍ່ສິ່ງແວດລ້ອມ ແລະສັງຄົມ ແລະບໍ່ໄດ້ສ້າງຜົນປະໂຫຍດໃຫ້ແກ່ປະເທດຊາດ ເທົ່າທີ່ຄວນ.

ແຕ່ເຈົ້າໜ້າທີ່ ຜູ້ຮູ້ຈັກວຽກງານ ການຂຸດຄົ້ນບໍ່ແຮ່ ຢູ່ແຂວງໄຊສົມບູນ ເວົ້າວ່າ ການອະນຸຍາດ ໃຫ້ນັກລົງທຶນຕ່າງປະເທດ ເຂົ້າມາຂຸດຄົ້ນແຮ່ທາດ ໃນລາວ ປັດຈຸບັນ ຕ້ອງໄດ້ຮັບການອະນຸຍາດ ຈາກລັດຖະບານເທົ່ານັ້ນ ແລະລັດຖະ ບານກໍເຫັນວ່າ ໂຄງການຂຸດຄົ້ນແຮ່ທາດ ຖືເປັນທ່າແຮງສໍາຄັນ ທີ່ສ້າງລາຍຮັບແລະຜົນປະໂຫຍດ ໃຫ້ແກ່ປະເທດຊາດ.

“ຢູ່ໃນສາຍທາງພະລັງງານ-ບໍ່ແຮ່ນ່າ ມັນກະມີອັນນ່າ ນະໂຍບາຍພິເສດຂອງລັດຖະບານ ໃນການຂຸດຄົ້ນເອົາທ່າແຮງມາພັດທະນາຕົວເອງ ຫັ້ນນ່າ ໂດຍທີ່ວ່າລັດຖະບານບໍ່ສາມາດ ຈະມີງົບປະ ມານກຸ້ມໄດ້ ແຕ່ບົນພື້ນຖານລັດ ຖະບານອະນຸຍາດເນາະ.”

ປັດຈຸບັນ ລັດຖະບານລາວ ແລະຫວຽດນາມ ມີສັນຍາ ວ່າດ້ວຍການຮ່ວມມືສອງຝ່າຍ ແຕ່ປີ 2021 ຫາປີ 2025 ໂດຍທີ່ທັງສອງຝ່າຍ ສາມາດຈັດຕັ້ງປະຕິບັດວຽກງານຕ່າງໆ ຮ່ວມກັນຫຼາຍດ້ານ ເປັນຕົ້ນ ການພົວພັນທາງດ້ານການເມືອງ ແລະການຕ່າງປະເທດ, ​ການປ້ອງກັນຊາດ-ປ້ອງກັນຄວາມສະຫງົບດ້ານການສຶກສາ, ການພັດທະນາຊັບພະຍາກອນມະນຸດ ແລະກໍ່ສ້າງວິຊາຊີບ.

ນັບແຕ່ປີ 2021 ເປັນຕົ້ນມາ ລັດຖະບານລາວ ໄດ້ອະນຸມັດການລົງທຶນໃໝ່ ໃຫ້ວິສາຫະກິດຫວຽດນາມ ຫຼາຍໂຄງການ ທີ່ມີມູນຄ່າການລົງທຶນຫຼາຍ. 

ເລື່ອງການລົງທຶນຂອງຫວຽດນາມ ຢູ່ປະເທດລາວ, The Laotian Times ລາຍງານວັນທີ 19 ສິງຫາ 2024 ນີ້ວ່າ ການລົງທຶນຂອງຫວຽດນາມຢູ່ລາວ ບັນລຸເຖິງ 5,5 ຕື້ໂດລ້າສະຫະລັດ ໃນຈໍານວນ 256 ໂຄງການ.