ປະຊາຊົນຫຼາຍຄົນບໍ່ເຊື່ອຂະບວນການສານ

ປະ​ຊາ​ຊົນ​ບໍ່​ເຊື່ອ​ໝັ້ນ ​ເຈົ້າ​ໜ້າ​ທີ່ຜູ້​ພິ​ພາກ​ສາ​ສານ ແລະເຈົ້າ​ໜ້າ​ທີ່ສານ ທີ່​ມີ​ພຶດຕິ​ກັມບໍ່​ຖືກ​ຕ້ອງ​ສວຍ​ໃຊ້ ​ອໍ​າ​ນາດ​ຕັດ​ສິນ​ຄະ​ດີ ​ຕາມ​ໃຈ​ໂຕ​ເອງ. ປະ​ຊາ​ຊົນ​ຫຼາຍ​ຄົນ ກໍ​ເຫັນ​ວ່າ ບັນ​ຫາ​ດັ່ງ​ກ່າວ ແກ້​ໄຂ​ໄດ້​ຍາການ ເພາະ​ວ່າ ຜ່ານ​ມາ ຜູ້​ພິ​ພາກ​ສາ ແລະ ເຈົ້າ​ໜ້າ​ທີ່​ສານຈຳ​ນວນ​ນຶ່ງ ມັກ​ໃຊ້​ອຳ​ນາດ ແລະຄວາມ​ສໍາ​ພັນ​ສ່ວນ​ບຸກ​ຄົນ ໃນ​ການ​ຕັດ​ສິນ ແລະພິ​ຈາ​ລະ​ນາ​ຄະ​ດີ ໂດຍບໍ່​ຄຳ​ນຶ່ງ​ເຖິງ​ຂໍ້​ປະ​ຕິ​ບັດ​ກົດ​ໝາຍ. ອາ​ດີດ​ພ​ນັກ​ງານຣັ​ຖກອນ ທ່ານ​ນຶ່ງໄດ້​ກ່າວ​ຕໍ່​ເອ​ເຊັຽ​ເສ​ຣີ ໃນ​ວັນ​ທີ 9 ພຶ​ສ​ຈິ​ກາ ວ່າ: 

“ຈາກ​ຜິດ​ຫັ້ນ ເຂົາ​ມາ​ເຮັດ​ໃຫ້​ເປັນ​ຖືກ ເພາະ​ວ່າ ເຂົາ​ມີ​ອຳ​ນາດ ບາດນີ້ ປະ​ຊາ​ຊົນ​ເຮົາ​ນີ້ ອັ​ບ​ປ​ໂຍດເນາະ ຊິ​ໄປ​ສູ້​ເຂົາ ມັນ​ກໍ​ສູ້ບໍ່​ໄດ້​ເດ້ ເພາະ​ເຂົາ​ມີ​ອຳ​ນາດ ຣັ​ຖ​ຢູ່​ໃນ​ມື ດຽວນີ້ ມັນ​ກໍ​ເປັນ​ມາ​ດົນ​ແລ້ວ ຫັ້ນ​ນ່າ ມັນ​ກໍ​ແກ້​ໄຂ​ຍາກ​ຢູ່ ເພາະ​ວ່າ ຜູ້​ມີ​ອຳ​ນາດ ກໍ​ຄື​ຣັ​ຖ​ບານ​ຫັ້ນ ເພິ່ນ​ກໍ​ເວົ້າ​ຕົວ​ະປະ​ຊາ​ຊົນ​ໄປ​ຊື່ໆ ຫັ້ນ​ແຕ່​ ໃນ​ສະ​ພານີ້ ກໍ​ເວົ້າ ປະ​ທານ​ສານ​ເພິ່ນ​ກໍ​ວ່າ ຈະ​ລົງ​ໂທດ​ວິ​ໃນ ແຕ່​ສຸດທ້າຍກໍ​ບໍ່​ເຫັນ​ເປັນ​ຮູບ​ປະ​ທັມ.” ​

ເຖິງວ່າ ສານ​ປະ​ຊາ​ຊົນ​ສູງ​ສຸດ ແລະ ໜ່ວຍ​ງານ​ທີ່​ກ່ຽວ​ຂ້ອງ​ຈະ​ອອກ​ມາ​ຖ​ແລງ​ກ່ຽວ​ກັບ​ວຽກ​ງານ​ທີ່​ຜ່ານ​ມາ ພ້ອມ​ໃຫ້​ຄຳ​ໝັ້ນ​ສັນ​ຍາ​ກັບ​ປະ​ຊາ​ຊົນ​ວ່າ ຈະ​ແກ້​ໄຂ​ບັນ​ຫາ​ການ​ປະ​ຕິ​ບັດ ແລະ ພຶດ​ຕິ​ກັມ​ອັນ​ບໍ່​ຖືກ​ຕ້ອງ​ຂອງ​ຜູ້​ພິ​ພາກ​ສາ ແລະ ເຈົ້າ​ໜ້າ​ທີ່​ສານ​ ແຕ່ ປະ​ຊາ​ຊົນ​ກໍ​ຍັງ​ບໍ່​ມີ​ຄວາມ​ເຊື່ອ​ໝັ້ນ ໃນ​ຂະ​ບວນ​ການ​ຍຸ​ຕິ​ທັມ​ຂອງ​ສານ ຍ້ອນ​ເຫັນ​ວ່າ ບາງ​ກໍ​ລະ​ນີ ສານ​ຕັດ​ສິນ​ຄະ​ດີບໍ່​ເປັນ​ໄປ​ຕາມ​ສະ​ພາບ​ໂຕ​ຈິງ. ຊາ​ວ​ບ້ານ ແຂວງ ໄຊ​ຍະ​ບູ​ຣີ ໄດ້​ກ່າວ​ໃນ​ວັນ​ທີ 9 ກັນ​ຍາ ວ່າ:

“ແຕ່​ຂ້ອນ​ຂ້າງ ມັນ​ກໍ​ຊື້ ມີ​ຄວາມ​ຍຸ​ຕິ​ທັມ ມັນ​ກໍ​ອາດ​ຈະ​ໜ້ອຍ ກໍ​ມີ​ແຕ່ຢາກ​ໃຫ້​ທາງ​ໜ່ວຍ​ງານ​ທີ່​ເພິ່ນ ຮັບ​ຜິດ​ຊອບ​ຫັ້ນ​ແຫຼະ ໃຫ້​ຕັດ​ສິນ​ບັນ​ຫາ ເລື່ອງຍຸ​ຕິ​ທັມອີ່​ຫ​ຍັງຕ່າງໆ ຄັນ​ຖ້າ​ວ່າ ມັນ​ບໍ່​ມີ​ຄວາມ​ຍຸ​ຕິ​ທັມ ເນາະ ເພາະ​ວ່າ ພໍ​ສານ​ຕັດ​ສິນ​ອອກ​ມາ ມັນ​ກໍ​ຊິ​ເວົ້າ​ວ່າ ຂ້ອນ​ຂ້າງ​ຖືກ​ຝ່າ​ຍ​ນຶ່ງ ວ່າ​ຜິດ​ຝ່າຍນຶ່ງ ແຕ່​ວ່າ ມັນ​ເຫັນ​ນ່າ ມັນ​ບໍ່​ຍຸ​ຕິ​ທັມ.”

ປະ​ຊາ​ຊົນ​ຈຳ​ນວນ​ຫຼາຍ ຕ້ອງ​ການ​ໃຫ້​ໜ່ວຍ​ງານ ​ທີ່​ກ່ຽວ​ຂ້ອງ​ດໍ​າ​ເນີນ​ກາ​ນ ກວດ​ສອບ​ຄວາມ​ປະ​ພຶດ ແລະ ການ​ປະ​ຕິ​ບັດ​ໜ້າ​ທີ່​ ຂອງ​ເຈົ້າ​ໜ້າ​ທີ່​ສານ ຢ່າງ​ເຄັ່ງ​ຄັດ ຍ້ອນ​ວ່າ ເວ​ລາ ມີ​ການ​ຕັດ​ສິນ ແລະພິ​ຈາ​ລະ​ນາ​ຄະ​ດີ​ແບບບໍ່​ຍຸ​ຕິ​ທັມ ແລະຂາດ​ຄວາມ​ໂປ່ງ​ໃສ ມັນ​ສົ່ງ​ຜົ​ລ​ໃຫ້​ປະ​ຊາ​ຊົນ​ບໍ່​ໄດ້​ຮັບ​ຄວາມ​ເປັນ​ທັມ. ຊາວ​ນະ​ຄອນ​ຫຼວງວຽງ​ຈັນ ກ່າວ​ວ່າ:  

“ຢູ່​ໃສ​ມັນ​ກໍ​ມີ​ໝົ​ດ​ເນາະ ເລື່ອງ​ແນວນີ້ ກໍ​ມີ​ແຕ່​ບັງ​ຄັບ​ໃຊ້​ກົດ​ໝາຍໃຫ້​ເຄັ່ງ​ຄັດ ຕື່ມ​ເທົ່າ​ນັ້ນແຫຼະ ກໍ​ແມ່ນ​ແຫຼະ ປະ​ເທດ​ດ້ອຍ​ພັ​ທ​ນາ ມັນ​ກໍ​ເຮັດ​ຍາກ​ໜ້ອຍ​ນຶ່ງ ການ​ບັງ​ຄັບ​ໃຊ້​ກົດ​ໝາຍ​ເວົ້າ​ເລື່ອງ​ຜູ້​ປະ​ຕິ​ບັດ​ກົດ​ໝາຍ ບາດ​ກົດ​ໝາຍບໍ່​ຖືກ ມັນ​ກໍ​ແນ່​ນ້ອນ​ແຫຼະຜົ​ລ​ກະ​ທົບ​ຕໍ່​ປະ​ຊາ​ຊົນ ກໍ​ບໍ່​ໄດ້​ຮັບ​ຄວາມ​ເປັນ​ທັມ ແນ່​ນອນຕ້ອງ​ຂໍ້​ຂັດ​ແຍ່ງ​ຕາມ​ມາ ເປັນ​ເລື່ອງ​ທີ່ບໍ່​ມີ​ໃຜ​ພຶງ​ປະ​ສົງ ຊິ​ຈະ​ໃຫ້​ມັນ​ເກີດ.”

ທີ່​ຜ່ານ​ມາ ຣະ​ບົບ​ສານ ແລະຂ​ະບວນ​ການ​ຍຸ​ຕິ​ທັມ ຢູ່​ລາວຍັງ​ບໍ່​ໄດ້​ຮັບ​ເຊື່ອ​ໝັ້ນ​ຈາກ​ປະ​ຊາ​ຊົນ. ເຈົ້າ​ໜ້າ​ທີ່​ຜູ້​ທີ່​ເຮັດ​ວຽກ​ດ້ານ​ກົ​ດ​ໝາຍ ທ່ານ​ນຶ່ງ ໄດ້​ກ່າ​ວ​ວ່າ:

“ຄັນ​ວ່າ ສານ​ຕັດ​ສິນ ກໍ​ວ່າ ອັນ​ໃດ​ຖືກ ປະ​ຊາ​ຊົນ​ກໍ​ເຮັດ​ຕາມ ສານ​ຕັດ​ສິນ​ວ່າ ອັນ​ນີ້ຖືກ ພໍ​ທະ​ນາຍ​ຄວາມ​ມາ​ກວດ​ສອບ​ທາງ​ດ້ານ​ກົດ​ໝາຍ ແລ້ວ ມັນ​ບໍ່​ສອດ​ຄ່ອງ​ການ​ຮ້ອງ​ຂໍ​ອຸ​ທອນ ການ​ແກ້​ຄຳ​ຮ້ອງ​ຟ້ອງ​ອີ່​ຫ​ຍັງ​ຕ່າງໆ ຂຶ້ນ​ໄປ ກວດ​ສອບ​ເຮັດ​ໃຫ້​ຜູ້​ພິ​ພາກ​ສາ ຫຼື​ວ່າ ເຈົ້າ​ໜ້າ​ທີ່ ຂະ​ເຈົ້າ​ກໍ​ບໍ່​ສາ​ມາດ​ເຮັດ​ຄື​ເກົ່າ ໄດ້​ແລ້ວ ບໍ່​ເອົາ​ແຕ່​ໃຈ​ໂຕ​ເອງ​ຄື​ເກົ່າໄດ້​ແລ້ວ ຕ້ອງ​ປະ​ຕິ​ບັດ​ຕາມ​ກົດ​ໝາຍ.”

ຍາ​ນາງ ວຽງ​ທອງ ສີ​ພັນ​ດອນ ປະທານ​ສານ​ປະ​ຊາ​ຊົນ​ສູງ​ສຸດ ໄດ້​ກ່າວ ​ຢູ່​ໃນ​ກອງ​ປະ​ຊຸມ​ສ​ໄມ​ສາ​ມັນ​ເທື່ອ​ທີ 2 ຂອງ​ສະ​ພາແຫ່ງ​ຊາດ​ຊຸດ​ທີ 9 ໃນ​ວັນ​ທີ 8 ພຶ​ສ​ຈິ​ກາ ຕອນ​ນຶ່ງວ່າ ໃນ​ໄລ​ຍະ 9 ເດືອນຂອງ​ປີ 2021 ໄດ້​ຮັບ​ຄຳ​ຮ້ອງ​ທຸກ, ຄຳ​ສ​ເນີ ກ່ຽວ​ກັບ​ການ​ປະ​ພຶດ ແລະການ​ປະ​ຕິ​ບັດ​ໜ້າ​ທີ່​ ຂອງ​ຜູ້​ພິ​ພາກ​ສາ ແລະເຈົ້າ​ໜ້າ​ທີ່​ຂອງ​ສານ ຈຳ​ນວນ 9 ສະ​ບັບ ຊຶ່ງ​ໄດ້​ດໍ​າ​ເນີນ​ການພິ​ຈາ​ລະ​ນາ ​ແກ້​ໄຂ​ແລ້ວ 7 ສະ​ບັບ ພ້ອມ​ອອກ​ຄຳ​ສັ່ງລົງ​ວິ​ໄນ ຜູ້​ກະ​ທຳ​ຜິດ​ຈຳ​ນວນ 5 ຄົນ ໃນ​ຈຳ​ນວນນີ້ ມີ​ຜູ້​ພິ​ພາກ​ສາ 1 ຄົນ ຖືກ​ສານ​ຕັດ​ສິນ​ໃນ​ການ​ເລື່ອນ​ຕຳ​ແໜ່ງ ສ່ວນ​ເຈົ້າ​ໜ້າ​ທີ່​ສານ​ອີກ 4 ຄົນ ຖືກ​ລົບ​ຊື່​ອອກ​ຈາກ ​ການ​ເປັນ​ພ​ນັກ​ງານ ​ຣັ​ຖກອນ.

“ເອ​ເຊັຽ​ເສ​ຣີ ໄດ້​ຕິດ​ຕໍ່​ຫາ​ເຈົ້າ​ໜ້າ​ທີ່​ສານ​ປະ​ຊາ​ຊົນ​ສູງ​ສຸດ ເພື່ອ​ສອບ​ຖາມ​ເພີ່ມ​ເຕີມ​ກ່ຽວ​ກັບ​ການ​ປະ​ພຶດ ແລະ ການ​ປະ​ຕິ​ບັດ​ໜ້າ​ທີ່​ຂອງຜູ້​ພິ​ພາກ​ສາ​ສານ ແລະເຈົ້າ​ໜ້າ​ທີ່​ສານ, ແຕ່ ເຈົ້າ​ໜ້າ​ທີ່​ສານ ບໍ່​ໃຫ້​ຄຳ​ເຫັນ​ກ່ຽວ​ກັບ​ເລື່ອງນີ້.

ນອກ​ຈາກນີ້ ປະ​ທານ​ສານ​ປະ​ຊາ​ຊົນ​ສູງ​ສຸດ ໄດ້​ກ່າວ​ຢູ່​ໃນ​ກອງ​ປະ​ຊຸມ​ສ​ມັຍ​ສາ​ມັນ​ເທື່ອ​ທີ 2 ຂອງ​ສະ​ພາ​ແຫ່ງ​ຊາດ​ຊຸດ​ທີ 9 ຕອນ​ນຶ່ງວ່າ ໜ່ວຍ​ງານ​ຂອງ​ທ່ານ ໄດ້​ດຳ​ເນີນ​ການກວດ​ກາ​ຄຳ​ຮ້ອງ ແລະຄຳ​ສ​ເນີ ກ່ຽວ​ກັບ​ກົດ​ໝາຍ ແລະການ​ດຳ​ເນີ​ນ​ຄະ​ດີຂອງ​ສານ ສຳ​ເຣັດ​ແລ້ວຈຳ​ນວນ 1,158 ສະ​ບັບ​ ຊຶ່ງ​ໃນ​ຈຳ​ນວນນີ້ ພົບ​ວ່າ ເປັນ​ການ​ຕັດ​ສິນ ແລະພິ​ພາກ​ສາ​ບົກ​ພ່ອງ ຍ້ອນ​ການ​ພິມ, ການ​ໃຊ້​ມາດ​ຕ​ຣາ ບໍ່​ຖືກ​ຕ້ອງ ຈຳ​ນວນ 148 ສະ​ບັບ ສ່ວນ​ໄລ​ຍະ 3 ເດືອນ​ສຸດ​ທ້າຍ​ປີນີ້ ສານ​ປະ​ຊາ​ຊົນ​ສູງ​ສຸດ ມີ​ເປົ້າ​ໝາຍ​ໃນ​ການ​ສ້າງ​ຜູ້​ພິ​ພາກ​ສາ​ ເກັ່ງ-ດີ ໃຫ້​ໄດ້​ຫຼາຍກວ່າ 25% ຂຶ້ນ​ໄປ.