ນີ້ຄືສຽງຮ້ອງຄຳຂວັນ ໃນເວລາຂອງນັກເຄື່ອນໄຫວ ທາງການເມືອງທີ່ມາປະທ້ວງ ຜູ້ນຳອາຊ້ຽນ ທີ່ມາຮ່ວມກອງປະຊຸມສຸດຍອດ ຜູ້ນຳອາຊ້ຽນ-ສະຫະຣັຖ ໂດຍ ມີຄວາມໝາຍວ່າ:
“ພວກເຮົາ ຕ້ອງການ ເສຣີພາບ ດຽວນີ້”.
ບັນດດາ ນັກເຄື່ອນໄຫວ ທາງດ້ານການເມືອງ ທີ່ເປັນຄົນລາວ, ກັມພູຊາ, ພະມ້າ, ວຽດນາມ ແລະ ໄທຍ ປະມານ 200 ຄົນ ໄດ້ພາກັນຈັດປະທ້ວງ ຜູ້ນຳອາຊ້ຽນທີ່ເຂົ້າມາຮ່ວມກອງປະຊຸມ ສຸດຍອດຜູ້ນຳອາຊ້ຽນ-ສະຫະຣັຖ ເຊິ່ງກອງປະຊຸມດັ່ງກ່າວ ມີກຳນົດການຈັດຂຶ້ນໃນວັນທີ 12-13 ພຶສພາ 2022.
ການຊຸມນຸມປະທ້ວງ ຂອງນັກເຄື່ອນໄຫວ ໄດ້ມີຂຶ້ນຢູ່ອານຸສາວະລີ ວໍຊິງຕັນ ໃນວັນທີ 12 ພຶດສພາ ແລະ ຜູ້ທ້ວງໄດ້ພາກັນຍ່າງໄປ ປະທ້ວງຢູ່ຕໍ່ໜ້າ ກະຊວງການຕ່າງປະເທດ ສະຫະຣັຖ ໂດຍຜູ້ປະທ້ວງໄດ້ຮຽກຮ້ອງໃຫ້ ຜູ້ນຳປະເທດອາຊ້ຽນ ບາງປະເທດ ໃຫ້ປົກຄອງປະເທດ ດ້ວຍປະຊາທິປະໄຕ, ໃຫ້ເຄົາຣົບສິດທິມະນຸສ ແລະ ໃຫ້ໃຫ້ປະຊາຊົນມີສິດ-ເສຣີພາບ.
ໂຕແທນຜູ້ປະທ້ວງ ທ່ານນຶ່ງ ໄດ້ກ່າວວ່າ:
" ມັນ ເປັນເວລາທີ່ຍິ່ງໃຫຍ່ ທີ່ ພວກເຮົາ ກຳພູຊາ, ພະມ້າ, ລາວ, ໄທຍ ແລະ ວຽດນາມ ມາລຸກຂຶ້ນ ສາມັກຄີກັນ ເພື່ອຕໍ່ສູ້ ເພື່ອຄົນຢູ່ໃນປະເທດຂອງພວກເຮົາ."
ຍາງ ນາງ ບຸນຈັນ ເສນທະວົງ ທີ່ປຶກສາ ຈາກອົງການ ພລັງຮ່ວມຊາດລາວ/ສູນສຶກສາ ແລະ ຄົ້ນຄວ້າກ່ຽວກັບລາວ ແລະ ເອເຊັຽ ເຊິ່ງເປັນຜູ້ນຶ່ງທີ່ມາຮ່ວມປະທ້ວງ ໄດ້ກ່າວຕໍ່ວິທຍຸເອເຊັຽເສຣີ ວ່າ:
"ເພື່ອມາຮ້ອງໃຫ້ປະທານາທິບໍດີ ສະຫະຣັຖຫັ້ນ ໃຫ້ບໍ່ຮັບຮູ້ຣັຖບານທີ່ບໍ່ຖືກຕ້ອງຂອງພະມ້າເນາະ ເພາະວ່າ ເຂົາເຈົ້າເຮັດຮັຖປະຫານ ໂຄ່ນລົ້ມຣັຖບານທີ່ຖືກຕ້ອງ ໃນເດືອນ 2 ປີ 2021. "
ໃນສ່ວນຂອງປະເທດລາວ ຍານາງ ບຸນຈັນ ໄດ້ກ່າວວ່າ:
“ໃນສ່ວນຂອງປະເທດລາວ ເພິ່ນກະມາປະຊຸມເປັນປົກຕິ ແຕ່ວ່າເພິ່ນກະຊິໄດ້ຍິນສຽງຮຽກຮ້ອງຈົ້ມວ່າ ຂອງປະຊາຊົນ ທີ່ວ່າຕ້ານກັບຣະບອບຜະເດັດການ ເພາະວ່າ ດຽວນີ້ ພວກເຮົາຮຽກຮ້ອງວ່າ ເພາະວ່າ ຢູ່ໃນປະເທດອາຊ້ຽນນີ້ ບໍ່ໃຫ້ມີຣະບົບຜະເດັດການ ໃຫ້ນັບຖືສິດທິມະນຸສ ແລະ ໃຫ້ປ່ຽນຣະບອບປົກຄອງໄປເປັນປະຊາທິປະໄຕ.”
ນອກຈາກນີ້ ເມື່ອນັກຂ່າວຖາມວ່າ ຢາກຈະສົ່ງສານຫຍັງເຖິງຜູ້ນຳອາຊ້ຽນ ລວມທັງຜູ້ນຳລາວ ທີ່ມາຮ່ວມກອງປະຊຸມຄັ້ງນີ້, ຍານາງ ບຸນຈັນ ຕອບວ່າ:
“ຢາກໃຫ້ປະເທດອາຊ້ຽນຫັ້ນ ປັບປຸງຫຼືວ່າ ປະຕິຮູບລະບອບປົກຄອງໄປສູ່ປະຊາທິປະໄຕ ທີ່ນັບຖື ແລະ ເຄົາຣົບສິດທິມະນຸສຂອງປະຊາຊົນ ເພາະວ່າ ສິ່ງນີ້ເປັນສິ່ງທີ່ຖືກຕ້ອງ ແລະ ຍຸຕິທັມ ເພາະວ່າ ເປັນກົດໝາຍຂອງສາກົລ.”
ທ່ານ Rithy Uong ຈາກພັກກູ້ຊາດກັມພູຊາ CNRP ທີ່ຢູ່ສະຫະຣັຖ ແລະ ການາດາ ທີ່ມາປະທ້ວງ ໄດ້ກ່າວວ່າ:
“ພວກເຮົາມານີ້ ເພື່ອຮຽກຮ້ອງ ໃຫ້ ປະທານາທິບໍດີ ໂຈ ບາຍເດັນ ໄດ້ຮູ້ວ່າ ພວກເຮົາປະຊາຊົນອາຊ້ຽນ ຕ້ອງການປະຊາທິປະໄຕ ພາຍໃນປະເທດ ແຕ່ບໍ່ແມ່ນອຳນາດຜະເດັດການ ນີ້ຄືສານທີ່ພວກເຮົາຢາກຈະສົ່ງເຖິ່ງ.”
ສຳລັບຣາຍການກອງປະຊຸມ ໃນວັນທີ 12 ພຶສພາ, ປະທານາທິບໍດີ ໂຈ ບາຍເດັນ (Joe Biden) ໄດ້ຕ້ອຮັບບັນດາຜູ້ນຳອາຊ້ຽນ ຢູ່ທຳນຽບຂາວ ຫຼື ຕຶກທີ່ທຳການປະທານາທິບໍດີ ສະຫະຣັຖ.
ສະເພາະຣາຍການປະຊຸມໃນວັນທີ 13 ພຶສພາ, ຍານາງ ຄະມາລາ ແຮຣ໌ຣິສ (Kamala Harris) ຮອງປະທານາທິບໍດີ ຈະປະຊຸມກັບ ບັນດາຜູ້ນຳອາຊ້ຽນ ກ່ຽວກັບເຣື່ອງການດຳເນີນງານ ກ່ຽວກັບສະພາບອາກາດ, ການຫັນປ່ຽນພລັງງານທີ່ສະອາດ ແລະ ໂຄງສ້າງພື້ນຖານທີ່ຍືນຍົງ ມີລາວ, ໄທຍ ແລະ ຟິລິປິນສ໌ ຈະກ່າວຄຳປາສັຍ. ນອກຈາກນີ້ ປະທານາທິບໍດີ ໂຈ ບາຍເດັນ (Joe Biden) ແລະ ຜູ້ນຳອາຊ້ຽນ ຈະມີການປະຊຸມ ແລກປ່ຽນຂໍ້ຄິດເຫັນ ກ່ຽວກັບບັນຫາລະດັບພາກພື້ນ ແລະ ສາກົລ.