ລາວ,ຈີນ ສັມພັນ ແໜ້ນແຟ້ນ

ປະເທດລາວ ແລະປະເທດຈີນ ມີຄວາມສັມພັນ ຢ່າງແໜ້ນແຟ້ນ ໃນຫລາຍດ້ານ ທັງທາງດ້ານການເມືອງ, ເສຖກິຈ ແລະການທະຫານ ຊຶ່ງຈີນເປັນປະເທດທີ່ລົງທຶນ ຣາຍໃຫຍ່ທີ່ສຸດໃນລາວ, ໄດ້ມີການຊ້ອມຣົບລະຫວ່າງກອງທັບ ລາວ ແລະກອງທັບຈີນ ທີ່ໃຫ້ຊື່ວ່າ “ໂລ້ກໍາບັງມິຕພາບ 2023” ຊຶ່ງໄດ້ດໍາເນີນໄປເປັນເວລາ 20 ມື້ ໃນເດືອນພຶສພາ ທີ່ຜ່ານມານີ້.

ຜູ້ນໍາ 2 ປະເທດ ໄດ້ເສີມຂຍາຍສາຍພົວພັນມິຕພາບ, ການພົວພັນຮ່ວມມືແບບຄູ່ຮ່ວມ ຍຸທສາດຮອບດ້ານ ຕາມທິດ 4 ດີ ແລະການເປັນຄູ່ຮ່ວມຊາຕາກັມ ລາວ-ຈີນ, ຈີນ-ລາວ ຊຶ່ງທັງ 2 ປະເທດໄດ້ຜັນຂຍາຍຜົລການພົບພໍ້ກັນລະຫວ່າງ 2 ເລຂາທິການໃຫຍ່ ຄະນະບໍຣິຫານງານສູນກາງພັກ, ປະທານປະເທດ ສປປ ລາວ ແລະ ຈີນ ທີ່ຜ່ານມາ.

ຜູ້ນໍາລາວ ສນັບສນູນແນວຄິດລິເຣີ່ມ ນຶ່ງແລວນຶ່ງເສັ້ນທາງ ຂອງຈີນ ແລະ ຈີນກໍໄດ້ເຂົ້າມາລົງທຶນຢ່າງຫລວງຫລາຍ ຢູ່ລາວ ໃນຂແນງການຕ່າງໆ ເປັນຕົ້ນ ສ້າງເຂດເສຖກິຈພິເສດ, ກໍ່ສ້າງໂຄງຮ່າງພື້ນຖານ, ສ້າງທາງຣົຖໄຟຄວາມໄວສູງ ລາວ-ຈີນ, ຂຸດຄົ້ນບໍ່ແຮ່, ລົງທຶນດ້ານອະສັງຫາຣິມະຊັບ ແລະອື່ນໆອີກຫລາຍຢ່າງ. ໃນດ້ານວັທນະທັມ ຈີນພະຍາຍາມສົ່ງເສີມໃຫ້ ມີການຮຽນ ແລະການສອນພາສາຈີນ ໃຫ້ປະຊາຊົນລາວຫລາຍຂຶ້ນ ແລະທັງໄດ້ເຜີຍແພ່ວັທນະທັມ ແລະບຸນປະເພນີຈີນ ຢູ່ລາວ ນໍາດ້ວຍ.

ກ່ຽວກັບເຣື່ອງການພົວພັນ ຮ່ວມມືລະຫວ່າງລາວ ແລະຈີນທີ່ວ່ານີ້ ວິທຍຸ ເອເຊັ ຽເສຣີ ໄດ້ຖາມຄວາມຄິດເຫັນ ຂອງຊາວລາວ ຈຳນວນນຶ່ງ ເຖິງທັສນະຂອງພວກເຂົາເຈົ້າ ໃນປັດຈຸບັນ ຊຶ່ງກໍໄດ້ຄໍາຕອບທີ່ແຕກຕ່າງກັນໄປ ທີ່ເປັນໜ້າສົນໃຈ ຢູ່ບໍ່ໜ້ອຍ. ປະຊາຊົນລາວຜູ້ນຶ່ງ ຢູ່ນະຄອນຫຼວງວຽງຈັນ ທີ່ບໍ່ປະສົງອອກຊື່ເວົ້າວ່າ ການທີ່ລາວກັບຈີນ ມີຄວາມສັມພັນທີ່ແໜ້ນແຟ້ນ ຕໍ່ກັນນັ້ນ ຈະເປັນຜົລດີຫຼາຍກວ່າຜົລເສັຽ ຕໍ່ລາວ ຍ້ອນວ່າ ຢ່າງໜ້ອຍທີ່ສຸດ ຊາວລາວ ກໍ່ໄດ້ຮັບປໂຍດຈາກການມີວຽກເຮັດງານທຳ ນຳຄົນຈີນ ແລະຊ່ອຍຫຼຸດຜ່ອນອິດທິພົລ ທາງການເມືອງ ແລະເສຖກິຈຈາກວຽດນາມ ທີ່ເຄີຍຄອບງຳລາວ ມາດົນນານ ລົງໄດ້ນຳອີກ.

ດັ່ງທີ່ທ່ານກ່າວໃນມື້ວັນທີ 5 ກໍຣະກະດານີ້ວ່າ:

“ຢູ່ (ຕລາດ) ຊັ່ງຈຽງ ມີແຕ່ຄົນລາວ ມີແຕ່ພະນັກງານລາວ. ເຂົາຈ້າງໄປເຮັດວຽກ ນຳ. ວຽດກັບຈີນມັນຕ່າງກັນບ່ອນນີ້. ວຽດນີ້ເອົາຢ່າງດຽວ, ເອົາຈາກລາວນີ້ ແຕ່ບໍ່ເຄີຍສ້າງ ບໍ່ເຄີຍຕອບແທນ, ແຕ່ວ່າຈີນນີ້ເຂົາເອົາເດີ້ ເຂົາສ້າງ.”
ໃນຂະນະດຽວກັນ ຊາວລາວອີກຜູ້ນຶ່ງ ຢູ່ແຂວງຄຳມ່ວນ ເຫັນວ່າ ການເຂົ້າມາລົງທຶນຂອງຈີນ ຢູ່ລາວ ປະຊາຊົນລາວ ບໍ່ໄດ້ຮັບປໂຍດຈາກເຣື່ອງນີ້ພໍປານໃດ ຍ້ອນວ່າ ບໍຣິສັດຈີນ ບໍ່ຢາກຈ້າງຄົນລາວ ເຮັດວຽກນໍາ ຍ້ອນວ່າຄົນລາວມີທັກສະ ແລະສີມືແຮງງານຕ່ຳກວ່າຄົນຈີນຫຼາຍ, ແຕ່ກໍຈຳເປັນຕ້ອງໄດ້ຈ້າງ ຍ້ອນມັນເປັນເງື່ອນໄຂນຶ່ງ ຂອງການອະນຸຍາດລົງທຶນ. ນອກຈາກນີ້ແລ້ວ, ພວກນັກທຸຣະກິຈຈີນ ຍັງໃຫ້ຄ່າຈ້າງແຮງງານຄົນລາວ ໃນອັດຕຣາເງິນເດືອນ ຂັ້ນຕ່ຳ ຕາມທີ່ກົດໝາຍແຮງງານກໍານົດໄວ້ ອັນເຮັດໃຫ້ຄົນງານລາວ ຢາກອອກໄປເຮັດວຽກ ຢູ່ຕ່າງປະເທດ ທີ່ໄດ້ເງິນເດືອນຫຼາຍກວ່າ:

“ຍຸກໃນປັດຈຸບັນນໍ ໂດຍສະເພາະສະພາບເງິນເຟີ້ນໍ. ທຽບໃສ່ຄ່າຄອງຊີບນໍ ແລະກະການວ່າຈ້າງ ເງິນກໍ່ຖືວ່າຍັງຕ່ຳຢູ່. ກະທຽບໃສ່ເຂົາເຈົ້າ ເອົາຄົນຈີນ ເອົາຄົນຂອງເຂົາເຈົ້າເຂົ້າມາ. ເງິນເດືອນຖືວ່າແຕກຕ່າງກັນຫຼາຍ ຄືໂຕຢ່າງ ຂ້ອຍກະຢູ່ນີ້ ກະເຮັດວຽກຢູ່ນຳຈີນຄືກັນ.”

ກ່ຽວກັບເຣື່ອງຄວາມສຳພັນ ທາງການເມືອງທີ່ແໜ້ນແຟ້ນ ລະຫວ່າງລາວ ແລະ ຈີນໃນປັດຈຸບັນນີ້ ອາຈານ ສຸເຈນ ກັນພະຣິດ ນັກວິຊາການອິສຣະ ດ້ານເອເຊັຽຕາ ເວັນອອກ ສຽງໃຕ້ ສຶກສາ ຢູ່ປະເທດໄທຍ ໄດ້ໃຫ້ຄຳເຫັນວ່າ ນອກຈາກທັງສອງຊາຕ ຈະມີຄວາມສຳພັນ ທາງການທູດ ຕາມປົກກະຕິແລ້ວນັ້ນ  ຍັງມີຄວາມສຳພັນໃນລັກສະນະສ່ວນໂຕ ຂອງໂຕຜູ້ນຳລາວ ແລະຈີນນໍາອີກ ເປັນຕົ້ນ ກໍຣະນີຂອງຄວາມສັມພັນ ສ່ວນໂຕ ລະຫວ່າງທ່ານ ສີຈິ້ນຜິງ ປະທານປະເທດຈີນ ແລະຄອບຄົວພົນເສນາ ທີ່ເປັນຕະກຸນການເມືອງນຶ່ງ ທີ່ສຳຄັນຂອງລາວ.

ທ່ານກ່າວວ່າ:

“ສີ ຈິ້ນຜິງ ໄປຢາມລາວ. ນຶ່ງໃນພາຣະກິຈ ທີ່ ສີ ຈິ້ນຜິງ ໄປ ແມ່ນໄປຢ້ຽມຢາມຄອບຄົວພົນເສນາ ຣະນຶກເຖິງຄວາມຫຼັງກັນ, ຊຶ່ງຂ້ອຍເຫັນວ່າ ມັນມີທັງການທູດ ໃນແບບສາຍ​ສັມພັນ ລະຫວ່າງ ເຄືອຍາດ, ໃນລະດັບຣັຖ ໃນລະດັບເຄືອຍາດ ມັນມີທັງສອງຝ່າຍ.”
ທ່ານກ່າວຕຶ່ມວ່າ ລັກສະນະຄວາມສັມພັນ ສ່ວນໂຕແນວນີ້ ກໍ່ບໍ່ຕ່າງຫຍັງກັບຄວາມສຳພັນສ່ວນໂຕ ລະຫວ່າງຜູ້ນຳລາວ ແລະວຽດນາມ ໃນເມື່ອກ່ອນ ເປັນຕົ້ນ ກໍຣະນີເຈົ້າສຸພານຸວົງ ທີ່ມີພັລຍາ ເປັນຊາວວຽດນາມ ຫຼື ກໍຣະນີຂອງທ່ານ ໄກສອນ ພົມວິຫານ ທີ່ເປັນລູກຊອດວຽດນາມ. ລັກສະນະ ຄວາມສັມພັນສ່ວນໂຕ ທີ່ດີຂອງຜູ້ນຳນັ້ນ ຍ່ອມຈະເຮັດໃຫ້ຄວາມ​ສັມພັນ ທາງການທູດ ລະຫວ່າງກັນ ຍິ່ງດີຂຶ້ນຕື່ມ.
ນອກຈາກນີ້ແລ້ວ, ການເຂົ້າມາລົງທຶນ ຂອງຈີນຢູ່ລາວ ຍັງໄດ້ເຮັດໃຫ້ຊາວລາວ ຈຳນວນບໍ່ໜ້ອຍ ຕື່ນຕົວໄປຮ່ຳຮຽນພາສາຈີນຫຼາຍຂຶ້ນ. ຣັຖບານຈີນກໍ່ໄດ້ຮ່ວມມື ກັບຣັຖບານລາວ ສ້າງຕັ້ງ ສະຖາບັນການສຶກສາພາສາ ແລະວັທນະທັມຈີນ ທີ່ໃສ່ຊື່ວ່າ ສະຖາບັນຂົງຈື້ ຢູ່ມະຫາວິທະຍາໄລ ແຫ່ງຊາຕ ລາວ ທີ່ນະຄອນຫຼວງວຽງຈັນ ແລະ ມະຫາວິທະຍາໄລ ສຸພານຸວົງ ຢູ່ແຂວງຫຼວງພຣະບາງ ແລະທັງໄດ້ສ້າງສູນ ວັທນະທັມຈີນ ຢູ່ລາວ ແລະສົ່ງພະນັກງານຄຣູ-ອາຈານ ຈີນ ໄປສອນຕາມໂຮງຮຽນ ມັທຍົມຢູ່ລາວ ເພື່ອສອນພາສາຈີນ ແລະ ເຜີຍແພ່ວັທນະທັມຈີນ ຢູ່ລາວ.
ນາຍຄຣູພາສາຈີນ ທ່ານນຶ່ງ ຢູ່ນະຄອນຫຼວງວຽງຈັນ ຊຶ່ງບໍ່ປະສົງອອກຊື່ ທັງຊື່ຂອງທ່ານ ແລະ ຊື່ໂຮງຮຽນ ກ່າວວ່າ ໂຮງຮຽນຂອງທ່ານ ກໍາລັງຈະເປີດສອນພາສາຈີນ ໃນພາກຮຽນຣະດູແລ້ງນີ້ ຊຶ່ງຈະມີຫຼາຍຫຼັກສູດ ທັງໃນລະດັບເຣີ່ມຕົ້ນ ແລະ ລະດັບສູງ, ໃນວິຊາລະດັບສູງ ຈະມີການສອນວັທນະທັມຈີນສອດເຂົ້າໄປນຳດ້ວຍ.

“(ລະດັບ) ພື້ນຖານນີ້ ຈະເນັ້ນກ່ຽວກັບແຕ່ພື້ນຖານພາສາແຕ່ວ່າຄັນຖ້າວ່າເຮົາຮຽນແຕ່ 2-3-4 ໄປນີ້ ຈະກ່ຽວກັບພາສາແດ່, ວັທນະທັມ ແມ່ນຫຍັງເຂົາເຈົ້າແດ່ເຈົ້າ. ອາຈານ ນີ້ ມີອາຈານຄົນຈີນ ແດ່ ແລະອາຈານທີ່ວ່າຈົບມາຈາກ ສປ ຈີນ ແດ່.”
ໃນມື້ວັນທີ 22 ມິຖຸນາ 2023, ບໍຣິສັດ ຕ້າຖັງ (ລາວ) ເຂື່ອນໄຟຟ້າປາກແບງ ຈຳກັດ ໄດ້ຈັດກິຈກັມສເລີມສລອງ ເທສະການບຸນຊ່ວງເຮືອມັງກອນ ຫຼືບຸນເຂົ້າ ຕົ້ມຈີນ ທີ່ຈີນເອິ້ນວ່າ ບຸນຕ່ວນຫວູ (Duanwu) ຊຶ່ງເປັນບຸນໃຫຍ່ ບຸນນຶ່ງ ໃນຣະດູແລ້ງ ຂອງຊາວຈີນ ຢູ່ສຳນັກງານ ບໍຣິສັດ ທີ່ນະຄອນຫຼວງວຽງຈັນ ເພື່ອເພິ່ມທະວີຄວາມສາມັກຄີ ລາວ-ຈີນ ໃຫ້ແໜ້ນແຟ້ນຍິ່ງຂຶ້ນ.
ໃນມື້ດຽວກັນນັ້ນ, ບໍຣິສັດ ພັທນາສວນວັທນະທັມລ້ານຊ້າງ ຈຳກັດ, ສູນວັທນະທັມຈີນ ປະຈຳລາວ ແລະ ສະຖາບັນຂົງຈື້ ມະຫາວິທະຍາໄລສຸພານຸວົງ ກໍ່ໄດ້ຈັດກິຈກັມສເລີມສລອງ ເທສະການບຸນຊ່ວງເຮືອມັງກອນນັ້ນ ເຊັ່ນກັນ. ໃນກິຈກັມດັ່ງກ່າວ ໄດ້ມີການແລກປ່ຽນ ວິທີການຫໍ່ເຂົ້າຕົ້ມ ທັງແບບລາວ ແລະແບບຈີນ ແລະແລກປ່ຽນປະເພນີຫໍ່ເຂົ້າຕົ້ມຈີນ ແລະວັນບຸນຫໍ່ເຂົ້າປະດັບດິນຂອງລາວ ລວມທັງປະເພນີບຸນຊ່ວງເຮືອຂອງລາວ ແລະຈີນນຳດ້ວຍ.

ດັ່ງທີ່ພະນັກງານ ບໍຣິສັດຈີນ ຜູ້ນຶ່ງ ຢູ່ນະຄອນຫຼວງວຽງຈັນເວົ້າວ່າ:

“ເຫັນຢູ່ໆ ເຫັນເຂົາເຈົ້າຈັດຢູຸ່ ຈັດກິຈກັມຢູ່ ສະດວກໄປກະໄປ ກະຂ້າພະເຈົ້າກໍ່ແຈ້ງລົງກຸ່ມບໍຣິສັດ ລົງແຈ້ງການອອກໃຫ້ຄົນລາວເຂົ້າຮ່ວມ.”

ທ່ານກ່າວຕື່ມວ່າ ພ້ອມກັນນັ້ນ ບໍຣິສັດຂອງລາວ ກໍໄດ້ຈັດງານບຸນປະເພນີລາວ ນຳອີກ ເປັນຕົ້ນບຸນປີໃໝ່ລາວ, ບຸນເຂົ້າພັນສາ-ອອກພັນສາ ນຳດ້ວຍ.
ການສເລີມສລອງ ບຸນຊ່ວງເຮືອມັງກອນ ຂອງຈີນ ຢູ່ປະເທດລາວ ມີການຈັດກິຈກັມໃນລັກສະນະເຜີຍແພ່ວັທນະທັມ ແລະການສັງສັນ ເປັນຕົ້ນ ການເຮັດເຂົ້າຕົ້ມຈີນ ແລະເຂົ້າຕົ້ມລາວ, ມີການລ້ຽງອາຫານ ແລະຫຼິ້ນກິລາ ເພື່ອເສີມສ້າງຄວາມສາມັກຄີ ແຕ່ບໍ່ມີການແຂ່ງຂັນຊ່ວງເຮືອມັງກອນນັ້ນ. ສະບາຍດີ