ເຈົ້າໜ້າທີ່ລາວ ເດີນທາງໄປຈີນ ແລກປ່ຽນບົດຮຽນ ວຽກງານກວດສອບ
2023.09.11
ຄະນະຜູ້ແທນ ອົງການກວດສອບແຫ່ງຣັຖ ຂອງ ສປປ ລາວ ເຄື່ອນໄຫວ ແລະ ເຮັດວຽກ ກັບສຳນັກງານກວດສອບແຫ່ງຣັຖ ສປ ຈີນ ລະຫວ່າງ ວັນທີ 2-9 ກັນຍາ 2023.
ຂໍຂອບໃຈຮູບພາບຈາກເພຈ ອົງການກວດກາແຫ່ງລັດ
ໃນວັນທີ 2-9 ກັນຍາ ທີ່ຜ່ານມາ, ເຈົ້າໜ້າທີ່ອົງການກວດສອບແຫ່ງຣັຖ ຂອງລາວ ໄດ້ເດີນທາງໄປປະເທດຈີນ ເພື່ອແລກປ່ຽນຂໍ້ມູນ ແລະ ຝຶກອົບຮົມວຽກງານກວດສອບ ລວມທັງການລົງນາມ ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືສະບັບປັບປຸງ. ໜັງສືພິມວຽງຈັນທາມສ໌ ໄດ້ລາຍງານ ໃນວັນທີ 8 ກັນຍາ ວ່າ ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງຣັຖ ເປັນຜູ້ທີ່ນໍາຄະນະຜູ້ແທນຝ່າຍລາວ ໄປຢ້ຽມຢາມຈີນ ໃນຄັ້ງນີ້. ໄດ້ມີການເຜີຍແຜ່ຂ່າວສານ ກ່ຽວກັບການເດີນທາງໄປໃນຄັ້ງນີ້.
ເຈົ້າໜ້າທີ່ ອົງການກວດສອບແຫ່ງຣັຖ ໄດ້ກ່າວໃນວັນທີ 11 ກັນຍາ ວ່າ:
“ຖືວ່າແລ້ວ ແລ້ວໆໄດ໋. ໄປແລກປ່ຽນບົດຮຽນ ຮ່ວມກັນນີ້ແຫຼະ. ແລກປ່ຽນບົດຮຽນກັນເຜີຍແຜ່ຫວາ ກະມີໄດ້ອອກຂ່າວ ອອກອິຫຍັງ ນໍາເຟສບຸກຄ໌ ນໍາເວບໄຊຕ໌ ຢູ່.”
ການໄປໃນຄັ້ງນີ້ ສ່ວນຫຼາຍຈະເປັນເຈົ້າໜ້າທີ່ ຈາກສູນກາງ ແລະ ມີຕາງໜ້າແຕ່ລະແຂວງ 1 ຄົນ. ເຈົ້າໜ້າທີ່ກວດການພັກ-ຣັຖ ນາງ ນຶ່ງໄດ້ກ່າວວ່າ:
“ແມ່ນມີແຕ່ກວດກາສູນກາງ ເພິ່ນໄປ ແຕ່ວ່າ ແຂວງກະມີແຕ່ແບບໄປຜູ້ດຽວຫັ້ນນ່າ. ເຊີນໄປກະແບບຜູ້ດຽວ. ແບບແຈ້ງຫາແຕ່ລະແຂວງ ວ່າ ສົ່ງລາຍຊື່ໄປ 1 ທ່ານ ແລ້ວ ກະໄປຮ່ວມນໍາຫັ້ນນາ ມີແຕ່ແບບນັ້ນ ໄປໝົດ ຄະນະກວດກາລະຍັງບໍ່ເຄີຍມີ.”
ທີ່ຜ່ານມາ ຢູ່ຫຼາຍແຂວງ ຍັງບໍ່ມີການປະຊຸມກ່ຽວກັບ ວຽກງານກວດສອບແຫ່ງຣັຖ ຢູ່ໃນລະດັບແຂວງຕໍ່ແຂວງ, ແຕ່ສ່ວນຫຼາຍຈະເປັນລະດັບຂັ້ນສູນກາງຫຼາຍກວ່າ. ເຈົ້າໜ້າທີ່ຫ້ອງການກວດກາ ພັກ-ຣັຖ ຂັ້ນແຂວງ ທ່ານນຶ່ງ ໄດ້ກ່າວວ່າ:
“ກອງປະຊຸມຢູ່ປະເທດຈີນ ສະເພາະກວດກາບໍ່ໄດ້ເຮັດ ທາງຄະນະກວດກາເພິ່ນໄປຈີນ ເພິ່ນໄປໃນນາມຮ່ວມກັບແຂວງ.”
ກ່ຽວກັບເຣື່ອງນີ້ ຊາວລາວຫຼາຍຄົນ ກໍໄດ້ຮັບຮູ້ ຈາກການອ່ານຂ່າວ ໃນສື່ສັງຄົມອອນລາຍນ໌ ແຕ່ບໍ່ສາມາດສະແດງຄວາມຄິດເຫັນ ຢ່າງກົງໄປກົງມາໄດ້ ເພາະວ່າ ບໍ່ເຂົ້າໃຈເນື້ອໃນ ແລະ ຣາຍລະອຽດຂອງການຮ່ວມມື ດ້ານວຽກງານກວດສອບ ລາວ-ຈີນ, ແຕ່ຊາວລາວບາງຄົນ ເຊື່ອວ່່າ ການຮ່ວມມືໃນຄັ້ງນີ້ ເພື່ອຖອດຖອນບົດຮຽນ ເພື່ອວ່າ ຝ່າຍລາວຈະນໍາມາໃຊ້ແກ້ໄຂບັນຫາ ສໍ້ຣາສບັງຫຼວງ.
ອະດີດເຈົ້າໜ້າທີ່ລາວ ທ່ານນຶ່ງ ໄດ້ກ່າວວ່າ:
“ການຈັດຕັ້ງປະຕິບັດນີ້ໃນບາງອັນ ມັນກໍຍັງບໍ່ທັນຄົບຊຸດໝົດນີ້ນ່າ ຜູ້ໃດເຮັດ ບັນຫານີ້ ຕ້ອງໄດ້ເຮັດວິໄນໃສ່ໂທດ ຕາມກົດໝາຍຫັ້ນແຫຼະ. ເຣື່ອງສະພາບການຂອງປະເທດ. ເຣື່ອງສະພາບການຂອງອ້ອມຂ້າງ ມັນກະຍັງຫຼາຍຫັ້ນນ່າ.”
ການປາບປາມ ການສໍ້ຣາສບັງຫຼວງ ຍັງບໍ່ທັນເຮັດຢ່າງເດັດຂາດ ເທົ່າທີ່ຄວນ ຈຶ່ງເຮັດໃຫ້ເຈົ້າໜ້າທີ່ຣັຖຈໍານວນນຶ່ງ ບໍ່ຢ້ານຕໍ່ການຖືກລົງໂທດ.
ຊາວລາວອີກທ່ານນຶ່ງ ໄດ້ກ່ວວ່າ:
“ກະເຫັນຢູ່ແກ້ໄຂແນວຫັ້ນ ແນວນີ້ ມີແຕ່ເວົ້າລະບໍ່ເຮັດ ຜູ້ໃດກະຢາກໃຫ້ແກ້ໄຂຫັ້ນ ລະໂອ ເຮັດແທ້ທໍາຈິງກະໄດ້ດີລະ.”
ເຖິງຢ່າງໃດກໍຕາມ, ທ່ານ ວຽງທະວີສອນ ເທບພະຈັນ ໄດ້ກ່າວຜ່ານສື່ມວນຊົນລາວ ວ່າ ການແລກປ່ຽນບົດຮຽນ ໃນເທື່ອນີ້ ຈະເຮັດໃຫ້ຄວາມສໍາພັນລະຫວ່າງ ອົງການກວດສອບລາວ ແລະ ຈີນ ເພີ່ມຄວາມແໜ້ນແຟ້ນ ຫຼາຍຂຶ້ນ ອີກທັງອົງການກວດສອບແຫ່ງຣັຖ ລາວ ແລະ ຈີນ ຍັງຫາລືກ່ຽວກັບຄວາມເປັນໄປໄດ້ ໃນການຮ່ວມມືອົງການກວດສອບ ລະດັບພາກ ກັບອົງການກວດສອບເມືອງກວາງຊີ ຂອງຈີນ.
ນອກຈາກນີ້ ທີ່ຜ່ານມາ ອົງການກວດສອບແຫ່ງຣັຖຂອງລາວ ຍັງໄດ້ຈັດກອງປະຊຸມແລກປ່ຽນຂໍ້ມູນ ກັບ ຄະນະກວດການຣັຖບານ ຈາກປະເທດວຽດນາມ ອີກດ້ວຍ ໃນວັນທີ 7 ສິງຫາ ເພືຶ່ອຍົກລະດັບຄວາມສໍາພັນ, ການຮ່ວມມື, ແລະ ແລກປ່ຽນບົດຮຽນ ລວມທັງລາຍງານກ່ຽວກັບວຽກງານ ສະກັດກັ້ນ ແລະ ແກ້ໄຂການສໍ້ຣາສບັງຫລວງ ອີິງຕາມການລາຍງານ ຂອງວາລະສານກວດກາ.
ອົງການຄວາມໂປ່ງໃສສາກົລ ຫຼື Transparency International ໄດ້ຣາຍງານ ໃນປີ 2022 ປະເທດລາວ ຢູ່ໃນອັນດັບທີ 126 ຈາກທັງໝົດ 180 ປະເທດ ໃນດ້ານຄວາມໂປ່ງໃສ ສ່ວນວ່າ ປະເທດຈິີນ ຢູ່ໃນອັນດັບທີ 68.
