ອົງການໂຮມລາວປະທ້ວງ ຣັຖບາລລາວ ກໍຣະນີ ຄົນງານລາວ ຢູ່ ມາເລເຊັຽ

ຈໍາປາທອງ
2021-01-04
Share
ອົງການໂຮມລາວປະທ້ວງ ຣັຖບາລລາວ ກໍຣະນີ ຄົນງານລາວ ຢູ່ ມາເລເຊັຽ ເຈົ້າ ຄໍາຫລວງ ໜໍ່ຄໍາ ເລຂາທິການເອກ ຂອງອົງການໂຮມລາວ ເພື່ອ ສັນຕິພາບ ແລະ ປະຊາທິປະຕັຍ, ກ່າວໃນກອງປະຊຸມໃຫຍ່ ຄັ້ງທີ 3 ເມື່ອ ວັນທີ 22 ກັນຍາ 2019 ທີ່ ເມືອງແຊັງພໍ ຣັດ ມີນີໂຊຕາ ສະຫະຣັດ ອາເມຣິກາ
File photo 2019: RFA

ອົງການໂຮມລາວ ເພື່ອ ສັນຕິພາບ ແລະ ປະຊາທິປະຕັຍ, ທີ່ມີສູນກາງ ຢູ່ ສະຫະຣັຖ ອາເມຣິກາ, ສົ່ງສານ ປະທ້ວງຣັຖບາລລາວ ເຣື່ອງ: ຊະຕາກັມ ຂອງ ຄົນງານລາວ 700 ຄົນ ທີ່ຕົກຄ້າງ ຢູ່ ມາເລເຊັຽ ຊຶ່ງຕ້ອງການ ກັບຄືນ ປະເທດດ່ວນ, ໃນມື້ວັນທີ 3 ມົກກະຣາ 2021; ເຖິງ ທ່ານ ທອງລຸນ ສີສຸລິດ ນາຍົກ ຣັຖມົນຕຣີ ທີ່ ບໍ່ຊ່ອຍເຫລືອຄົນລາວ ຊຶ່ງເປັນຄົນງານ ຫາປາຢູ່ປະເທດ ມາເລເຊັຽ ຈໍານວນ 700 ຄົນ, ທີ່ຕົກຢູ່ໃນຊາຕາກັມ ລໍາບາກຫລາຍ ກັບຄືນ ສາທາຣະນະຣັຖ ປະຊາທິປະໄຕ ປະຊາຊົນລາວ.

ມາເຖິງປັດຈຸບັນ ກໍຍັງບໍ່ທັນມີວິແວວວ່າ, ທາງການສປປລາວ ເປັນຫ່ວງເປັນໃຍ ແລະ ຈະຊ່ອຍແກ້ໄຂບັນຫາ ຫຍຸ້ງຍາກລໍາບາກ ທີ່ຄົນງານລາວຈໍານວນດັ່ງກ່າວ ປະເຊີນຢູ່ນັ້ນ ແຕ່ຢ່າງໃດ. ບໍ່ພຽງເທົ່ານັ້ນ ຍັງໃຊ້ວິທີທ່ວງດຶງແກ່ຍາວເວລາ ໃນການຊອກຫາ ວິທີການແກ້ໄຂບັນຫາ ດັ່ງກ່າວ.

ດັ່ງນັ້ນ ອົງການໂຮມລາວ ເພື່ອ ສັນຕິພາບ ແລະ ປະຊາທິປະຕັຍ ໃນນາມຄົນລາວ ຜູ້ມີນໍ້າໃຈຮັກຊາດ ຮັກປະຊາຊົນລາວອັນສູງສົ່ງ ທີ່ໄດ້ພາກັນສ່ຽງຕາຍ ໜີຜ່າຍ ຣະບອບ ການປົກຄອງ ແບບຜະເດັດການຄອມມິວນິສ ຂອງ ພັກປະຊາຊົນ ປະຕິວັດລາວ ມາໄດ້ 45 ປີ ໄປຢູ່ປະເທດປະຊາທິປະໄຕໃນໂລກ ໄດ້ປະນາມຮຽກຮ້ອງ ແລະທວງໃຫ້ ຣັຖບາລລາວ ຈົ່ງເອົາໃຈໃສ່ຊ່ອຍເຫລືອ ຄົນງານລາວ ທີ່ ອັຕຄັດ ຢູ່ປະເທດມາເລເຊັຽນັ້ນ ໃຫ້ໄດ້ກັບຄືນປະເທດ ຢ່າງຮີບດ່ວນ.

ທ່ານ ເຄືອບຄໍາ ດວງພຣະຈັນ ຫົວໜ້າທິມງານ ຫ້ອງການປົກຄອງ ຂອງອົງການໂຮມລາວ ເພື່ອ ສັນຕິພາບ ແລະ ປະຊາທິປະຕັຍ ທີ່ ປະເທດການາດາ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 4 ມົກກະຣາ 2021 ນີ້ວ່າ, ອົງການໂຮມລາວ ຂອງ ພວກທ່ານເຮັດສານ ປະທ້ວງ ຄັ້ງນີ້ ມີຈຸດປະສົງສອງຢ່າງ:

"ຈຸດປະສົງອັນທີ 1; ພວກເຮົາມີຄວາມເປັນຫ່ວງເປັນໃຍ ແລະວິຕົກຕໍ່ໂຊກຊະຕາກັມ ຂອງພວກຄົນລາວ ທີ່ໄປຫາກິນດ້ວຍຄວາມສ່ຽງ ໃນຕ່າງປະເທດ. ເພາະຣັຖບານລາວ ບໍ່ມີວຽກໃຫ້ພວກເຂົາເຮັດ ພາຍໃນປະເທດ ຢາກໃຫ້ຣັຖບານສປປລາວ ຮັບເອົາຄົນງານລາວນີ້ 700 ຄົນ ກັບຄືນຫາຄອບຄົວ ຫາລູກເມັຽທີ່ລໍຄອຍ ຢູ່ທາງບ້ານ."

ແລະ ຈຸດປະສົງໂຕທີ 2; ພວກເຮົາຮຽກຮ້ອງໃຫ້ປະຊາຄົມ ຜູ້ນໍາສະມາຄົມປະເທດອາຊຽນ ຜັກດັນ ແລະ ເອົາບັນຫາການຕັດສິນໃຈ ຂອງ ຣັຖບານລາວ ທີ່ຜິດພາດນີ້ ຂຶ້ນມາສຶກສາ, ເປີດເສັ້ນທາງໃຫ້ຄົນງານລາວ ຢູ່ມາເລເຊັຽ ກັບຄືນປະເທດບົນພື້ນຖານ ຂອງ ຄວາມເປັນມະນຸສທັມ.

ອົງການໂຮມລາວ ເພື່ອ ສັນຕິພາບ ແລະ ປະຊາທິປະຕັຍ, ທີ່ປະກອບດ້ວຍຫລາຍອົງການຈັດຕັ້ງ ແລະ ຊຸມຊົນລາວ ທີ່ຮັກຊາດ, ຊຶ່ງພ້ອມກັນຕໍ່ສູ້ ເພື່ອຄວາມຄົງຢູ່ ຂອງຄວາມເປັນ ລາວ ຕລອດໄປຊົົ່ວກາລະນານ ໄດ້ສົ່ງສານປະທ້ວງຣັຖບາລ ສປປລາວ 5 ຂໍ້ ຊຶ່ງໃນນັ້ນໄດ້ເວົ້າເຖິງຄວາມເປັນຫ່ວງເປັນໃຍ ແລະການຢູ່ຄຽງຂ້າງ ຊາວປະມົງລາວ 700 ຄົນ, ທີ່ ຕົກຄ້າງຢູ່ປະເທດ ມາເລເຊັຍ ທີ່ກໍາລັງ ດິ້ນຮົນເພື່ອໃຫ້ໄດ້ກັບຄືນ ເມືອຫາຄອບຄົວ ຢູ່ປະເທດຂອງຕົນ ດ້ວຍຄວາມປອດພັຍ, ປະນາມຣັຖບານ ສປປລາວ ທີ່ຂາດຄວາມຮັບຜິດຊອບ ຈົງໃຈປະປ່ອຍ ພວກເຂົາເຈົ້າ ໃຫ້ໄປຕາມຍັດຖາກັມນັ້ນ ພົວພັນກັບຣັຖບາລປະເທດພາຄີຂອງກຸົ່ມອາຊຽນ, ໂດຍສະເພາະ ຣັຖບານຂອງປະເທດມາເລເຊັຽ ແລະ ຣາຊອານາຈັກໄທຍ ເພື່ອຂໍຄວາມຮົ່ວມມື ໃນການແກ້ໄຂບັນຫານີ້ໃຫ້ຕົກໄປ.

ພ້ອມກັນນັ້ນ ໃນສານປະທ້ວງຍັງໄດ້ຮຽກຮ້ອງໃຫ້ ຣັຖບາລສປປລາວ ເອົາໃຈໃສ່ຈັດກຽມ ສະຖານທີ່ກັກໂຕຊົ່ວຄາວ ຕາມກໍານົດເວລາ ສໍາລັບ ພວກເຂົາເຈົ້າຊຶ່ງຫວັງວ່າ ຄົງຈະບໍ່ເກີນ ຄວາມສາມາດ ທີ່ຈະກະທໍາໄດ້ ແລະ ຮີບຮ້ອນແກ້ໄຂບັນຫາດັ່ງກ່າວ.

ແລະຕໍ່ຄໍາຖາມທີ່ວ່າ ອົງການໂຮມລາວ ເພື່ອ ສັນຕິພາບ ແລະ ປະຊາທິປະຕັຍ ຄິດວ່າ ທາງຮັຖບາລ ສປປລາວ ຈະຕອບຮັບຄໍາ ຮຽກຮ້ອງ ຂອງ ພວກທ່ານ ຫລື ວ່າແນວໃດນັ້ນ ທ່ານ ເຄືອບຄໍາ ດວງພຣະຈັນ ຕອບວ່າ ຣັຖບາລ ສປປລາວ ຄວນປະຕິບັດຕາມ ຄໍາແນະນໍານັ້ນ:

“ພວກເຮົາກະຫວັງຢ່າງຍິ່ງວ່າ ຣັຖບານ ສປປລາວ ນີ້ ຄວນປະຕິບັດຕາມ ຄໍາແນະນໍາ ພວກເຮົານີ້ ແມ່ນລໍຖ້າເບິ່ງຣັຖບານລາວນີ້ ຈະເອົາທ່າທີີ ຫລື ຊອກຫາ ວິທີແນວໃດ ທີ່ຈະຊົດຊ່ອຍພວກເຂົາ ໃຫ້ກັບບ້ານໂດຍຄວາມປອດພັຍ.“

ທ່ານກ່າວຕໍ່ໄປວ່າ ການປະທ້ວງໃນຂໍ້ທີ 5 ນັ້ນພວກເຮົາໄດ້ຮຽກຮ້ອງ ໃຫ້ຣັຖບານສປປລາວຊອກຫາສະຖານທີ່ ຮອງຮັບຄົນງານລາວ ຈໍານວນດັ່ງກ່າວນັ້ນ ຕາມມາຕການປ້ອງກັນ ໂຄວິດ-19 ຄືກັກຕົວ 14 ມື້.

ອົງການໂຮມລາວ ເພື່ອ ສັນຕິພາບ ແລະ ປະຊາທິປະຕັຍ ເວົ້າວ່າ ຖ້າຣັຖບາລ ສປປລາວ ບໍ່ມີຄວາມສາມາດ ແກ້ໄຂບັນຫານີ້ໄດ້ ກໍຈົົ່ງພາກັນລາອອກ ຈາກການເປັນຜູ້ບໍຣິຫານ ປະເທດທັນທີ, ອີງຕາມຄໍາເວົ້າ ໃນສານປະທ້ວງ ທີ່ສົ່ງເຖິງ ທ່ານ ທອງລຸນ ສີສຸລິດ ນາຍົກຣັຖມົນຕຣີ ຊຶ່ງເຈົ້າ ຄໍາຫລວງ ໜໍ່ຄໍາ ເລຂາທິການເອກ ຂອງອົງການໂຮມລາວ ເພື່ອ ສັນຕິພາບ ແລະ ປະຊາທິປະຕັຍ ເປັນຜູ້ລົງນາມ ໃນມື້ວັນທີ 2 ມົກກະຣາ 2021 ນີ້.

somephone
somephone says:
Jan 05, 2021 05:19 PM

Dear: Lao freedom for democracy in Exile. We are the Lao student in the Lao national university would like to ask your honors that 45 years to now all lao exile could not fight the Lao PDR for humen violation in Laos. We are so hate and we all do not favor the Lao pdr to control the country. They believed Mark- Lenin that just to lie and make corruption .Many of Lao people have went out to Thailand seeking for job to support the families. We all the students want to fight the governments of Laos PDR to out of the Laos completly . WQe need your support please.

ວີໄລ
ວີໄລ says:
Jan 05, 2021 05:44 PM

ພວກທ່ານສູ້ແທ້ເດີ ໃກ້ຈະສູນຫາຍໄປແລ້ວ

ຈົງລໍເຮີ
ຈົງລໍເຮີ says:
Jan 08, 2021 11:18 PM

ສະບາຍດີເຖິງ ຄະນະສຽງເອເຊຍເສຣີ ພາກພາສາລາວ ທີ່ສະຫະລັດອາເມລິກາ ທີ່ຮັກແພງ. ອົົງການໂຮມລາວ ເພື່ອສັນຕີພາບ,ພະນະທ່ານ ເຈົ້າຄຳຫລວງໜໍຄຳເລຂາທີ່ການເອກ,ບັນດາອະດີດ,ນັກສືກສາ ບັນຍາຊົນ, ປະຊາຊົນລາວທຸຸກຊົນເຜົາທັງ ພາຍໃນແລະຕ່າງປະເທດ ທີ່ແສນເຄົາລົບຮັກທັງຫລາຍ. ຂ້າພະເຈົ້າ ຈົງລໍເຮີ ຜູ້ນຳພາຂະບວນການຕໍ່ສູ້ທີ່ເປັນປະຊາຊົນລາວທີ່ບໍລິສຸດ ອີກທີ່ເປັນກອງກຳລັງທີ່ສປປລາວ ຮຽກກັນວ່າ ເຈົ້າຟ້າ ທີ່ຍັງເຫລືອຢູ່ຈອມພູເບຍ, ປະຈຸບັນເປັນແຂວງໄຊສົມບູນ, ເປັນເຂດນຳ້ແດນດີນບ້ານເກີດເມືອງນອນທີ່ພວກເຮົາເຄິຍປົກປັກຮັກສາຢ່າງພີລະອາດຫານມາໄດ້ຫລາຍຍຸກຫລາຍສະມັຍ. ຂໍສະແດງຄວາມພາບພູມໃຈຢ່າງຈົງຮັກພັກດີມາຍ້ອງຍໍສັນລະເສີນອົງການໂຮມລາວເພືອ່ສັນຕິພາບຈົງຮ່ວມກັນສຳມະຄີເປັນສຽງເປັນກຳລັງກັບກອງກຳລັງຕໍ່ສູ້ທີ່ຍັງຢູ່ພາຍໃນປະເທດເເລະປະຊາຊົນລາວທັງຊາດເພືອຂັບໄລ່ພວກ ສປປລາວທີ່ກືນກິນຊາດ ທີ່ຍັງໃຊ້ລັດທີ່ກາມາກ ເລນີນ ທີ່ພົ້ນສະລາຍໄປແລ້ວນັ້ນມາເປັນພື້ນຖານການເມືອງໂຄສະນາຊົນເຊືອເພືອຫວັງຈະກືນກີນປະເທດຕໍ່ໄປ. ຂໍໃຫ້ທັງອົງການສະພາໂຮມລາວຈົງຢືດໝັ້ນບົນພື້ນຖານຄວາມສຳມະຄີບັນດາຊົນຊາດຊົນເຜົາໃຫ້ແໜ້ນແຟ້ນກ່ວາເກົາ. ກອງກຳລັງຂອງພວກເຮົາພ້ອມແລ້ວທີ່ຈະໃຫ້ຄວາມຮ່ວມມືປົກປັກແລະຈະຕໍ່ສູ້ພັກສປປລາວທີ່ຂາຍຊາດໄປຈົນບໍ່ມີວັນສີ້ນສຸດ. ແລະ ອີກປະການໜືງ ຂ້າພະເຈົ້າຈະຂໍປະກາດມາຍັງພີ່ນ້ອງ ໃນແຂວງໄຊສົມບູນ. ປະຊາຊົນລາວທົວປະເທດ ແລະນັກທ່ອງທຽ່ວທີ່ຮັກແພງທັງຫລາຍ ຈົງຢຸດເຊົາການແຜ່ຂະຫຍາຍໄປທ່ຽວຊົມຈອມພູເບຍເຂດທີ່ໝັ້ນຂອງພວກເຮົາ ຕັ້ງແຕ່ ເດືອນ 01/2021ນີ້ເປັນຕົ້ນໄປ ກອງກຳລັງຂອງພວກເຮົາຈະເລີມອອກປະຕິບັດ, ສະກັດກັ້ນ ກອງກຳລັງ ກໍ່ສ້າງແລະຝ່າຍກຳລັງ ສປປລາວທີ່ຫວັງຈະສ້າງຈອມພູເບຍເປັນ ແຫລ່ງທ່ອງທ່ຽວໃຫ້ພົ້ນທະລາຍໄປຢ່າງເດັດຂາດ ຖ້າຜູ້ໃດຍັງຝ່າຝືນລະເມີດຂື້ນໄປທ່ຽວຊົມຈອມພູເຍບ ກອງກຳລັງຂອງພວກເຮົາຈະບໍຮັບປະກັນຊິວີດຄວາມປອດໄພຂອງພີ່ນ້ອງທຸກຄົນ: ຈົງລໍ່ເຮີ ປະທານກອງກຳລັງຕໍ່ສູ້ເພືອເສລີປະຊາທີປະໄຕ ທີ່ພູເບຍ,ແຂວງໄຊສົມບູນ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ