ຣັຖບານ ສເນີໃຫ້ສະພາຮັບຮອງ ຣັຖກອນ 850 ຄົນ ໃນປີ 2024

ເມື່ອວັນທີ 31 ຕຸລາ 2023 ທີ່ຜ່ານມາ ສະພາແຫ່ງຊາຕ ເປີດກອງປະຊຸມສໄມສາມັນ ເທື່ອທີ 6 ຂອງສະພາແຫ່ງຊາຕ ຊຸດທີ 9 ຢ່າງເປັນທາງການແລ້ວ ນຶ່ງໃນຂໍ້ສເນີທີ່ຣັຖບານ ໄດ້ສເນີຕໍ່ສະພາແຫ່ງຊາຕ ເທື່ອນີ້ ແມ່ນການຂໍຈຳນວນໂຄຕ້າ ຣັຖກອນ 850 ຄົນ ສຳລັບງົບປະມານປີ 2024. ໂຄຕ້າທີ່ສເນີໃນເທື່ອນີ້ເພີ່ມຂຶ້ນ 50 ຄົນ ຈາກປີ 2023 ແຕ່ຍັງຖືວ່າ ຫຼຸດລົງຫຼາຍ ເມື່ອທຽບໃສ່ປີ 2022 ເຖິງ 1,300 ຄົນ, ໃນປີ 2021 ຮັບຣັຖກອນ 1,600 ຄົນ ແລະ ປີ 2020 ທີ່ເປີດຮັບຣັຖກອນ 2,000 ຄົນ.

ກ່ຽວກັບເຣື່ອງນີ້ ຄຣູອາສາສມັກ ທີ່ໄດ້ສອນມາແລ້ວ 8 ປີ ຢູ່ເມືອງແກ່ນທ້າວ ແຂວງໄຊຍະບູຣີ ກ່າວວ່າເຖິງແມ່ນວ່າ ໃນປີ 2024 ອາຈມີໂຄຕ້າຣັຖກອນເພີ່ມຂຶ້ນ ແລະ ການບັນຈຸຕ່າງຈາກປີກ່ອນ ຄືຄຣູອາສາສມັກຫຼຸດລົງ ເປັນຈຳນວນຫຼາຍ ແຕ່ໂອກາດໄດ້ບັນຈຸເຂົ້າເປັນຣັຖກອນ ບໍ່ຕ່າງຈາກເກົ່າ ຍ້ອນໃນປີຜ່ານມາ ເມືອງໄດ້ໂຄຕ້າຣັຖກອນຄຣູ ຈຳນວນ 3 ຄົນເທົ່ານັ້ນ ບໍ່ເຄີຍໄດ້ເກີນຊໍ່ານີ້ ເຊິ່ງຍານາງຄິດວ່າຈະລໍຖ້າສອບເສັງ ອີກປີນຶ່ງ ຫາກບໍ່ໄດ້ໂຄຕ້າ ຈະລາອອກເພື່ອໄປເຮັດວຽກອື່ນ ດັ່ງຍານາງກ່າວຕໍ່ວິທຍຸ ເອເຊັຽເສຣີ ໃນວັນທີ 01 ພຶສຈິກາ 2023 ນີ້ວ່າ:

“ຕາມຄວາມຄິດຫັ້ນແຫຼະຂຶ້ນນິດນຶ່ງ ທໍ່ເກົ່າຫັ້ນແຫຼະ ຕ່າງແຕ່ວ່າ ອາສາ ປັດຈຸບັນມັນຫຼຸດລົງໝົດ. ຄັນຖາມວ່າ ກໍມາຄືເກົ່າລະຕິແບບວ່່່າ ເພາະວ່າ ເຄີຍໄປກໍມີແຕ່ອະນຸບານ ໂຕນຶ່ງ ປະຖົມໂຕນຶ່ງ ມັທຍົມໂຕນຶ່ງ ຊໍ່ານີ້ແຫຼະ ແຕ່ລະປີທີ່ເຂົາກໍຊິລໍເບິ່ງ ປີນຶ່ງ ຄັນວ່າມີໂອກາດໄດ້ ຄັນວ່າຖ້າບໍ່ມີໂອກາດໄດ້ ກໍຊິໄປບ່ອນໃໝ່.”

ສໍາລັບເງິນອຸດໜູນ ທີ່ຣັຖບານປະກາດ ອອກມາວ່າ ຈະຊ່ອຍເຫຼືອບັນດາຄຣູອາສານັ້ນ ຍານາງກ່າວວ່າ ຍັງບໍ່ໄດ້ຮັບເທື່ອ ຈຶ່ງຢາກສເນີໃຫ້ທາງການຊ່ອຍເຫຼືອ ຄຣູອາສາສມັກ ໃນເຣື່ອງນີ້ຕື່ມ ຍ້ອນປັດຈຸບັນບໍ່ໄດ້ຮັບຄ່າຈ້າງໃດໆ, ໄດ້ແຕ່ເງິນ 100,000-200,000 ກີບທີ່ໂຮງຮຽນໃຫ້ ເພື່ອຊ່ອຍຄ່າໃຊ້ຈ່າຍອື່ນໆ.

ຄຣູອາສາສມັກ ອີກຍານາງນຶ່ງທີ່ສອນມາໄດ້ 8 ປີແລ້ວຢູ່ເມືອງຍອດອູ ແຂວງຜົ້ງສາລີ ກ່າວວ່າປີກາຍຢູ່ເມືອງຍອດອູ ໄດ້ໂຄຕ້າຣັຖກອນຄຣູ 2 ຄົນເທົ່ານັ້ນ ແລະ ເຖິງແມ່ນວ່າຮູ້ ສືກທໍ້ ແຕ່ບໍ່ມີທາງເລືອກອື່ນ.

ດັ່ງຍານາງກ່າວວ່າ:

“ຄວາມທໍ້ກໍຫາກມີແຕ່ວ່າ ເຮົາຊິອອກໄປແນວອື່ນ ກໍບໍ່ໄດ້ເຮົາບໍ່ມີທາງໄປແລ້ວເພາະວ່າ ເຮົາບໍ່ມີທຸຣະກິຈໄປລົງທຶນແນວອື່ນແລ້ວ ກໍມີແຕ່ຢູ່ແນວນີ້ແຫຼະ ມີແຕ່ການນຳເພິ່ນ ບອກໃຫ້ຢູ່ກໍຢູ່ໄປແນວນີ້ແຫຼະ.”

ໃນປີ 2023 ເມືອງຜາໄຊ ແຂວງຊຽງຂວາງ ບໍ່ໄດ້ຮັບໂຄຕ້າຄຣູອາສາສມັກ ຈັກຄົນປັດຈຸບັນ ຈຶ່ງມີຄຣູອາສາສມັກພຽງ 5 ຄົນ ແຕ່ລະຄົນສອນມາໄດ້ 7-8 ປີ ແລະ ຕອນນີ້ເມືອງຂາດເຂີນ ທັງຄຣູອາສາສມັກ ແລະ ຣັຖກອນຄຣູໂດຍສະເພາະ ໃນເຂດຫ່າງໄກສອກຫຼີກ ໂດຍຄຣູລະດັບອະນຸບານນັ້ນ ຂາດເຂີນຫຼາຍທີ່ສຸດ.

ປັດຈຸບັນມີໂຮງຮຽນອະນຸບານ ແຫ່ງນຶ່ງໃນເມືອງຜາໄຊ ທີ່ບໍ່ສາມາດເປີດການສອນ ໄດ້ຍ້ອນຣັຖກອນຄຣູລາພັກຕລອດ ແລະ ຄຣູອາສາສມັກອີກຄົນນຶ່ງ ບໍ່ມາສອນຕ້ອງປິດໂຮງຮຽນ ເຮັດໃຫ້ນັກຮຽນຊັ້ນອະນຸບານ 1-3 ບໍ່ໄດ້ຮຽນໜັງສື ຕັ້ງແຕ່ເປີດສົກຮຽນເມື່ອວັນທີ 01 ກັນຍາ ທີຜ່ານມາ ແລະ ຈະບໍ່ໄດ້ຮຽນຈົນໝົດສົກຮຽນ ໃນເດືອນກຸມພາປີ 2024 ຍ້ອນຕ້ອງລໍຖ້າຄຣູຣັຖກອນ ກັບມາຈາກລາພັກ ຄຣູອາສາສມັກ ທີ່ບໍ່ມາສອນນີ້ສອນມາໄດ້ 8 ປີແລ້ວ ແລະຍັງບໍ່ໄດ້ບັຈຸຣັຖກອນເທື່ອ ຈຶ່ງເກີດການທໍ້ ເຖິງຈະສົ່ງໜັງ ສືສເນີໄປຫາຂັ້ນແຂວງ ແລະໄດ້ໄປລົມກັບຜູ້ປົກຄອງ ຂອງນັກຮຽນແລ້ວ ແຕ່ກໍບໍ່ສາມາດແກ້ບັນຫາໄດ້ ຍ້ອນວ່າ ຖ້າໃຫ້ຄຣູໂຮງຮຽນອື່ນ ມາສອນຊ່ອຍໂຮງຮຽນນັ້ນ ຈະຂາດຄຣູ.

ດັ່ງເຈົ້າໜ້າທີ່ ທີ່ກ່ຽວຂ້ອງ ນາງນຶ່ງກ່າວວ່າ:

“ເມືອງຜາໄຊ ສ່ວນຫຼາຍເຂດຫ່າງໄກສອກຫຼີກ ຫຼືຈະແມ່ນຂາດແຄນບ່ອນທີ່ ຂະເຈົ້າລາອອກຫັ້ນ ສາມຂັ້ນຮຽນອະນຸບານນຶ່ງ, ສອງ, ສາມ. ປັດຈຸບັນນີ້ປິດປະຕູຄຣູອາສາຫັ້ນ ບໍ່ໄປບໍ່ມີຄຣູເລີຍ ເອົາບ່ອນໂຮງຮຽນອື່ນ ໄປຊ່ອຍ ກໍບໍ່ໄດ້ຫັ້ນນ່່າ ຖ້າເອົາບ່ອນນີ້ໄປບ່ອນນີ້ຂາດຫັ້ນນ່າ.”

ປັດຈຸບັນການສອບເສັງ ບັນຈຸເຂົ້າຣັຖກອນຄຣູ ໃນຫຼາຍແຂວງ ຈະມີການຈັດສັນລໍາດັບ ໃຫ້ບັນດາຄຣູອາສາສມັກ ທີ່ສອນມາຫຼາຍປີ ແລະ ຄຣູອາສມັກມີອາຍຸ 31-35 ປີ ໃນການສອບເສັງ ກ່ອນຖ້າຫາກອາຍຸ 35 ປີໄປແລ້ວ ຈະເປັນຣັຖກອນ ໄດ້ເຮັດໃຫ້ບາງທີ່ບັນດາຄຣູອາສາສມັກ ທີ່ສອນມາດົນແລ້ວ ແຕ່ອາຍຸຍັງນ້ອຍ ບໍ່ໄດ້ໄປສອບເສັງ ຕ້ອງລໍຖ້າຕື່ມ.

ບໍ່ແມ່ນແຕ່ ພາກສ່ວນການສຶກສາ ເທົ່ານັ້ນທີ່ປະສົບບັນຫາ ຂາດເຂີນພະນັກງານ ແຕ່ພາກສ່ວນສາທາຣະນະສຸຂ ກໍຂາດເຂີນບຸກຄະລາກອນນໍາ ຍ້ອນໃນແຕ່ລະປີ ມີແພດອາສາສມັກ, ພະຍາບານອາສາສມັກ ລາອອກຫຼາຍ. ສ່ວນນຶ່ງກໍຍ້ອນ ຍັງບໍ່ໄດ້ບັນຈຸຣັຖກອນ ເຖິງຈະເຮັດວຽກມາດົນແລ້ວ ແລະມີພຽງເງິນຈູງໃຈ ຈາກໂຮງໝໍ ໃຫ້ເດືອນລະ 500,000 ກີບເທົ່ານັ້ນ ແລະ ບາງເດືອນ ກໍບໍ່ໄດ້ຮັບເຕັມຈຳນວນ.

ຢູ່ແຂວງຈໍາປາສັກ ໃນປີທີ່ຜ່ານມາມີໂຄຕ້າ ຣັຖກອນແພດພຽງ 7 ຄົນ ທຽບໃສ່ຈໍານວນອາສາສມັກ ໃນໂຮງໝໍແຂວງຈຳປາສັກທີ່ມີຢູ່ 300 ຄົນ ແລະ ອາສາສມັກໃນໂຮງໝໍນ້ອຍ ທົ່ວແຂວງ ຖືວ່າຈຳນວນຮັບບັນຈຸ ໜ້ອຍຫຼາຍ.

ດັ່ງອະດີດຜູ້ຊ່ອຍພະຍາບານ ອາສາສມັກ ຢູ່ເມືອງປາກເຊແຂວງຈຳປາສັກ ນາງນຶ່ງກ່າວວ່າ:

“ແມ່ນມັນໜ້ອຍແຮງ ເບິດທັງປະເທດນີ້ ຈະສອງສາມຮ້ອຍ ມັນກໍຄືຊິໜ້ອຍໂພດຫັ້ນນ່າ ຄັນວ່າເຮົາຈະທຽບອາສາສມັກ ກັບແຕ່ໃນໂຮງໝໍ ດຽວກໍປາໄປ 50-60 ຄົນແລ້ວ ສົມມຸດໂຮງໝໍນ້ອຍໆ. ໂຮງໝໍເມືອງ, ໂຮງໝໍແຂວງ ນີ້ຫຼາຍຮອ້ຍ.”

ດ້ານເຈົ້າໜ້າທີ່ ຜແນກສາທາຣະນະສຸຂ ເມືອງຊໍາເໜືອ ແຂວງຫົວພັນກ່າວວ່າ ປັດຈຸບັນເມືອງຂາດເຂີນບຸກຄະລາກອນ ທາງການແພດຫຼາຍທັງຣັຖກອນ ແລະອາສາສມັກບໍ່ວ່າ ຈະເປັນພະຍາບານ, ພະຍາບານປະດຸງຄັນ ແລະ ໝໍ ຍ້ອນທີ່ຜ່ານມາບໍ່ໄດ້ໂຄຕ້າຣັຖກອນແພດ ມາເມືອງຈົນເຮັດໃຫ້ບາງບ່ອນ ຕ້ອງປິດສຸຂສາລາ ໄປ.

ດັ່ງຍານາງກ່າວວ່າ:

“ຂາດເຂີນຫັ້ນແຫຼະ ຄືວ່າບໍ່ໄດ້ໂຄຕ້າຈັກເທື່ອຕ້ອງການນີ້ລະ ແມ່ນພະຍາບານເນາະ ພະຍາບານຫຼາຍຄົນອັນທີ່ວ່າ ຍັງຄ້າງຢູ່ຫຼາຍປີຕໍ່າສຸດ ກໍແມ່ນ 5 ປີ. ເອີ ຜະດຸງຄັນກໍຍັງຂາດ.”

ໃນປີ 2023 ນີ້, ຣັຖບານລາວ ມີກຳນົດຮັບຣັຖກອນໃໝ່ ທັງໝົດທົ່ວປະເທດ 800 ຄົນ. ໃນນີ້, ມີຣັຖກອນຄຣູ 285 ຄົນ ແລະ ຣັຖກອນແພດ 225 ຄົນ. ໂດຍການຈັດສັນ ຣັຖກອນໃໝ່ ຈຳນວນດັ່ງກ່າວແມ່ນຈະໃຫ້ບູຣິມະສິດ ແກ່ຄຣູອາສາສມັກ ແລະ ແພດອາສາສມັກ ທີ່ເຮັດວຽກຢູ່ເຂດຫ່າງໄກ ສອກຫລີກ ແລະ ທຸລະກັນດານ.

ສຳລັບຣັຖກອນຄຣູ ຖືວ່າຮັບໜ້ອຍລົງເມື່ອທຽບໃສ່ປີ 2022 ທີ່ຣັຖບານ ໃຫໂຄຕ້າຣັຖກອນຄຣູ 340 ຄົນສ່ວນໂຕເລຂ ສຳລັບກະຊວງສາທາຣະນສຸຂ ນັ້ນໃນປີ 2023ໄດ້ໂຕເລຂ ຈຳນວນ 230 ຄົນ ໃນນີ້ເປັນໂຕເລຂຣັຖກອນແພດ 225 ຄົນ ແລະ ເປັນຣັຖກອນ ບໍຣິຫານ 5 ຄົນ ເຊິ່ງຖືເປັນການແບ່ງໂຕເລຂ ຣັຖກອນທີ່ໜ້ອຍທີ່ສຸດ ໃນຮອບ 5 ປີ ເນື່ອງຈາກໃນປີ 2019 ກະຊວງສາທາຣະນະສຸຂ ໄດ້ໂຄຕ້າ 220 ຄົນ, ປີ 2020 ໄດ້ໂຄຕ້າ 300 ຄົນ, ປີ 2021 ໄດ້ໂຄຕ້າ 321 ຄົນ ແລະ ປີ 2022 ໄດ້ໂຄຕ້າ 335 ຄົນ.