ຣັຖບານ ຈະເລັ່ງຕ້ານ-ສະກັດກັ້ນ ອາຊຍາກັມ ທາງໄຊເບີ້

ຄະນະກັມມະການ ຄຸ້ມຄອງ ອິນເຕີເນັດ ແຫ່ງຊາຕລາວ ຫຼື ຄຄອຊ ພາຍໃຕ້ຣັຖບານລາວ ຈະເລັ່ງຕ້ານແລະສະກັດກັ້ນ ບັນຫາອາຊຍາກັມທາງໄຊເບີ້ ຫຼື Cybercrime ທີ່ຖືກເຜີຍແຜ່ຜ່ານລະບົບໂທຣະຄົມມະນາຄົມ ແລະອິນເຕີເນັດ ເພື່ອປ້ອງກັນການນຳໃຊ້ສື່ສັງຄົມອ໋ອນລາຍນ໌ ແລະການນຳໃຊ້ ອິນເຕີເນັດໃນລາວ ໄປໃນທາງທີ່ບໍ່ດີ.

ກ່ຽວກັບເຣື່ອງນີ້ ເຈົ້າໜ້າທີ່ສູນອິນເຕີເນັດແຫ່ງຊາຕ ກະຊວງເຕັກໂນໂລຈີ ແລະການສື່ສານ ກ່າວວ່າ ການຕ້ານ ແລະສະກັດກັ້ນ ບັນຫາອາຊຍາກັມທາງໄຊເບີ້ ໃນລາວຈະມີຫຼາຍພາກສ່ວນ ທີ່ເຮັດວຽກຮ່ວມກັນ ແຕ່ມີເປົ້າໝາຍດຽວກັນ ຄືຄວບຄຸມ ແລະຊອກຫາຜູ້ລະເມີດ ມາດຳເນີນຄະດີ ຕາມກົດໝາຍ.

ດັ່ງເຈົ້າໜ້າທີ່ ສູນອິນເຕີເນັດ ແຫ່ງຊາຕ ກ່າວຕໍ່ວິທຍຸເອເຊັຽເສຣີ ໃນວັນທີ 30 ພຶສຈິການີ້ວ່າ:

“ກ່ຽວກັບອາຊຍາກັມທາງໄຊເບີ້ນີ້ເນາະ ເຈົ້າໜ້າທີ່ຕຳຣວດແຖວບ້ານເພິ່ນ ຈະເຮັດສຳເນົາ ດຳເນີນຄະດີແລ້ວຈຶ່ງມາປຶກສາ ທາງພວກເຮົານີ້ (ສູນອິນເຕີເນັດແຫ່ງຊາຕ) ແລ້ວພວກເຮົາຈະເຮັດກັນວ່າ ຜູ້ທີ່ວ່າເຮັດອາຊຍາກັມ ທາງໄຊເບີ້ເນາະ ເຂົາເຈົ້າຢູ່ໃສ ແລ້ວພວກເຮົາຈະຊອກດຳເນີນໃຫ້.”

ສໍາລັບອາຊຍາກັມໄຊເບີ້ ທີ່ຣັຖບານລາວຈະເລັ່ງຕ້ານ ແລະສະກັດກັ້ນນັ້ນ ຈະມີບັນຫາເຊັ່ນການຕິດຕາມ, ກວດກາ ແລະ ຕອບໂຕ້ຫາງສຽງບໍ່ດີ ໃນສັງຄົມໃຫ້ເຂັ້ມແຂງ ແລະມີປະສິດທິພາບກ່ວາເກົ່າ, ເລັ່ງຈັດຕັ້ງປະຕິບັດ ການລົງທະບຽນເລກໂທຣະສັບ ໃຫ້ສຳເຣັດຕາມແຜນ, ແກ້ໄຂບັນຫາອາຊຍາກັມ ແລະການຕົວະຍົວະ ຫຼອກລວງຜ່ານລະບົບອິນເຕີເນັດ ໂດຍຜ່ານແກ້ງຄອລເຊັນເຕີ້.

ນອກຈາກນີ້ກໍຈະຕິດຕາມ ກວດກາບັນດາສື່ ແລະເວັບໄຊຕ໌ ລາມົກອະນາຈານ, ບັນຫາເກມສ໌ ການພະນັນ, ຄາສິໂນອ໋ອນລາຍນ໌, ການຄ້າຂາຍຫວຍເຖື່ອນ, ຕິດຕາມການຮົ່ວໄຫຼ ຂອງເອກະສານ ຂອງພັກ-ຣັຖ ແລະການຮົ່ວໄຫຼ ຂໍ້ມູນສ່ວນບຸກຄົນ.

ຊາວລາວ ໃນແຂວງຫຼວງພຣະບາງ ກ່າວວ່າ ດຽວນີ້ບັນຫາອາຊຍາກັມ ທາງໄຊເບີ້ ນັບມື້ຈະທະວີຄວາມຮຸນແຮງຂຶ້ນ ໂດຍສະເພາະພວກແກ້ງຄອນເຊັນເຕີ້, ການຄ້າຂາຍອາວຸດ ແລະສິ່ງເສບຕິດ ປະເພດຕ່າງໆ ຈຶ່ງຢາກໃຫ້ຣັຖບານລາວ ແລະປະເທດໃນພາກພື້ນ ຮ່ວມກັນຕ້ານ ແລະສະກັດກັ້ນຢ່າງຈິງຈັງ ເພື່ອປ້ອງກັນການສູນເສັຍ ເງິນຄຳ ແລະຊັບສິນມີຄ່າອື່ນໆ.

ດັ່ງທ່ານໄດ້ກ່າວຕໍ່ ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ມັນໃຊ້ລະບົບຄວບຄຸມ ຂອງຈີນທີ່ມາຊ່ອຍ ແຕ່ມັນກາຍັງມີຊ່ອງຫວ່າງ ເພາະວ່າພວກແກ້ງຕົ້ມຕຸນ ຄອລເຊັນເຕີ້ ສ່ວນຫຼາຍມັນເປັນຄົນໄທຍ, ຄົນຈີນ ແລ້ວກາໃຊ້ຄົນລາວ ເປັນກຳມະກອນຕອບແຊັດ ຕອບຫຍັງໃຫ້ເຂົາສື່ໆ ຫຼາຍພາກສ່ວນຕ້ອງຮ່ວມມື ກັນເອົາຈິງ ເອົາຈັງຫັ້ນແຫຼະ.”

ຊາວລາວ ໃນແຂວງເຊກກອງກ່າວວ່າ ດຽວນີ້ບໍ່ຄ່ອຍມີແກ້ງຄອລເຊັນເຕີ້ ໂທຣະສັບມາຕົ້ມຕຸນ, ຫຼອກລວງຄົນລາວ ປານໃດອາດເປັນຍ້ອນ ຣັຖບານລາວ ເຂັ້ມງວດ ໃນການຕິດຕາມ-ກວດກາແຕ່ ໃນສື່ສັງຄົມອ໋ອນລາຍນ໌ ໄລຍະນີ້ກໍຈະມີກຸ່ມຄົນ ປ່ອຍເງິນກູ້ນອກລະບົບ ດອກເບັ້ຍແພງຫຼາຍ ຄົນໄປກູ້ມາແລ້ວບໍ່ສາມາດສົ່ງເງິນຕົ້ນ ແລະດອກເບັ້ຍໄດ້ ຕາມກຳນົດກໍເອົາທີ່ດິນ ໄປຈຳກາຍເປັນພາຣະອັນໃຫຍ່ຫຼວງ ຂອງຄົນລາວ.

ດັ່ງຊາວລາວ ແຂວງຊຽງເຊກອງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ:

“ບໍ່ໆ! ບໍ່ມີໆ ມີແຕ່ພວກອັນນ່າ ເຮັດກູ້ເງິນ ການມອບເງິນກູ້ເງິນ ຫັ້ນແລ້ວກາໃຫ້ຈໍາດິນ ຈຳດອນ ຫຼາຍຄົນໄດ້ເສັຍເງິນ.”

ຊາວລາວ ໃນນະຄອນຫຼວງວຽງຈັນ ກ່າວວ່າເຫັນດີ ທີ່ຣັຖບານລາວ ຈະຕ້ານ ແລະສະກັດກັ້ນບັນຫາອາຊຍາກັມ ທາງໄຊເບີ້ ເພາະປັດຈຸບັນແກ້ງຄອລເຊັນເຕີ້, ການຫຼອກລວງປະຊາຊົນ, ການຕົ້ມຕຸນ, ການພະນັນອ໋ອນລາຍນ໌ ນັບມື້ຈະເພີ່ມທະວີ ຄວາມຮຸນແຮງຂຶ້ນ.

ສ່ວນຂໍ້ກັງວົນໃຈ ແມ່ນການລົງທະບຽນເລກໂທຣະສັບ ເພື່ອຢັ້ງຢືນຕົນເອງ, ການສະແດງຄວາມຄິດຄວາມເຫັນຕໍ່ການເຮັດວຽກ ຂອງຣັຖບານລາວ ຫຼືໜ່ວຍງານຂອງພັກ-ຣັຖ ໃນອະນາຄົດຜ່ານສື່ສັງຄົມອ໋ອນລາຍນ໌ ຈະຖືກຄວບຄຸມຢ່າງເຂັ້ມງວດ ເຊິ່ງຈະເຮັດໃຫ້ຄົນລາວ ບໍ່ມີເສຣີພາບ ໃນການສະແດງຄວາມຄິດຄວາມເຫັນ ຫຼືວິພາກວິຈານ ນະໂຍບາຍຂອງຣັຖບານລາວ.

ດັ່ງຊາວລາວ ໃນນະຄອນຫຼວງວຽງຈັນ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ:

“ເຣື່ອງຄວາມປອດໄພ ນີ້ກາບໍ່ຢາກຄັກປານໃດ ເວົ້າງ່າຍໆ ແບບວ່າມັນລ່ວງລໍ້າສິດທິ ສ່ວນໂຕແດ່ໜ້ອຍນຶ່ງ ດີບໍ່ດີບາງເທື່ອກາເຮັດເກີດຄວາມລຳຄານ.”

ເຈົ້າໜ້າທີ່ລາວ ທີ່ເຮັດວຽ ກຢູ່ອົງການສະຫະປະຊາຊາຕ ປະຈໍາລາວກ່າວວ່າ ປັດຈຸບັນມີປະຊາຊົນ ຈຳນວນຫຼາຍ ຫັນມາສະແດງຄວາມຄິດຄວາມເຫັນ ຜ່ານສື່ສັງຄົມອ໋ອນລາຍນ໌ ເພີ່ມຂຶ້ນເຊິ່ງມີທັງຝ່າຍສນັບສນູນ ແລະຝ່າຍເຫັນຕ່າງ ແຕ່ຢູ່ໃນເຫດໃນຜົລຂອງເຣື່ອງນັ້ນໆ ແຕ່ເຣື່ອງທັງໝົດ ກໍຍັງບໍ່ສາມາດເວົ້າໄດ້ 100%.

ເຈົ້າໜ້າທີ່ໄດ້ກ່າວຕື່ມວ່າ ການສະແດງຄວາມຄິດຄວາມເຫັນ ຫຼືວິພາກວິຈານນະໂຍບາຍ ຂອງຣັຖບານລາວ ບໍ່ແມ່ນບັນຫາອາຊຍາກັມ ທາງໄຊເບີ້ ແລະຣັຖບານລາວ ບໍ່ຄວນຈະໄປຈຳກັດສິດ ຫຼືຂົ່ມຄູ່ ຄຸກຄາມປະຊາຊົນລາວ ຖ້າປະຊາຊົນລາວ ຕ້ອງການມີສ່ວນຮ່ວມ ໃນການສະແດງຄວາມຄິດຄວາມເຫັນ ຜ່ານສື່ສັງຄົມອ໋ອນລາຍນ໌.

ດັ່ງເຈົ້າໜ້າທີ່ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນວ່າ:

“ຖາມວ່າເປັນບຸກຄົນທົ່ວໄປ ຈັ່ງຊິໃນການສ່ອງແສງຕາມສື່ອ໋ອນລາຍນ໌ ກາປະກົດເຫັນ ຂະເຈົ້າໃຫ້ຄວາມຄິດຄວາມເຫັນ ທີ່ກ່ຽວກັບວຽກງານຣັຖບານ ແມ່ນຫຍັງຢູ່ໃດ ຈະມີຝ່າຍສນັບສນູນ ຫຼືວ່າຝ່າຍທີ່ບໍ່ເຫັນດີ ກາມີໆ ຫັ້ນນ່າຂະເຈົ້າກາໃຫ້ການສ່ອງແສງ ທີ່ດີໃດຕາມທີ່ເຮົາເບິ່ງຫັ້ນນ່າ.”

ປັດຈຸບັນປະຊາຊົນລາວ ໃນປະເທດມີການນໍາໃຊ້ ສື່ສັງຄົມອ໋ອນລາຍນ໌ ຫຼື Social Media ເພີ່ມຂຶ້ນຫຼາຍໂດຍໃນປີ 2023 ນີ້ປະຊາຊົນລາວ 85% ມີໂທຣະສັບສະມາດໂຟນ ໃຊ້ 65% ຂອງປະຊາກອນລາວ ສາມາດເຂົ້າເຖິງອິນເຕີເນັດ ແລະ 44.2% ມີການນໍາໃຊ້ສື່ສັງຄົມ ອ໋ອນລາຍນ໌ ເຊັ່ນເຟສບຸກຄ໌, ອິນສະຕຣາແກຣມ, ທະວີດເຕີ້ ແລະ ຢູທູບ.

ປະເທດລາວ ໄດ້ອອກຄໍາສັ່ງວ່າ ດ້ວຍການຄຸ້ມຄອງ ຂໍ້ມູນຜ່ານອິນເຕີ້ເນັດ ເລກທີ 327 ເພື່ອຄວບຄຸມ ຜູ້ທີ່ໃຊ່ສື່ສັງຄົມອ໋ອນລາຍນ໌ ສະເພາະຫຼືຜູ້ທີ່ສະແດງຄວາມຄິດຄວາມເຫັນ ແລະຈັບໂຕຜູ້ກ້າ ສະແດງຄວາມຄິດຄວາມເຫັນ ທີ່ໄປວິພາກວິຈານຣັຖບານ ຜ່ານສື່ສັງຄົມອ໋ອນລາຍນ໌. ນອກຈາກນີ້ ກະຊວງຖແລງຂ່າວ ວັທນາທັມ ແລະ ທ່ອງທ່ຽວ ຍັງໃຫ້ຜູ້ໃຊ້ເຟສບຸກຄ໌, ຢູທູບ ແລະ ເວັບໄຊຕ໌ ໃຫ້ລົງທະບຽນສ້າງຕັ້ງສື່ສັງຄົມອ໋ອນລາຍນ໌ ຢ່າງຖືກຕ້ອງເພື່ອໃຫ້ສອດຄ່ອງ ກັບກົດໝາຍສື່ມວນຊົນ.

ປະທານ ປະເທດ ໄດ້ອອກດໍາຣັດເລກທີ 199/ປປທ ກ່ຽວກັບການປະກາດ ໃຊ້ກົດໝາຍວ່າດ້ວຍ ເຕັກໂນໂລຈີ ການສື່ສານ, ຂໍ້ມູນ, ຂ່າວສານມາຕຣາ 48 ຂໍ້ຫ້າມສຳຄັນ ຜູ້ໃຊ້ບໍຣິການສ້າງ ແລະ ເຜີຍແຜ່ຂໍ້ມູນຂ່າວສານ ທີ່ມີລັກສະນະລາມົກ ອະນາຈານ, ບິດເບືອນ, ສົ່ງເສີມການກໍ່ການຮ້າຍ ຫຼືຕໍ່ຕ້ານຣັຖບານແຫ່ງ ສປປ ລາວ ຫາກລະເມີດ ຈະຖືກກ່າວເຕືອນ, ສຶກສາ ອົບຮົມ, ລົງວິໄນ, ປັບໃໝ ແລະ ລົງໂທດທາງອາຍາ ແລ້ວແຕ່ກໍຣະນີເບົາ ຫຼືໜັກ.

ເມື່ອເດືອນກັນຍາ 2023 ທີ່ຜ່ານມານີ້ຣັຖບານລາວ ທີ່ມີແຜນຈະພັທນາໂຄງການ ໂຄງຂ່າຍຄວາມໄວສູງເພື່ອຫຼຸດຜ່ອນ ຄວາມທຸກຍາກ ແລະຮອງຮັບແລວທາງ ເສຖກິຈສາຍໃໝ ດິຈິຕອລ ໂດຍຣັຖບານຈີນຈະເປັນຜູ້ພັທນາ ແລະຊ່ອຍເຫຼືອ ດ້ານງົບປະມານ ໂຄງການດັ່ງກ່າວຈະສ້າງພື້ນຖານ ໂຄງຮ່າງດິຈິຕອລຄືສູນຂໍ້ມູນ ແຫ່ງຊາຕ 4 ແຫ່ງ ຢູ່ພາກເໜືອ, ພາກໃຕ້ ແລະ ນະຄອນຫຼວງວຽງຈັນ 2 ແຫ່ງ.