ທຶນຮຽນຕໍ່ຈີນຖືກກຸ່ມ ແອບແຝງ ຫາປໂຍດ.

ໄຊຍາ
2021-04-07
Share
ທຶນຮຽນຕໍ່ຈີນຖືກກຸ່ມ ແອບແຝງ ຫາປໂຍດ. ມະຫາວິທຍາໄລ ການສຶກສາ ໃນ ປະເທດຈີນ
ພາບປະກອບ: ນັກຂ່າວພົລເມືອງ

ອັນທີ່ຈິງປະເດັນນີ້ ກໍເປັນທີ່ຮູ້ຈັກກັນດີ ເພາະມີນັກສຶກສາລາວ ຈຳນວນຫລາຍຫລົງເຊື່ອ ກຸ່ມມິດສາຊີບເລົ່ານີ້ທີ່ວ່າສາມາດຈັດຫາ ທຶນຮຽນຟຣີ ທີ່ຣັຖບານຈີນ ປະກາດອອກມາ ແຕ່ລະປີ. ໂດຍຜູ້ທີ່ສົນໃຈ ຕ້ອງໄດ້ລົງທະບຽນ ແລະເສັຽຄ່າໃຊ້ຈ່າຍໃຫ້ຕົວແທນ ປະສານງານເຖິງ 5 ພັນ ຫາ 7 ພັນ ໂດລາສະຫະຣັຖ. ແຕ່ພໍເດີນທາງໄປຮອດວິທຍາລັຍຈີນ ຜູ້ປະສານງານກໍໄປສົ່ງແລ້ວ ຈ່າຍຄ່າຮຽນ ພາສາຈີນ ແຕ່ນັ້ນບໍ່ແມ່ນການ ໄດ້ທຶນຮຽນ ພຽງແຕ່ໄປສົ່ງເຖິງ ມະຫາວິທຍາລັຍ ຕາມທຶນປະກາດ.

ທີ່ຈິງນັກສຶກສາ ທີ່ຈ່າຍເງິນໃຫ້ຜູ້ປະສານງານ ກໍຫວັງໄດ້ທຶນໄປຮຽນເລີຍ. ແຕ່ພໍໄປຮອດຈີນ ຕ້ອງໄດ້ດີ້ນຮົນກຸ້ມຕົນເອງ, ທັງຄ່າ ອາຫານ, ຄ່າຫໍພັກ ແລະ ຄ່າໃຊ້ຈ່າຍຕ່າງໆ ໃນຂນະ ທີ່ຢູ່ວິທຍາລັຍຈີນ. ພໍ່-ແມ່ກໍຕ້ອງໄດ້ສົ່ງເງິນໄປໃຫ້. ມີບາງຄົນກໍກັບບ້ານ, ບາງຄົນກໍໄປຕໍ່ຈົນ ສອບເສງໄດ້ທຶນ ຕ້ອງໃຊ້ເວລາປະມານສອງປີ.

ຕໍ່ກັບກໍຣະນີດັ່ງກ່າວນັກສຶກສາ ທີ່ຕົກເປັນເຫຍື່ອ ຂອງຂະບວນການນີ້ ກໍໄດ້ເປີດໃຈໃຫ້ສັມພາດ ຕໍ່ RFA ເມື່ອທ້າຍເດືອນມິນາ ວ່າ; ພໍຮູ້ໂຕອີກເທື່ອນຶ່ງ ກໍຖືກຕົວະຕົ້ມແລ້ວ ແຕ່ແນວໃດໄດ້ ມາຮອດຈີນແລ້ວ ກໍຕັດສິນໃຈ ຮຽນຕໍ່ຈົນເສັງໄດ້ທຶນ.

ໃນໄລຍະກຽມພໍ່-ແມ່ ໄດ້ສົ່ງເງິິນມາໃຫ້. ຖ້າຈະເຮັດວຽກເສີມ ກໍຜິດກົດຣະບຽບ ຈຶ່ງຈຳເປັນຕ້ອງບືນຮຽນຈົນ ໃນທີ່ສຸດກໍໄດ້ທຶນຂອງ ວິທຍາລັຍບໍ່ແມ່ນທຶນມອບຜ່ານໃຫ້ຣັຖບານລາວ ແລ້ວສົ່ງມາຮຽນເຊິ່ງເອີ້ນວ່າ ທຶນໃນແຜນ. ນີ້ແມ່ນທຶນທີ່ຕ້ອງມາສ່ຽງໂຊກ ເສັງເອົາ ແຕ່ທຶນນີ້ກໍຍັງມີຄ່າໃຊ້ຈ່າຍບາງສ່ວນທີ່ຕ້ອງກຸ້ມຕົນເອງ. ແຕ່ເມື່ອທຽບກັບເມື່ອກ່ອນ ຄ່າໃຊ້ຈ່າຍ ຫລຸດລົງຫລາຍ.

ຕໍ່ກັບກໍຣະນີບໍຣິສັດ ແລະ ກຸ່ມຄົນທີ່ຮັບແລ່ນທຶນຮຽນຈີນ ໂດຍເອົາທຶນຂອງຣັຖບານມາອ້າງນັ້ນນັກສຶກສາ ທີ່ເຄີຍຜ່ານເຣື່ອງນີ້ ໄດ້ແຈ້ງເຕືອນວ່າ ຄວາມຈິງທຶນຮຽນຈີນ ປຣິນຍາຕຣີ ແມ່ນຕ້ອງສະມັກ ຜ່ານກະຊວງສຶກສາທິການ ແລະກິລາ ໂດຍກົງ. ສ່ວນທຶນໃນສົກຮຽນປີ 2020-2021 ຣັຖບານຈີນ ຍັງບໍ່ໄດ້ອອກແຈ້ງການເທື່ອ.

ຖ້າມີທຶນເພິ່ນກໍຈະສົ່ງມາຍັງກະຊວງເພາະ ນີ້ແມ່ນທຶນໃນແຜນ. ແຕ່ລະປີມີການສອບເສັງຍາດແຍ່ງກັນສູງ ແຕ່ສ່ວນຫຼາຍທຶນ ດັ່ງກ່າວ ຈະເປັນໂອກາດຂອງຣັຖກອນ ຫຼາຍກວ່າ ນັກຮຽນທົ່ວໄປ.

ແຕ່ລະປີ ທຶນໃນແຜນມີບໍ່ຮອດ 10% ດັ່ງໃນສົກປີ 2019-20 ໃນແຂວງອານຮຸຍມີພຽງ 71 ຄົນ. ເຊິ່ງຜູ້ມາຮຽນທຶນໃນແຜນແມ່ນ ຮຽນຕາມທຶນທີ່ຣັຖບານຈີນ ສົ່ງມາໃຫ້. ໃນຂນະທີ່ ທຶນການສຶກສາຂອງຈີນ ມີຫລາຍປະເພດ ເຊິ່ງເປີດຮັບສມັກຕລອດປີ, ເຊິ່ງ ສມັກຫລາຍທີ່ ສຸດແມ່ນເດືອນຕຸລາ ຫາ ເດືອນກໍຣະກະດາ.

ໃນການແຈ້ງເຕືອນ ໄດ້ຣະບຸຕື່ມວ່າ ທຶນຣັຖບານຈີນ ສົ່ງໃຫ້ລາວ ແມ່ນໄລຍະສັ້ນສະເພາະ ບາງແຂວງ ແລະບາງໂຮງຮຽນທີ່ມີ ສາຍພົວພັນກັບລາວ. ທຶນການສຶກສາຂອງປະເທດຈີນ ໃຫ້ນັກສຶກສາທົ່ວໂລກ ບໍ່ຕໍ່າກວ່າ 4 ແສນ ທຶນ ທີ່ແຈກຢາຍຢູ່ ມະຫາວິທຍາລັຍ 270 ແຫ່ງ ທົ່ວປະເທດຈີນ.

ກ່ຽວກັບເຣື່ອງທຶນຮຽນຈີນ ກະຊວງສຶກສາທິການ ແລະກິລາ ກໍໄດ້ອອກແຈ້ງການ ສະບັບເລກທີ 219 ວັນທີ 19 ມົກຣາ 2021 ໂດຍເນື້ອໃນສຳຄັນຣະບຸວ່າ. ບໍຣິສັດ ເອກກະຊົນ, ບຸກຄົນ ແລະ ນິຕິບຸກຄົນໂຄສະນາ ຜ່ານສື່ສັງຄົມອອນລາຍ ເຮັດໃຫ້ປະຊາຊົນ ເກີດຄວາມເຂົ້າໃຈຜິດ ກ່ຽວກັບການເອົານັກສຶກສາລາວ ໄປຮຽນຕໍ່ຈີນ ແລະ ວຽດນາມ. ໂດຍແອບອ້າງວ່າ ເປັນທຶນຂອງຣັຖບານຈີນ ຫລື CSC ແລະ ວຽດນາມ. ຖ້າພົບເຫັນການໂຄສະນາ ດັ່ງກ່າວໃຫ້ແຈ້ງມາຍັງ ກົມກິຈກັມນັກສຶກສາ ຂອງ ກະຊວງສຶກສາທິການ ແລະ ກິລາ.

ຕາມສະຖິຕິ ຂອງທາງການນັກສຶກສາລາວ ທີ່ຮຽນຈົບມໍປາຍ ແລ້ວເລືອກໄປຮຽນຕໍ່ ທີ່ປະເທດຈີນ ນັບແຕ່ປີ 2016 ເປັນຕົ້ນມາ ເພີ່ມຂື້ນເລື້ອຍໆ ຈາກ 4,000 ຄົນ.ໃນປີ 2019 ສະຖານທູດຈີນ ປະຈຳລາວ ຣາຍງານວ່າໃນປີ 2019 ມີນັກຮຽນລາວໄປຮຽນຈີນ ເຖິງ 14,000 ຄົນ ເປັນອັນດັບສອງ ໃນອາຊຽນ.

ສ່ວນໃນປີ 2020 ຫາ ປີ 2021 ຍັງເກັບກຳໂຕເລກບໍ່ໄດ້ຣະອຽດ ເນື່ອງຈາກສະພາບການ ຣະບາດຂອງພຍາດໂຄວິດ-19, ຫຼາຍ ໂຮງຮຽນ ຍັງບໍ່ໄດ້ກັບເຂົ້າສູ່ສະພາບປົກກະຕິ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ