ຄົນງານລາວກັບບ້ານຖືກຈັບ ລຶກລັບ

ອະວາຣີ
2016-05-12
ອີແມວລ໌
ຄໍາເຫັນ
Share
ພິມ
(ຊ້າຍຫາຂວາ)ທ້າວສົມພອນ ພິມມະສອນ, ນາງຫລອດ ທັມມະວົງ ຖືກຈັບໃນວັນທີ 5 ມິນາ ຢູ່ບ້ານນາວາງໃຕ້ ເມືອງໜອງບົກ ແຂວງຄຳມ່ວນ, ທ້າວ ສຸການ ໃຈທັດ ຫາຍສາບສູນ ໃນວັນທີ 22 ມີນາ ໃນຂນະທີ່ ມາຕໍ່ໜັງສື ເດີນທາງ ຢູ່ຫ້ອງການ ປກສ ແຂວງ ສວັນນະເຂດ
(ຊ້າຍຫາຂວາ)ທ້າວສົມພອນ ພິມມະສອນ, ນາງຫລອດ ທັມມະວົງ ຖືກຈັບໃນວັນທີ 5 ມິນາ ຢູ່ບ້ານນາວາງໃຕ້ ເມືອງໜອງບົກ ແຂວງຄຳມ່ວນ, ທ້າວ ສຸການ ໃຈທັດ ຫາຍສາບສູນ ໃນວັນທີ 22 ມີນາ ໃນຂນະທີ່ ມາຕໍ່ໜັງສື ເດີນທາງ ຢູ່ຫ້ອງການ ປກສ ແຂວງ ສວັນນະເຂດ
Citizen Journalist

ຄົນງານລາວ ທີ່ ໄປເຮັດວຽກ ຢູ່ໄທ 2 ຄົນ ຖືກຈັບ ຢູ່ແຂວງ ຄຳມ່ວນ ແລະ ອີກຄົນນຶ່ງ ຫາຍສາບສູນ ທີ່ແຂວງ ສວັນນະເຂດ ພາຍຫລັງ ທີ່ ພວກຂະເຈົ້າ ກັບໄປລາວ ເພື່ອ ລົງທະບຽນ ເລືອກຕັ້ງ ສະມາຊິກ ສະພາ ແຫ່ງຊາດ ແລະ ສະພາ ປະຊາຊົນ ຂັ້ນແຂວງ, ອີງຕາມ ຣາຍງານ ຈາກ ແຫລ່ງຂ່າວ ທີ່ ເຊື່ອຖືໄດ້ ໃນວັນທີ 10 ພຶສພາ ນີ້.

ທ້າວ ສົມພອນ ພິມມະສອນ ຫລື ເພັດອາຄົມ, ອາຍຸ 29 ປີ, ປົກກະຕິ ຢູ່ບ້ານ ດົງກະລຶມ ເມືອງປາກງື່ມ ນະຄອນຫຼວງ ວຽງຈັນ ແລະ ນາງ ຫລອດ ທັມ​ມະ​ວົງ, ອາຍຸ 30 ປີ, ຢູ່ບ້ານ ນາວາງໃຕ້ ເມືອງ ໜອງບົກ ແຂວງຄຳມ່ວນ, ຖືກຈັບ ເມື່ອວັນທີ 5 ເດືອນ ມິນາ ປີ 2016 ນີ້ ທີ່ບ້ານ ຂອງນາງຫລອດ. ຕໍ່ມາ ທັງສອງ ຖືກສົ່ງໄປ ນະຄອນຫຼວງ ວຽງຈັນ ແຕ່ບໍ່ຮູ້ວ່າ ປັດຈຸບັນ ຖືກກັກຂັງ ຢູ່ໃສ, ອີງຕາມ ການເປີດເຜີຍ ຂອງ ໝູ່ເພື່ອນ ທີ່ ເຄີຍເຮັດວຽກ ນຳກັນ ຢູ່ໄທ.

ກ່ຽວກັບ ເຣື່ອງນີ້ ພັນໂທ ຄຳໄມ ຈັບທະວົງໄຊ ຮອງຫົວໜ້າ ກອງ ບັນຊາການ ປກສ ແຂວງຄຳມ່ວນ ກ່າວຕໍ່ ວິທຍຸ ເອເຊັຽເສຣີ ວ່າ ທ່ານ ບໍ່ທັນຮູ້ ເຣື່ອງນີ້ເທື່ອ, ທ່ານວ່າ ຈະຖາມເບິ່ງ ຣາຍລະອຽດ ໃຫ້.

ນອກຈາກນັ້ນ, ກັມມະກອນ ລາວ ອີກຄົນນຶ່ງ ກໍ ຫາຍສາບສູນ. ຄົນລາວ ຜູ້ນີ້ ມີຊື່ວ່າ ທ້າວ ສຸການ ໃຈທັດ, ອາຍຸ 32 ປີ, ເດີມຢູ່ ບ້ານຄຳແຮ້ງ, ເມືອງ ໄຊພູທອງ, ແຂວງ ສວັນນະເຂດ, ອາຊີບ ເຮັດວຽກ ເປັນຄົນຍາມ ຢູ່ ປະເທດໄທ, ໄດ້ເດີນທາງ ກັບໄປລາວ ເມື່ອວັນທີ 18 ເດືອນ ກຸມພາ ປີ 2016, ແລ້ວ ຫາຍສາບສູນ ໄປ ເມື່ອວັນທີ 22 ເດືອນ ມິນາ ໃນເວລາ ໄປຫ້ອງການ ປກສ ແຂວງ ສວັນນະເຂດ ເພື່ອຍື່ນ ເອກສານ ເຮັດໜັງສື ເດີນທາງ. ແຟນ ຂອງທ້າວ ສຸການ ທີ່ເຮັດວຽກ ຢູ່ໄທເຊັ່ນກັນ ເວົ້າກັບ ວິທຍຸ ເອເຊັຽເສຣີ ເມື່ອວັນທີ 10 ເດືອນ ພຶສພາ ນີ້ວ່າ:

“ປານນີ້ ກໍຍັງບໍ່ທັນ ໄດ້ຂ່າວ ນັ້ນລະ, ເຂົ້າໄປລາວ ຕັ້ງແຕ່ ວັນທີ 18 [ກຸມພາ] ພຸ້ນນ່າ ແຕ່ວ່າ ເພິ່ນຫາຍໂຕ ໃນວັນທີ 22 [ເດືອນມີນາ]. ເພິ່ນໄປເຮັດ ພັສປອດ ຢູ່ ປກສ ແຂວງ ນ໋ະ. ເພິ່ນ ກະຫາຍໄປ ປະມານ 3 ໂມງ ເຄິ່ງນັ້ນລະ, ເພິ່ນ ຫາຍໄປນະ, ເພິ່ນ ກະບໍ່ຕິດຕໍ່ ມາເລີຍ ເທົ່າສູ່ມື້ນີ້. ຕອນນີ້ ພໍ່ແມ່ ເພິ່ນກະໄປ ຊອກຫາຢູ່ ແຕ່ວ່າກະ ຕຳຣວດ ເຂົາກໍບໍ່ ເປີດເຜີຍ ເຂົາກະວ່າ ບໍ່ເຫັນ.”

ໃນຂນະດຽວກັນ ນັກຂ່າວ ວິທຍຸ ເອເຊັຽເສຣີ ຂອງພວກເຮົາ ກໍຕິດຕໍ່ຫາ ເຈົ້າໜ້າທີ່ ຕຳຣວດ ແຂວງ ສວັນນະເຂດ ທີ່ເວົ້າວ່າ:

“ຍັງໆ ບໍ່ທັນມີໃຜ ແຈ້ງຄວາມ ມາວ່າ ຫາຍສາບສູນ ນ໋ະ, ທາງ ຄອບຄົວລາວ ກະບໍ່ທັນໄດ້ ແຈ້ງມາ ວ່າ ເອີ ລູກຂ້ອຍ ບໍ່ເຫັນ ແນວນັ້ນ ແນວນີ້ ຫັ້ນນ່າ ບໍ່ທັນມີ.”

ໃນຕອນເຊົ້າ ຂອງວັນທີ 22 ມີນາ ປີນີ້, ທ້າວສຸການ ພ້ອມດ້ວຍ ພີ່ນ້ອງຄົນນຶ່ງ ໄປລຽນແຖວ ຂໍຍື່ນ ເອກສານ ເຮັດໜັງສື ເດີນທາງຢູ່ ແຂວງ ສວັນນະເຂດ, ຕອນນຶ່ງ ຜູ້ເປັນ ພີ່ນ້ອງ ອອກໄປຊື້ເຄື່ອງ ຢູ່ຂ້າງນອກ ປ່ອຍ ທ້າວສຸການ ລໍຖ້າ ຢູ່ຜູ້ດຽວ, ແຕ່ກັບມາ ປະມານ ເຄິ່ງຊົ່ງໂມງ ຕໍ່ມາ ກໍບໍ່ເຫັນ ທ້າວສຸການ ແລະ ຫາຍສາບສູນ ໄປເລີຍ.

ຄໍາເຫັນ (7)
Share

ຢາກຈັບຄອມມິວນິສ໌

ຈາກ ເມືອງນອກ

ເຖິງ ຄົນຄອມມູນິດ ຈາກ ສປປລ, ບໍ່ຮູ້ວ່າ ຄົນຕາບອດມາແຕ່ໃສ ທີ່ໃຫ້ປະເທດຄອມມິວນິສ໌ ສປປລ ເປັນອັນດັບສາມຂອງອາຊຽນ.​ ຄົງຈະບໍ່ແມ່ນອັນດັບສາມ ໃນແນວທີ່ດີແນ່ນອນ...


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 22, 2016 04:52 PM

ຄົນຄອມມູນິດ

ຈາກ ສປປລ

ສັງເກດວ່າມີແຕ່ຄົນເກົ່າ ທີ່ມີຄຳເຫັນກັບ RFA ພວກເພີ່ນ ຄົງຈະບໍ່ມິຄວາມສຸກຫຼາຍ ທີ່ ປະເທດລາວປະຈຸບັນ ກຳລັງພັດທະນາ ເປັນອັນດັບສາມຂອງອາຊຽນ ອັນນີ້ຈຶ່ງແມ່ນແ່ລງຂ່າວ ທີ່ເຊື່ອຖືໄດ້ ບໍ່ມີອັກຂະຕິ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 20, 2016 08:51 AM

ຢາກຈັບຄອມມິວນິສ໌

ຈາກ ເມືອງນອກ

ຕາມທັດສະນະສ່ວນຕົວ ຖ້າກຸ່ມພັກລັດຍັງເຮັດເສີຍຢູ່ຄື ຫມາປະຫຳ... ກໍສົມຄວນ ທີ່ຄົນລາວທຸກຄົນທີ່ຮັກຄວາມເປັນທຳ ມາຮ່ວມໃຈກັນອອກຈັບ ພວກເສນາຫມາກຂີ້ກາຄອມມິວນິສ໌ ຫລືຍາດຕິພີ່ນ້ອງຂອງພວກຄອມມິວນິສ໌ ທິ່ອອກມາລົ້ວຢູ່ນອກປະເທດພີ້.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 19, 2016 02:48 PM

ຄ.ນະຄຳມ່ວນ

ຈາກ ທ່າແຂກ

ບໍ່ຮູ້,ບໍ່ເຫັນ,ບໍ່ຈັກ ເປັນທິດສະດີ ຂອງພັກ-ຣັຖ ສປປລາວ ຈຳໃສ່ ສະຫມອງຫົວບໍ່ໄດ້ຂາດ, ສະນັ້ນ ຈົ່ງຢ່າໄດ້ປະມາດກັບພວກນີ້ ຖ້າຕ້ອງການຢາກມີຊີວິຕ ສືບຕໍ່ເປັນວັນໆໄປ ການຫາຍຕົວຢ່າງກະທັນ ແບບນີ້ນັ້ນກໍ່ຄືວ່າ: ໄປສະພະທຸກຂ໌ ຫລືວ່າຫມົດແລ້ວຄວາມຫວັງ ໃນຊາຕປັຈຈຸບັນນີ້, ເອື້ອຍ, ອ້າຍ, ນ້ອງ ລາວເຮົາເອີຍ!!!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 16, 2016 05:32 PM

Boon Mahalath

ຈາກ Canada

ສະແດງວ່າເຈົ້າໜ້ີາທີ່ ຫຼືທາງການລາວ ເອງຊຸມຫົວກັນປິດເລື້ອງ ໄວ້ ?ແບບເຄີຍເຮັດມາ ?ຈະເວົ້າໄດ້ແນວໃດວ່າ ເປັນປະເທດມີຄວາມສະງົບ ແລະຍຸຕິທັມ? ທັງມີຄວາມສາມາດ ປົກປັກຮັກສາຄວາມທຸກສຸຂ ຂອງປະຊາຊົນໄດ້? ເຊົ້າຕົວະແລະທຳລາຍ ປະຊາຊົນຄົນລາວສາ? ເພາະ
ສ/ຫ ກໍແມ່ນຄົນລາວ ? ບໍ່ແມ່ນແກວຫຼືເຈັກ ?


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

May 15, 2016 02:50 PM

ເບິ່ງຄວາມເຫັນທັງໝົດ.

ເຕັມຫນ້າ