ນັກວິຊາການຕັ້ງຄໍາຖາມ ມາຕຖານ ຂອງເຂື່ອນ

ອຸ່ນແກ້ວ ສຸກສະຫວັນ
2018-07-31
ອີແມວລ໌
ຄໍາເຫັນ
Share
ພິມ
ບ້ານເຮືອນ ວັດວາອາຮາມ ທີ່ຖືກນໍ້າຖ້ວມເສັຽຫາຍ ໃນສະພາບທີ່ ສ້ອມແປງຄືນບໍ່ໄດ້
ບ້ານເຮືອນ ວັດວາອາຮາມ ທີ່ຖືກນໍ້າຖ້ວມເສັຽຫາຍ ໃນສະພາບທີ່ ສ້ອມແປງຄືນບໍ່ໄດ້
Screen captured : Attapeu today

ເຫດການເຂື່ອນເຊປຽນແຕກ ໃນວັນທີ 23 ກໍຣະກະດາ, ເປັນອີກເຫດການນຶ່ງ ທີ່ຄົນລາວທຸກຄົນ ຈະຕ້ອງຈົດຈຳໄປຕລອດຊີວິດ.

ບັນດາທ່ານ ເບິ່ງພາບຄວາມເສັຍຫາຍ ຄົງຈະບໍ່ຈຳເປັນຕ້ອງອະທິບາຍ ແລະປ່ອຍໃຫ້ພາບຈາກຜູ້ໃຊ້ສື່ສັງຄົມອອນລາຍ ໄດ້ອະທິບາຍຄວາມ ໝາຍໃນຕົວຂອງມັນເອງ, ພາບຂອງຄວາມເຈັບປວດທາງຈິດໃຈ ປະຊາຊົນ ຜູ້ທີ່ສູນເສັຍສະມາຊິກຄອບຄົວ ທີ່ເປັນຫົວຈັກຫລັກແຫຼ່ງຂອງ ຄອບຄົວໄປ ໂດຍບໍ່ມີວັນຫວນກັບຄືນມາ.

ຜູ້ລອດຊີວິດຄົນນຶ່ງທີ່ເສັຍສາມີ ທີ່ຮູ້ດີວ່າຜົວຂອງລາວ ໄດ້ເສັຍຊີວິດແລ້ວ ພຽງແຕ່ວ່າ ຢາກໄດ້ສົບມາທຳພິທີ ສົ່ງສະການເທົ່ານັ້ນ. ນາງກ່າວ ຕອນນຶ່ງວ່າ:

"ຄົ້ນຫານີ້ແຫລະ ຄືຊິເຫັນນີ້ແຫລ ເພິ່ນກະວ່າຄົ້ນຫາສຸດ ແຕ່ວ່າສາມາດເຮັດໄດ້ວ່າຊັ້ນຊາ ມີແຕ່ ໃນຄອບຕົວຂອງເອື້ອຍມີແຕ່ 4 ຄົນ ແຕ່ວ່າ ເສັຍຊີວິດມີຜູ້ນຶ່ງ ຜົວ ລູກສອງຄົນ ລອດຊີວິດ ຜູ້ນຶ່ງໄປນ້ຳເອື້ອຍນີ້ ອາຍຸ 11 ປີ ແມ່ຍິງ ໄປນຳແມ່ລອດຊີວິດ ຜູ້ໄປນຳພໍ່ອາຍຸ 6 ປີ ລອດມີແຕ່ພໍ່ບໍ່ເຫັນ ບໍ່ມີແຫລະ ອັນຊິວ່າ ຫວັງວ່າ ຍັງນີ້ບໍ່ຫວັງລະ ມີແຕ່ວ່າຕາຍ ມີແຕ່ວ່າຕາຍນີ້ ກະຢາກເຫັນສົບເຫັນຊາກ ວ່າຊັ້ນຊາ ພໍວ່າໄດ້ມ້ຽນໄດ້ມັດຕິວ່າ ພໍໄດ້ມີກຳລັງໃຈ." 

ກໍຣະນີ ເຂື່ອນເຊແຕກໃນຄັ້ງນີ້ ກໍໃຫ້ເກີດຄຳຖາມ ທີ່ຫລາກຫລາຍຕາມມາ ເຖິງສາເຫດບໍ່ວ່າຈະເປັນມາດຕະຖານ ການສ້າງເຂື່ອນ ແລະ ລະບົບການແຈ້ງເຕືອນ ປະຊາຊົນ ໃຫ້ມີການອົພຍົບ ນັ້ນພົບວ່າຍັງມີຄວາມຊັກຊ້າ.

ສາເຫດອັນທີ່ນຶ່ງ ຄືລະບົບການແຈ້ງເຕືອນ ທີ່ບໍຣິສັດເຮັດແຈ້ງເຕືອນ ອອກມາເຖິງໜ່ວຍງານຍົກຍ້າຍ ຈັດສັນປະຊາຊົນ ໄດ້ອອກແຈ້ງເຕືອນ ໃນມື້ວັນທີ 23 ກໍຣະກະດາ ກົງກັບວັນຈັນ ຊຶ່ງເປັນມື້ ເຂື່ອນແຕກ ນັ້ນເອງ.

ໃນຂະນະທີ່ ສຳນັກຂ່າວ AFP ຂອງຕ່າງປະເທດ ໄດ້ລາຍງານວ່າ ໃນວັນທີ 24 ກໍຣະກະດາ ໂດຍ ອີງຕາມເອກກະສານ ທີ່ບໍຣິສັດ ຂອງເກົາຫລີໃຕ້ ຊື່ວ່າ Korean Western Power ຊຶ່ງເປັນນຶ່ງ ໃນບໍຣິສັດທີ່ຮັບຜິດຊອບ ການກໍ່ສ້າງເຂື່ອນເຊປຽນ ໄດ້ຣາຍງານຕໍ່ ຣັຖສະພາ ເກົາຫລີໃຕ້.

ຢູ່ໃນເອກກະສານໄດ້ຣາຍງານວ່າ ເຈົ້າໜ້າທີ່ຢູ່ພາກສະໜາມ ທີີ່ຮັບຜິດຊອບ ການກໍ່ສ້າງເຂື່ອນ ພົບວ່າມີຮອຍ ແຕກ-ແຫງ ສັນເຂື່ອນຍ່ອຍ ຫລື Saddle Dam D ນັບແຕ່ວັນທີ່ 20 ກໍຣະກະດາ ຊຶ່ງກົງກັບວັນສຸກ ອີງຕາມ ສຳນັກຂ່າວ AFP.

ແຕ່ການແຈ້ງເຕືອນປະຊາຊົນໄປຫາໜ່ວຍງານ ຈັດສັນແລະຍົກຍ້າຍ ປະຊາຊົນ ຢູ່ແຂວງຈຳປາສັກ ແລະ ແຂວງອັດຕະປື ມີຂຶ້ນໃນວັນທີ 23 ກໍຣະກະດາ ເພື່ອໃຫ້ມີການຍົກຍ້າຍ ປະຊາຊົນຂຶ້ນໄປຢູ່ບ່ອນສູງ ຫລື ບ່ອນທີ່ປອດພັຍ ໃນຂນະທີ່ ເຈົ້າໜ້າທີ່ ຮູ້ກ່ອນລ່ວງໜ້າແລ້ວ 3 ມື້ ກ່ອນທີ່ເຂື່ອນ ຈະແຕກ.

ເຖິງຢ່າງໃດກໍຕາມ, ບໍຣິສັດດັ່ງກ່າວ ກໍຍັງບໍ່ທັນອອກມາຊີ້ແຈງ ວ່າເປັນຫຍັງການແຈ້ງເຕືອນ ຈຶ່ງມີຄວາມຊັກຊ້າ.

ເລື້ອງນີ້ກໍກົງກັບຄຳເວົ້າ ຂອງເຈົ້າໜ້າທີ່ການນຳຂອງແຂວງອັດຕະປື ວ່າການແຈ້ງເຕືອນ ດ່ວນໃຫ້ປະຊາຊົນຍົກຍ້າຍ ອອກໄປຢູ່ພື້ນທີ່ ປອດພັຍ ໃຊ້ເວລາບໍ່ພຽງເທົ່າໃດ ຊົ່ວໂມງ ເທົ່ານັ້ນ. ທ່ານ ເລັດ ໄຊຍະພອນ ເຈົ້າແຂວງອັດຕະປື ກ່າວຕໍ່ ສື່ມວນຊົນ ໃນວັນທີ 27 ກໍຣະກະດາ ຕອນນຶ່ງວ່າ:

"ແຕ່ວ່າ ມັນຍ້ອນວ່າ ເວລາທີ່ແຈ້ງຫັ້ນມັນໃຊ້ເວລາສັ້ນ ເພາະວ່າເວລາ 2 ໂມງແລງ ໝູ່ເຮົາແຈ້ງລະຮອດເວລາ 5 ໂມງແລງ ລະແມ່ນຄັນຄູ ເຂື່ອນກະໄດ້ທະລຸ ຈັ່ງຊັ້ນໝູ່ເຮົາກະໃຊ້ເວລາແຕ່ 2-3 ຊົ່ວໂມງ ຈຶ່ງເຮັດໃຫ້ການໂຍກຍ້າຍ ພໍ່ແມ່ປະຊາຊົນ ຈາກຈຸດ ອັນຕະລາຍ ໄປຫາ ຈຸດປອດພັຍ ບໍ່ທ່ວງທັນ.”

ທ່່ານກ່າວຕື່ມວ່າ ເວລາ 10 ໂມງເຊົ້າ ຜູ້ຮັບຜິດຊອບກໍ່ສ້າງເຂື່ອນ ເຊປຽນ-ເຊນໍ້ານ້ອຍ ກໍໄດ້ແຈ້ງໃຫ້ແຂວງຮູ້ວ່າ ຄູກັນນໍ້າ ຫລືສັນເຂື່ອນ ມີການແຕກແຫງ ແລະໃຫ້ທາງແຂວງແຈ້ງເຕືອນ ປະຊາຊົນ ເພື່ອໃຫ້ກະກຽມ ຢ້ານມີຄວາມອັນຕະຣາຍ. ຫຼັງຈາກນັ້ນ ເຈົ້າໜ້າທີ່ ກໍໄດ້ ແຈ້ງການ ໃຫ້ປະຊາຊົນ 11 ບ້ານນັັ້ນ ໃຫ້ມີການ ໂຍກຍ້າຍດ່ວນ. ມາຮອດເວລາ 20 ໂມງກາງຄືນ ປະຣິມານນ້ຳ ອັນມະຫາສານ ກໍໄຫລເຂົ້າຖ້ວມບ້ານເຮືອນ ຂອງປະຊາຊົນ ໃນ 6 ໝູ່ບ້ານ.

ນອກຈາກນີ້ ເລື້ອງມາດຕະຖານ ການກໍ່ສ້າງເຂື່ອນ ກໍຍັງຖືກຕັ້ງຄຳຖາມ ກັນຢ່າງແຜ່ຫລາຍ ໂດຍນັກວິຊາການຕ່າງປະເທດ.

ໃນວັນທີ 30 ກໍຣະກະດາ, ເວັບໄຊໂທລະໂຄ່ງ ໄດ້ເຜີຍແຜ່ເອກກະສານ ຂອງນັກວິສວະກອນໄທ ກ່ຽວກັບສາເຫດ ຂອງເຂື່ອນເຊປຽນ ແຕກໃນຄັ້ງນີ້.

ອີງຕາມຮູບພາບຂອງສັນເຂື່ອນທີ່ແຕກ, ນັກວິສວະກອນ ດ້ານການກໍ່ສ້າງເຂື່ອນ ຂອງໄທ ໄດ້ຕັ້ງຂໍ້ສັງເກດວ່າ ສັນເຂື່ອນທີ່ແຕກນັ້ນ ເປັນລັກສນະຄູກັ້ນທັມມະດາ ໂດຍບໍ່ມີແກນຂອງເຂື່ອນ ທີ່ສ້າງຂຶ້ນດ້ວຍດິນໜຽວອັດແໜ້ນ ແບບພິເສດເພື່ອບໍ່ໃຫ້ນ້ຳຊຶມ. ແຕ່ລັກສນະ ແຕກ ຂອງສັນເຂື່ອນນັ້ນ ເປັນແບບຊຸດຕົວລົງ ສະແດງໃຫ້ເຫັນເຖິງຖານ ທາງພື້ນຂອງສັນເຂື່ອນທີ່ແຕກ ບໍ່ແຂງແຮງ ນັ້ນອາດຈະເປັນອີກສາເຫດ ນຶ່ງທີ່ເຮັດໃຫ້ເຂື່ອນແຕກ.

ນອກຈາກນີ້ ນັກວິສວະກອນໄທ ຍັງສະແດງຄວາມເປັນຫ່ວງ ອີກວ່າ ກໍຣະນີສັນເຂື່ອນແຕກໃນຄັ້ງນີ້, ແລ້ວຈະເອົາຫຍັງມາຮັບປະກັນ ວ່າ ສັນເຂື່ອນຍ່ອຍອື່ນໆ ຂອງໂຄງການ ເຂື່ອນເຊປຽນ ຈະບໍ່ແຕກໃນອີກຕໍ່ໜ້າ. ອັນນັ້ນ ຂໍ້ສັງເກດຂອງ ນັກຊາການໄທ ທີ່ຈະຕ້ອງຫາຄຳຕອບ ອີກຕໍ່ໄປ.

ແຕ່ໃນເວລາດຽວກັນ ເຈົ້າໜ້າຂັ້ນສູງ ຂອງກະຊວງພລັງງານ ແລະບໍ່ແຮ່, ທ່ານ ຄຳມະນີ ອິນທິລາດ ໄດ້ກ່າວຕໍ່ເອເຊັຍເສຣີ ໃນວັນ 28 ກໍຣະກະດາ ວ່າ ມີສອງເຫດຜົນ ທີ່ເຮັດໃຫ້ເຂື່ອນແຕກ: ເຫດຜົນອັນທີນຶ່ງເປັນຍ້ອນຝົນຕົກໜັກ ແລະກ່ຽວຂ້ອງກັບ ເຕັກນິກການກໍ່ສ້າງ ເຂື່ອນ.

ບົດສລຸບຂອງການກວດສອບ ສາເຫດຂອງເຂື່ອນແຕກ ໃນຕັ້ງນີ້ ຈະອອກມາແນວໃດ ແລະ ຈະມີການເປີດເຜີຍຕໍ່ ສາທາຣະນະຊົນ ຫລືບໍ່ນັ້ນ ກໍບໍ່ມີໃຜຮູ້ສາມາດ ໃຫ້ຄຳຕອບໄດ້.

ແຕ່ສິ່ງສຳຄັນກໍຄື ຊາວບ້ານຜູ້ທີ່ໄດ້ຮັບຜົນກະທົບ ສູນເສັຍສະມາຊິກຄອບຄົວ, ສູນເສັຍຊັບສົມບັດ, ສູນເສັຍເຮືອນຊານບ້ານຊ່ອງ ຊຶ່ງ ເປັນຜູ້ທີ່ໄດ້ຮັບຜົນກະທົບ ໂດຍກົງຈາກເຫດການ ເຂື່ອນແຕກ ໃນຄັ້ງນີ້, ເຂົາເຈົ້າເຫລົ່ານັ້ນ ຄວນທີ່ຈະໄດ້ຮັບຮູ້ ເຖິງຄວາມຈິງຂອງ ສາເຫດເຂື່ອນແຕກ ຄັ້ງນີ້...

ຄໍາເຫັນ (2)
Share

(

ທຸກສິ່ງຢ່າງທີ່ມັນເກີດຂື້ນ ແລະເຮັດໄຫ້ປະຊາຊົນລາວທີ່ໄດ້ຮັບຜົນກະທົບເຖິງຊັບສິນ ແລະຊີວິດຂອງປະຊາຊົນລາວ ນັບຕັ້ງແຕ່ພວກທ່ານກໍາອໍານາດມານັ້ນ ໃຫ້ລົງມາຊົດໄຊ້ໃຫ້ໝົດທຸກຢ່າງ ແລະເຊີນສະເດັດລົງມາເປີດເຜີຍຂໍ້ເທັດຈິງ ໄຫ້ປະຊາຊົນຮັບຮູ້ ຢ່າງຈະແຈ້ງໂດຍໄວ ເພາະວ່າພວກປະຊາຊົນຄົນລາວ ຜູ້ທີ່ບໍ່ມີອໍານາດແລະບໍ່ຢູ່ໃນຖັນແຖວຂອງພວກເຈົ້າ ໂດຍລວມຄືຜູ້ທຸກຍາກທົ່ວປະເທດ ທີ່ຫາມື້ເຊົ້າເອົາໄວ້ກິນມື້ແລງ ແລະບໍ່ມີວຽກເຮັດງານທໍາຄືພວກເຈົ້ານັ້ນມັນເຫຼືອຈະອົດກັ້ນ ບໍ່ໄດ້ອີກຕໍ່ໄປບໍໄດ້ ອີກແລ້ວ ທ່ານທຸກມື້ນີ້ມັນເຫັນໄດ້ຈະແຈ້ງແລ້ວ ແລະຈະມາຕົວະພວກເຮົາບໍ່ໄດ້ອີກແລ້ວ ທ່ານສິ່ງທີ່ມັນຈະແຈ້ງແທ້ກໍຄືພວກທ່ານ ເຮັດວຽກຢູ່ກະຊວງນັ້ນກະຊວງນີ້ ແລ້ວຊັບສົມບັນຄືມາ ຫຼາຍແທ້


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 28, 2018 08:33 AM

John

ຈາກ ນະຄອນຫລວງວຽງຈັນ

ສະບາຍດີ RFA Lao
ມັນແມ່ນແທ້ບໍ່ ຂໍ້ມູນລຸ່ມນີ້
ນາຍຄຳມະນີ ອິນທິລາດ ລັດຖະມົນຕີ ພະລັງງານບໍ່ແຮ່ ຖືກສັ່ງປົດອອກຈາກໜ້າທີ່ ໃນວັນນີ້ 27/7/2018 ພອ້ມໃຫ້ມີການສືບສວນ ໃຫ້ຮັບຜິດຊອບຕໍ່ເຫດການເຂື່ອນແຕກ ແຕ່ຜູ້ກ່ຽວບໍ່ຍອມ ໃຫ້ກວດສອບຊັບສິນ ສ່ວນຕົວແລະຄອບຄົວ, ອ້າງເປັນຂອງສ່ວນຕົວ,ໃນເມື່ອມີຄວາມຜິດຕ້ອງມີການກວດສອບ ລົງໂທດວິໄນ ຕາມທີ່ປະຊາຊົນຮຽກຮ້ອງ, ຖ້າພັກລັດປ່ຽນໃຫ້ຜູ້ກ່ຽວລອຍນວນ ຄື:ພວກໂຈນປົ້ນຊາດຫລາຍຄົນ ຜ່ານມາ ທີ່ພັກລັດບໍ່ລົງໂທດ #ປະຊາຊົນ ຈະເປັນຜູ້ລົງໂທດພັກລັດຂາຍຊາດ ຂ້າປະຊາຊົນລາວ #ຄັ້ງນີ້ເປັນຄັ້ງທີ່3 ທີ່ມີເຫດການເຂື່ອນແຕກ ໃນລະຍະ3ປີ ທີ່ຜ່ານມາ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 06, 2018 04:43 AM

ເຕັມຫນ້າ