ລາວ-ຈີນ ຂະຫຍາຍການຮ່ວມມື ວຽກງານດ່ານສາກົນ ບໍ່ເຕັນ-ບໍ່ຫານ

ລາວ ແລະຈີນ ຈະຮ່ວມມືກັນ ຂະຫຍາຍການຮ່ວມມື, ປັບປຸງໂຄງຮ່າງພື້ນຖານ ແລະຄວາມປອດໄພ ຢູ່ບໍລິເວນດ່ານສາກົນບໍ່ເຕັນ-ບໍ່ຫານ ແລະ ຮ່ວມມືກັນໃນດ້ານອຸດສາຫະກໍາການຜະລິດ ຂອງທັງສອງຝ່າຍ ຮວມທັງຈະຊຸກຍູ້ວຽກງານ ຂອງໂຄງການຕ່າງໆ ເພື່ອໃຫ້ເກີດປະໂຫຍດ ຢູ່ຊາຍແດນຂອງສອງປະເທດ.

ຢູ່ດ່ານສາກົນບໍ່ເຕັນ ແມ່ນມີແຜນຈະປັບປຸງໂຄງຮ່າງພື້ນຖານ, ຂະຫຍາຍຊ່ອງບໍລິການ ສໍາລັບລົດບັນທຸກ ລົດໂດຍສານ ຮວມທັງລົດນັກທ່ຽງທ່ຽວ ແຕ່ຍັງບໍ່ຮູ້ວ່າ ໂຄງການດັ່ງກ່າວ ຈະເລີ່ມປະຕິບັດເມື່ອໃດ.

ສໍາລັບເລື່ອງຄວາມປອດໄພ ຢູ່ບໍລິເວນດ່ານນັ້ນ ເຈົ້າໜ້າທີ່ຂອງທັງສອງປະເທດ ກໍໄດ້ກວດກາ ລາດຕະເວນ ຕາມແນວຊາຍແດນ ຊຶ່ງທີ່ຜ່ານມາ ກໍບໍ່ມີບັນຫາ ອີງຕາມຄໍາເວົ້າຂອງເຈົ້າໜ້າທີ່ຢູ່ແຂວງຫລວງນໍ້າທາ ຜູ້ຂໍສະຫງວນຊື່ ແລະຕໍາ ແໜ່ງທ່ານນຶ່ງ ຕໍ່ວິທຍຸເອເຊັຍເສຣີ ໃນມື້ວັນທີ 24 ເມສານີ້ວ່າ:

“ດ່ານບໍ່ເຕັນບໍ ຄືເປັນລະບົບ ຄືຂົວ ບໍ່ແກ້ວ ຊຽງຂອງ ມັນບໍ່ເປັຍລະບົບ ມັນເປັນຕຶກເປັນທາງ ເຮັດເປັນຊ່ອງບໍລິການຊື່ໆ ຄືວ່າຄົນກໍຫລາຍ ບາດນີ້ມັນແອອັດຫັ້ນນະ ແລ້ວກໍລົດຂົນສົ່ງສິນຄ້າ ຜ່ານມາ ກໍຍັງສັບສົນຢູ່ ມັນຍັງບໍ່ເປັນແບບສາກົນເທື່ອ ກໍເລີຍຂັ້ນເທິງມີແຜນທີ່ຈະຂະຫຍາຍເສັ້ນທາງບໍຊີ້ນະ ມີແຜນປັບປຸງດ່ານເລັກໆນ້ອຍໆ”

ດ່ານສາກົນບໍ່ເຕັນ-ບໍ່ຫານ ເປັນດ່ານສໍາຄັນ ຕໍ່ການສົ່ງເສີມການຂົນສົ່ງ ແລະການລົງທຶນ ລະຫວ່າງລາວ ແລະຈີນ, ເປັນຈຸດຜ່ານຂອງການຂົນສົ່ງສິນຄ້າ ລະຫວ່າງລາວ-ຈີນ ແລະລະຫວ່າງໄທ ແລະຈີນນໍາດ້ວຍ.

ສິນຄ້າທີ່ຜ່ານດ່ານນີ້ ມີທັງພືດຜັກ ແລະໝາກໄມ້ ຮວມທັງໝາກຖົ່ວເຫລືອງ,  ໝາກໂມ, ກ້ວຍ ຊຶ່ງກ່ອນໜ້ານັ້ນບໍ່ມີຫລາຍ ແຕ່ໃນຊ່ວງປີນີ້ມີຫລາຍ.

ດັ່ງພະນັກງານບໍລິສັດຂົນສົ່ງສິນຄ້າ ລະຫວ່າງໄທ ລາວ ແລະຈີນ ຢູ່ເມືອງຫ້ວຍຊາຍ ແຂວງບໍ່ແກ້ວຜູ້ນຶ່ງເວົ້າວ່າ:

“ຫລາຍຂຶ້ນຫລາຍ ຫລັງຈາກໂຄວິດ-19 ນີ້ບໍ່ຫລາຍ ແຕ່ຊ່ວງປີນີ້ມີຫລາຍ ຫລາຍໆປີນີ້ ເຂົາມາເຮັດໝາກຖົ່ວໝາກຫຍັງຫລາຍ ສິນຄ້າສ່ວນຫລາຍຢູ່ນີ້ ຈີນເຂົາມາປູກໝາກຖົ່ວຢູ່ລາວ ອາໄສມາໃຊ້ດິນປະຊາຊົນປູກໝາກຖົ່ວ ແລ້ວກໍສົ່ງກັບປະເທດ ແມ່ນສິນຄ້າໄທເອົາໄປ ກໍມີພວກໝາກມັງຄຸດ ໝາກຖົ່ວລຽນ.”

ເຂດເສດຖະກິດພິເສດບໍ່ເຕັນ ແບ່ງອອກເປັນຫລາຍເຂດຫຍ່ອຍ. ປັດຈຸບັນ ໃນແຕ່ລະເຂດ ກໍາລັງກໍ່ສ້າງຕຶກອາຄານ, ໂຮງແຮມ, ຄອນໂດ ຫ້ອງເຊົ່າ. ແຕ່ສັງເກດເຫັນວ່າ ນັກທຸລະກິດຈີນ ທີ່ເຂົ້າມາລົງທຶນນັ້ນ ບໍ່ຄ່ອຍຫລາຍ ເທົ່າກ່ອນຊ່ວງໂຄວິດ-19 ລະບາດ.

ດັ່ງປະຊາຊົນ ຢູ່ບໍລິເວນດ່ານບໍ່ເຕັນ ຜູ້ນຶ່ງເວົ້າວ່າ:

“ເພາະວ່າດຽວນີ້ກໍບໍ່ຫລາຍປານໃດ ບໍ່ຄືຊ່ວງກ່ອນໂຄວິດຫັ້ນນະ ເພາະວ່າດຽວນີ້ ແມ່ນນຶ່ມາມັນຖືກຊ່ວງໂຄວິດເດນໍ ຄົນຈີນກໍບໍ່ສູ້ອອກມານອກປະເທດ ເຂົາກໍໄປບ່ອນອື່ນແດ່ຫັ້ນນະ ໄປບ່ອນສາມຫລ່ຽມທອງຄໍາບໍ ຫລືວ່າໄປແຖວອື່ນ ຢູ່ບໍ່ເຕັນດຽວນີ້ ຄົນບໍ່ຄ່ອຍສູ້ຫລາຍປານໃດ ນັກທຸລະກິດມາລົງທຶນກໍບໍ່ຄ່ອຍສູ້ຫລາຍປານໃດ.”

ແລະເຈົ້າຂອງເຮືອນພັກ ຢູ່ບໍລິເວນ ເຂດເສດຖະກິດພິເສດບໍ່ເຕັນແດນງານ ນາງນຶ່ງ ກໍເວົ້າຄືກັນວ່າ ປັດຈຸບັນ ຈໍານວນນັກທຸລະກິດຈີນ ທີ່ເຂົ້າມາລົງທຶນ ຫລຸດລົງ ແຕ່ລົດບັນທຸກສິນຄ້າ ຍັງເຂົ້າ-ອອກ ຕາມປົກກະຕິ ແຕ່ຊ່ວງນີ້ບໍ່ຫລາຍ.

“ຄົນຈີນ ບໍ່ຫລາຍໆຊ່ວງນີ້ ໂຄວິດແລ້ວກໍແລ້ວ ໂຄວິດຫັ້ນຫລາຍ ດຽວນີ້ບໍ່ຫລາຍແລ້ວ ຄືເກົ່າໆອັນນີ້ຫັ້ນນະ ສິນຄ້ານີ້ນະ ຄືກັນຫັ້ນແຫລະ ຈີນອອກມາກໍຫລາຍຢູ່ລາວ ເຂົາກໍໄປຫລາຍນະແຕ່ລະມື້ ມີຫລາຍ ມີຜັກ ມີປະເພດທີ່ເຂົາເອົາສົ່ງອອກລາວໄດ້ຫັ້ນແຫລະ ຫລາຍແຫລະ.”

ເມື່ອກ່ອນໜ້ານີ້ ຄືໃນເດືອນກັນຍາ ປີ 2023 ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກປະຊາຊົນປະຕິວັດລາວ ນາຍົກລັດຖະມົນຕີ ກໍໄດ້ໄປຕິດຕາມເບິ່ງ ສະພາບການຄຸ້ມຄອງດ່ານສາກົນ ບໍ່ເຕ່ນ ແລະການພັດທະ ນາເຂດເສດຖະກິດພິເສດບໍ່ເຕ່ນແດນງາມ ແລະໄດ້ໄປເບິ່ງດ່ານບໍ່ຫານນໍາດ້ວຍ.

ອີງຕາມລາຍງານລ່າສຸດ ຂອງສໍານັກຂ່າວສານປະເທດລາວ ເມື່ອເດືອນກັນຍາ ປີ 2023, ສະພາບການນໍາເຂົ້າ ແລະສົ່ງອອກສິນຄ້າ ຜ່ານດ່ານສາກົນບໍ່ເຕັນ ມີລົດບັນທຸກສິນຄ້າເຂົ້າມາ ສະເລ່ຍ 189 ຄັນຕໍ່ມື້, ໃນໄລຍະ 8 ເດືອນທໍາອິດຂອງປີ 2023 ມີສິນຄ້າຂາເຂົ້າທັງໝົດ 1,150 ລ້ານໂຕນ, ມູນຄ່າ 1,238 ລ້ານໂດລ້າຣ໌ສະຫະລັດ ແລະລົດບັນທຸກສິນຄ້າຂາອອກ ສະເລ່ຽ 264 ຄັນຕໍ່ມື້, ມີສິນຄ້າຂາອອກທັງໝົດ 2,235 ລ້ານໂຕນ, ມູນຄ່າ 1,270 ລ້ານໂດລ້າຣ໌ສະຫະລັດ. ສຳລັບລົດບັນທຸກສິນຄ້າຜ່ານແດນ ຈາກປະເທດໄທ ໄປປະເທດຈີນ ມີທັງໝົດ 23,405 ຄັນ, ແລະຈາກ ຈີນ ໄປໄທ ມີທັງໝົດ 17,183 ຄັນ.

ຢູ່ຈຸດກວດກາສິນຄ້າ ທີ່ສະຖານີລົດໄຟບໍ່ເຕັນ ມີສິນຄ້າຂາເຂົ້າ ສະເລ່ຍ 3 ຫາ 5 ຖ້ຽວຕໍ່ມື້ ຫລື ປະມານ 20-80 ຕູ້ຕໍ່ມື້, ສິນຄ້າຂາອອກ ທີ່ເປັນແຮ່ເຫລັກ ສະເລ່ຍ 3 ຫາ 5 ຖ້ຽວຕໍ່ມື້ ຫລື ປະມານ 200-350 ຕູ້ຕໍ່ມື້, ສິນຄ້າຜ່ານແດນ  ປະເພດໝາກໄມ້ສົດ ສະເລ່ຍ 1-2 ຖ້ຽວຕໍ່ມື້ ຫລື ປະມານ 30-60 ຕູ້ຕໍ່ມື້.

ການສ້າງເຂດເສດຖະກິດພິເສດ ບໍ່ເຕັນແດນງາມ ລົງທຶນໄປແລ້ວ 2.11 ຕື້ໂດລາ, ມີຫົວໜ່ວຍທຸລະກິດ ແລະ ຫ້າງຮ້ານ ລວມທັງໝົດ 298 ບໍລິສັດ, ມີທຶນຈົດທະ ບຽນ 490 ລ້ານໂດລ້າຣ໌ສະຫະລັດ, ບັນດານັກທຸລະກິດດັ່ງກ່າວ ແມ່ນມາຈາກປະ ເທດຈີນ, ມຽນມາ, ໄທ, ຫວຽດນາມ, ກໍາປູເຈຍ, ສິງກະໂປ, ມາເລເຊຍ ເຊິ່ງມີຄົນງານທັງໝົດ 2,232 ຄົນ. ໃນຈໍານວນນັ້ນ ເປັນລາວ 1,783 ຄົນ.