ທາງການລາວປົກປ້ອງຣະບຽບ ນັກຂ່າວ

ສິດນີ
2016-04-08
ອີແມວລ໌
ຄໍາເຫັນ
Share
ພິມ
ຫ້ອງວ່າການຣັຖບານ ສປປ ລາວ
ຫ້ອງວ່າການຣັຖບານ ສປປ ລາວ
L PDR

ໃນມື້ວານນີ້ ທາງການລາວ ໄດ້ອອກ ຖແລງຂ່າວ ກ່ຽວກັບ ກົດຣະບຽບ ຕໍ່ ນັກຂ່າວ ຕ່າງປະເທດ ທີ່ ຣັຖບານລາວ ໄດ້ອອກ ຄໍາສັ່ງໄປ ເມື່ອມໍ່ໆ ມານີ້ວ່າ: ທາງການລາວ ບໍ່ໄດ້ກີດກັ້ນ ນັກຂ່າວ ຕ່າງປະເທດ ທີ່ຈະເຂົ້າມາ ຣາຍງານຂ່າວ ໃນຣະຍະ ກອງປະຊຸມ ສຸດຍອດ ອາຊຽນ ປີນີ້ ທີ່ ສປປລາວ ຈະເປັນ ເຈົ້າພາບ ທີ່ ນະຄອນຫຼວງ ວຽງຈັນ.

ທ່ານ ສະຫວັນຄອນ ຣາຊມົນຕຣີ ຮອງ ຣັຖມົນຕຣີ ກະຊວງ ຖແລງຂ່າວ ວັທນະທັມ ແລະ ທ່ອງທ່ຽວ ສປປລາວ ຮ່ວມທັງເປັນ ປະທານ ສະມາຄົມ ນັກຂ່າວລາວ ກ່າວວ່າ: ພວກເຮົາ ບໍ່ມີຂໍ້ ຈຳກັດ ແຕ່ເປັນ ກົດຣະບຽບ ເພື່ອ ປະຕິບັດ ຊຶ່ງ ໃນປະເທດ ອື່ນໆ ຂະເຈົ້າ ກໍມີ ກົດຣະບຽບ ເຊັ່ນກັນ ເພື່ອ ຄວາມປອດພັຍ ຂອງ ປະເທດ.

ກົດຣະບຽບ ໃຫມ່ ທີ່ ທາງການລາວ ອອກແລະຖືກ ບັງຄັບໃຊ້ ມາແຕ່ວັນທີ 14 ມົກກະຣາ ປີນີ້ນັ້ນ ກໍແມ່ນວ່າ ອົງການຂ່າວ ຕ່າງປະເທດ ທີ່ຈະເຂົ້າໄປ ຣາຍງານ ຂ່າວ ໃນລາວ ຕ້ອງໄດ້ ສົ່ງຂໍ້ຄວາມ ເນື້ອຫາສາຣະ ທຸກຄັ້ງ ໃຫ້ກະຊວງ ຕ່າງປະເທດ ກວດສອບກ່ອນ ກ່ອນຈະພິມ ອອກເຜີຍແພ່ ຫລື ຣາຍງານ ເປັນຂ່າວໄດ້.

ທ່ານ ວໍຣະສັກ ປະວົງວຽງຄຳ ຮອງ ເອກອະທິບໍດີ ສະຖານີ ວິທຍຸ ກະຈ່າຍສຽງ ແຫ່ງຊາດລາວ ເວົ້າວ່າ: ສຳລັບ ນັກຂ່າວ ຕ່າງປະເທດ ທີ່ຈະເຂົ້າມາ ຣາຍງານຂ່າວ ໃນຣະຍະ ກອງປະຊຸມ ສຸດຍອດ ອາຊຽນ ນັ້ນ ບໍ່ຕ້ອງເຮັດ ແບບນັ້ນ ກໍໄດ້, ຊຶ່ງ ກົດຣະບຽບ ດັ່ງກ່າວ ແມ່ນ ໃຊ້ສຳລັບ ຜູ້ທີ່ເຂົ້າມາ ຖ່າຍຫນັງ ຖ່າຍລະຄອນ ຫລືເຮັດ ສາຣະຄະດີ ຕ່າງໆ ຕ້ອງໄດ້ສົ່ງ ເນື້ອໃນສາຣະ ໃຫ້ກະຊວງ ຕ່າງປະເທດ.

ສຳລັບ ນັກຂ່າວ ຂອງ ຕ່າງປະເທດ ນັ້ນ ພຽງແຕ່ ປະຕິບັດ ຕາມ ກົດຣະບຽບ ການເຮັດຂ່າວ ເທົ່ານັ້ນ ແລະ ຈະມີຜູ້ ຕິດຕາມ ໃນການ ໄປເອົາຂ່າວ ໃນ ກອງປະຊຸມ ສຸດຍອດ ອາຊຽນ.

ເຕັມຫນ້າ