ສປປລາວ ຍັງຂາດເຂີນຄຣູ

ຈໍາປາທອງ
2019-04-05
ອີແມວລ໌
ຄໍາເຫັນ
Share
ພິມ
ກະຊວງສຶກສາທິການ ແລະ ກິລາ ໃນນະຄອນຫຼວງວຽງຈັນ
ກະຊວງສຶກສາທິການ ແລະ ກິລາ ໃນນະຄອນຫຼວງວຽງຈັນ
RFA

ກະຊວງສຶກສາຂອງ ສປປລາວ ຜະເຊີນກັບບັນຫາຂາດເຂີນຄຣູສອນຫລາຍພັນຄົນ ໃນທົ່ວປະເທສ ເປັນຕົ້ນ ຄຣູວິຊາຄະນິດສາດ ແລະ ວິທຍາສາດ ຍ້ອນນັກສຶກສາຄຣູບໍ່ມັກຮຽນ ແລະຫັນໄປຮຽນ ວິຊາອື່ນ ເຊັ່ນວິຊາພາສາຕ່າງປະເທສ, ບັນຊີ, ການເງິນ ແລະວິຊາບໍຣິຫານ ທຸຣະກິດ. ພ້ອມກັນນັ້ນ ຣັຖບາລ ສປປລາວ ກໍຍັງຫລຸດໂຄຕາ ຮັບເອົານັກຮຽນ ເຂົ້າຮຽນເປັນຄຣູລົງນໍາເລື້ອຍ ແລະ ຜູ້ຮຽນຈົບໄປແລ້ວ ກໍຍັງບໍ່ທັນໄດ້ຖືກສັບຊ້ອນ ເຂົ້າເປັນຣັຖກອນ. ຕາມຄໍາເວົ້າຂອງເຈົ້າໜ້າທີ່ ກະຊວງສຶກສາທິການແລະກິລາ ຕໍ່ວິທຍຸເອເຊັຍເສຣີ ໃນວັນທີ 4 ເມສາ ນີ້:

"ມານີ້ ປະມານສອງປີ ຄືວ່າເຮົາ ຜລິດອອກໄປ ກໍ່ມັນບໍ່ທັນໄດ້ເຂົ້າເປັນຣັຖກອນເທື່ອ ແລ້ວການສ້າງຄຣູ ປະເດັນນຶ່ງ ສ້າງຫລຸດລົງໜ້ອຍ ທີ່ສຸດ ແຕ່ກ່ອນວິທຍາລັຍ ພວກເຮົານີ້ແມ່ນສ້າງຮອດຮັບ ແຕ່ລະປີປະມານເຈັດແປດຮ້ອຍນະ ແຕ່ດຽວນີ້ຫລຸດລົງມາ ເຫຼືອສອງເຖິງສາມ ຮ້ອຍຊື່ໆ."

ທ່ານເວົ້າວ່າຕໍ່ໄປ ຫລາຍໂຮງຮຽນອາດຈະບໍ່ມີຄຣູສອນ ວິຊາຄະນິດສາດ ແລະວິຊາວິທຍາສາດກໍເປັນໄດ້ ແລະທັງວ່າ ການຫລຸດໂຄຕາ ຣັຖກອນຄຣູລົງ ໂດຍສະເພາະໃນຣະຍະ 2 ປີມານີ້ ທາງການຈະເຮັດໃຫ້ຈໍານວນຄຣູ ໃນປະເທສລາວ ຫລຸດລົງຫຼາຍ ອັນຈະສົ່ງຜົລບໍ່ດີ ຕໍ່ຣະບົບການຮຽນການສອນໃນປະເທສ.

ແຕ່ລະປີຈະມີນັກສຶກສາທີ່ຈົບຊັ້ນປຣິນຍາຕຣີວິຊາຄຣູ ຈາກທຸກມະຫາວິທຍາລັຍໃນທົ່ວປະເທສຫຼາຍພັນຄົນ ແຕ່ບໍ່ແມ່ນຈົບວິຊາຄະນິດສາດ ແລະວິທຍາສາດ ຊຶ່ງເປັນວິຊາ ທີ່ຕ້ອງການທີ່ສຸດ, ດັ່ງທ່ານກ່າວວ່າ:

ບາງຄູຂແນງການນັ້ນເຫລືອ ບາງຄຣູຂແນງການກໍບໍ່ພໍ ຄຣູຄະນິດສາດ ບໍ; ຄຣູຟີສິກສາດບໍ; ຄຣູເຄມີສາດ, ຄຣູຊີວະສາດບໍນໍ; ຈາກນັ້ນ ກໍແມ່ນຄຣູ ອະນຸບານກັບຄຣູປະຖົມ ຜ່ານມາອັນຄົນບໍ່ສູ້ຮຽນ."

ທົ່ວປະເທສລາວ ເກືອບທຸກເມືອງ ຍັງຂາດເຂີນຄຣູສອນວິຊາຄະນິດສາດ ແລະວິຊາວິທຍາສາດ ໂດຍສະເພາະຄຣູສອນຊັ້ນປະຖົມ ໃນຂນະທີ່ກະຊວງສຶກສາທິການ ແລະກິລາ ຣາຍງານວ່າ ການສຶກສາໃນລາວ ຍັງຂາດເຂີນຄຣູສອນທຸກວິຊາ ເກືອບເຖິງ 10 ພັນຄົນ ໃນທົ່ວປະເທສ.

ແຕ່ເຖິງຢ່າງໃດກໍຕາມ ຣັຖບາລລາວກໍເວົ້າວ່າ ພຍາຍາມຊຸກຍູ້ການສຶກສາ ເພື່ອພັທນາຊັພຍາກອນມະນຸດ, ແກ້ໄຂບັນຫາຊ່ອງວ່າງ ທາງ ດ້ານການສຶກສາ ຣະຫວ່າງຕົວເມືອງ ແລະຊົນນະບົດ ຊຶ່ງ ເປັນບັນຫາຮີບຮ້ອນ ທີ່ຈະຕ້ອງໄດ້ແກ້ໄຂ ຮວມທັງເຣຶ່ອງການຂາດເຂີນຄຣູ ແລະໃຫ້ເອົາໃຈໃສ່ຊຸກຍູ້ຄຣູ ໄປສອນຢູ່ເຂດຊົນນະບົດ ຫ່າງໄກຫຼາຍຂຶ້ນ.

ເຕັມຫນ້າ