ຜູ້ສມັກເລືອກຕັ້ງນຶ່ງທ່ານ ຖືກໃຫ້ ຖອນຊື່

ຈໍາປາທອງ
2021-02-16
Share
ຜູ້ສມັກເລືອກຕັ້ງນຶ່ງທ່ານ ຖືກໃຫ້ ຖອນຊື່ ທາງການຕິດຕັ້ງ ປ້າຍໂຄສະນາ ການເລືອກຕັ້ງ ຢູ່ຕາມເຂດເລືອກຕັ້ງຕ່າງໆ
ພາບປະກອບ: ນັກຂ່າວພົລເມືອງ

ເມື່ອວັນທີ 12 ກຸມພາ ນີ້ ຄະນະກໍາມະການເລືອກຕັ້ງຣະດັບຊາດ ໄດ້ເຮັດໜັງສືເຖິງຄະນະກໍາມະການ ເລືອກຕັ້ງ ນະຄອນຫຼວງ ວຽງຈັນ ໃຫ້ພິຈາຣະນາຖອດຖອນລາຍຊື່ ທ່ານ ອຸທັນ ໄຕລິດທິ ຜູ້ສມັກຮັບເລືອກຕັ້ງ ເປັນສະມາຊິກສະພາ ປະຊາຊົນຂັ້ນແຂວງ ເຂດເມືອງໄຊເສດຖາ ນະຄອນຫຼວງວຽງຈັນ ອອກຈາກລາຍຊື່ ຜູ້ສມັກຮັບເລືອກຕັ້ງ ຍ້ອນທ່ານມີມາຕຖານ ບໍ່ຄົບຖ້ວນ ຕາມທີ່ ກໍານົດໄວ້ ຢູ່ໃນກົດໝາຍ ວ່າດ້ວຍການເລືອກຕັ້ງ ສະມາຊິກ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ມາດຕຣາ 12, ແຕ່ທາງເຈົ້າໜ້າທີ່ ທີ່ກ່ຽວຂ້ອງ ເວົ້າວ່າ ທ່ານຍັງບໍ່ທັນໄດ້ຖືກຖອດຖອນ ຢ່າງເປັນທາງການເທື່ອ, ດັ່ງເຈົ້າໜ້າທີ່ ທີ່ກ່ຽວຂ້ອງກັບ ການເລືອກຕັ້ງ ນາງນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 16 ກຸມພາ ນີ້ວ່າ:

“ມັນບໍ່ໄດ້ເປັນທາງການເຈົ້າ, ມັນບໍ່ໄດ້ເປັນທາງການເຈົ້າ, ຍັງບໍ່ທັນມີເອກສານແຈ້ງການ ເປັນລາຍລັກອັກສອນເທື່ອເນາະ, ຄັນວ່າ ເປັນເອກສານແຈ້ງການ ເປັນລາຍລັກອັກສອນ ມາເພິ່ນຈະເອົາລົງປະກາດ ແຈ້ງການ ອອກໜັງສືພິມ.”

ຍານາງກ່າວຕື່ມວ່າ ປັດຈຸບັນ ຄະນະຮັບຜິດຊອບ ກໍາລັງກວດສອບເຣື່ອງນີ້ຢູ່, ຍັງບໍ່ຮູ້ຄັກແນ່ເທື່ອວ່າ ຜູ້ສມັກຮັບເລືອກຕັ້ງຄົນ ດັ່ງກ່າວ ຍັງມີສິດລົງໂຄສະນາຫາສຽງຢູ່ຫລືບໍ່ ຫລືຖືກ ໝົດສິດໄປແລ້ວ, ຕ້ອງລໍຖ້າໃຫ້ຄະນະກໍາມະການເລືອກຕັ້ງ ນະຄອນຫຼວງ ວຽງຈັນ ຊີ້ແຈງກ່ອນ. ກ່ຽວກັບເຣື່ອງທີ່ວ່ານີ້ ວິທຍຸເອເຊັຍເສຣີ ໄດ້ຕິດຕໍ່ໄປຫາ ຄະນະກໍາມະການເລືອກຕັ້ງ ຣະດັບຊາດ ແລະ ຄະນະກໍາມະການເລືອກຕັ້ງ ນະຄອນຫຼວງວຽງຈັນ ເພື່ອຂໍຮູ້ລາຍລະອຽດ ແຕ່ເຈົ້າໜ້າທີ່ ທີ່ຮັບຜິດຊອບເຣື່ອງນີ້ ບໍ່ສະດວກທີ່ຈະ ໃຫ້ສໍາພາດ.

ແລະໃນຂນະດຽວກັນ ກໍພຍາຍາມຕິດຕໍ່ ໄປຫາ ທ່ານ ອຸທັນ ໄຕລິດທິ ເພື່ອຂໍຮູ້ກ່ຽວກັບເຣື່ອງທີ່ວ່ານີ້ ແຕ່ບໍ່ສາມາດຕິດຕໍ່ໄດ້. ຊາວລາວ ທີ່ຮູ້ຂ່າວນີ້ ກໍມີຄວາມສົງສັຍວ່າ ເປັນຍ້ອນຫຍັງ ແທ້ ທ່ານຈຶ່ງຖືກໃຫ້ຖອດຖອນ ລາຍຊື່ອອກຈາກການເປັນ ຜູ້ສມັກຮັບເລືອກຕັ້ງ, ທ່ານບໍ່ຮູ້ຈັກ ດັ່ງທີ່ທ່ານກ່າວວ່າ:

“ກະບໍ່ຮູ້ແລ້ວໃດ໋ ຫລາຍໆຄົນກະສົງສັຍຢູ່ວ່າ ຖອນຍ້ອນຫຍັງຫັ້ນນະ ຍິນຄົນວ່າຖອນຍ້ອນເພິ່ນ ຣະດັບການສຶກສາ ເພິ່ນບໍ່ມີ ໃບປະກາດ ບໍ່ມີຫຍັງຂ້ອຍກະບໍ່ແນ່ໃຈ ນໍາເພິ່ນ ບໍ່ຮູ້ຈັກເດີ໋.”

ທ່ານກ່າວຕື່ມວ່າ ເຖິງຢ່າງໃດກໍຕາມ ກໍຢາກໃຫ້ພາກສ່ວນທີ່ກ່ຽວຂ້ອງ ກັບການເລືອກຕັ້ງ ຊີ້ແຈງເຫດຜົລລະອຽດ ຖ້າຫາກວ່າໄດ້ ຖອດຖອນທ່ານ ອອກຈາກບັນຊີລາຍຊື່ ຜູ້ສມັກຮັບ ເລືອກຕັ້ງນັ້ນແທ້ ເພື່ອໄຂຂໍ້ສົງສັຍ ໃຫ້ຜູ້ມີສິດປ່ອນບັດ ເລືອກຕັ້ງໃນເຂດ ເລືອກຕັ້ງນັ້ນ ກ່ອນມື້ເລືອກຕັ້ງຈະມາເຖິງ.

ຊາວເມືອງໄຊເສດຖາ ທີ່ເປັນເຂດເລືອກຕັ້ງ ຂອງທ່ານ ເວົ້າເມື່ອບໍດົນມານີ້ວ່າ ຕົນກໍເຄີຍເຫັນ ທ່ານ ອຸທັນ ລົງມາໂຄສະນາຫາສຽງ ຢູ່ເຂດບ້ານຂອງຕົນ, ແຕ່ມາສົງສັຍວ່າ ເປັນຫຍັງ ທ່ານຈຶ່ງຖືກສເນີໃຫ້ ພິຈາລະນາຖອດຖອນຊື່ ອອກຈາກການເປັນຜູ້ສມັກຮັບ ເລືອກຕັ້ງ ແລະ ບໍ່ຮູ້ວ່າທ່ານມີມາຕຖານ ບໍ່ຄົບຖ້ວນແນວໃດແດ່ ດັ່ງທີ່ນາງກ່າວວ່າ:

“ເຫັນຢູ່ແຕ່ວ່າກະເບິ່ງໄປຕາມ ເງື່ອນໄຂຂອງໃຜລາວ ແຫຼະເນາະ ເຮັດໄປຈັ່ງຊັ້ນແຫຼະ ຖືກຖອນຣາຍຊື່ນີ້ ກໍເງື່ອນໄຂບໍ່ຄົບສ່ວນຕິ ກະອີງຕາມຫາງສຽງສັງຄົມເຂົາ.”

ແລະ ຊາວລາວອີກທ່ານນຶ່ງ ກໍເວົ້າວ່າ ການສເນີໃຫ້ພິຈາຣະນາຖອດຖອນ ຜູ້ສມັກຮັບເລືອກຕັ້ງ ອອກຈາກການເລືອກຕັ້ງນັ້ນຕົນ ບໍ່ໄດ້ຕິດໃຈພໍເທົ່າໃດ ຍ້ອນເຊື່ອວ່າ ການເລືອກຕັ້ງ ໃນເທື່ອນີ້ ກໍຄົງຈະຖືກຈັດຂຶ້ນ ໄປຕາມທໍານຽມຊື່ໆ ຍ້ອນວ່າພາກສ່ວນທາງການ ທີ່ກ່ຽວຂ້ອງເພິ່ນໄດ້ຄັດເລືອກ ເອົາຄົນຂອງເພິ່ນໄວ້ແລ້ວ ວ່າໃຜຈະໄດ້ຮັບການເລືອກຕັ້ງ ດັ່ງທີ່ທ່ານ ກ່າວວ່າ:

“ອັນນີ້ມັນກະບໍ່ຕ່າງຫຍັງ ກັບຜ່ານມາຫັ້ນແຫຼະ ແບບດຽວກັນໝົດ ເພາະວ່າພັກດຽວເດ໋ ເພິ່ນມີແຜນຢູ່ແລ້ວ ຜູ້ໃດໄດ້ຄະແນນ ເທົ່າໃດ ກະບໍ່ໄດ້ຮູ້ນໍາເພິ່ນ.”

ທ່ານ ອຸທັນ ໄຕລິດທິ ອາຍຸ 35 ປີ, ເປັນປະທານສະພາການຄ້າ ແລະ ອຸດສາຫະກັມ ເມືອງໄຊເສດຖາ ແລະທັງເປັນປະທານ ຫຼາຍ ບໍຣິສັດເຊັ່ນ; ບໍຣິສັດ ໂຕ້ ປີໂຕຣລຽມ ໄບໂອ-ເອທານອລ ລາວ ນໍາເຂົ້າ-ສົ່ງອອກ ຈໍາກັດຜູ້ດຽວ, ບໍຣິສັດສິນຄ້າຜ່ານແດນ ຈີນສວັນ. ທ່ານເປັນຜູ້ສມັກ ຮັບເລືອກຕັ້ງເປັນສະມາຊິກ ສະພາປະຊາຊົນຂັ້ນແຂວງ ເຂດເມືອງ ໄຊເສດຖາ ນະຄອນຫຼວງວຽງຈັນ, ໝາຍເລກ 6.

ຂ່າວວຽງຈັນທາມສ໌ ວັນທີ 16 ກຸມພາ ນີ້ເວົ້າວ່າ ທ່ານ ອຸທັນ ບໍ່ມີມາຕຖານພຽງພໍ ຊຶ່ງຄະນະກັມການເລືອກຕັ້ງຣະດັບຊາດ ໄດ້ອ້າງ ເຖິງມາດຕຣາ 12 ຂອງກົດໝາຍວ່າດ້ວຍ ການເລືອກຕັ້ງສະມາຊິກ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ທີ່ເວົ້າເຖິງ ມາຕຖານ ຂອງຜູ້ສມັກຮັບເລືອກຕັ້ງ ແລະ ມາດຕຣາ 16 ວ່າດ້ວຍການປະຕິເສດ ຜູ້ສມັກຮັບເລືອກຕັ້ງ, ແລະແຈ້ງການຂອງຄະນະ ກໍາມະເລືອກຕັ້ງ ນະຄອນຫຼວງວຽງຈັນ ເຣື່ອງການສິ້ນສຸດ ແລະ ຈໍານວນຜູ້ສມັກຮັບເລືອກຕັ້ງ.

ພ້ອມດຽວກັນ ກໍອ້າງເຖິງການຕັດສິນໃຈ ຂອງກະຊວງປ້ອງກັນຄວາມສງົບ ລົງວັນທີ 12 ກຸມພາ ນີ້ນໍາດ້ວຍ ແລະທັງຍັງໄດ້ອ້າງ ເຖິງຄວາມ ບໍ່ພໍໃຈຂອງ ຜູ້ປ່ອນບັດເລືອກຕັ້ງ ກ່ຽວກັບມາຕຖານ ຂອງ ດຣ. ອຸທັນ ໄຕລິດທິ. ກະຊວງສືກສາທິການ ແລະກິລາ ເວົ້າວ່າ ທ່ານ ອຸທັນ ໄດ້ຂໍໃຫ້ເຈົ້າໜ້າທີ່ ອອກໃບ ປະກາດສະນິຍະບັດ ຂັ້ນປຣິນຍາເອກ ໃຫ້ ທ່ານ ຊຶ່ງ ທາງກະຊວງ ບໍ່ສາມາດ ເຮັດໄດ້ ຍ້ອນສົງສັຍ ໃນໃບປະກາດ ຂັ້ນປຣິນຍາເອກ ທີ່ທ່ານມີຢູ່ນັ້ນ. ສູນການສຶກສາທີ່ທ່ານອ້າງວ່າ ໄດ້ສຶກສາມານັ້ນບໍ່ໄດ້ຂຶ້ນ ທະບຽນກັບກະຊວງ ສຶກສາທິການຂອງໄທຍ. ກະຊວງສຶກສາທິການ ແລະກິລາຂອງລາວຍັງເວົ້າອີກວ່າ ໄດ້ຢຸດໃຫ້ສິດທ່ານສອນ ໃນປີ 2012 ແລະບໍ່ຮັບຮູ້ ຊັ້ນຮອງສາສດາຈານ ແລະ ຊັ້ນ ດ໊ອກເຕີຣາ ຫລື ປຣີນຍາເອກ ຂອງ ທ່ານ ອຸທັນ ໂດຍເວົ້າວ່າ ຣະດັບການສຶກສາ ຂອງສະຖາບັນ ການສຶກສາ ທີ່ທ່ານໄດ້ຮຽນມານັ້ນ ບໍ່ສອດຄ່ອງກັບຣະດັບ ການສຶກສາຊັ້ນສູງ ຫລື ກົດໝາຍ ຂອງລາວ.

ກົດໝາຍວ່າດ້ວຍ ການເລືອກຕັ້ງສະມາຊິກ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ມາດຕຣາ 12 ຣະບຸວ່າ ຜູ້ສມັກ ຮັບເລືອກຕັ້ງເປັນສະມາຊິກສະພາ ຕ້ອງມີມາຕຖານ ຄົບຖ້້ວນ ຄື:

1. ເປັນພົລເມືອງລາວ. 2. ມີນໍ້າໃຈຮັກຊາດ ຮັກຣະບອບປະຊາທິປະໄຕ, ຈົງຮັກພັກດີ ແລະ ຕັ້ງຕໍ່ບໍຣິສຸດຕໍ່ປະເທດຊາດ, 3. ກໍາແໜ້ນ ແລະ ຢຶດໝັ້ນແນວທາງ ປ່ຽນແປງໃໝ່, ກົດໝາຍ ແລະ ຣັຖທັມມະນູນ, 4. ມີຄວາມຮັບຜິດຊອບ ສູງຕໍ່ໜ້າທີ່ການເມືອງ, 5. ມີຣະດັບການສຶກສາ ຈົບຊັ້ນມັທຍົມຕົ້ນຂຶ້ນໄປ ແລະ ມີວິຊາສະເພາະໃດນຶ່ງ ແລະ 6. ມີສຸຂພາບດີ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ