ທຸກແຂວງໃນລາວນັບ ຄະແນນ ເລືອກຕັ້ງ

ຈໍາປາທອງ
2021-02-22
Share
ທຸກແຂວງໃນລາວນັບ ຄະແນນ ເລືອກຕັ້ງ ປະຊາຊົນລາວ ທີ່ ອອກໄປປ່ອນບັດເລືອກຕັ້ງ ໃນມື້ວັນທີ 21 2021
ພາບປະກອບ: ນັກຂ່າວພົລເມືອງ

ພາຍຫລັງການປ່ອນບັດເລືອກຕັ້ງ ສະມາຊິກສະພາແຫ່ງຊາດ ຊຸດທີ 9 ແລະ ສະມາຊິກສະພາປະຊາຊົນ ຂັ້ນແຂວງ ຊຸດທີ 2 ໃນ ວັນທີ 21 ກຸມພາ 2021 ຄະນະກັມການເລືອກຕັ້ງ ຂັ້ນແຂວງ ໃນແຕ່ລະແຂວງ ກໍໄດ້ນັບບັດລົງຄະແນນສຽງເລືອກຕັ້ງ ຊຶ່ງມາຮອດ ມື້ນີ້ ກໍມີຫຼາຍແຂວງ ຮວມທັງແຂວງຫຼວງພຣະບາງ ໄດ້ສໍາເຣັດການນັບ ຄະແນນສຽງນັ້ນແລ້ວ ແລະ ສົ່ງຜົລການເລືອກຕັ້ງ ໄປໃຫ້ ຄະນະກັມການເລືອກຕັ້ງ ຣະດັບຊາດ ເພື່ອສັງລວມ ແລະ ປະກາດຜົລຢ່າງເປັນທາງການ.

ສໍາລັບຜົລການເລືອກຕັ້ງ ສະມາຊິກສະພາປະຊາຊົນຂັ້ນແຂວງ ທາງແຂວງຈະເປັນຜູ້ສັງລວມຈາກເມືອງ ແລະປະກາດຜົລຢ່າງ ເປັນທາງການເອງ. ເຈົ້າໜ້າທີ່ສະພາແຫ່ງຊາດ ປະຈໍາແຂວງຫຼວງພຣະບາງ ກ່າວຕໍ່ວິທຍຸເອເຊັຽເສຣີ ໃນວັນທີ 22 ກຸມພາ ນີ້ວ່າ:

“ສລຸບແລ້ວ ເຈົ້າ, ສໍາເຣັດແລ້ວ ເຈົ້າ, ຍັງບໍ່ໄດ້ປະກາດເທື່ອ ເຈົ້າ, ຖ້ານະຄອນຫລວງຢູ່ ເຈົ້າ, ເອກສານແມ່ນເຮົາສົ່ງໄປນະຄອນ ຫຼວງແລ້ວ ເຈົ້າ, ຖ້າສະພາແຫ່ງຊາດພຸ້ນແຫຼະ ເຈົ້າ.”

ຍານາງກ່າວຕື່ມວ່າ ສໍາລັບຜົລການເລືອກຕັ້ງ ປະຈໍາແຂວງຫຼວງພຣະບາງ ເຖິງແມ່ນວ່າໄດ້ສລຸບຜົລແລ້ວ ແຕ່ກໍບໍ່ສາມາດແຈ້ງ ໃຫ້ຮູ້ໄດ້ເທື່ອ, ຕ້ອງໄດ້ລໍຖ້າໃຫ້ຄະນະກັມການ ເລືອກຕັ້ງຣະດັບຊາດ ເປັນຜູ້ປະກາດອອກ ພ້ອມກັນທົ່ວປະເທດ ບາດດຽວ. ການເລືອກຕັ້ງພາຍໃນແຂວງ ເທື່ອນີ້ ມີຜູ້ອອກມາໃຊ້ສິດ ປ່ອນບັດໜາແໜ້ນ ແຕ່ຍັງບໍ່ສາມາດ ສລຸບໄດ້ເທື່ອວ່າ ມີຄົນອອກມາ ໃຊ້ສິດປ່ອນບັດເລືອກຕັ້ງເທົ່າໃດ.

ຢູ່ແຂວງຫົວພັນ ເຈົ້າໜ້າທີ່ສະພາແຫ່ງຊາດ ປະຈໍາແຂວງທ່ານນຶ່ງ ກໍກ່າວວ່າ ການນັບບັດລົງຄະແນນສຽງ ຕອນນີ້ກໍາລັງສລຸບຢູ່ ແລະ ຈະສົ່ງຜົລການເລືອກຕັ້ງ ສະມາຊິກ ສະພາ ແຫ່ງຊາດ ໃຫ້ຄະນະກັມການ ເລືອກຕັ້ງຣະດັບຊາດ ດັ່ງທີ່ທ່ານກ່າວວ່າ:

“ຕອນນີ້ຍັງກໍາລັງສລຸບ ຜົລການນັບຄະແນນ ເຈົ້າ ຕອນນີ້ເພິ່ນຍັງປະຊຸມຢູ່.”

ໃນຂນະດຽວກັນນີ້ ກໍມີແຂວງຈໍານວນນຶ່ງ ທີ່ຍັງຢູ່ໃນຣະຫວ່າງການ ນັບບັດລົງຄະແນນເລືອກຕັ້ງ ຊຶ່ງຄາດວ່າຈະສໍາເຣັດໃນມໍ່ໆນີ້. ເຊັ່ນຢູ່ແຂວງໄຊຍະບູຣີ ກໍພວມນັບຄະແນນນັ້ນຢູ່ ຍັງບໍ່ຮູ້ເທື່ອວ່າ ຈະນັບແລ້ວເມື່ອໃດ ດັ່ງເຈົ້າໜ້າທີ່ກ່ຽວຂ້ອງ ທ່ານນຶ່ງ ກ່າວວ່າ:

“ໂຕນີ້ແທ້ເພິ່ນ ຍັງບໍ່ທັນໄດ້ປະກາດເທື່ອ ຍັງບໍ່ທັນແຈ້ງຫຍັງມາເທື່ອ ຖ້າເພິ່ນມີຫຍັງເຄື່ອນໄຫວ ເພິ່ນຫາກສິແຈ້ງຕາມຫຼັງຊີ້ນະ ຍັງບໍ່ໄດ້ກໍານົດເທື່ອວ່າ ທິດນີ້ຫລືທິດໜ້າ ຫລືຈັ່ງໃດ.”

ໃນຂນະນີ້ ຜູ້ທີ່ໄດ້ໄປໃຊ້ສິດປ່ອນບັດ ເລືອກຕັ້ງຫຼາຍຄົນ ກໍກໍາລັງລໍຖ້າຟັງການປະກາດ ຜົລການເລືອກຕັ້ງຢູ່ ແລະຫວັງວ່າຜູ້ສມັກ ຮັບເລືອກຕັ້ງ ທີ່ຕົກມັກ ຈະໄດ້ເປັນຜູ້ແທນຢູ່ໃນ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ດັ່ງຊາວນະຄອນຫຼວງວຽງຈັນ ນາງນຶ່ງເວົ້າວ່າ:

“ເພາະວ່າ ຫາກໍ່ເລືອກຕັ້ງວານນີ້ເນາະ ກະຍັງບໍ່ທັນຮູ້ຜົລປານໃດຫັ້ນນະ ເອື້ອຍນີ້ເອື້ອຍກະເລືອກເອົາ ຜູ້ທີ່ເພິ່ນເປັນຄົນປະຊາຊົນ ຫັ້ນແຫຼະ ຖ້າວ່າມີຜູ້ໃດຢູ່ ທີ່ວ່າປະຊາຊົນ ຂະເຈົ້າ ຮູ້ເນາະ ເຂົາກະຄືສິບໍ່ເອົາດອກ ຄົນນັ້ນ ປະຊາຊົນ... ຄົນກະຮູ້ໆກັນເນາະ.”

ແລະຊາວລາວ ຢູ່ ນະຄອນຫຼວງພຣະບາງ ນາງນຶ່ງກໍເວົ້າວ່າ ການເລືອກຕັ້ງ ຢູ່ ນະຄອນຫຼວງພຣະບາງ ເທື່ອນີ້ ຖືວ່າມີຄວາມ ຄຶກຄື້ນດີຢູ່ ຊຶ່ງຕົນກໍກໍາລັງລໍຖ້າ ການປະກາດຜົລ ການເລືອກຕັ້ງນັ້ນຢູ່ ແລະ ກໍຫວັງວ່າ ຜູ້ທີ່ໄດ້ຮັບການ ເລືອກຕັ້ງເຂົ້າສະພາ ນັ້ນຈະສາມາດແກ້ໄຂບັນຫາ ຕ່າງໆໄດ້ ໂດຍສະເພາະ ການຟື້ນຟູ ການທ່ອງທ່ຽວ ຢູ່ພາຍໃນແຂວງນີ້ ດັ່ງທີ່ນາງກ່າວວ່າ:

“ກະຄຶກຄື້ນສົມຄວນຫັ້ນແຫຼະ ຜູ້ໃດກະຕື່ນເຕັ້ນແຫຼະ ກ່ອນສິເຂົ້າໄປເພິ່ນກະຢາຍຜ້າ ເພິ່ນກະລ້າງເຂລ ກະຢາກໃຫ້ເພິ່ນມາ ຊ່ວຍເຫລືອເບິ່ງແຫຼະ ເຣື່ອງການທ່ອງທ່ຽວເຮົານີ້ເນາະ ຢາກໃຫ້ແຂກໄປແຂກມາ ຫັ້ນແຫຼະເນາະ ກໍຢາກໃຫ້ສ້າງບັນຍາກາດ ໃຫ້ມັນຟື້ນ ບັນຍາກາດເກົ່າຫັ້ນ ຄືນມາເນາະ.”

ວິທຍຸເອເຊັຍເສຣີ ໄດ້ຕິດຕໍ່ໄປຫາ ສະພາແຫ່ງຊາດ ເພື່ອຂໍຮູ້ລາຍລະອຽດກ່ຽວກັບ ຂັ້ນຕອນຕ່າງໆ ກ່ອນການປະກາດຜົລການ ເລືອກຕັ້ງ ແຕ່ເຈົ້າໜ້າທີ່ກ່ຽວຂ້ອງ ຍັງບໍ່ສະດວກ ທີ່ຈະໃຫ້ຄໍາເຫັນ ຈົນກວ່າວ່າ ຜົລການເລືອກຕັ້ງ ຈະໄດ້ຖືກປະກາດອອກຢ່າງ ເປັນທາງການເທົ່ານັ້ນ.

ເວົ້າເຖິງການປະກາດຜົລການເລືອກຕັ້ງ ກົດໝາຍວ່າດ້ວຍການເລືອກຕັ້ງ ສະມາຊິກສະພາແຫ່ງຊາດ ແລະສະພາປະຊາຊົນຂັ້ນ ແຂວງ, ມາດຕຣາ 40 ບົ່ງເອົາໄວ້ໃນຂໍ້ທີ 1 ວ່າ ຄະນະກໍາມະການ ເລືອກຕັ້ງຂັ້ນແຂວງ ໃຫ້ສົ່ງຜົລຂອງການເລືອກຕັ້ງສະມາຊິກ ສະພາແຫ່ງຊາດ ໄປຍັງ ຄະນະກໍາມະການເລືອກຕັ້ງ ລະດັບຊາດ ເພື່ອສັງລວມ ແລະ ປະກາດຜົລ ຢ່າງເປັນທາງການ.

ຂໍ້ທີ 2 ກໍານົດວ່າ ຄະນະກໍາມະການເລືອກຕັ້ງຂັ້ນມືອງ ໃຫ້ສົ່ງຜົລຂອງການເລືອກຕັ້ງ ສະມາຊິກສະພາປະຊາຊົນຂັ້ນແຂວງໄປຍັງ ຄະນະກໍາມະການເລືອກຂັ້ນແຂວງ ເພື່ອສັງລວມ  ແລະ ປະກາດຜົລຢ່າງເປັນທາງການ.

ການເລືອກຕັ້ງສະມາຊິກສະພາແຫ່ງຊາດ ຊຸດທີ 9 ມີຜູ້ສມັກເລືອກຕັ້ງທັງໝົດ 224 ຄົນ, ໃນນັ້ນເລືອກເອົາ 164 ຄົນ ແລະການ ເລືອກຕັ້ງສະມາຊິກ ສະພາປະຊາຊົນຂັ້ນແຂວງ ມີຜູ້ສມັກຮັບເລືອກຕັ້ງ ທັງໝົດ 789 ຄົນ, ໃນນັ້ນ ເລືອກເອົາ 492 ຄົນ.

ໃນການເລືອກຕັ້ງສະມາຊິກສະພາຊຸດ ນີ້ ມີຜູ້ມີສິດ ປ່ອນບັດ ເລືອກຕັ້ງ ທັງໝົດ ປະມານ 4,200,000 ຄົນ.

Anonymous says:
Feb 24, 2021 12:17 PM

ການເລືອກຕັ້ງ ສະມາຊິກສະພາແຫ່ງຊາດແລະສະພາແຂວງເທື່ອນີ້ ມີການໂຄສະນາອອກທາງສື່ຫລັກແລະສື່ສັງຄົມຢ່າງຄຶກຄັກ ຜູ້ແທນຊຸດນີ້ ມີໃບຫນ້າໃຫມ່ຫລາຍ ສ່ວນຫນ້າເກົ່າ ທີ່ມີການຕຳນິພັກລັດ ຫລາຍຄົນກໍບໍ່ໄດ້ລົງສະຫມັກ ເພາະພວກເພິ່ນກໍອອກກິນບຳນານ. ຫວັງວ່າ ຜູ້ແທນຊຸດໃຫມ່ ຈະຟັງສຽງຂອງປະຊາຊົນ ໄດ້ນຳໄປສະເຫນີໃຫ້ສະພາ ໂດຍບໍ່ຢ້ານວ່າ ຈະແຕະຕ້ອງການນຳ ຫລືວ່າ ແຕະຕ້ອງຜູ້ໃດຜູ້ນຶ່ງ ທີ່ຍັງໃຊ້ອຳນາດສໍ້ໂກງ. ແຕ່ເທົ່າທີ່ເບິ່ງຕາມລາຍຊື່ຜູ້ແທນ ກໍຍັງບໍ່ທັນເຫັນບົດບາດແລະຜົນງານ ໃນລະຍະຜ່ານມາພໍເທົ່າໃດ. ໃນເວລານີ້ ບ້ານເມືອງແຮ່ງລຳບາກ ເສດຖະກິດຝືດເຄືອງ ຍ້ອນໂຄວິດລະບາດ ຢາກໃຫຜູ້ແທນນຳສະເຫນີເລື້ອງປາກທ້ອງແລະການແກ້ໄຂບັນຫາເສດຖະກິດ ໃຫ້ປະຊາຊົນຫລາຍໆ ປະ​ຊ​າ​ຊົນ​ບໍ່​ໄດ້​ຮັບ​ຄວາມ​ເປັນ​ທຳ ຄ່າ​ຊົດ​ເຊີຍ​ທີ່​ສູນ​ເສຍ​ທີ່​ດິນ​ ຂອງ​ເຂົາ​ໃຈ​ໃຫ້​ໂຄງ​ການ​ພັດ​ທະ​ນາ ປະ​ຊາ​ຊົນ​ບໍ່​ມີ​ທີ່​ທຳ​ກິນໃນ​ແຜ່ນ​ດິນ​ເກີດ​ຂອງ​ຕົນ ທັ້ງໆ​ທີ່​ປະ​ເທດ​ລາວ​ມີ​ດິນດອນ​ກ້ວງ​ໃຫ​ຍ່​ໄພ​ສານ ອັນ​ນີ້​ຜູ້​ແທນ​ຄວນ​ຂົນ​ຂວາຍ​ຊອກ​ຫາ​ແລະ​ແກ້​ໄຂ​ບັນ​ຫາ. ຂອບໃຈ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ