ຄຣູອາສາ 16 ຄົນໄດ້ເປັນ ຣັຖກອນ

ສິດນີ
2018-06-08
ອີແມວລ໌
ຄໍາເຫັນ
Share
ພິມ
ຫ້ອງການຜແນກສຶກສາທິການ ແລະ ກິລາ ແຂວງຫຼວງນໍ້າທາ
ຫ້ອງການຜແນກສຶກສາທິການ ແລະ ກິລາ ແຂວງຫຼວງນໍ້າທາ
RFA/VD

ຄຣູອາສາສມັກ ແຂວງຫລວງນໍ້າທາຈຳນວນນຶ່ງ ຖືກບັນຈຸເຂົ້າເປັນຣັຖກອນແລ້ວ ຫລັງຈາກໄດ້ເປັນຄຣູອາສາສມັກ ມາເປັນເວລາສາມປີ, ເປັນຕົ້ນທີ່ ເມືອງສິງ ຄຣູອາສາສມັກ ໄດ້ເຂົ້າເປັນຄຣູຖາວອນ ທັງໝົດແລ້ວ 16 ຄົນ, ໃນນັ້ນມີຜູ້ຍິງ 7 ຄົນ.

ໃນເວລາເປັນຄຣູອາສານັ້ນ ຄຣູສອນເຫລົ່ານີ້ ບໍ່ໄດ້ຮັບເງິນເດືອນ ຈາກຣັຖບານເລີຍ ໄດ້ແຕ່ເງິນເບັ້ຽລ້ຽງ 3 ແສນກີບຕໍ່ເດືອນ ທີ່ອຳນາດ ການປົກຄອງບ້ານ ແລະພໍ່ແມ່ ປະຊາຊົນພາຍໃນບ້ານ ທີ່ຄຣູອາສາສອນ ຢູ່ເກັບເງິນກັນເອງ ແລ້ວຈ່າຍໃຫ້ພວກເຂົາ. ດັ່ງຄຳເວົ້າຂອງ ຄຣູອາສາສມັກ ທ່ານນຶ່ງກ່າວຕໍ່ວິທຍຸເອເຊັຽເສຣີ ໃນມື້ວັນທີ 6 ມີຖຸນານີ້ວ່າ:

“ເລີ່ມເປັນຄູອາສານີ້ມາໄດ້ 3 ປີແລ້ວເລີ່ມແຕ່ປີ 2015 ຫາ 2018 ນີ້ແຫຼະ 3 ປີຕອນເປັນຄູອາສາເຮົາສອນ ຂຶ້ນກັບບ້ານໃດ ແມ່ນບ້ານນັ້ນ ຈະເປັນຜູ້ຈ່າຍໃຫ້ ອິງໃສ່ຂໍ້ຕົກລົງ ຂອງເຈົ້າເມືອງ ໃຫ້ບ້ານທີ່ເຮົາໄປສອນເປັນຜູ້ຈ່າຍໃຫ້ ຕອນເປັນຄູອາສາເງິນເດືອນ ພຽງແຕ່ 3 ແສນ ນີ້ ແມ່ນເຮົາພຽງແຕ່ ໃສ່ນໍ້າມັນລົດ ມາໂຮງຮຽນຫລື ວ່າທຽວມາການ ເທົ່ານັ້ນສ່ວນອັນອື່ນ ຍັງໄດ້ຂໍພໍ່ແມ່ຈ່າຍຢູ່ ແຕ່ວ່າຄັນໄດ້ເຂົ້າລັດຖະກອນ ແລ້ວມັນກະຈະ ລຸດຜ່ອນລາຍຈ່າຍ ຂອງພໍ່ແມ່ ເພາະວ່າເງິນເດືອນເຮົາ ກະເພີ້ມຂຶ້ນ ກະຫລາຍສົມ ຄວນຖ້າທຽບໃສ່ 3 ແສນຂອງອາສາ ໃນເມື່ອກ່ອນ ແຕ່ວ່າຄັນຊິ ໃຫ້ພໍກິນແທ້ມັນກະບໍ່ພໍ ແຕ່ວ່າມັນກະຫລຸດຜ່ອນ ລາຍຈ່າຍຂອງຄອບຄົວ ໄປຫລາຍເຕີບ.”

ທ່ານວ່າກ່ອນຈະໄດ້ເຂົ້າເປັນພະນັກງານຣັຖກອນນັ້ນ ຄຣູອາສາສມັກບາງຄົນໄດ້ຈ່າຍເງິນຊື້ຈ້າງ ເພື່ອໃຫ້ໄດ້ເຂົ້າເປັນຣັຖກອນ. ດັ່ງຄຳເວົ້າ ຂອງຄຣູອາສາສມັກ ຜູ້ນຶ່ງທີ່ບໍ່ປະສົງ ອອກຊື່ແລະສຽງ ຕໍ່ວິທຍຸເອເຊັຽເສຣີ ໃນຕອນນື່ງວ່າ:

“ມັນເປັນທຳນຽມປະເພນີມັນແລ້ວ ຖ້າຜູ້ໃດຢາກເຂົ້າເປັນຣັຖກອນ ບໍ່ວ່າຂແນງໃດແມ່ນຈະຕ້ອງໄດ້ຈ່າຍເງິນໝົດ ອີງຕາມໜ້າວຽກ ຄືຄຣູ ນິຊິວ່ານ້ອຍກະບໍ່ນ້ອຍຊິວ່າຫຼາຍກະບໍ່ຫຼາຍ ແຕ່ຖ້າທຽບໃສ່ເຮົານີ້ມັນກະຫຼາຍສົມຄວນ ຖານະເຮົາກະບໍ່ແມ່ນຄົນມີ ຖ້າເຮົາບໍ່ຈ່າຍ ເຮົາກະຊິ ບໍ່ມີລາຍຊື່ນຳເຂົາ.”

ແຂວງຫລວງນ້ຳທາ ມີຄູອາສາສມັກທັງໝົດ 200 ປາຍຄົນ, ຄຣູອາສາ ຕ້ອງສອນໜັງສື ຢ່າງນ້ອຍເປັນເວລາສາມປີ ກ່ອນຈະໄດ້ເປັນ ຣັຖກອນ ເຊິ່ງໃນປີນີ້ ທົ່ວແຂວງຫລວງນໍ້າທາ ມີຄຣູອາສາໄດ້ເຂົ້າເປັນຣັຖກອນ ທັງໝົດແລ້ວ 69 ຄົນ.

ຄໍາເຫັນ (1)
Share

khon lao tar khao

ຈາກ opened mind

ຂໍຖາມແນ່ ພຸດທະສາດສະຫນານີ້ ເຮັດຫຍັງແນ່ໃຫ້ສັງຄົມ ເຮັດຫຍັງແນ່ທິປັບປຸງ ໃຫ້ມະນຸດມີຊິວິດຊິວາດີຂື້ນ ເຮົາຂໍເວົ້າຄວາມຈິງ ເຮົາໄປວັດເຮົາບໍ່ເຄີຍໄດ້ຫຍັງຫມົດ ບໍ່ໄດ້ໄດ້ຄວາມຮູ້ບໍ່ໄດ້ໄດ້ຄວາມສະຫລາດ ຮອດບໍ່ເຂົ້າໃຈຊຳ້ວ່າຍາຄູເວົ້າຫຍັງ ອີກຢ່າງເຮົາບໍ່ເຄີຍເຫັນສາດສະຫນາພຸດຊ່ວຍຄົນທຸກຄົນຍາກ ມັນແນວໃດກັນຫວະ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jun 11, 2018 12:27 PM

ເຕັມຫນ້າ