ມ.ຊຽງເງິນຂາດອຸປກອນການຮຽນ ການສອນ

ສິດນີ
2017-10-19
ອີແມວລ໌
ຄໍາເຫັນ
Share
ພິມ
ເດັກນ້ອຍນັກຮຽນ ໃນເຂດຊົນນະບົດ ທີ່ເມືອງຊຽງເງິນ ຍັງຂາດອຸປກອນ ການຮຽນການສອນຢູ່ ເປັນຕົ້ນບ້ານຫ້ວຍຮາວ
ເດັກນ້ອຍນັກຮຽນ ໃນເຂດຊົນນະບົດ ທີ່ເມືອງຊຽງເງິນ ຍັງຂາດອຸປກອນ ການຮຽນການສອນຢູ່ ເປັນຕົ້ນບ້ານຫ້ວຍຮາວ
RFA/PN

ເດັກນ້ອຍນັກຮຽນ ໃນເຂດຊົນນະບົດ ທີ່ເມືອງຊຽງເງິນຫລາຍບ້ານຍັງຂາດ ອຸປກອນການຮຽນການສອນ ຢູ່ ເປັນຕົ້ນບ້ານຫ້ວຍຮາວ ແລະ ບ້ານໃກ້ຄຽງ ນອກຈາກຂາດປື້ມຮຽນ ປື້ມສອນແລ້ວ ບາງແຫ່ງຍັງຂາດຫ້ອງຮຽນ ຕ້ອງໄດ້ສອນກັນໃນໂຮງຮຽນແອອັດ ທີ່ເປ່ເພໃນແຕ່ລະມື້. ດັ່ງພໍ່ບ້ານຫ້ວຍຮາວ ເມືອງຊຽງເງີນ ກ່າວໃນວັນທີ 18 ຕຸລາ ນີ້ວ່າ:

"ຕອນນີ້ຢາກໄດ້ເປັນເຄື່ອງນັກຮຽນ ແລ້ວກໍເປັນເຄື່ອງກິລາມີນັກຮຽນ 96 ນາຍຄູ 4 ເປັນອາສາສມັກ 2 ກິນເງິນເດືອນ 2 ສະພາບໂຮງຮຽນ ນັ້ນຈະປັນຝາໄມ້ເຮັ້ຽ ຊຸດໂຊມຫລາຍ ແລ້ວກໍປູພື້ນນັ້ນ ກໍຍັງບໍ່ໄດ້ເທ ເປັນດິນແດງ ເປັນຂຸມຢູ່ຫັ້ນຫນ່າ"

ທ່ານກ່າວຕື່ມວ່າ ສິ່ງທີ່ທາງໂຮງຮຽນຕ້ອງການ ຫລາຍທີ່ສຸດ ແມ່ນປື້ມຮຽນ ຕຳຣາຮຽນ ປື້ມຂຽນ ສາດປູນັ່ງ ໃນປັດຈຸບັນ ມີປື້ມຕຳຣາຮຽນບໍ່ ຮອດ 5 ເຫຼັ້ມ ຕໍ່ນັກຮຽນນຶ່ງຫ້ອງ ເປັນການສອນທີ່ຊັກຊ້າ ແລະດົນນານຕ້ອງໄດ້ກ່າຍກັນ ໃນບົດຮຽນບົດນື່ງ. ນອກຈາກນັ້ນ ເຄື່ອງນຸ່ງຫົ່ມ ຂອງນັກຮຽນ ຊຸດນັກຮຽນ ເກີບ ກໍຍັງຂາດເຂີນ ແລະທຸກມື້ນີ້ ເດັກນ້ອຍມາຮຽນ ກໍບໍ່ມີເກີບໃສ່.

ໂຮງຮຽນປະຖົມບ້ານຫ້ວຍຮາວ ເລີ້ມຈາກຊັ້ນ ປ1 ຫາ ປ5 ມີນັກຮຽນທັງຫມົດ 96 ຄົນ ມີອາຄານຮຽນນຶ່ງຫລັງ ແຍກເປັນສີ່ຫ້ອງ 4 ຫ້ອງ ສຳລັບ ປ1 ຫາ ປ5 ມີ 3 ຫ້ອງແລະຫ້ອງນຶ່ງ ສຳລັບຊັ້ນອະນຸບານ ມີສະພາບເປ່ເພຫລາຍ ໃນຫ້ອງຮຽນ ຍັງເປັນພື້ນດິນ ຕ້ອງໄດ້ປູສາດ ນັ່ງພື້ນຮຽນ.

ຍ້ອນຄວາມທຸກຍາກ ແລະເປັນບ້ານຊົນເຜົ່າ ຫ່າງຈາກເມືອງຊຽງເງິນ ປະມານ 30 ກິໂລແມັດປາຍ ຖນົນຫົນທາງເຂົ້າໄປບ້ານ ກໍລຳບາກ ການຊ່ອຍເຫລືອ ຈາກຣັຖບານ ກໍບໍ່ຄ່ອຍມີ. ຖ້າມີການເຈັບໄຂ້ ກໍບໍ່ສາມາດ ເຂົ້າໄປປີ່ນປົວ ຢູ່ໂຮງພຍາບານຢູ່ໃນເມືອງ ໄດ້ທັນເວລາ.

ເຕັມຫນ້າ