ນັກຂ່າວລາວຕ້ອງຍົກ ຣະດັບ: ວຽງຈັນທາມສ

ສຸພັດຕາ
2019-05-03
ອີແມວລ໌
ຄໍາເຫັນ
Share
ພິມ
ສື່ມວລຊົນ ໃນລາວ
ສື່ມວລຊົນ ໃນລາວ
ຮູບພາບຈາກ : ຫົວໜ່ວຍສາທາຣະນະ

ວັນທີ 3 ພຶສພາ ຂອງທຸກປີເປັນວັນ “ເສຣີພາບສື່ມວລຊົນໂລກ” ໃນໂອກາດນີ້ ທ່ານ ພອນແກ້ວ ວໍລະກຸນ ຮອງຫົວໜ້າບັນນາທິການ ຂ່າວ ໜັງສືພິມ ວຽງຈັນທາມສ ກ່າວຕໍ່ ວິທຍຸເອເຊັຽເສຣີ ໃນວັນທີ 3 ພຶສພາ ນີ້ວ່າ, ນັກຂ່າວລາວ ຕ້ອງການຍົກຣະດັບ ຄວາມຮູ້ຄວາມສາມາດ ໃນການນໍາສເນີຂ່າວ ໃຫ້ມີຄວາມຫຼາກຫຼາຍ ເພື່ອຍົກຣະດັບ ຄຸນນະພາບ, ມາຕຖານຂອງສື່ມວລຊົນໃນລາວ ໃຫ້ເທົ່າທຽມກັບຕ່າງປະເທດ:

“ຄັນວ່າ, ກໍຢາກຍົກຣະດັບ ເຣື່ອງຄວາມສາມາດ ຂອງນັກຂ່າວເຮົາເອງ ຢາກພັທນາແນວໃດ ເຮົາໃນຖານະຂອງນັກຂ່າວນີ້ ຈະສາມາດ ຕອບສນອງ ຄວາມຮຽກຮ້ອງຕ້ອງການຂອງສັງຄົມ ດ້ານຂໍ້ມູນຂ່າວສານ ໄດ້ຫຼາຍປານໃດນັ້ນ ມັນຂຶ້ນກັບ ຄວາມສາມາດ ຂອງອົງການ ຂ່າວ ແຕ່ລະບ່ອນເອງ.”

ທ່ານກ່າວວ່າ ການເຮັດວຽກສື່ມວນຊົນໃນລາວ ມີກົດໝາຍຄຸ້ມຄອງນັກຂ່າວທຸກຄົນ ນັກຂ່າວມີສິດແລະເສຣີພາບ ໃນການນໍາສເນີຂ່າວ ໃນທຸກປະເດັນ ຕາມຂໍ້ມູນ ແລະ ຂໍ້ມູນຄວາມຈິງ ທີ່ເກີດຂຶ້ນ ຫຼືແມ້ແຕ່ ການສະແດງຄວາມຄິດ ຄວາມເຫັນ ກໍສາມາດເຮັດໄດ້ ຢ່າງເສຣີ ບໍ່ມີການຈໍາກັດ ສິດ-ເສຣີພາບ ຂອງນັກຂ່າວ ແຕ່ຢ່າງໃດ:

“ຄິດວ່າ ກໍມີເສຣີພາບການຂຽນຂ່າວ ເພາະວ່າເຮົາມີກົດໝາຍ ສື່ມວລຊົນເນາະ ທີ່ຣະບຸໄວ້ວ່າ ສື່ມວນຊົນນີ້ ເສຣີພາບໃນການນໍາສເນີຂ່າວ ໃນການສະແດງຄວາມຄິດຄວາມເຫັນຕ່າງໆ ເຂົ້າກັບປັນຫາຕ່າງໆ.”

ໃນຂນະທີ່ ສື່ມວນຊົນທ້ອງຖິ່ນ ແຂວງອັດຕະປື ເວົ້າວ່າ ການນໍາສເນີປະເດັນຂ່າວ ໃນແຕ່ລະເທື່ອນັ້ນ ຍັງຕ້ອງນໍາສເນີໄປຕາມຄໍາສັ່ງ ຂອງ ເມືອງແລະແຂວງ ແລ້ວຍັງຖືກກວດສອບເນື້ອຫາ ຂອງ ຂ່າວກ່ອນ ກ່ອນທີ່ຈະຖືກນໍາສເນີ ໃຫ້ສັງຄົມຮັບຮູ້, ຊຶ່ງສ່ວນຫຼາຍຈະເປັນຂ່າວ ໃນເຣື່ອງທີ່ດີ ບໍ່ການນໍາສເນີຂ່າວທາງລົບ:

“ເນື້ອໃນຂ່າວໃຫ້ຄົມຊັດ ກວ່າທີ່ຜ່ານມາ ບໍ່ແມ່ນຊິຂຽນແບບຂ່າວ ແບບວິຊາການ ແບບຕາຍໂຕ ໃຫ້ມີລັກສນະແຕກຕ່າງໄປເລື້ອຍໆ ແຕ່ວ່າ ຂໍ້ມູນຄົບຖ້ວນ ອາຈໄດ້ ແຕ່ວ່າ ອາຈຕ້ອງຜ່ານປະທານ ຜູ້ຊີ້ນໍາ, ຄື ເຈົ້າເມືອງ, ເຈົ້າແຂວງ ອະນຸຍາດໃຫ້ເປີດເຜີຍ ເຖິງຈະເປີດເຜີຍໄດ້.”

ອົງການຂ່າວ ບໍ່ມີພົມແດນເປີດເຜີຍດັຊນີ ເສຣີພາບຂອງສື່ມວນຊົນ ໃນປະເທດລາວ ວ່າຍັງບໍ່ມີສິດເສຣີພາບ ໃນການປາກເວົ້າອອກຂ່າວ ແລະຍັງຢູ່ໃນອັນດັບເດີມ ຈາກປີຜ່ານມາ ໂດຍຢູ່ໃນອັນດັບ ທີ 171 ຈາກທັງໝົດ 180 ປະເທດ ໃນທົ່ວໂລກ.

ເຕັມຫນ້າ