ທາງການລາວຕ້ອງສືບສວນເຣື້ອງ ທ. ສົມບັດ


2013-12-17
Share
F-default ທາງການລາວຕ້ອງສືບສວນເຣື້ອງ ທ. ສົມບັດ
RFA

 

ກຸ່ມນັກຊ່ຽວຊານອິສຣະດ້ານສິດທິມະນຸດສະຫະປະຊາຊາຕ ໃນວັນທີ່ 16 ທັນວາ 2013 ນີ້ ໄດ້ອອກຖແລງການຮຽກຮ້ອງຣັຖບານລາວສືບ ສວນການບັງຄັບໃຫ້ຫາຍສາບສູນ ຂອງທ່ານ ສົມບັດ ສົມພອນ ນັກພັທນາຊຸມຊົນລາວ ເມື່ອນຶ່ງປີຜ່ານມາ ໃຫ້ຄັກແນ່. ກຸ່ມເຮັດວຽກໃນສະ ຫະປະຊາຊາຕກ່ຽວກັບການບັງຄັບໃຫ້ຫາຍສາບສູນກ່າວໃນຖແລງການວ່າ: “ພວກຕົນມີຄວາມເປັນຫ່ງຢ່າງເລິກເຊິ່ງນໍາຄວາມປອດພັຍ ຂອງ ທ່ານ ສົມບັດ ສົມພອນ.

ຂໍຮຽກຮ້ອງໃຫ້ຣັຖບານລາວເຮັດສຸດຄວາມສາມາດ ເພື່ອຊອກຫາທ່ານສົມບັດເພື່ອຢາກຮູ້ຈັກໂຊກຊະຕາກັມແລະຄວາມເປັນຢູ່ຂອງທ່ານ ແລະ ເອົາໂຕຜູ້ທີ່ບັງຄັບໃຫ້ຫາຍສາບສູນນັ້ນມາລົງໂທດ. ນັກຊ່ຽວຊານ ໃຫ້ຂໍ້ສັງເກດວ່າຕາມທີ່ໄດ້ຮັບລາຍງານເພີ້ມຕື່ມນັ້ນ ທ່ານ ສົມບັດສົມພອນ ຖືກກັກໂຕໄວ້ຢູ່ສະຖານີຕໍາຣວດຫຼັງຈາກມີລາຍງານການແຈ້ງຫາຍສາບສູນ. ສອງສາມວັນຫຼັງຈາກຫາຍສາບສູນແລ້ວຍັງເຫັນທ່ານ ສົມພອນ ຢູ່ໃນຫ້ອງຂັງ ຂອງສະຖານີຕໍາຣວດຢູ່ ພ້ອມທັງຣົດຂອງລາວ ຈອດໄວ້ຢູ່ບໍຣິເວນສະຖານີຕໍາຣວດແລະຕໍ່ມາອີກ 2-3 ວັນ ລາຍງານວ່າ ລາວ ຖືກຍ້າຍໄປຢູ່ຄ້າຍທະຫານນອກໂຕເມືອງນະຄອນຫລວງ ວຽງຈັນ ແລະນຶ່ງອາທິດຕໍ່ມາ ລາວໄດ້້ຖືກຍ້າຍໄປບ່ອນອື່ນທີ່ບໍ່ຮູ້ວ່າຢູ່ບ່ອນໃດ.

ມີລາຍງານຕື່ມວ່າ ສອງສາມວັນຕໍ່ມາເຈົ້າໜ້າທີ່ທາງການກ່ຽວຂ້ອງໄດ້ເວົ້າວ່າ ທ່ານ ສົມບັດ ຈະຖືກປ່ອຍ. ນັກຊ່ຽວຊາກ່າວຕື່ມວ່າມີລາຍງານ ວ່າຮູບພາບວີດີໂອຈາກກ້ອງວົງຈອນປິດທີ່ບັນທຶກໄວ້ໃນເວລາຖືກລັກ ພາໂຕໄປໃນວັນທີ່ 15 ທັນວາ 2012 ນັ້ນບໍ່ໄດ້ຖືກນໍາມາວິເຄາະໂດຍ ຫນ່ວຍງານອິສຣະ.

ມາດາມ Magaret Sekarggya  ນັກຊ່ຽວຊານລາຍງານສະພາບສິດທິມະນຸດກ່າວວ່າ: ‘ຜົນງານຂອງຜູ້ທີ່ທໍາຄຸນງາມຄວາມດີຕໍ່ຊຸມຊົນຄວນ ໄດ້ຮັບການເຄົາຣົບຢໍາເກງຢ່າງເຕັມສ່ວນ. ການຫາຍສາບສູນຂອງທ່ານ ສົມບັດສົມພອນ ອາດມີຜົນກະທົບເຮັດໃຫ້ຜູ້ຕໍ່ສູ້ເພື່ອສິດທິມະນຸດ ໃນ ປະເທດນັ້ນມີຄວາມຢ້ານກົວ. ທ່ານ Maina Kiai  ນັກຊ່ຽວຊານດ້ານເສຣີພາບ ແລະການໂຮມຊຸມນຸມແບບສັນຕິຮຽກຮ້ອງໃຫ້ທາງການລາວ ໃຫ້ຄວາມຮ່ວມມືຢ່າງເຕັມສ່ວນ ກັບສະພາສິດທິມະນຸດ ແລະນັກຊ່ຽວຊານ ແລະສະແດງຄວາມເສັຽໃຈ ທີ່ຣັຖບານບໍ່ຕອບສນອງ ຄໍາຮຽກຮ້ອງ ຂອງທ່ານ ທີ່ຂໍໄປຢ້ຽມຢາມລາວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ