ເມືອງແລະແຂວງປະຕິບັດ ຄໍາສັ່ງ ປິດເມືອງ

ສຸພັດຕາ
2020-04-15
ອີແມວລ໌
ຄໍາເຫັນ
Share
ພິມ
ເຈົ້າໜ້າທີ່ ເມືອງຫາດຊາຍຟອງ ປິດການສັນຈອນໄປມາ
ເຈົ້າໜ້າທີ່ ເມືອງຫາດຊາຍຟອງ ປິດການສັນຈອນໄປມາ
ພາບຈາກ : ວີດີໂອ ໂທຣະທັສ ນະຄອນຫຼວງວຽງຈັນ

ແຂວງໄຊຍະບູຣີ ໄດ້ປິດການເຂົ້າ-ອອກ ຊົ່ວຄາວ ຣະຫວ່າງ ແຂວງຕໍ່ແຂວງ ແລະເມືອງຕໍ່ເມືອງ, ຜູ້ໃດຈະເຂົ້າ-ອອກ ຕ້ອງມີເອກກະສານ ຈາກທາງການອະນຸຍາດຢ່າງຖືກຕ້ອງ, ພ້ອມດຽວກັນນັ້ນເຈົ້າໜ້າທີ່ ທ້ອງຖິ່ນ ຍັງໄດ້ກວດກາເວນຍາມ ເພື່ອກວດກາການເຂົ້າ-ອອກຂອງ ປະຊາຊົນ ແລະ ຈະປັບໃໝ ຖ້າມີການຊຸມນຸມກັນເກີນ 10 ຄົນຂຶ້ນໄປ ຮວມທັງການຕັ້ງດ່ານ ສີດຢາຂ້າເຊື້ອໂຣຄ ສໍາລັບຣົດເຂົ້າ-ອອກ ຕາມດ່ານ ເພື່ອຫຼຸດຜ່ອນຄວາມສ່ຽງ ການແຜ່ຣະບາດຂອງເຊື້ອໄວຣັສ ໂຄວິດ-19, ອີງຕາມຄໍາເວົ້າຂອງ ເຈົ້າໜ້າທີ່ ແຂວງໄຊຍະບູຣີ ຕໍ່ ວິທຍຸເອເຊັຽເສຣີ ໃນວັນທີ 6 ເມສານີ້:

“ແລ້ວກໍປິດບໍ່ໃຫ້ຄົນໄປຫາກັນຢູ່ເມືອງ ພາຍໃນແຂວງ ແມ່ນແຫຼະ ເຮົາກໍບໍ່ຢາກໃຫ້ໄປມາຫາສູ່ກັນຫຼາຍ ເພິ່ນເວົ້າຕາມນັ້ນ ແຕ່ຂະເຈົ້າບໍ່ໄດ້ ຊຸມນຸມຫຍັງກັນຫຼາຍແລ້ວ ຂະເຈົ້າກໍປະຕິບັດຕາມແຈ້ງການ ຈໍາເປັນກໍຕ້ອງໄດ້ເອົາເອກກະສານມາຢັ້ງຢືນ.”

ທ່ານກ່າວຕື່ມວ່າ ມາຕການດັ່ງກ່າວນັ້ນ ແມ່ນໃຫ້ເຣີ້ມປະຕິບັດ ຕັ້ງແຕ່ວັນທີ 5 ເມສາ ເປັນຕົ້ນໄປ ຈົນກວ່າວ່າ ຈະມີແຈ້ງການອອກມາໃໝ່, ຍົກເວັ້ນຄະນະສະເພາະກິຈ ເພື່ອປ້ອງກັນ ແລະແກ້ໄຂການຣະບາດ ຂອງເຊື້ອໄວຣັສໂຄວິດ-19 ແລະໃນກໍຣະນີ ພາຫະນະຂົນສົ່ງສິນຄ້າ ທີ່ມີໃບຢັ້ງຢືນຈາກພາກສ່ວນກ່ຽວຂ້ອງ ຈຶ່ງສາມາດເດີນທາງເຂົ້າ-ອອກໄດ້.

ໃນຂນະດຽວກັນ ເຈົ້າໜ້າທີ່ເມືອງໂພນໂຮງ ແຂວງວຽງຈັນ ທ່ານນຶ່ງກໍເວົ້າວ່າ ທາງເມືອງໄດ້ແຈ້ງໃຫ້ຫົວໜ້າກຸ່ມບ້ານ ພາຍໃນເມືອງ ໃນ ຈໍານວນ 6 ກຸ່ມບ້ານ ທີ່ປະກອບດ້ວຍ 59 ບ້ານ ຕິດຕາມກວດກາ ປະຊາຊົນ ພາຍໃນບ້ານຂອງໂຕເອງ ແລະຫ້າມບໍ່ໃຫ້ສັນຈອນໄປ-ມາ ໃຫ້ກັກໂຕຢູ່ເຮືອນໃຜລາວ ຫ້າມຕັ້ງວົງຊຸມແຊວ ຢູ່ແຕ່ລະເຮືອນ ຍົກເວັ້ນເຮືອນດີ ຫຼືວຽກງານທີ່ຈໍາເປັນແທ້ໆ ໃຫ້ມີການປ້ອງກັນ ເວນຍາມ ຢ່າງເຂັ້ມງວດຕລອດ 24 ຊົ່ວໂມງ ເຣີ້ມແຕ່ວັນທີ 5 ເມສາ ເປັນຕົ້ນໄປ ຈົນກວ່າສະພາບການຈະເຈົ້າສູ່ສະພາວະປົກກະຕິ:

“ບໍ່ໃຫ້ຄົນເຂົ້າອອກ ຄັນບໍ່ມີວຽກຈໍາເປັນແທ້ໆ ແມ່ນບໍ່ໃຫ້ໄປອັນມັນບໍ່ຈໍາເປັນ ລະແມ່ນອັນນຶ່ງການຕາຍເນາະ ໄປໂຮງໝໍບໍ ໄປການມາການ ບໍ, ເພິ່ນປ່ອຍອັນນີ້ນະ ຍົກຕົວຢ່າງວ່າ ເມືອງຕໍ່ເມືອງ ເພິ່ນຢູ່ສົ້ນບ້ານ ສົ້ນເມືອງ.”

ທ່ານກ່າວຕື່ມວ່າ ສໍາລັບປະຊາຊົນ ກຸ່ມບ້ານໃໝ່ ຈໍານວນ 3 ຄົນ ຊຶ່ງເປັນໝູ່ຮັກແພງ ຂອງຄົນຕິດເຊື້ອໄວຣັສໂຄວິດ-19 ຄົນທີ່ 11 ໃນ ລາວນັ້ນແມ່ນໄດ້ຖືກກັກໂຕຢູ່ເຮືອນ 14 ມື້ເພື່ອເບິ່ງອາການວ່າພວກຂະເຈົ້າ ຈະຕິດເຊືິ້ອໄວຣັສໂຄວິດ-19 ຫຼືບໍ່, ສໍາລັບຄົນງານລາວ ທີ່ ຂ້າມແດນມາຈາກໄທ 100 ປາຍຄົນ, ໃນນັ້ນ ຈໍານວນນຶ່ງ ໄດ້ຖືກປ່ອຍໂຕກັບເມືອເຮືອນ, ພາຍຫຼັງກວດບໍ່ພົບອາການພາຍໃນ 14 ມື້, ອີກຈໍານວນນຶ່ງ ຍັງເຝົ້າເບິ່ງອາການຢູ່ສູນກັກໂຕຊົ່ວຄາວ.

ເຈົ້າໜ້າທີ່ເມືອງສີໂຄດຕະບອງ ນະຄອນຫຼວງວຽງຈັນກ່າວວ່າ ເມືອງສີໂຄດຕະບອງມີຜູ້ຕິດເຊື້ອໄວຣັສໂຄວິດ-19 ຫຼາຍກວ່າໝູ່ຄື, ຈໍານວນ 4 ຄົນ ຢູ່ບ້ານຈັນສະຫວ່າງ, ບ້ານຫ້ວຍຫ້ອມ, ບ້ານຈໍາປາ ແລະ ໜອງສະໂນຄໍາ ຈາກທັງໝົດ 12 ຄົນ ເຮັດໃຫ້ອໍານາດການປົກຄອງ ເມືອງ ສີໂຄດຕະບອງ ຕ້ອງປິດການສັນຈອນ ແລະຕັ້ງຈຸດກວດກາ 7 ຈຸດທົ່ວເມືອງ ຕັ້ງແຕ່ວັນທີ 4 ເມສາ ເປັນຕົ້ນມາ, ຖ້າຫາກພົບ ເຫັນຜູ້ໃດ ບໍ່ກັກໂຕຢູ່ເຮືອນ ຫຼືເດີນທາງເຂົ້າ-ອອກ ປາສຈາກເອກກະສານຢັ້ງຢືນ ຈາກທາງການຈະຖືິກຕັກເຕືອນ ແລະເຮັດບົດບັນທຶກເປັນທາງການ:

“ໂອ້ຫຼາຍ ເມືອງສີໂຄດລ້າໆຍັງມີ  7 ດ່ານ ຖ້າເຈົ້າຊິອອກຕ່າງແຂວງນີ່ຕ່າງແຂວງ ເຂົາເຈົ້າກໍບໍ່ຢາກໃຫ້ຜ່ານແຂວງເລີຍນະ ແຕ່ລະທາງເຂົ້າ ບ້ານ ຂະເຈົ້າກໍມີດ່ານຂອງຂະເຈົ້າອີກຕ່າງຫາກຫັ່ນນະ.”

ທ່ານກ່າວຕື່ມວ່າ ສ່ວນຍາດພີ່ນ້ອງຂອງຜູ້ຕິດເຊື້ອ ໄວຣັສໂຄວິດ-19 ນັ້ນ ແມ່ນໃຫ້ກັກໂຕເອງຢູ່ເຮືອນໃຜລາວ 14 ມື້ ຕາມຄໍາແນະນໍາຂອງ ເຈົ້າໜ້າທີ່. ໃນຂນະທີ່ ປະຊາຊົນຢູ່ບ້ານນາເລົ່າ ເມືອງສີໂຄດຕະບອງ ຜູ້ນຶ່ງເວົ້າວ່າ ປັດຈຸບັນ ປະຊາຊົນພາຍໃນບ້ານ ໄດ້ກັກໂຕເອງຢູ່ໃນ ເຮືອນເຖິງ 60-70%, ຍົກເວັ້ນຜູ້ໃດຈໍາເປັນຕ້ອງໄດ້ອອກເຮືອນ ໄປຊື້ອາຫານການກິນ ຫຼືໄປໂຮງໝໍ ຕ້ອງໄດ້ໃສ່ຜ້າອັດປາກອັດດັງ ອອກໄປ ແລະຕ້ອງມີເຈວລ້າງມື ເພື່ອປ້ອງກັນການແຜ່ຣະບາດ ຂອງເຊື້ອໄວຣັສໂຄວິດ-19 ຕາມການໂຄສະນາຂອງທາງການ:

“60-70% ນິ່ ກັກໂຕເອງຢູ່ເຮືອນ ພຽງແຕ່ວ່າ ບາງຄົນໄປຊອກຊື້ອາຫານການກິນຫັ່ນນະ ຄວາມສະດວກຫຼາຍໆຢ່າງ ປະເທດລາວ ມັນບໍ່ ພ້ອມເດ້ ເວົ້າເຣື້ອງ ບໍ່ມີເງິນ ຄົນນິ່ນາ ແລ້ວແບບຮ້ານສະດວກຊື້ບໍ ຮ້ານອອນລາຍບໍ່ຫຼາຍ ສັ່ງອອນລາຍ ໂອນເງິນອອນລາຍ ມັນບໍ່ຄື ຕ່າງປະເທດເດ້ ທີ່ມີເງິນຢູ່ໃນທະນາຄານທຸກຄົນນາ.”

ປະຊາຊົນເຊື້ອສາຍຈີນ ສັນຊາດລາວຜູ້ນຶ່ງ ໃນເຂດນະຄອນຫຼວງວຽງຈັນ ເວົ້າວ່າໂຕເອງປະກອບອາຊີບຂາຍຖ້ວຍ, ຂາຍຈານຂນາດນ້ອຍ ກໍໄດ້ປິດກິຈການແຕ່ເດືອນມີນາຜ່ານມາ, ປັດຈຸບັນໂຕເອງ ແລະຄອບຄົວ ກໍໄດ້ກັກໂຕເອງຢູ່ເຮືອນ ບໍ່ອອກໄປຂ້າງນອກຫາກບໍ່ຈໍາເປັນ:

“ຂາຍຖ້ວຍ ຂາຍຈານ ບໍ່ໄດ້ອອກໄປໃສ ຂ້ອຍຢູ່ເຮືອນ ດຽວນີ້ບໍ່ມີຄົນນະ ແຖວນີ້ ກໍປິດໝົດ ບໍ່ມີຣົດ ບໍ່ມີລູກຄ້າ.”

ໃນຂນະດຽວກັນ ຢູ່ເມືອງຄໍາເກີດ ແຂວງບໍຣິຄໍາໄຊ ກໍໄດ້ປິດເມືອງ ໃນມື້ວັນທີ່ 2 ເມສາ ຜ່ານມາ ເພື່ອສະກັດກັ້ນ ການແຜ່ຣະບາດຂອງເຊື້ອ ໄວຣັສ ໂຄວິດ-19 ແລະ ເມືອງສາມັກຄີໄຊ ແຂວງອັດຕະປື ໄດ້ອອກ ແຈ້ງການປິດດ່ານ ຫຼັກ 52 ບ້ານໃຫຍ່ໝື່ນຫົວເມືອງ ເຂດຊາຍແດນ ອັດຕະປື-ປາກຊ່ອງ ແຂວງຈໍາປາສັກ ແລະອັດຕະປື-ເຊກອງ ເຣີ້ມແຕ່ວັນທີ 2 ເມສາຄືກັນ.

ເຕັມຫນ້າ