ທາງການລາວຕ້ອງສືບຕໍ່ຄົ້ນຫາ ທ.ສົມບັດ


2013-08-28
Share
F-sombat ທ່ານ Mugiyanto ປະທານມູນນິທິ ຕໍ່ຕ້ານການຖືກບັງຄັບໃຫ້ຫາຍສາບສູນ ແຫ່ງເອເຊັຽ ຫລື AFAD
RFA

 

ຄນະຜູ້ແທນສະພາຕ່າງປະເທດຖະແຫລງວ່າ ຈະສືບຕໍ່ຕິດຕາມ ການສືບສວນຫາ ທ່ານ ສົມບົດ ສົມພອນ ຂອງຣັຖບານລາວຕໍ່ໄປເພື່ອໃຫ້ ທ່ານ ສົມບັດ ກັບຄືນມາສູ່ຄອບຄົວ ເພາະມັນເປັນເຣື້ອງ ສິດທິມະນຸດໄປແລ້ວ. ດັ່ງທ່ານ Mugiyanto ປະທານ ມູນນິທິ ຕໍ່ຕ້ານການຖືກ ບັງຄັບ ໃຫ້ຫາຍສາບສູນ ແຫ່ງເອເຊັຽ ຫລື AFAD ໄດ້ກ່າວວ່າ:

"ທ່ານວ່າ ສິ່ງສໍາຄັນ ທີ່ເຮົາແນະນໍາ ໃຫ້ຣັຖບານລາວ ຄືໃຫ້ຮີບນໍາເອົາ ທ່ານ ສົມບັດ ສົມພອນກັບຄືນສູ່ຄອບຄົວ. ມັນເປັນສິດທິ ທີ່ຄອບຄົວ ຂອງເຂົາເຈົ້າຕ້ອງໄດ້ຮັບການຕອບສນອງຢ່າງທີ່ສຸດ ເພາະສິດທິ ດັ່ງກ່າວໄດ້ຮັບການຮັບຮອງແລ້ວວ່າເປັນສິດທິຂັ້ນພື້ນຖານ ທີ່ຄົນທົ່ວໂລກ ຄວນຈະໄດ້ຮັບ".

ສະມາຊິກຣັຖສະພາຕ່າງປະເທດ ຮ່ວມທັງອົງການສິດທິມະນຸດຕ່າງໆ ມີຄວາມກັງວົນຍ້ອນວ່າ ຣັຖບານລາວ ບໍ່ຮີບຮ້ອນໃນການສືບສວນຫາ ທ່ານ ສົມບັດ ສົມພອນ. ຖະແຫລງການຂອງຄນະຜູ້ແທນຣັຖສະພາຕ່າງປະເທດວ່າ ຈາກການເດີນທາງໄປລາວ ໃນວັນທີ 25 ຫາວັນທີ 27 ສິງຫາ ທາງຄນະຮູ້ສຶກເສັຽໃຈ ທີ່ວ່າ ຈົນປານນີ້ແລ້ວ ຣັຖບານລາວ ຍັງບໍ່ສາມາດ ເປີດເຜີຽຢ່າງຊັດເຈນ ກ່ຽວກັບການສອບສວນຫາ ທ່ານ ສົມບັດ ສົມພອນ ພ້ອມທັງປະຕິເສດ ຂໍ້ສະເໜີທີ່ຈະນໍາລະບົບເທັກໂນໂລຈີ ເຂົ້າມາຊ່ວຍໃນການສືບສວນ. ທາງຄນະມີແຜນຈະເດີນທາງ ໄປລາວ ອີກໃນວັນທີ 28 ຕຸລາ ເພື່ອຊາບເຖິງຄວາມຄືບໜ້າ ຂອງການສອບສວນອີກ. ນັບວ່າໄດ້ 8 ເດືອນແລ້ວທີ່ທ່ານ ສົມບັດ ສົມພອນ ນັກພັທນາດີເດັ່ນ ແລະເປັນທີ່ຮູ້ຈັກ ຢ່າງກວ້າງຂວາງ ຈາກອົງການ ຕ່າງປະເທດ ໄດ້ຖືກລັກພາໂຕໄປ ໂດຍບໍ່ຮູ້ສາເຫດ ຢູ່ຕໍ່ໜ້າປ້ອມຍາມ ຕໍາຣວດ ທີ່ນະຄອນຫລວງວຽງຈັນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ