ລາວຢາກໃຫ້ວິສັຍທັສເປັນ ຮູປທັມ

ສົມເນ
2016-07-24
ອີແມວລ໌
ຄໍາເຫັນ
Share
ພິມ
ຄນະຣັຖມົນຕຣີ ການຕ່າງປະເທດ ຖ່າຍຮູປໃນພິທີເປີດ ກອງປະຊຸມ
ຄນະຣັຖມົນຕຣີ ການຕ່າງປະເທດ ຖ່າຍຮູປໃນພິທີເປີດ ກອງປະຊຸມ
RFA

ໃນພິທີ ເປິດ ກອງປະຊຸມ ຣັຖມົນຕຣີ ຕ່າງປະເທດ ອາຊຽນ ຄັ້ງທີ 49 ທີ່ ໄຂຂຶ້ນ ຢ່າງເປັນທາງການ ໃນ ວັນທີ 24 ກໍຣະກະດາ 2016 ທີ່ ນະຄອນຫລວງ ວຽງຈັນ, ພນະທ່ານ ທອງລຸນ ສີສຸລິດ ນາຍົກ ຣັຖມົນຕຣີ ສປປ ລາວ ກ່າວເນັ້ນເຖິງ ຄວາມສໍາຄັນ ສໍາລັບ ອາຊຽນ ໃນ ປີ ໄຂສັງກາດ ໃໝ່ ຂອງການເປັນ ປະຊາຄົມ ອາຊຽນ ໃນ ຕອນນຶ່ງວ່າ:

"ສປປລາວ ຮູ້ສຶກເປັນກຽດ ຢ່າງສູງ ທີ່ໄດ້ຖືກ ມອບໝາຍໃຫ້ເປັນ ປະທານ ອາຊຽນ ເປັນ ຄັ້ງທີສອງ ໃນປີ 2016 ຊຶ່ງ ເປັນປີ ທີ່ມີ ຄວາມໝາຍ ສໍາຄັນ ສໍາລັບ ອາຊຽນ ເນື່ອງຈາກວ່າ ເປັນປີ ໄຂສັງກາດໃໝ່ ຂອງການເປັນ ປະຊາຄົມ ອາຊຽນ ແລະ ທັງເປັນ ປີທໍາອິດ ຂອງການ ຈັດຕັ້ງ ປະຕິບັດ ວິສັຍທັສ ປະຊາຄົມ ອາຊຽນ 2025. ບົນຈິດໃຈ ດັ່ງກ່າວ ສປປລາວ ຈຶ່ງໄດ້ວາງ ຄໍາຂວັນ ສໍາລັບ ການ ເປັນປະທານ ວ່າ ຫັນວິສັຍທັສ ໃຫ້ ເປັນຮູປທັມ ເພື່ອ ຄວາມເຂັ້ມແຂງ ຂອງ ປະຊາຄົມ ອາຊຽນ".

ທ່ານວ່າ ຄໍາຂັວນ ຫັນວິສັຍທັສ ໃຫ້ເປັນ ຮູປະທັມ ເພື່ອຄວາມເຂັ້ມແຂງ ຂອງ ປະຊາຄົມ ອາຊຽນ ສໍາລັບ ການເປັນ ປະທານວຽນ ຂອງລາວ ໄດ້ ກໍານົດເອົາ 8 ບຸຣິມະສິດ ຊຶ່ງ ກອງປະຊຸມ ວົງແຄບ ຣັຖມົນຕຣີ ຕ່າງປະເທດ ໄດ້ ຮັບຮອງເອົາ ໃນເດືອນ ກຸມພາ ປີ 2016 ທີ່ ນະຄອນຫຼວງ ວຽງຈັນ ໃນນັ້ນມີ 2 ເອກກະສານ ກ່ຽວກັບ ແຜນງານ ຂໍ້ລິເລີ້ມ ສໍາລັບ ການເຊື່ອມໂຍງ ອາຊຽນ ສະບັບທີ 3 ຫລື ມີ ຊື່ຫຍໍ້ວ່າ IAI ແລະ ແຜນແມ່ບົດ ວ່າດ້ວຍການ ເຊື່ອມຈອດ ອາຊຽນ 2025 ຊຶ່ງຈະຖືກ ຮັບຮອງເອົາ ໂດຍຜູ້ນໍາ ປະເທດ ສະມາຊິກ ອາຊຽນ ໃນ ກອງປະຊຸມ ເດືອນ ກັນຍາ 2016 ນີ້ ເພື່ອ ປະກອບເປັນ ສ່ວນນຶ່ງ ຂອງ ວິສັຍທັສ ປະຊາຄົມ ອາຊຽນ 2025.

ສປປ ລາວ ມີຄວາມ ຕັ້ງໃຈສູງ ໃນເວລາ ເປັນປະທານ ອາຊຽນ ປີ 2016 ຄື ຢາກເຮັດໃຫ້ ວິສັຍທັສ ອາຊຽນ 2025 ກາຍເປັນຮູປທັມ ຂຶ້ນເລື້ອຍໆ. ໃນຕອນນຶ່ງ ຂອງ ຄໍາປາສັຍ ຂອງທ່ານນັ້ນ ກ່າວວ່າ, ກອງປະຊຸມ ຣັຖມົນຕຣີ ຕ່າງປະເທດ ອາຊຽນ ຄັ້ງທີ 49 ແລະ ບັນດາ ກອງປະຊຸມ ກ່ຽວຂ້ອງ ຖືກຈັດຂຶ້ນ ຖ້າມກາງ ທີ່ອາຊຽນ ພວມສຸມໃສ່ ຈັດຕັ້ງ ປະຕິບັດ ວິສັຍທັສ ປະຊາຄົມ ອາຊຽນ 2025 ແລະ ຮັດແໜ້ນ ການຮ່ວມມື ພາຍນອກ ໂດຍອາຊຽນ ເປັນແກນກາງ.

ແລະ ໃນຂນະດຽວກັນ ສະພາບການ ພາກພື້ນ ແລະ ສາກົນ ກໍສືບຕໍ່ ມີການຜັນແປໄປ ຢ່າງໄວວາ ຊຶ່ງ ມີທັງ ກາລະໂອກາດ ແລະ ສິ່ງທ້າທາຍ ສໍາລັບ ອາຊຽນ ຫຼາຍດ້ານ ນັບແຕ່ ການປ່ຽນແປງ ຂອງດິນຟ້າ ອາກາດ ການຂັດແຍ້ງ ຊາຍແດນ ການຄ້າ ມະນຸດ ຮ່ວມທັງ ການຖອນຕົວ ຂອງ ອັງກິດ ອອກຈາກ ສະຫະພາບ ຢູໂຣບ ຊຶ່ງ ທ່ານ ທອງລຸນ ເຫັນວ່າ ມັນເປັນເຫດການ ທີ່ ອາຊຽນ ຕ້ອງສືບຕໍ່ ຕິດຕາມ ຢ່າງໃກ້ຊິດ ແລະ ຫວັງວ່າ ບັນດາ ຣັຖມົນຕຣີ ຕ່າງ ປະເທດ ອາຊຽນ ແລະ ຄູ່ຮ່ວມມື ພາຍນອກ ຈະພ້ອມກັນ ປຶກສາຫາລື ຢ່າງ ກົງໄປກົງມາ ແລະ ສ້າງສັນ ເພື່ອກະຕຣຽມ ໃຫ້ ກອງປະຊຸມ ສຸດຍອດ ອາຊຽນ ຄັ້ງທີ່ 28 ແລະ 29 ຕໍ່ໜ້ານີ້ ມີຄວາມສໍາເຣັດ.

ສົມເນ  RFA ຣາຍງານ ຈາກ ນະຄອນຫຼວງ ວຽງຈັນ

ຄໍາເຫັນ (1)
Share

ຄ.ນະຄຳມ່ວນ

ຈາກ ທ່າແຂກ

ລາວຢາກໃຫ້ວິສັຍທັສເປັນຮູບທັມ ບອກຫມູ່ໄດ້ແຕ່ຕົນເອງ ກັບເປັນຄົນຂັດຂືນທຸກຢ່າງ, ຍົກໂຕຢ່າງຄຳຂວັນທີ່ວາງໄວ້ ໃຫ້ປະຊາຊົນລາວໄດ້ຫລົງໄຫລແຕ່ຄາວກ່ອນກີ້ຄື : ສັນຕິພາບ, ເອກລາດ, ເອກພາບ, ປະຊາທິປະໄຕ ແລະ ວັດທະນາຖາວອນ ມີຂໍ້ໄດແດ່ ພັກ-ຣັຖ ສປປລາວ ໄດ້ປະຕິບັດ ເປັນຮູບທັມ ແດ່ແລ້ວ! ບັນຫາໄຫມ່ໆນີ້ ກ່ຄື ສິດທິ ຂອງຄວາມເປັນມະນຸຕ ສິ່ງດຽວ, ສປປລາວ ປະຕິບັດໄດ້ດີແລ້ວບ?; ຫລືໃຊ້ມືເຊັນ ແລ້ວກໍເລີຍເອົາຕີນ ສີກຖິ້ມ!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jul 26, 2016 04:47 PM

ເຕັມຫນ້າ