ການກູ້ລະເບີດຢູ່ຄໍາເກີດ ມີບັນຫາ

ການເກັບກູ້ລະເບີດ ບໍ່ທັນແຕກ ທີ່ຕົກຄ້າງຢູ່ ລາວ ນັບແຕ່ປາງສົງຄາມ ຢູ່ແຂວງບໍລິຄຳໄຊ, ຍັງເຫລືອເນື້ອທີ່ ປະມານ 50 ເຮັກຕາ ຫລັງຈາກ ເຈົ້າໜ້າທີ່ລາວ ຮ່ວມກັບຕ່າງປະເທດ, ໄດ້ດຳເນີນການ ເກັບກູ້ມາແຕ່ ປີ 2018.

ໃນເບື້ອງຕົ້ນ, ເຈົ້າໜ້າທີ່ໄດ້ເກັບກູ້ໄປແລ້ວປະມານ 50 ເຮັກຕາ, ໃນຈຳນວນເນື້ອທີ່ເປົ້າໝາຍທັງໝົດ 100 ເຮັກຕາ, ແຕ່ການເກັບກູ້ ຍັງມີອຸປສັກ ຍ້ອນວ່າ ເຂດບ້ານທ່າແວ້ງ ເມືອງຄຳເກີດ ເປັນເຂດ ພູສູງ ປ່າຕຶບໜາ, ແລະ ເຈົ້າໜ້າທີ່ຕ້ອງໄດ້ຖາງປ່າ ກ່ອນທີ່ຈະມີ ການເກັບກູ້. ເຈົ້າໜ້າທີ່ຜແນກແຮງງານ ແລະສວັດດີການສັງສັງຄົມ ແຂວງບໍລິຄຳໄຊ ໄດ້ກ່າວຕໍ່ເອເຊັຽເສຣີ ໃນວັນທີ 20 ກຸມພາ ວ່າ:

"ອຸປສັກມັນເປັນປ່າຕຶບໜາ, ແລະ ກໍຢູ່ເຂດພູ, ຈະເອົາອຸປກອນເຂົ້າໄປກວດ, ມັນກໍຍາກເນາະ, ສະນັ້ນແລ້ວ, ຕ້ອງໄດ້ຖາງກ່ອນ, ຄັນວ່າ ຖາງແລ້ວ, ຊິເອົາແຮງງານຄົນໄປຖາງມັນກໍສ່ຽງອີກ, ເພິ່ນຕ້ອງ ໄດ້ກວາດໄປນຳ ຖາງໄປນຳ, ກໍຄຶດຍາກຢູ່, ປັດຈຸບັນ ປະຕິບັດໄດ້ແລ້ວ 50.876 ເຮັກຕາແລ້ວ ທຳລາຍລະເບີດຢູ່ 163 ລູກ."

ຢູ່ໃນເຂດດັ່ງກ່າວ, ປະຊາຊົນຕ້ອງໄດ້ສ່ຽງຊີວິດ ກັບລູກລະເບີດທີ່ບໍ່ທັນແຕກ, ໃນເວລາທີ່ເຂົາເຈົ້າ ໄປເກັບເຄື່ອງປ່າຂອງດົງ, ດັ່ງ ທ່ານ ກ່າວຕື່ມອີກວ່າ:

"ຄືຜ່ານມາການທຳມາຫາກິນ ກໍບໍ່ຍາກ, ມັນກໍສະດວກ ເພາະປະຊາຊົນ ປະຊາກອນ ມັນກໍບໍ່ຫລາຍ, ເລື່ອງເຄື່ອງປ່າຂອງດົງ, ມັນກໍອາດ ຈະສົມບູນເນາະ, ແຕ່ດຽວນີ້ ເລື່ອງການທຳມາຫາກິນ ກໍຍາກລຳບາກ, ແລ ຕ້ອງໄດ້ຂະຫຍາຍພື້ນທີ່ໄປ, ຖ້າເຂົ້າໄປມັນກໍສ່ຽງຕໍ່ລະເບີດ ຕົກຄ້າງ."

ເຈົ້າໜ້າທີ່ທາງການລາວ ໄດ້ເກັບກູ້ລະເບີດຕາມເປົ້າໝາຍ ທີ່ກຳນົດເອົາໄວ້, ແຕ່ ຖ້າບໍ່ສຳເຣັດ ເຂົາເຈົ້າ ກໍຈະຂະຫຍາຍເວລາອອກໄປອີກ.