ກຸ່ມຕຽມປະທ້ວງຖືກຈັບ ຕໍ່ມາ ຖືກປ່ອຍ ຈໍານວນນຶ່ງ

ອຸ່ນແກ້ວ ສຸກສະຫວັນ
2019-11-15
Share
F-protest ກຸ່ມປະຊາຊົນ ຜູ້ທີ່ຈະເຮັດການປະທ້ວງ ພາກັນປຶກສາຫາລືກັນ ຢູ່ ນະຄອນຫລວງວຽງຈັນ ໃນວັນທີ 12 ພຶສຈິກາ ກ່ອນທີ່ເຂົາເຈົ້າ ຈະຖືກເຈົ້າໜ້າທີ່ຕຳຣວດຈັບ ໃນເວລາຕໍ່ມາ
ຮູບພາບຈາກ : ນັກຂ່າວພົລເມືອງ

ຄົນລາວ 8 ຄົນ ທີ່ເປັນຜູ້ນຳພາ ໃຫ້ມີການປະທ້ວງເຣື່ອງສິດທິມະນຸດ ໄດ້ຖືກຈັບໃນວັນທີ 11 ແລະ 12 ພຶສຈິກາ ຊຶ່ງກົງກັບໄລຍະສລອງ ບຸນທາດຫຼວງ. ເຫດຜົນຂອງປະຊາຊົນ ຈະປະທ້ວງໃນຄັ້ງນີ້ ແມ່ນເພື່ອຮຽກຮ້ອງເຣື່ອງສິດທິມະນຸດ, ການເຂົ້າເຖິງ ຂໍ້ມູນຂ່າວສານ, ບັນຫາ ການຍຶດທີ່ດິນ ການສ້າງເຂື່ອນ ການຕັດໄມ້ ແລະ ການສ້າງທາງຣົດໄຟ. ປະຊາຊົນຜູ້ທີ່ຈະເຂົ້າຮ່ວມການປະທ້ວງ ໄດ້ກ່າວຕໍ່ເອເຊັຽເສຣີ ໃນ ວັນທີ 15 ພຶສຈິກາ ວ່າ:

"ເຫດຜົນປະທ້ວງເພື່ອດ້ານສິດທິມະນຸດໄຊຍະຊົນ ຂອງລາວ ເພື່ອໃຫ້ປະຊາຊົນຄົນລາວ ໃນຊາດໜິ ເຂົ້າເຖິງຂ່າວສານ ທາງດ້ານຂໍ້ມູນ ແລະ ອັນທີສອງ ແມ່ນເວົ້າເຣື່ອງການຍຶດດິນການເຮັດເຂື່ອນ ແລະການຕັດໄມ້ທຳລາຍປ່າ ແລະການສ້າງທາງຣົດໄຟ ເຮັດໃຫ້ຄົນລາວ ມີການທີ່ວ່າ ຍ້າຍບ້ານໄປຕັ້ງຖິ່ນຖານລຳເນົາໃໝ່ ແລະ ປະຊາຊົນເຂົາເດືອດຮ້ອນ ບໍ່ໄດ້ຮັບຄວາມເປັນທັມ."

ນອກຈາກນີ້ ຫົວໜ້າກຸ່ມຜູ້ປະທ້ວງ ທ່ານນຶ່ງຜູ້ທີ່ບໍ່ປະສົງອອກຊື່ ໄດ້ກ່າວຕໍ່ເອເຊັຽເສຣີ ໃນວັນທີ 15 ພືສຈິກາ ວ່າ:

"ໃນເບື້ອງຕົ້ນເຈົ້າໜ້າທີ່ຕຳຣວດ ໄດ້ຈັບເອົາຕົວແກນນຳ ທີ່ຈະນຳພາການປະທ້ວງ ຈຳນວນນຶ່ງໃນວັນທີ 11 ພຶສຈິກາ [ບໍ່ໄດ້ລະບຸສະຖານທີ່] ແລະ ຕໍ່ມາວັນທີ 12 ພຶສຈິກາ ເຈົ້າໜ້າທີ່ຕຳຣວດ ຂອງທາງການ ກໍເຂົ້າມາຈັບປະຊາຊົນ ເພີ້ມອີກຈຳນວນນຶ່ງ ຢູ່ເຮືອນພັກອຸດົມພອນ ເຂດບ້ານໂພນສີນວນ ສີສັດຕະນາກ ນະຄອນຫລວງວຽງຈັນ."

ຊາວບ້ານຄົນນຶ່ງ ຜູ້ທີ່ເຫັນເຫດການຈັບຕົວປະຊາຊົນ 6 ຄົນ ຢູ່ເຮືອນພັກອຸດົມພອນ ໄດ້ຢືນຢັນຕໍ່ເອເຊັຽເສຣີ ໃນວັນທີ 15 ພຶສຈິກາ ວ່າມີ ການຈັບກຸມຄົນແທ້:

"ບໍ່ຮູ້ວ່າມາປະທ້ວງເບາະ ຫລື ມາຫຍັງເຮົາບໍ່ຮູ້ ແຕ່ວ່າເຈົ້າໜ້າທີ່ໄດ້ເອົາໄປແທ້ ກະຊິປະມານ 6 ຄົນ ນີ້ແຫຼະ, ເອີມື້ຄ່ຳນຶ່ງ ວ່າມາແຕ່ເມືອງ ໂພນທອງ ແຕ່ວ່າທັງໝົດຫັ້ນມັນກະບໍ່ແມ່ນ ສຽງເວົ້າຫັ້ນມັນ ບໍ່ແມ່ນໄທໃຕ້ໝົດດອກ."

ອີງຕາມຂໍ້ມູນເບື້ອງຕົ້ນ ຈາກຜູ້ນຳພາການປະທ້ວງ, ປະຊາຊົນທີ່ຖືກເຈົ້າໜ້າທີ່ຕຳຣວດ ຈັບຕົວ ລວມມີ;

1- ທ້າວ. ສູນທອນ ຟ້າສ່ອງໄສ,

2- ທ້າວ ສັນຕິນ້ອຍ ເທບໄກສອນ,

3- ເມັຽຂອງທ້າວສັນຕິນ້ອຍ ເທບໄກສອນ (ບໍ່ລະບຸຊື່)

4- ທ້າວ ກ້ອນຄຳ ພັນທະວົງ,

5- ບຸນຍອນ ພັນທະວົງ,

6- ທ້າວ ຈຽງສອນ ພັນທະວົງ,

7- ທ້າວ ກຽດຕິສັກ ຮັກມີສຸກ,

8- ທ້າວ ພູວົງ ໄຊຍະແສງ.

ອັນນັ້ນເປັນຂໍ້ມູນໃນເບື້ອງຕົ້ນ, ແຕ່ຕົວເລກຈຳນວນຜູ້ຖືກຈັບທັງໝົດ ຍັງບໍ່ທັນມີການສລຸບມາ ຢ່າງແຈ່ມແຈ້ງ ວ່າມີຈຳນວນເທົ່າໃດແທ້. ເຈົ້າໜ້າທີ່ຜູ້ທີ່ໃກ້ຊິດ ການນຳລະດັບສູງ ທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນວັນທີ 15 ພືຶສຈິກາ ວ່າມີການຈັບກຸມ ຜູ້ທີ່ຈະເຮັດການ ປະທ້ວງແທ້ ຊຶ່ງຜູ້ປະທ້ວງ ຈະກໍ່ການປະທ້ວງຢູ່ 4 ຈຸດ ຄື:

ຈຸດທີ 1 ຢູ່ເຂດເດີ່ນທາດຫລວງ,

ຈຸດທີ 2 ຢູ່ມະຫາວິທຍາໄລແຫ່ງຊາດ,

ຈຸດທີ 3 ແມ່ນເຂດບ້ານຫລັກ 26 ເສັ້ນທາງເລກທີ 13 ໃຕ້,

ຈຸດທີ 4 ແມ່ນຢູ່ເຂດຫລັກ 18 ເສັ້ນທາງເລກທີ 13 ເໜືອ.

ແຕ່ຫລ້າສຸດ ວັນທີ 15 ພຶສຈິກາ, ເຈົ້າໜ້າທີ່ຕຳຣວດ ເມືອງສີສັດຕະນາກ ມີຄຳສັ່ງປ່ອຍຕົວ ປະຊາຊົນ 6 ຄົນ ທີ່ຖືກຈັບຢູ່ເຮືອນພັກ ອຸດົມພອນ ກັບບ້ານແລ້ວ ໂດຍໃຫ້ເຫດຜົນ ທັງ 6 ຄົນຖືກຈັບຍ້ອນວ່າ ເຕົ້າໂຮມຊຸມແຊວ ໃນຊ້ວງບຸນນະມັດສະການ ພຣະທາດຫລວງ ກາຍໂມງ ກາຍເວລາ ທີ່ກຳນົດໄວ້ ແລະ ເຈົ້າໜ້າທີ່ ໄດ້ປ່ອຍຕົວ ຫລັງຈາກທີ່ໄດ້ສຶກສາອົບຮົມ ເຂົາເຈົ້າ.

ໃນຂນະດຽວກັນ ວິທຍຸເອເຊັຽເສຣີ ກໍຍັງຈະຕິດຕາມຂ່າວຕໍ່ໄປ ຖ້າມີຄວາມຄືບໜ້າແນວໃດ ເຮົາຈະນຳມາສເນີທ່ານ ໃນທັນທີ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ