ເຈົ້າໜ້າທີ່ແຂວງຊຽງຮາຍ ຈັບຄົນລາວ 4 ຄົນ

ສິດນີ
2021-06-02
Share
ເຈົ້າໜ້າທີ່ແຂວງຊຽງຮາຍ ຈັບຄົນລາວ 4 ຄົນ ປກສ ແຂວງບໍ່ແກ້ວ ທີ່ ອອກລາດຕະເວນ ຕາມລໍາແມ່ນໍ້າຂອງ
ນັກຂ່າວພົລເມືອງ

ໃນວັນທີ 31 ພຶສພາ ຜ່ານມານີ້, ເຈົ້າໜ້າທີ່ຕຳຣວດ ເມືອງວຽງແກ່ນ ແຂວງຊຽງຮາຍ ຮ່ວມກັບເຈົ້າໜ້າທີ່ ກອງບັນຊາການປ້ອງກັນ ຄວາມສງົບຕາມແຄມແມ່ນ້ຳຂອງ ແຂວງຊຽງຮາຍ ໄດ້ຈັບແມ່ຍິງລາວ 1 ຄົນ ຈາກແຂວງບໍ່ແກ້ວ ທີ່ລັກເຂົ້າມາແຂວງຊຽງຮາຍ ແລະ ໃນເວລາດຽວກັນ ກໍຈັບຊາວລາວ ອີກ 3 ຄົນ ທີ່ພຍາຍາມລັກຂ້າມໄປ ແຂວງບໍ່ແກ້ວ ຈາກ ແຂວງຊຽງຮາຍ ທັງຫມົດ 4 ຄົນ ປັດຈຸບັນຖືກສົ່ງ ໄປດຳເນີນຄະດີ ຕາມກົດຫມາຍ. ດັ່ງເຈົ້າໜ້າທີ່ຕຳຣວດໄທຍ ຢູ່ແຂວງຊຽງຮາຍ ກ່າວຕໍ່ ວິທຍຸເອເຊັຽເສຣີ ໃນວັນທີ 2 ມິຖຸນາ ປີ 2021 ນີ້ວ່າ:

“ເຂົາເອົາໄປຝາກຂັງແລ້ວ ເຂົາກໍເອົາໄປດຳເນີນການຕາມຂັ້ນຕອນ ທາງກົດຫມາຍວ່າດ້ວຍການຄຸ້ມຄອງ ຄົນຕ່າງດ້າວຄວບຄຸມ ພຍາດຕິດຕໍ່ ແລະ ອີ່ຫຍັງຕ່າງໆ ເຊິ່ງໄດ້ນຳຕົວ ສົ່ງໃຫ້ພະນັກງານສືບສວນ ເພື່ອດໍາເນີນຄະດີ ຕາມກົດຫມາຍ ມື້ວານນີ້ເຂົາ ກໍເອົາໄປສົ່ງຮອດສານແລ້ວ.”

ທ່ານກ່າວຕື່ມວ່າ ໃນໄລຍະນີ້, ເຈົ້າໜ້າທີ່ຕຳຣວດ ແຂວງຊຽງຮາຍ ແລະ ໜ່ວຍງານທີ່ກ່ຽວຂ້ອງໄດ້ສືບຕໍ່ກວດກາຄວາມສງົບຕາມລຳ ແມ່ນໍ້າຂອງ ຢ່າງເຄັ່ງຄັດເພຶ່ອ ສະກັດກັ້ນທັງຜູ້ ທີ່ລັກລອບຈາກລາວ ເຂົ້າມາໄທຍ ແລະ ຜູ້ທີ່ພຍາຍາມລັກໄປລາວ ພ້ອມທັງຢາກ ເຕືອນປະຊາຊົນລາວ ບໍ່ໃຫ້ລັກລອບເຂົ້າປະເທດໄທຍ ແບບຜິດກົດຫມາຍ ຖ້າມີການຝ່ານຝືນ ຈະຖືກດຳເນີນຄະດີ. ກ່ຽວກັບເຣື້ອງນີ້ ເຈົ້າໜ້າທີ່ທ້ອງຖິ່ນ ເມືອງຕົ້ນເຜິ້ງແຂວງບໍ່ແກ້ວ ທ່ານນຶ່ງກ່າວວ່າ; ປັດຈຸບັນນີ້ ເຈົ້າໜ້າທີ່ ປກຊ-ປກສ ກໍມີການລາດຕະເວນຕາມລຳ ແມ່ນ້ຳຂອງ ທຸກມື້ ສ່ວນເຈົ້າຫນ້າທີ່ທ້ອງຖີ່ນ ກໍມີສ່ວນຮ່ວມໃນການ ກວດກາຕາມລຳແມ່ນ້ຳຂອງ ເພື່ອສະກັດກັ້ນຜູ້ທີ່ລັກລອບ ເຂົ້າ-ອອກ ປະເທດ ແບບບໍ່ຖືກຕ້ອງຕາມກົດຫມາຍ. ດັ່ງທີ່ທ່ານ ກ່າວວ່າ:

“ຄົນທີ່ລັກຂ້າມມາແຕ່ໄທຍ ກໍຖືກເຈົ້າໜ້າທີ່ເຂົາຕິດຕາມຢູ່ ລາດຕະເວນຕາມຊາຍແດນ ເຮົາດຽວນີ້ມັນມີເຮືອທະຫານ ຢູ່ທາງຝັ່ງເຮົາ ນີ້ໂອ້ເຄື່ອນໄຫວຕລອດເນາະ ກໍພື້ນທີ່ມັນກວ້າງ ເນາະ ມັນອາດຈະຢູ່ທີ່ນັ້ນ ທີ່ວ່າຄົນລັກຂ້າມມາຫັ້ນນ່າ.”

ທ່ານກ່າວຕຶ່ມວ່າ ຈາກການຕິດຕາມສະຖານະການເບື້ອງຕົ້ນພົບວ່າ ຄົນລາວຫຼາຍຄົນພຍາຍາມລັກກັບປະເທດຍ້ອນການແຜ່ຣະບາດ ຂອງ Covid-19 ໃນປະເທດໄທຍຍັງໜັກຢູ່ ເຮັດໃຫ້ຜູ້ປະກອບການພາກັນເລີກຈ້າງຄົນງານ, ດ້ວຍເຫດນີ້ຄົນງານລາວ ຜູ້ທີ່ບໍ່ມີວຽກ ເຮັດຈຶ່ງຢາກກັບມາລາວ ແບບບໍ່ຖືກຕ້ອງ ຍ້ອນບໍ່ຢາກຜ່ານຂັ້ນຕອນມາຕການປ້ອງກັນ ໂຄວິດ-19 ຂອງຣັຖບານ ແລະບໍ່ຢາກຖືກ ກັກໂຕ ເປັນເວລາ 14 ວັນ.

ຊາວບ້ານເມືອງຫ້ວຍຊາຍ ແຂວງບໍ່ແກ້ວ ທ່ານນຶ່ງເວົ້າວ່າ ຫລັງຈາກໄດ້ຍິນຂ່າວວ່າ ມີຄົນລາວຢູ່ໄທຍ ພຍາຍາມລັກລອບເຂົ້າມາ ແຂວງບໍ່ແກ້ວ ຕົນເອງກໍຮູ້ສຶກມີຄວາມຢ້ານກົວ ແລະຢາກໃຫ້ພາກສ່ວນ ທີ່ກ່ຽວຂ້ອງ ໃຊ້ມາຕການກັບກຸ່ມຄົນດັ່ງກ່າວ ເພື່ອບໍ່ໃຫ້ສ້າງ ຄວາມເສັຽຫາຍ ຕໍ່ປະເທດຊາດ. ດັ່ງທີ່ທ່ານເວົ້າວ່າ:

“ໂອ້ຍ ຢ້ານແທ້ລົງໂທດຫຼາຍແຫຼະ ໄທຍຂ້າມມາກະຈັບ ລາວຂ້າມມາກະຈັບ ໃຊ້ມາຕການເຂັ້ມງວດແຫຼະ ການເດີນທາງກະຍັງ ເຂັ້ມງວດຢູ່ໃດ໋ ແບບພາຍໃນແຂວງນີ້ ໄປມາຫາກັນ ໄດ້ຢູ່ ແຕ່ຄົນຕ່າງແຂວງນີ້ເຂົ້າ-ອອກບໍ່ໄດ້.”

ໃນຂນະດຽວກັນ, ຊາວບ້ານຢູ່ແຂວງບໍ່ແກ້ວ ອີກນາງນື່ງເວົ້າວ່າ ຄັນຄົນງານລາວ ທີ່ເຮັດວຽກຢູ່ປະເທດໄທຍ ຢາກກັບມາແຂວງ ບໍ່ແກ້ວ ຫລື ແຂວງອື່ນໆໃນລາວ ກໍຢາກໃຫ້ເຂົ້າມາ ແບບຖືກຕ້ອງຕາມກົດຫມາຍ ຕາມດ່ານສາກົນເພື່ອ ປະຕິບັດຕາມຂັ້ນຕອນ ມາຕການປ້ອງກັນ ໂຄວິດ-19 ຂອງຣັຖບານ ແທນທີ່ຈະລັກເຂົ້າມາ ແລະ ໄປກວດໂຄວິດ-19 ກັກໂຕ 14 ມື້ຕາມກຳນົດທາງການ ເພື່ອປ້ອງກັນ ການແຜ່ລາມຂອງໂຄວິດ-19 ໃນລາວ.

“ຄົນທີ່ຢາກລັກເຂົ້າເມືອງຫັ້ນ ກະມີແຕ່ຢາກໃຫ້ເຂົ້າມາດ່ານ ຕາມດ່ານສາກົນຫັ້ນ ມີການອັນນ້ັ້ນກັກໂຕ ກໍມີການຄວບຄຸມມີມາຕການ ຄຸ້ມຄອງຢູ່.”

ໃນທ້າຍເດືອນພຶສພານີ້ ກຳລັງ ປກສ-ປກສ ຢູ່ແຂວງບໍ່ແກ້ວ ໄດ້ສືບຕໍ່ເພີ່ມກຳລັງໃນວຽກງານ ການລາດຕະເວນຕາມເຂດຊາຍແດນ ທັງທາງບົກ ແລະທາງນ້ຳ ຕລອດ 24 ຊົ່ວໂມງ ໂດຍສະເພາະເຂດ ເມືອງຫ້ວຍຊາຍ ເຊິ່ງເຄີຍມີທັງບັນຫາ ຄົນລັກລອບ ເຂົ້າເມືອງ ການຂາຍຂອງເຖື່ອນ ແລະ ການຄ້າຢາເສບຕິດ ພ້ອມທັງວຽກງານຕ້ານ ໂຄວິດ-19 ນຳອີກ.

ນອກຈາກນັ້ນ ກະຊວງສາທາຣະນະສຸຂ ຍັງໄດ້ອອກເບີໂທຣະສັບ ສາຍດ່ວນ ເລກທີ 166 ແລະ165 ເພື່ອໃຫ້ປະຊາຊົນຣາຍງານ ຖ້າພົບເຫັນຜູ້ລັກລອບ ເຂົ້່າເມືອງແບບບໍ່ຖືກຕ້ອງ ໂດຍດ່ວນແລ້ວເຈົ້າໜ້າທີ່ມາຮັບເອົາໄປກັກໂຕ 14 ມື້ ພ້ອມທັງລົງໂທດ ຕາມ ກົດຫມາຍ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ