ຊາວບ້ານຖືກ​ຈັບ, ຂໍ້​ຫາ​ລັກ​ເງິນ ໂດຍ​ຫຼັກ​ຖານບໍ່​ພຽງ​ພໍ: ພີ່​ນ້ອງ

ອຸ່ນແກ້ວ ສຸກສະຫວັນ
2019-04-08
ອີແມວລ໌
ຄໍາເຫັນ
Share
ພິມ
ທ້າວ ຄໍາສອນ ກໍາລັງ ຖືກສອບສວນ ຢູ່ຫ້ອງການ ກອງບັນຊາການ ປກສ ແຂວງຫລວງພຣະບາງ. ຮູບຖ່າຍເດືອນ ທັນວາ 2018
ທ້າວ ຄໍາສອນ ກໍາລັງ ຖືກສອບສວນ ຢູ່ຫ້ອງການ ກອງບັນຊາການ ປກສ ແຂວງຫລວງພຣະບາງ. ຮູບຖ່າຍເດືອນ ທັນວາ 2018
ໂດຍ ນັກຂ່າວພົລເມືອງ

ເຈົ້າໜ້າທີ່ຕຳຣວດ ແຂວງຫລວງພຣະບາງ ໄດ້ຈັບປະຊາຊົນ ບ້ານຊຽງມວກ ຄົນນຶ່ງ ຂັງຄຸກ ເປັນເວລາຫຼາຍເດືອນ ໂດຍບໍ່ມີຫຼັກຖານພຽງພໍ ໃນການດຳເນີນຄະດີ. ຊາວບ້ານຊຽງມວກ ຜູ້ທີ່ບໍ່ປະສົງອອກຊື່ ແລະ ສຽງ ໄດ້ກ່າວຕໍ່ ເອເຊັຽເສຣີ ໃນວັນທີ 4 ເມສາ ວ່າ: ເຈົ້າໜ້າທີ່ຕຳຣວດ ໄດ້ຈັບ ທ້າວ ຄຳສອນ ຫລື (ອ້າຍ) ອາຍຸ 32 ປີ ປະຊາຊົນ ບ້ານຊຽງມວກ ເມືອງ ແລະ ແຂວງ ຫລວງພຣະບາງ ໃນວັນທີ 10 ທັນວາ 2018 ໃນຂໍ້ຫາ ລັກເງິນແຂກ ທີ່ມາພັກ ຢູ່ຣີສອດ ທີ່ຊື່ວ່າ ວິວຊາຍ.

ຫລັກຖານ ຈາກກ້ອງວົງຈອນປິດ ໄດ້ສະແດງໃຫ້ເຫັນວ່າ ທ້າວ ຄຳສອນ ຜູ້ທີ່ເຮັດວຽກ ຢູ່ໃນຣີສອດດັ່ງກ່າວ ໄດ້ເຂົ້າໄປ ໃນຫ້ອງພັກຣີສອດນັ້ນ ໃນວັນທີ 7 ທັນວາ ກ່ອນທີ່ແຂກ ທີ່ມາພັກຢູ່ ຣີສອດ ມາແຈ້ງວ່າ ເງິນເຂົາເຈົ້າເສັຽ ໃນວັນທີ 10 ທັນວາ, ແຕ່ຊາວບ້ານຊຽງມວກ ທ່ານນີ້ ກ່າວວ່າ ທ້າວ ຄຳສອນ ເຂົ້າໄປໃນຫ້ອງນັ້ນແທ້ ແຕ່ລາວເຂົ້າໄປ ແປງຫ້ອງນ້ຳ: ເປັນໄປບໍ່ໄດ້ ທີ່ເງິນລູກຄ້າເສັຽ ແຕ່ວັນທີ 7 ທັນວາ ເຂົາເຈົ້າ ຊິບໍ່ຮູ້ວ່າ ເງິນຂອງຕົນເອງເສັຽ ຊຶ່ງເຫດການ ຜ່ານໄປ 3 ມື້ ແລ້ວແຂກ ຈຶ່ງມາແຈ້ງວ່າ ເງິນຕົວເອງເສັຽ ໃນວັນທີ 10 ທັນວາ.

ທ້າວ ຄຳສອນ ຖືກຈັບ ໃນຕອນເຊົ້າ ຂອງວັນທີ 10 ທັນວາ 2018, ແລະ ໃນຕອນແລງ ເວລາ 17 ໂມງ ຂອງວັນດຽວກັນ, ເຈົ້າໜ້າທີ່ ຕຳຣວດກຸ່ມ ໂທຫາ ຄົນໃນຄອບຄົວ ຂອງລາວ ມາຮັບຮູ້ ຂໍ້ກ່າວຫາ. ຊາວບ້ານຊຽງມວກ ທ່ານນີ້ ກ່າວຕື່ມອີກວ່າ: ທ້າວ ຄຳສອນ ເປັນຄົນ ບໍ່ເຕັມປານໃດ, ເປັນຄົນອ່ານ ແລະ ຂຽນໜັງສື ບໍ່ໄດ້, ລາວເປັນຄົນຢ້ານຄົນ ໃນເວລາທີ່ຖືກເຈົ້າໜ້າທີ່ ຕຳຣວດຖາມ ແລະ ລາວບໍ່ສາມາດ ຕອບຄຳຖາມ ຄືຄົນປົກກະຕິ. ເງິນທີ່ແຂກມາແຈ້ງເສັຽນັ້ນ ຄິດເປັນເງິນກີບ ປະມານ 4,000,000 ກີບ, ແລະ ເຈົ້າໜ້າທີ່ຕຳຣວດ ກຳລັງດຳເນີນ ການສືບສວນຢູ່.

ທ່ານພັນໂທ ສີໃພ ເຈົ້າໜ້າທີ່ ຜູ້ສືບສວນເຣື້ອງນີ້ ໄດ້ກ່າວຕໍ່ເອເຊັຽເສຣີ ໃນວັນທີ 4 ເມສາ ທີ່ຜ່ານມາ ວ່າ:

"ຂໍໂທດເດີທ່ານ ໂຕນີ້ ມັນອັນໜ້າ ໄດ້ມອບໃຫ້ ຂະເຈົ້າ ໃຫ້ວິຊາການ ຂະເຈົ້າດຳເນີນນະ ໃຫ້ເຈົ້າປະສານ ທາງພຸ້ນເລີຍເດີ ພາກສ່ວນນັ້ນເລີຍ."

ແຕ່ທ່ານພັນໂທ ສີໃພ ປະຕິເສດ ທີ່ຈະໃຫ້ຣາຍລະອຽດໃນເຣື້ອງນີ້, ແລະ ປັດຈຸບັນ ທ້າວ ຄຳສອນ ຍັງຖືກກັກຂັງຢູ່ຄຸກ ແຂວງຫຼວງພຣະບາງ.

ໃນຂະນະທີ່ ຄູ່ກໍຣລະນີ ນາງ ອາລຸນສະຫວັດ ເຈົ້າຂອງຣີສອດ ໄດ້ກ່າວຕໍ່ ເອເຊັຽເສຣີ ໃນວັນທີ 5 ເມສາວ່າ: ມີຫຼັກຖານ ນຳຕຳຣວດໝົດແລ້ວ ທັງວີດີໂອ ທັງຮູບ ທັງຫຍັງ ແມ່ນຢູ່ກັບ ຕຳຣວດ ໝົດແລ້ວ ຂ້ອຍ, ໝາຍເຖິງ ນາງ ອາລຸນສະຫວັດ, ກະເວົ້າຫຍັງບໍ່ໄດ້ເນາະ ອັນນີ້ ແມ່ນທາງວິຊາການ ເພິ່ນເປັນຄົນຈັດການ. ແຕ່ ເຈົ້າຂອງ ຣີສອດ ຮຽກຮ້ອງ ໃຫ້ຄອບຄົວ ເອົາເງິນ ມາໃຊ້ແທນ ເງິນຈຳນວນ ທີ່ເສັຽໄປ 4,000,000 ກີບນັ້ນ ແຕ່ຖ້າບໍ່ໃຊ້ ຈະປັບໃໝ, ອີງຕາມຊາວບ້ານຊຽງມວກ.

ເຕັມຫນ້າ