ສະພາວ່າ ຣັຖ ຕ້ອງເຄັ່ງຄັດ ເຣື່ອງ ສານເຄມີ

ອຸ່ນແກ້ວ ສຸກສະຫວັນ
2016-11-02
ອີແມວລ໌
ຄໍາເຫັນ
Share
ພິມ
ຕົວຢ່າງນຶ່ງ ຂອງປະເພດ ສານເຄມີ ທີ່ນໍາມາໃຊ້ ໃນການ ກະສິກັມ ຢູ່ ສປປລາວ
ຕົວຢ່າງນຶ່ງ ຂອງປະເພດ ສານເຄມີ ທີ່ນໍາມາໃຊ້ ໃນການ ກະສິກັມ ຢູ່ ສປປລາວ
RFA/NY

ສະມາຊິກ ສະພາ ແຫ່ງຊາດ ໄດ້ຮຽກຮ້ອງ ໃຫ້ຣັຖບານ ເຂັ້ມງວດ ຕໍ່ການໃຊ້ ສານເຄມີ ໃນ ທົ່ວປະເທດ ໃນຂນະທີ່ ນາຍົກ ຣັຖມົນຕຣີ ກໍໄດ້ມອບໝາຍ ໃຫ້ແຕ່ລະແຂວງ ເນັ້ນໜັກ ສະກັດກັ້ນ ການນຳເຂົ້າ ສານເຄມີ ທີ່ຕ້ອງຫ້າມ. ທ່ານ ທອງຈັນ ມະນີໄຊ ສະມາຊິກ ສະພາ ແຫ່ງຊາດ ປະຈຳ ແຂວງ ຫຼວງພຣະບາງ ໄດ້ສະແດງ ຄວາມກັງວົນ ຕໍ່ການໃຊ້ ສານເຄມີ ຢູ່ ບໍ່ຄຳພູເບັ້ຍ ແຂວງ ໄຊສົມບູນ ທີ່ ໄຫລລົງສູ່ ແມ່ນ້ຳ ເຮັດໃຫ້ ແຫຼ່ງນ້ຳ ທັມມະຊາດ ເປື້ອນເປິ ຍ້ອນ ສານເຄມີ ຫຼາຍລ້ານ ແມັດກ້ອນ.

ນອກຈາກນີ້ ທ່ານ ທອງລຸນ ສີສຸລິດ ນາຍົກ ຣັຖມົນຕຼີ ກໍໄດ້ຕອບ ຄຳຖາມ ກ່ຽວກັບ ການໃຊ້ ສານເຄມີ ວ່າ, ທາງ ຣັຖບານ ໄດ້ປະສານ ສົມທົບກັບ ບັນດາ ແຂວງ ທີ່ມີການໃຊ້ ສານເຄມີ ຕ້ອງຫ້າມ ໃຫ້ ພຍາຍາມ ປ້ອງກັນ ແລະ ສະກັດກັ້ນ ການນຳເຂົ້າ ປະເພດ ສານເຄມີ ຕ່າງໆ ລວມທັງ ສານເຄມີ ຕ້ອງຫ້າມ ຢ່າງສຸດ ຄວາມສາມາດ ແລະຈະມີ ມາຕການ ສັ່ງຢຸດ ຫົວໜ່ວຍ ທຸຣະກິຈ ທີ່ບໍ່ເຮັດ ຕາມຣະບຽບ ຂອງທາງການ ລາວ.

ໃນເວລາດຽວກັນ ເຈົ້າໜ້າທີ່ ວິຊາການ ຂັ້ນແຂວງ ຜູ້ທີ່ເຮັດວຽກ ຄວບຄຸມ ສານເຄມີ ກໍເຫັນດີ ກັບສິ່ງທີ່ ສະມາຊິກ ສະພາ ແຫ່ງຊາດ ຍົກຂຶ້ນມາ ອະພິປາຍ ຢູ່ ກອງປະຊຸມ ສະພາ ແລະ ເຫັນດີກັບ ມາດຕະການ ຂອງຣັຖບານ ໃນການຕ້ານ ແລະ ຄວບຄຸມ ການໃຊ້ ສານເຄມີ ຊຶ່ງ ຈະສາມາດໃຊ້ ເປັນບ່ອນອີງ ໃນເວລາ ປະຕິບັດ ວຽກງານ ຢູ່ ພາກສະໜາມ. ດັ່ງ ເຈົ້າໜ້າທີ່ ຜແນກ ຊັພຍາກອນ ທັມມະຊາດ ແລະ ສິ່ງແວດລ້ອມ ແຂວງ ຫຼວງພຣະບາງ ທ່ານນຶ່ງ ໄດ້ກ່າວຕໍ່ ເອເຊັຽ ເສຣີ ວ່າ:

"ເພິ່ນເວົ້າເລື້ອງຫັ້ນ ກະຖືວ່າ ດີມີທິດທາງ ແນວນັ້ນ ກະຖືວ່າ ເປັນການ ມີບ່ອນອີງ ໃຫ້ພວກເຮົາ ຈັດຕັ້ງ ປະຕິບັດ ຫັ້ນແລ້ວ ຕົກລົງກັນ ແລ້ວ ກະຊິໄດ້ ຜັນຂະຫຍາຍ ເນື້ອໃນ ຈິດໃຈ ເພິ່ນຫັ້ນແລ້ວ ເນາະ ເປັນບ່ອນອີງ ໃຫ້ ເຈົ້າໜ້າທີ່ ພວກເຮົາ ເຮັດວຽກ ຫຼາຍຂຶ້ນ".

ການໃຊ້ ສານເຄມີ ທີ່ຕ້ອງຫ້າມ ມີຢ່າງແຜ່ຫຼາຍ ຢູ່ ປະເທດລາວ ໂດຍສະເພາະ ໃນການ ຂຸດຄົ້ນ ບໍ່ແຮ່ທາດ ຕ່າງໆ ແລະ ຢູ່ໃນ ສວນກ້ວຍ ຂອງ ນັກລົງທຶນ ຈີນ ແລະ ປູກ ຢາງພາລາ ຂອງ ວຽດນາມ.

ຄໍາເຫັນ (2)
Share

ຕາມໃຈ

ຈາກ ຕາມໃຈ

ຄຳໃດ ອອກຈາກປາກ ກະວ່າ ຕ້ອງເຄັ່ງຄັດ ຕ້ອງເດັດຂາດ ບາດແລ້ວ ຜົນທີ່ອອກມາ ອັນໃດ ກໍໃຊ້ບໍ່ໄດ້ ຈັກຢ່າງ ມີແຕ່ ນ້ຳລາຍຟຸມຟາຍ ເຕັມປາກ ແຂ້ວບໍ່ຖູນັ້ນ...


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 07, 2016 05:30 PM

ຄ.ນະຄຳມວ່ນ

ຈາກ ທ່າແຂກ

ຮີບເອົາໃຈໃສ່ມາເຊັນຄຳສັ່ງອີກ ສະຫາຍ ນາຍົກ ທອງລຸນ ສີສຸຣິດ ເອີຍ, ຄຳສັ່ງນີ້ຟູມເຟີຍຫລາຍແລ້ວເດີ, ຈົ່ງປະຢັດມັດທະຍັດຂຶ້ນຕື່ມແດ່, ຄິດເຫັນໃຈ ປາກກາແລະກະດາດແດ່, ຈັກຫນ້ອຍຕ່າງປະເທສເຂົາບໍ່ເອົານຳ ມັນຈະລຳບາກບັ້ນປາຍແທ້ໆໄດ, ເຫັນໃຈຜູ້ເຂົາສົ່ງສານເຄມີ ມາໃຫ້ບໍ່ເປັນກໍ່ສັ່ງເອົາໄປຖອກໃສ່ປາກແລະທ້ອງ ປະຊາຊົນລາວໂລດ ແບບນີ້ແມ່ນຫມົດບັນຫາທັນທີ!!!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 03, 2016 01:46 PM

ເຕັມຫນ້າ