ຈັບຄົນລັກສາຍໄຟຟ້າ ແລວທາງ ຣົຖໄຟລາວ-ຈີນ

ກອງບັນຊາການ ປກສ ແຂວງຫຼວງພຣະບາງ ໄດ້ຖແລງຂ່າວຈັບກຸ່ມຄົນບໍ່ດີ ໄດ້ທັງໝົດ 9 ຄົນ ເມື່ອວັນທີ່ 21 ທັນວາທີ່ຜ່ານມາ ທີ່ກໍເຫດລັກສາຍໄຟຟ້າຕາມແລວທາງຣົຖໄຟລາວ-ຈີນ ຢູ່ເຂດບ້ານຊຽງລ້ອມ ນະຄອນຫຼວງພຣະບາງ ເມື່ອວັນທີ່ 11 ທັນວາ ປີນີ້ ແລະຍັງມີຜູ້ຫຼົບໜີອີກ 1 ຄົນ ທີ່ຍັງບໍ່ທັນຈັບໄດ້ເທື່ອ ຊຶ່ງຜູ້ກໍ່ເຫດມີເປົ້າໝາຍນໍາສາຍໄຟຟ້າດັ່ງກ່າວໄປຂາຍເພື່ອຫາລາຍໄດ້, ດັ່ງເຈົ້າໜ້າທີ່ຮັກສາຄວາມປອດພັຍ ຕາມແລວທາງຣົຖໄຟລາວ-ຈີນ ຢູ່ນະຄອນຫຼວງພຣະບາງ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ເມື່ອວັນທີ່ 24 ທັນວາ ນີ້ວ່າ:

“ກະຊິມີລັກໄປຂາຍ ຕໍາຣວດຂະເຈົ້າຈັບໄດ້ເດ້ ຕອນກາງຄືນນ່າ ຂະເຈົ້າມາຮຸ້ນກັນຫຼາຍຄົນ ຂະເຈົ້າກະລວມຫົວກັນມາເຮັດນ່າ ແຕ່ວ່າຂະເຈົ້າຈັບໄດ້ ຂະເຈົ້າກະເອົາໄປຫັ້ນລະເນາະ ໄປດໍາເນີນຄະດີ.”

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ຫາກອງບັນຊາການ ປກສ ແຂວງຫຼວງພຣະບາງ ເພື່ອສອບຖາມຄວາມຄືບໜ້າເພີ່ມຕື່ມຂອງຄະດີດັ່ງກ່າວ ແຕ່ເຈົ້າໜ້າທີ່ທີ່ກ່ຽວຂ້ອງ ຍັງບໍ່ສະດວກໃຫ້ຂໍ້ມູນ ແລະລາຍຣະອຽດຫຼາຍໄປກວ່ານີ້ໄດ້.

ກຸ່ມຜູ້ກະທໍາຜິດດັ່ງກ່າວ ມີທັງເພດຊາຍ ແລະເພດຍິງ ທີ່ມີອາຍຸຕັ້ງແຕ່ 19 ຫາ 37 ປີ ໄດ້ຮ່ວມກັນລັກເຫຼັກເສດ ແລະລັກສາຍໄຟຟ້າຂນາດຄວາມຍາວ 120 ຊັງຕີແມັດ ທັງໝົດ 28 ທ່ອນ ແລະສາຍໄຟທີ່ປອກແລ້ວອີກປະມານ 200 ກິໂລກຣາມ ເຊິ່ງປັດຈຸບັນ ທາງເຈົ້າໜ້າທີ່ໄດ້ນໍາໂຕສົ່ງໃຫ້ຫ້ອງການອັຍການປະຊາຊົນຂັ້ນແຂວງ ແລະສານປະຊາຊົນຂັ້ນແຂວງ ສືບຕໍ່ດໍາເນີນຄະດີຕາມກົດໝາຍ, ສ່ວນຜູ້ທີ່ຍັງຫຼົບໜີອີກນຶ່ງຄົນ ກໍາລັງຢູ່ລະຫວ່າງການຕິດຕາມໂຕ, ອີງຕາມການຣາຍງານຂອງກອງບັນຊາການ ປກສ ແຂວງຫຼວງພຣະບາງ. ໃນຂະນະດຽວກັນ ວິທຍຸເອເຊັຽເສຣີ ກໍໄດ້ຕິດຕໍ່ໄປຫາຫ້ອງການອັຍການປະຊາຊົນຂັ້ນແຂວງ ແຂວງຫຼວງພຣະບາງ ເພື່ອຖາມຄວາມຄືບໜ້າຂອງຄະດີນີ້ ແຕ່ເຈົ້າໜ້າທີ່ ທີ່ກ່ຽວຂ້ອງຍັງບໍ່ສະດວກໃຫ້ຂໍ້ມູນ ຍ້ອນກໍາລັງຢູ່ໃນລະຫວ່າງດໍາເນີນການຕາມຂັ້ນຕອນຢູ່.

ແຕ່ອີງຕາມມາດຕຣາ 156 ຂອງກົດໝາຍອາຍາ ຣະບຸວ່າ ບຸກຄົນໃດຫາກມີການກະທໍາທີ່ລະເມີດຣະບຽບ ຫຼືເປັນອັນຕລາຍຕໍ່ຄວາມປອດພັຍ ຂອງສະຖານີຣົດໄຟ ຊຶ່ງຫາກສ້າງຄວາມເສັຍຫາຍຫຼາຍ ຈະຖືກລົງໂທດຈໍາຄຸກແຕ່ 5 ປີ ຫາ 10 ປີ ແລະປັບໃໝແຕ່ 5 ລ້ານກີບ ຫາ 20 ລ້ານກີບ ແລະໃນກໍຣະນີ ສ້າງຄວາມເສັຍຫາຍຢ່າງຫຼວງຫຼາຍ ຈະຖືກລົງໂທດຈໍາຄຸກ ແຕ່ 10 ປີ ຫາຕລອດຊີວິດ ແລະປັບໃໝແຕ່ 15 ລ້ານກີບ ຫາ 150 ລ້ານກີບ.

ທາງດ້ານຊາວບ້ານ ທີ່ຢູ່ໃກ້ຄຽງກັບສະຖານທີ່ເກີດເຫດກໍເຊື່ອວ່າ ກຸ່ມຄົນບໍ່ດີດັ່ງກ່າວ ມີຈຸດປະສົງເພື່ອລັກເອົາສາຍໄຟໄປຂາຍ ຫຼາຍກວ່າທີ່ຈະຕັ້ງໃຈເຮັດ ເພື່ອໃຫ້ເກີດຄວາມເສັຍຫາຍຕໍ່ທາງຣົຖໄຟ ເນື່ອງຈາກພວກເຂົາເຈົ້າເຮັດເປັນຂບວນການ ແລະອາຈນໍາເງິນທີ່ໄດ້ຈາກການຂາຍສາຍໄຟຟ້າ ແລະເຫຼັກເສດນັ້ນໄປແບ່ງກັນ, ດັ່ງຊາວບ້ານທ່ານນຶ່ງ ກ່າວວ່າ:

“ມີແຕ່ລັກເອົາໄປຂາຍແນວນັ້ນແຫຼະ ແບບເປັນເຫຼັກເສດອັນນີ້ແຫຼະ ຈະມີແນວສະກັດກັ້ນຢູ່ ມີຮົ້ວລ້ອມມີກໍາແພງຍັງຂ້າມ ມີແຕ່ຜູ້ໃດຝ່າຝືນ ເພິ່ນກະຈັບ ໄປຕາມກົດໝາຍຫັ້ນແຫຼະ.”

ໃນຂະນະທີ່ ຊາວບ້ານຢູ່ແຂວງຫຼວງພຣະບາງ ທີ່ໃຊ້ບໍຣິການໂດຍສານ ຣົຖໄຟລາວ-ຈີນ ໄປຕ່າງແຂວງແລ້ວນັ້ນ ຫຼາຍຄົນກໍບໍ່ທັນຮູ້ວ່າ ຍັງມີກຸ່ມຄົນບໍ່ດີກໍ່ເຫດລັກສາຍໄຟຕາມແລວທາງຣົຖໄຟລາວ-ຈີນຢູ່ ແຕ່ກໍບໍ່ໄດ້ຮູ້ສຶກຢ້ານແຕ່ຢ່າງໃດ ຍ້ອນໝັ້ນໃຈໃນຣະບົບການຮັກສາຄວາມປອດພັຍ ໃນຂະນະທີ່ໂດຍສານຣົຖໄຟ, ດັ່ງຊາວນະຄອນຫຼວງພຣະບາງ ນາງນຶ່ງ ກ່າວວ່າ:

“ເຄີຍໄດ້ຂີ່ຣົຖໄຟໄປວຽງຈັນ 2 ເທື່ອ ແຕ່ວ່າ ກະບໍ່ໄດ້ຮູ້ ກ່ອນໜ້າຫັ້ນເຄີຍເຫັນຂ່າວ ເຄີຍເຫັນຂ່າວລົງຕາມເຟສບຸກ ຢູ່ວ່າມີຄົນຕັດສາຍໄຟຕາມຫົນທາງ ແຕ່ວ່າຂະເຈົ້າເປີດນໍາໃຊ້ແລ້ວ ກະບໍ່ເຄີຍໄດ້ຍິນຂ່າວອີກ.”

ສ່ວນຊາວບ້ານ ຢູ່ແຂວງຫຼວງພຣະບາງ ອີກທ່ານນຶ່ງ ທີ່ເຄີຍໄປໃຊ້ບໍຣິການໂດຍສານຣົຖໄຟລາວ-ຈີນແລ້ວ ກໍບໍ່ໄດ້ຢ້ານຕໍ່ຂ່າວດັ່ງກ່າວ ແລະກໍຕຽມທີ່ຈະໂດຍສານຣົຖໄຟອີກເທື່ອນຶ່ງໃນມໍ່ໆນີ້ ຍ້ອນເຊື່ອວ່າ ກຸ່ມຄົນບໍ່ດີດັ່ງກ່າວຈະບໍ່ກໍ່ເຫດອີກ ແລະທາງເຈົ້າໜ້າທີ່ ກໍໄດ້ເພີ່ມມາຕການຮັກສາຄວາມປອດພັຍ ຕາມແລວທາງຣົຖໄຟລາວ-ຈີນ ຢ່າງເຂັ້ມງວດຂຶ້ນ, ດັ່ງທ່ານກ່າວວ່າ:

“ບໍ່ມີແລ້ວ ເພາະວ່າຂະເຈົ້າຈັບໝົດແລ້ວເດ້ ເພາະວ່າທາງລາວ ຈະມີໜ່ວຍສະເພາະກິຈ ຈາກຕໍາຣວດກອງທາງຣົຖໄຟເນາະ ແຕ່ລະຈຸດໆປອດພັຍແລ້ວ ເພາະວ່າຣົຖຮ່ວນຢູ່.”

ກ່ອນໜ້ານີ້ ຄືເມື່ອວັນທີ່ 28 ພຶສຈິກາ ທີ່ຜ່ານມາ ເຈົ້າໜ້າທີ່ ປກສ ເມືອງຈອມເພັດ ແຂວງຫຼວງພຣະບາງ ໄດ້ຈັບຊາວບ້ານຈໍານວນ 4 ຄົນ ທີ່ກໍ່ເຫດລັກຖອດເຫຼັກ ແລະນ໋ອດ ຈໍານວນຫຼາຍຣາຍການ ອອກຈາກແລວທາງຣົຖໄຟລາວ-ຈີນ ຢູ່ເຂດເມືອງຈອມເພັດ ໂດຍກຸ່ມຜູ້ຕ້ອງຫາດັ່ງກ່າວ ແມ່ນມີອາຊີບຮັບຊື້ເຫຼັກເສດຕາມເຮືອນຂອງຊາວບ້ານ ເພື່ອນໍາໄປຂາຍໃຫ້ແກ່ໂຮງງານຮັບຊື້ເຫຼັກເສດ ແລະກ່ອນໜ້ານັ້ນ ໃນວັນທີ່ 9 ພຶສຈິກາ ປີນີ້ ຊາວບ້ານ 2 ຄົນ ທີ່ລັກຖອດເຫຼັກ ໜັກ 100 ກິໂລກຣາມ ອອກຈາກທາງຣົຖໄຟ ຢູ່ເຂດບ້ານຫ້ວຍນໍ້າເຢັນ ເມືອງນາຊາຍທອງ ນະຄອນຫຼວງວຽງຈັນ ກໍຖືກເຈົ້າໜ້າທີ່ ປກສ ຈັບໂຕໄປດໍາເນີນຄະດີຄືກັນ.

ມາຮອດປັດຈຸບັນ ຣົຖໄຟລາວ-ຈີນ ໄດ້ເປີດໃຊ້ບໍຣິການມາແລ້ວປະມານ 3 ສັປດາ ກໍເຫັນວ່າໄດ້ຮັບການຕອບຮັບເປັນຢ່າງດີ ຕໍ່ຊາວລາວທົ່ວໄປ ຊຶ່ງໄດ້ພາກັນອອກມາລຽນແຖວຊື້ປີ້ ເພື່ອໂດຍສານນໍາຣົຖໄຟລາວ-ຈີນ ຈົນປີ້ຣົຖໄຟຊັ້ນ 1 ຂາຍໝົດທຸກມື້.

ແຕ່ເຖິງຢ່າງໃດກໍຕາມ ກໍຍັງມີຊາວບ້ານຈໍານວນນຶ່ງ ທີ່ຍັງບໍ່ທັນເຂົ້າໃຈ ກ່ຽວກັບກົດຣະບຽບ ໃນການໂດຍສານນໍາຣົຖໄຟລາວ-ຈີນ ເຊິ່ງພວກຂະເຈົ້າກໍມັກນໍາວັດຖຸເກືອດຫ້າມ ເຂົ້າສູ່ຂບວນຣົຖໄຟນໍາດ້ວຍ ເປັນຕົ້ນ ເຄື່ອງດື່ມທີ່ມີທາດເຫຼົ້າ, ທາດແຕກ, ວັດຖຸໄວໄຟ, ວັດຖຸມີຄົມ, ສັດລ້ຽງ ແລະອື່ນໆ, ອີງຕາມການຣາຍງານ ຂອງຍານາງ ປານໃຈ ເຢັ່ຍຢັ້ງວ່າ ຜູ້ຮັບຜິດຊອບຂົນສົ່ງຜູ້ໂດຍສານຣົຖໄຟລາວ-ຈີນ ປະຈໍາສະຖານີ ນະຄອນຫຼວງວຽງຈັນ ເມື່ອວັນທີ່ 22 ທັນວາ ທີ່ຜ່ານມາ.