ຮຽກຮ້ອງ ກອງປະຊຸມອາຊຽນ ຫາລື ສິທທິມະນຸສ

ໂພ​ໄຊ​ສວັດ
2018-03-17
Share
f-protest-asean ການ​ປະ​ທ້ວງ ຮຽກ​ຮ້ອງ ໃຫ້​ມີ​ການຫາ​ລື ກ່ຽວ​ກັບ ການ​ລ​ະ​ເມີດ​ສິ​ທ​ທິ​ມະ​ນຸ​ສ ໃນ​ກອງ​ປະ​ຊຸມ​ສຸດຍອດ​ອາ​ຊຽນ ທີ່​ນະ​ຄອນ​ຊິດ​ນີ
​RFA/PX

ກຸ່ມຄົນຫຼາຍກວ່າ 3,000 ຄົນ ຈາກຊຸມຊົນເອເຊັຽ ຮວມທັງ ລາວ, ກຳພູຊາ, ວຽດນາມ,ໄທ, ພະມ້າ, ໂຣຮິນຢາ, ຟີລິບປີນ, ຈີນ ແລະ ຊຸມຊົນທ້ອງຖິ່ນ ໄດ້ຈັດ ການຊຸມນຸມປະທ້ວງຂຶ້ນ ຢູ່ທີ່ ຊິດນີ ຮາຍຮ໌ ພາຣ໌ຄ (Sydney High Park) ແລະ ຊິດນີ ທາວນ໌ ຮອລລ໌ (Sydney Town Hall) ໃນຄ່ຳຄືນ ວັນທີ 16 ມີນາ ຕໍ່ໃສ່ ຕອນເຊົ້າວັນທີ 17 ມີນາ 2018 ເມື່ອ ກອງປະຊຸມພິເສດສຸດຍອດ ອາຊຽນ-ອອສເຕຣເລັຽ 2018 ກຳລັງດຳເນີນໄປຢູ່.

ປະທານ ພັນທະມິຕ ເພື່ອປະຊາທິປະໄຕ ໃນລາວ, ດຣ. ບຸນທອນ ຈັນທະລາວົງ ວີເຊີ, ຊຶ່ງໄດ້ເດີນທາງ ມາຈາກ ປະເທດເຢັຽຣະມັນ ເພື່ອຮ່ວມໃນການຊຸມນຸມປະທ້ວງ ເທື່ອນີ້ ໂດຍສະເພາະ ເວົ້າກ່ຽວກັບ ຈຸດປະສົງ ຂອງການ ມາຊຸມນຸມປະທ້ວງວ່າ:

ມື້ນີ້ ພັທມິຕ ເພື່ອປະຊາທິປະໄຕ ໃນລາວ ຮ່ວມກັບ ການຈັດຕັ້ງການເມືອງ ຂອງລາວ ຫລາຍການຈັດຕັ້ງ ແລະ ພໍ່ແມ່ພີ່ນ້ອງ ຈາກປະເທດໂອສຕຣາລີ ແລະ ພໍ່ແມ່ພີ່ນ້ອງ ຈາກລາວຈາກທົ່ວໂລກ ແລະ ພາຍໃນປະເທດ ຜູ້ຮັກຊາດ ແລະ ຮັກປະຊາທີປະໄຕ ໄດ້ຮ່ວມກັນ ມາເດີນຂະບວນປະທ້ວງມື້ນີ້ ຮ່ວມກັບປະຊາຊົນ ຊາວກຳພູຊາ, ພະມ້າ ແລະ ຊາດອື່ນໆ ກັບຊາວສາກົນ ເພື່ອປະນາມ ຜູ້ນຳສູງສຸດ ສປປລາວ ແລະ ວຽດນາມ ຄອມມິວນີິສ ທີ່ມາຮ່ວມກອງປະຊຸມ ຜູ້ນຳສູງສຸດ ກັບຣັຖບານ ໂອສຕຣາລີ.”

ສ່ວນຄົນລາວຜູ້ນຶ່ງ, ທ່ານ ໂພສີ ແສງທອງ, ຈາກນະຄອນຊິດນີ ທີ່ມາຮ່ວມ ໃນການຊຸມນຸມປະທ້ວງ ບອກກັບ ຜູ້ສື່ຂ່າວ ວິທຍຸ ເອເຊັຽ ເສຣີ ວ່າ:

ຂ້າພະເຈົ້າ ໄດ້ມາຮ່ວມການຊຸມນຸມປະທ້ວງ ໃນມື້ນີ້ ກໍເນື່ອງຈາກວ່າ ອຳນາດປົກຄອງລາວ ໄດ້ປົກຄອງປະເທດຊາດ ດ້ວຍການຂາດສິທທິມະນຸສ ແລະ ປະຊາທີປະໄຕ ຂັ້ນພື້ນຖານ. ແລະ ຢາກຍ້ຳໃຫ້ ຣັຖບານ ໂອສຕຣາລີ ຜູ້ເປັນໜ້າທີ່ ໃຫ້ຄວາມແນະນຳ ອຳນາດປົກຄອງລາວ ໃຫ້ປະຕິບັດ ສິທທິປະຊາທິປະໂຕ ແລະ ນັບຖື ສິທທິມະນຸສ ຢ່າງເຄັ່ງຄັດ. ຂອບໃຈຫລາຍໆ.”

ອອສເຕຣເລັຽ ໄດ້ຍົກເອົາບັນຫາ ການລະເມີດ ສິທທິມະນຸສ ຂຶ້ນມາທວງຖາມ ຈຳເພາະ ແຕ່ກັບ ພະມ້າ ແລະ ກຳພູຊາ ສ່ວນປະເທດ ສະມາຊິກ ອາຊຽນ ອື່ນໆ ເຊັ່ນລາວ ເຖິງວ່າ ໄດ້ຝ່າຝືນ ພື້ນຖານສິທທິມະນຸສ ຮຸນແຮງ ບໍ່ໄດ້ຖືກເອີ່ຍເຖິງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ