ສາກົນຮຽກຮ້ອງ ຣັຖບາລລາວ ໃຫ້ຜູ້ທຸກຍາກ ມີສິດ

ຈຳປາທອງ
2019-02-06
Share
F-FIDH ສະຫະພັນ ເພື່ອສິດທິມະນຸດສາກົນ ແລະຂະບວນການລາວເພື່ອສິດທິມະນຸດ ຮຽກຮ້ອງໃຫ້ຣັຖບານລາວ ເປີດໂອກາດ ໃຫ້ປະຊາຊົນລາວ ຜູ້ທຸກຍາກ ມີສິດມີສຽງໃນການຕັດສິນໃຈ ໃນບັນຫາທີ່ມີຜົນກະທົບຕໍ່ການດຳລົງຊີວິດ ແລະຊີວິດ ການເປັນຢູ່ ຂອງພວກເຂົາເຈົ້າ.
Public Domain

ສະຫະພັນ ເພື່ອສິດທິມະນຸດສາກົນ ແລະ ຂະບວນການລາວ ເພື່ອສິດທິມະນຸດ ຮຽກຮ້ອງ ຣັຖບານລາວ ເປີດໂອກາດ ໃຫ້ປະຊາຊົນລາວ ຜູ້ທຸກຍາກ ມີສິດມີສຽງ ໃນການຕັດສິນໃຈ ໃນບັນຫາ ທີ່ມີຜົນກະທົບ ຕໍ່ການດຳລົງຊີວິດ ແລະ ຊີວິດການເປັນຢູ່ ຂອງພວກເຂົາເຈົ້າ.

ທ່ານ ແອນ​ດ​ເຣັຽ ຈີ​ໂອ​ເງັດ​ຕາ (Andrea Giorgetta), ຜູ້ຕາງໜ້າສະຫະພັນ ເພື່ອສິດທິມະນຸດສາກົນ, ໃຫ້ຣາຍລະອຽດ ກ່ຽວກັບຄຳຮຽກຮ້ອງ ທີ່ີວ່ານັ້ນ ກັບວິທຍຸ ເອເຊັຽ ເສຣີ ຂອງພວກເຮົາ ໃນມື້ນີ້ວ່າ:

“ຕໍ່ປະຊາຊົນ ຜູ້ທຸກຍາກ ພວກເຮົາເຫັນ ການສ້າງເຂື່ອນ ການສ້າງທາງຣົດໄຟ ພວກເຮົາຮູ້ຂ່າວວ່າ ກ່ອນຈະສ້າງ ບໍ່ມີໃຜ ໄດ້ປຶກສາຫາລື ກັບປະຊາຊົນເຫລົ່ານີ້ ກ່ຽວກັບ ໂຄງການຕ່າງໆນັ້ນເລີຍ ບໍ່ຫາລື ແລະ ກໍບໍ່ບອກ ໃຫ້ພວກເຂົາເຈົ້າ ຮູ້ວ່າ ໂຄງການນັ້ນ ຈະສົ່ງຜົນກະທົບແນວໃດ ຈະໂຍກຍ້າຍ ປະຊາຊົນ ໄປຢູ່ໃສ ແລະ ພວກເຂົາເຈົ້າ ຄວນຈະໄດ້ຮັບຄ່າ ຊົດເຊີຍເທົ່າໃດ.”

ອົງການ ສິດທິມະນຸດ ທັງສອງ ອອກຖແລງການ ກ່ຽວກັບເຣື່ອງນີ້ ໃນມື້ວັນທີ 6 ກຸມພາ 2019 ນີ້ວ່າ ເມື່ອເວົ້າເຖິງ ການຫຼຸດຜ່ອນ ຄວາມທຸກຍາກ ຜ່ານມາ ຣັຖບານລາວ ບໍ່ໄດ້ຮັບຟັງ ຄວາມຄິດຄວາມເຫັນ ຂອງປະຊາຊົນ ທີ່ທຸກຍາກ ນັ້ນເລີຍ. ສະນັ້ນ ພວກເຮົາ ຈຶ່ງຂໍຮຽກຮ້ອງ ໃຫ້ ຜູ້ຣາຍງານ ພິເສດ ສະຫະປະຊາຊາດ ສຶກສາເບິ່ງຄັກໆ ວ່າ ນະໂຍບາຍ ທີ່ບໍ່ຖືກຕ້ອງແບບນັ້ນ ຍັງຈະສືບຕໍ່ ຈຳກັດ ການມີສ່ວນຮ່ວມ ຂອງປະຊາຊົນລາວ ທີ່ທຸກຍາກນັ້ນຢູ່ ຫລືບໍ່.

ຖແລງການ ຢ້ຳໃນຕອນທ້າຍວ່າ ໂຄງການລົງທຶນ ແລະ ການສ້າງ ໂຄງຮ່າງພື້ນຖານ ໄດ້ສົ່ງຜົນກະທົບ ໂດຍກົງ ຕໍ່ປະຊາຊົນ ຜູ້ທຸກຍາກ ໃນລາວ. ແຕ່ເຈົ້າຂອງ ໂຄງການເຫລົ່ານັ້ນ ກໍຍັງສືບຕໍ່ ດຳເນີນໄປ ໂດຍທີ່ ບໍ່ໄດ້ປຶກສາຫາລື ກັບປະຊາຊົນ ຜູ້ໄດ້ຮັບຜົນກະທົບນັ້ນຫຼາຍ ເທົ່າທີ່ຄວນ. ຣັຖບານ ຄວນເປີດໂອກາດ ໃຫ້ປະຊາຊົນ ມີສ່ວນຮ່ວມ ໃນການອອກຄຳຄິດຄຳເຫັນ ກ່ຽວກັບ ໂຄງການພັທນາຕ່າງໆ ເຫລົ່ານັ້ນໂດຍດ່ວນ.

ພ້ອມດຽວກັນນັ້ນ, ໂດຍທົ່ວໄປ ອົງການສິດທິມະນຸດສາກົນ ຍັງຊີ້ໃຫ້ເຫັນວ່າ ປະຊາຊົນ ໃນປະເທດລາວ ຍັງບໍ່ມີສິດບໍ່ມີສຽງ ໃນການປາກເວົ້າ, ການອອກຂ່າວ, ການໂຮມຊຸມນຸມ ແລະ ການຈັດຕັ້ງ ສະມາຄົມ ຂອງພວກຕົນ. ປະຊາຊົນລາວ ຜູ້ໄດ້ຮັບ ຜົລກະທົບ ຈາກໂຄງການພັທນາ ຫລາຍບ່ອນ ຍັງບໍ່ໄດ້ຮັບຄ່າຊົດເຊີຍ ຕົວຢ່າງ: ປັດຈຸບັນ ປະຊາຊົນ ເມືອງຊຽງເງິນ ແຂວງຫຼວງພຣະບາງ ຫຼາຍຄອບຄົວ ຮຽກຮ້ອງໃຫ້ ໂຄງການ ທາງຣົດໄຟລາວ-ຈີນ ເລັ່ງຈ່າຍຄ່າຊົດເຊີຍ ໃຫ້ແກ່ພວກເຂົາເຈົ້າ ຍ້ອນເສັຽທີ່ດິນປູກຝັງ ໃຫ້ໂຄງການໄປແລ້ວ, ພວກເຂົາເຈົ້າ ບໍ່ສາມາດປູກເຂົ້າ ແລະ ພືດອື່ນໆໄດ້ ດັ່ງເຈົ້າໜ້າທີ່ ທ້ອງຖິ່ນທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 24 ມົກກະຣາ ຜ່ານມານີ້ວ່າ:

“ກະບໍ່ເຂົ້າໃຈດຽວ ນີ້ ວ່າເດືອນນີ້ເດືອນໜ້າ ເດືອນໃໝ່ຢູ່ ເງິນຊົດເຊີຍຫັ້ນເດ ປະຊາຊົນລະວົນວາຍຢູ່ ເຂົາຢາກໄດ້ເງິນ. ດຽວນີ້ດິນຫັ້ນ ເຂົາດຸດເປັນທາງຣົດໄຟໄປແລ້ວ ດິນສວນໝາກນັດ ສວນກ້ວຍ ສວນອ້ອຍ ບໍ່ໄດ້ເຮັດນາກະບໍ່ມີເຂົ້າກິນ ດຽວນີ້ເຮັດແນວໃດ."

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ