ສວັນນະເຂດກໍາຈັດອິນເທິເນັຕ ເຖື່ອນ

ທາງການ ແຂວງ ສວັນນະເຂດ ລົງ ຕິດຕາມ ກວາດລ້າງ ການລັກ ຕິດຕັ້ງ ເສົາ ຮັບ ສັນຍານ ອິນເທິເນັຕ ຈາກ ປະເທດ ໄທ ຂອງ ປະຊາຊົນ ຢູ່ ຕາມ ແຄມ ແມ່ນໍ້າຂອງ ແລະ ຕາມເມືອງ ຕ່າງໆ. ການ ຕິດຕັ້ງ ທີ່ວ່າ ນີ້ ແມ່ນ ເພື່ອ ເຊື່ອມຕໍ່ ສັນຍານ ໃສ່ ໂທຣະສັບ ມືຖື. ເຈົ້າໜ້າທີ່ ໄດ້ ປົດເສົາ ຮັບ ສັນຍານ ນັ້ນ ອອກໄປ ຫລາຍ ເສົາ ແລ້ວ ເພາະ ເປັນສິ່ງ ຜິດ ກົດໝາຍ. ຕາມ ຄໍາເວົ້າ ຂອງ ເຈົ້າໜ້າທີ່ ໂທຣະຄົມ ແຂວງ ສວັນນະເຂດ ໃນ ວັນທີ 29 ເມສາ 2015:

"ຕະກີ້ ກະມີ ມີລະກະ ພວກ ຫ້ອງການ ຄົມນາຄົມ ເຂົາໄປ ເອົາລົງ ໝົດເດ້ ໃນເມືອງ ກະມີຢູ່ ແຖວເຂດ ນອກ ກະມີ ເຂົາໃຊ້ ສັນຍານ ໄທ ມີແຕ່ຊື້ ເບີໄທ ມາລະກະ ຊື້ແຜງ ໄທ ມາໃຊ້".

ນັ້ນເປັນ ບັນຫາ ທີ່ ເຄີຍ ເກີດຂຶ້ນ ຢູ່ ຫລາຍເມືອງ ເປັນຕົ້ນ ເມືອງ ໄກສອນ ພົມວິຫານ ອຸທຸມພອນ ສອງຄອນ ໄຊບູລີ ແລະ ເມືອງ ຈໍາພອນ ຊຶ່ງ ຜູ້ ກະທໍາຜິດ ນັ້ນ ເຈົ້າໜ້າທີ່ ໄດ້ ນໍາມາ ສັ່ງສອນ ອົບຮົມ, ລົງ ບັນທຶກ ໄວ້, ບໍ່ໃຫ້ ເຮັດ ອີກ ແລະ ກໍແນະນໍາ ໃຫ້ ໃຊ້ ຊິມ ໂທຣະສັບ ຂອງ ລາວ ແທນ.

ເຈົ້າໜ້າທີ່ ເວົ້າວ່າ ບັນຫາ ດັ່ງກ່າວ ໄດ້ ຫຼຸດລົງ ແດ່ແລ້ວ ແຕ່ ກໍຍັງມີ ປະຊາຊົນ ຈໍານວນ ນຶ່ງ ທີ່ ຊື້ເສົາ ຮັບ ສັນຍານ ນັ້ນມາ ລັກ ຕິດຕັ້ງ ຢູ່. ແລະວ່າ ການ ກວດກາ ຂອງ ເຈົ້າໜ້າທີ່ ຍັງມີ ຂໍ້ ຫຍູ້ງຍາກ ຍ້ອນ ຂາດ ເຄື່ອງມື ກວດກາ ຄວາມຖີ່ ຂອງ ສັນຍານ. ສິ່ງທີ່ ພໍເຮັດໄດ້ ກໍມີແຕ່ ຊອກຫາ ເສົາ ສັນຍານ ເທົ່ານັ້ນ.

ເຈົ້າຂອງ ຮ້ານ ຂາຍ ໂທຣະສັບ ມືຖື ທີ່ ຂໍ ສງວນ ຊື່ ເວົ້າວ່າ ສາເຫດ ທີ່ ປະຊາຊົນຈໍາ ລັກ ຕິດຕັ້ງ ເສົາ ຮັບ ສັນຍານ ອິນເທີເນັຕ ນັ້ນ ກໍຍ້ອນ ຄິດວ່າຄ່າ ບໍຣິການ ອິນເທີເນັຕ ໂທຣະສັບ ມືຖື ໃນລາວ ນັ້ນແພງ ຊຶ່ງ ຄວາມຈິງ ແລ້ວ ກໍບໍ່ ແຕກຕ່າງ ກັບຄ່າ ບໍຣິການ ໃນ ປະເທດ ໄທ, ຈຶ່ງຢາກ ໃຫ້ ພວກ ເຂົາເຈົ້າ ຫັນມາ ເຮັດແບບ ຖືກ ກົດໝາຍ ຈະດີ ກວ່າ.