ວິທຍາໄລລາຊາ ຈັບມືກັບສະຖາບັນ ບໍຣິຫານທຸຣະກິຈຊານຕົງ ຂອງຈີນ

ວິທຍາໄລລາຊາ ແຂວງອຸດົມໄຊ ແລະສະຖາບັນ ບໍຣິຫານທຸຣະກິຈ ຊານຕົງ ແຂວງຊານຕົງ ຂອງຈີນ ໄດ້ລົງນາມ ໃນບົດບັນທຶກຄວາມເຂົ້າໃຈ (MOU) ຢູ່ວິທຍາໄລລາຊາ ບ້ານນາເລົາ ເມືອງໄຊ ແຂວງອຸດົມໄຊ ໃນວັນທີ 14 ສິງ ຫາ ທີ່ຜ່ານມາ ກ່ຽວກັບການພົວພັນຮ່ວມມື ແລະແລກປ່ຽນບົດຮຽນ ດ້ານການສຶກສາ ແລະ ພັທນາຊັພຍາກອນມະນຸສ, ຮ່ວມກັນສ້າງບຸກຄະລາກອນ ໃຫ້ມີຄຸນນະພາບ ໂດຍສະເພາະການໃຫ້ທຶນການສຶກສາ ໄປຮຽນວິຊາສະເພາະຢູ່ຈີນ.

ກ່ຽວກັບເຣື່ອງນີ້, ວິທຍຸເອເຊັຽເສຣີ ໄດ້ຕິດຕໍ່ຖາມເຈົ້າໜ້າທີ່ ກ່ຽວຂ້ອງນາງນຶ່ງ ເຊິ່ງບໍ່ປະສົງອອກຊື່ ແລະຕຳແໜ່ງ, ໄດ້ຮັບຕໍາຕອບວ່າ ວິທຍາໄລລາຊາ ຮ່ວມມືກັບສະຖາບັນການສຶກສາ ວິຊາຊີບ ຢູ່ຈີນ 2 ແຫ່ງ ແລະໄດ້ທຶນການສຶກສາ ໄປຮຽນຢູ່ຈີນນຳດ້ວຍ.

ດັ່ງທີ່ນາງກ່າວໃນມື້ວັນທີ 21 ກັນຍານີ້ວ່າ:

“ຢູ່ຊານຕົງ ກະຢົ່ງໂຈວ ບ່ອນເຮົາຮ່ວມມືກັບສອງສະຖາບັນ. ຄົນທີ່ມາລໍຖ້າທຶນນີ້ ມັນຕ້ອງມາຮຽນນຳເຮົາ ເງື່ອນໄຂແນວນັ້ນ ຮຽນໃຫ້ມັນໄດ້ຕາມມາຕຖານຫັ້ນ. ແຕ່ວ່າປີນີ້ນີ່ຖືວ່າໂຊກດີ ທີ່ວ່າບໍ່ໄດ້ຈັກໂຕ ກໍໄປໄດ້ ປີນີ້ນ່າ ພາສາຈີນນ່າ. ເພາະວ່າໄປກຽມຢູ່ພຸ້ນຫັ້ນ ປະມານ 1 ປີລະກະເຂົ້າສາຍເລີຍ. ໄປຮຽນເຂົ້າສາຍວິຊາສະເພາະໂອະ.”

ນາງກ່າວຕຶ່ມວ່າ ທາງສະຖາບັນ ບໍຣິຫານທຸຣະກິຈ ຊານຕົງ ຈະມາຊ່ອຍ ວິທຍາໄລລາຊາ ໃນການສ້າງ ສູນກຽມພາສາຈີນ ໃຫ້ນັກສຶກສາລາວ ທີ່ຈະໄປຮຽນຕໍ່ຢູ່ຈີນ ແລະພັທນາ ຫຼັກສູດຝຶກອົບຮົບ ວິຊາຊີບ ນຳອີກ.

ວິທຍາໄລລາຊາ ມີຊື່ເດີມວ່າ ວິທຍາໄລລາວນານາຊາຕ ສາຂາແຂວງອຸດົມໄຊ ເປັນສະຖາບັນການສຶກສາເອກຊົນ ສາຍວິຊາຊີບ ເປີດສອນລະດັບຊັ້ນສູງ 3 ປີ ໃນ 6 ສາຂາວິຊາ ຄື ການເງິນ ແລະການບັນຊີ, ບໍຣິຫານການຈັດການ, ເຕັກໂນໂລຈີຂໍ້ມູນຂ່າວສານ, ພາສາຈີນ, ເສຖກິຈ-ການຄ້າສາກົລ ແລະພາສາອັງ ກິດ ທຸຣະກິຈ.

ວິທຍາໄລນີ້ ມີການຮ່ວມມື ກັບມະຫາວິທຍາໄລ ຣາຊະພັດ ອຸດຕະຣະດິດ ຂອງໄທຍ ເພື່ອຮັບຜູ້ຮຽນຈົບຈາກວິທຍາໄລນີ້ ໄປຮຽນຕໍ່ໃນລະດັບປະຣິນຍາຕຣີ ແລະປະຣິນຍາໂທ ນຳດ້ວຍ.

ປັດຈຸບັນ, ນັກຮຽນ ນັກສຶກສາລາວ ສົນໃຈຮຽນພາສາຈີນ ເພື່ອຂໍທຶນຮຽນຕໍ່ຢູ່ຈີນຫຼາຍຂຶ້ນ. ຈີນມີບົດບາດ ແລະອິດທິພົລຫຼາຍຂຶ້ນຢູ່ລາວ ຍ້ອນການລົງທຶນຕ່າງໆຢ່າງຫລວງຫລາຍ, ເຮັດໃຫ້ຊາວລາວ ຢາກເຮັດວຽກ ຫຼືຢາກຄ້າຂາຍນຳຊາວຈີນຫລາຍຂຶ້ນ. ແຕ່ນັກທຸຣະກິຈຈີນ ຕ້ອງການຈ້າງຄົນງານ ຫຼືເຮັດທຸຣະກິຈກັບຄົນລາວ ທີ່ຮູ້ພາສາຈີນຫລາຍກວ່າ.

ດັ່ງທີ່ນັກສຶກສານາງນຶ່ງ ຢູ່ແຂວງອຸດົມໄຊ ເວົ້າວ່າ:

“ຄົນພາກເໜືອສ່ວນຫຼາຍ ເຂົາເຈົ້າຈະແບບ ກະຕືລືລົ້ນ ທີ່ຢາກຈະໄດ້ຮຽນພາສາຈີນເລີຍຫັ້ນນ່າ. ເຂົາເຈົ້າກະຈະວ່າ ຕອບສນອງໃນການເຮັດວຽກນີ້ແຫຼະ ຢ່າງນ້ອຍໄດ້ພາສາຈີນ ຄັນຖ້າມາເຮັດທຸຣະກິຈໂຕເອງ ສາມາດສື່ສານພາສາຈີນແມ່ນບໍ່ ເພາະວ່າຢູ່ພາກເໜືອນີ້ຈະມີສ່ວນຫຼາຍ ຈະແມ່ນນັກລົງທຶນ ສ່ວນຫຼາຍກະຈະເປັນຄົນຈີນຫັ້ນນ່າ.”

ເຈົ້າໜ້າທີ່ ດ້ານການສຶກສາ ຜູ້ນຶ່ງ ຢູ່ແຂວງຫຼວງພຣະບາງ ເວົ້າວ່າ ທາງພາກສ່ວນຂອງທ່ານ ໄດ້ປະກາດຮັບສມັກ ເອົາທຶນໄປຮຽນຕໍ່ຊັ້ນສູງ ສາຍວິຊາຊີບ ຢູ່ເມືອງຊຽງຮຸ່ງ ແຂວງຢູນານ ປະເທດຈີນ.

“ໄປຮຽນຢູ່ຊຽງຮຸ່ງ ທຶນໂຕນີ້ແມ່ນ ຟຣີຄ່າຮຽນ ຄ່າຫໍພັກ ໄດ້ອັດຕຣາເງິນເດືອນຫັ້ນ 200 ຢວນຕໍ່ເດືອນ.”

ເຣື່ອງທຶນໄປຮຽນຕໍ່ຢູ່ຈີນ, ນັກຮຽນທີ່ຢາກໄດ້ທຶນ ຈຳນວນນຶ່ງ ໄດ້ແລ່ນເອກະສານ ສມັກເອົາທຶນ ຜ່ານນາຍໜ້າ.

ດັ່ງຜູ້ປົກຄອງນັກຮຽນນາງນຶ່ງ ຢູ່ນະຄອນຫຼວງວຽງຈັນ ເວົ້າວ່າ ນາງໄດ້ລອງຈ້າງ ໂຮງຮຽນສອນພາສາຈີນ ແຫ່ງນຶ່ງ ເຮັດໃຫ້ນ້ອງສາວຫຼ້າຂອງນາງ ໄປຮຽນຕໍ່ຢູ່ຈີນ ຊຶ່ງບາງເຈົ້າ ກໍເອົາຫລາຍພັນໂດລ້າຣ໌.

“ໂດຍ, ເພາະວ່າມີບາງເຈົ້າກະ 4,000-5,000 (ໂດລ້າຣ໌ສະຫະຣັຖ). ທາງເຮົາຫັ້ນກະ ລໍທຶນມາດົນລະ ມັນກະແບບວ່າ ພາດຫຼາຍເທື່ອແລ້ວ ກະເລີຍມາລອງຕຣົງນີ້ເບິ່ງ. ໂຮງຮຽນເຂົາເຈົ້າກໍຕັ້ງຢູ່ ຢູ່ບ້ານເຮົານີ້ແຫຼະ. ເຂົາເຈົ້າເປັນໂຮງຮຽນສອນພາສາຈີນ.”

ກ່ຽວກັບຄວາມຮ່ວມມື ລາວ-ຈີນ ໃນການພັທນາ ການສຶກສາ ດ້ານເຕັກນິກ-ວິຊາຊີບ ຢູ່ລາວ, ທ່ານ ບຸນຍະລິດ ຂັນທະຈັກ ຜູ້ອຳນວຍການ ວິທຍາໄລ ເຕັກນິກ-ວິຊາຊີບ ການຣົຖໄຟ ໄດ້ກ່າວຕໍ່ສື່ມວນຊົນຂອງຈີນ ກ່ຽວກັບໂຄງການກໍ່ສ້າງວິທຍາໄລດັ່ງກ່າວ ເມື່ອບໍ່ດົນມານີ້ວ່າ:

“ເປັນໂຄງການທີ່ສຳຄັນ ແລະໄດ້ຮັບການຊ່ວຍເຫຼືອຈາກຣັຖບານຂອງ ສປ ຈີນ. ໃຫ້ທຶນການຊ່ວຍເຫຼືອແບບຄົບຊຸດ. ເພິ່ນກະປະກອບທາງດ້ານພື້ນຖານໂຄງລ່າງແລ້ວ ກະຍັງໄດ້ມີປະກອບອຸປະກອນເຕັກນິກ ໃນວິຊາສະເພາະທີ່ກ່ຽວຂ້ອງ ຄຣູອາຈານຂອງພວກເຮົາ ລ້ວນແລ້ວແຕ່ແມ່ນໄດ້ຮັບການຮຽນ ວິຊາສະເພາະດ້ານຣົຖໄຟມາຈາກ ສປ ຈີນ.”

ທ່ານກ່າວຕຶ່ມວ່າ ທາງວິທຍາໄລເຕັກນິກ ການຣົຖໄຟ ຄຸນໝິງ ແຂວງຢູນານ ຈະສົ່ງຊ່ຽວຊານ ມາປະຈຳຢູ່ວິທຍາໄລ ເຕັກນິກ-ວິຊາຊີບ ການຣົຖໄຟ ເປັນເວລາ 5 ປີ ເພື່ອແນະນຳ ໃຫ້ຄຳປຶກສາ ໃນດ້ານການສິດສອນ; ທາງວິທຍາໄລ ມີແຜນຮ່ວມມືກັບບໍຣິສັດ ທາງຣົຖໄຟລາວ-ຈີນ ເພື່ອສ້າງບຸກຄະລາກອນ ວິຊາສະເພາະ ໃນດ້ານການຣົຖໄຟນີ້.

ນອກຈາກນັ້ນ ນັກທຸຣະກິຈຈີນ ກໍໄດ້ສ້າງໂຮງຮຽນ ທີ່ສອນ ໂດຍໃຊ້ພາສາຈີນເປັນຫຼັກ ເປັນຕົ້ນແມ່ນ ໂຮງຮຽນ ອະນຸບານ ແລະໂຮງຮຽນ ປະຖົມ ດອກງິ້ວຄຳ ຢູ່ເຂດເສຖກິຈພິເສດ ສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ເຊິ່ງໄດ້ມີພິທີ ເປີດສົກຮຽນ ໃນວັນທີ 20 ກັນຍານີ້ ໂດຍການເປັນປະທານ ຂອງທ່ານ ຈ້າວ ເຫວີຍ ປະທານສະພາບໍຣິຫານເຂດເສຖກິຈ ພິເສດສາມຫຼ່ຽມຄຳ. ໂຮງຮຽນນີ້ ບໍ່ເກັບຄ່າຮຽນ, ມີນັກຮຽນຈີນ, ພະມ້າແລະລາວ ຮຽນຮ່ວມກັນ.